البعثات للخارج .

[Ash]

في الفترة الأخيرة صرت في حالة حيرة غير طبيعية , اني أقدم بعثه و أكمل الدراسة بأمريكا , أو أكمل الدراسة هنا , و محتار جدا بالقرارين .

ياريت الي عاشوا التجربة أو الي يعرفون عنها أي شيئ يتقدمون بنصائح أو يذكرون الايجابيات و السلبيات للسفر للخارج , بانتظاركم .

 

[Humam]

فيصل عليك بالاستخارة أولا ثم الاستشارة.. صدقني ماراح تندم أبدا على صلاة الاستخارة لأن ربنا راح يوجهك مباشرة للطريق الصحيح والأنسب, وبالتوفيق ان شاء الله لباش مهندس المستقبل 😉

 

[Black]

مثل ما قال همام .. عليك بالاستخارة ..
وأيضاً .. شوف مميزات دراستك هناك ومميزات دراستك هنا " بالكويت " .. والسلبيات أيضاً .. وفكر على مهل .. ولا تنسى ان هذا مستقبلك انت ..
وبالتوفيق لك ان شاء الله ^^ ..

 

[Uchiha Basem]

بالنسبة للدراسة في الكويت فالأمر بحسب الجامعة التي ستدرس فيها ، يعني هل هي جامعة كويتية ؟ أمريكية؟

الشهادة العربية بشكل عام تفتج لك المجال في الدول العربية وبعض الشهادات (بحسب الجامعات) لا تتيج لك العمل إلا في بلد واحد ، لكنك ستكون في كلا الحالتين قريب من أصدقائك وأهلك

الشهادة الأمريكية تتيح لك العمل في كل مكان بكل تأكيد ولكن الغربة صعبة جدا يعني لن ترى أصحابك ولن تستطيع أن تأكل الأكلات التي تحبها ...الخ ، أيضا المناهج تختلف وهنا قد تلاقي صعوبة بعض الشيء

وأخيرا :بالنسبة لي مستحيل أهلي يوافقوا روح أمريكا لأنهم بخافوا علي من مشاكل الإرهاب والإعتقالات العشوائية و سجن بجوانتنامو ، لكن يبدو أن الإخوة الذين يدرسون بأمريكا بعيدين عن هذه الأمور حتى الآن والحمد لله

في رأيي أنك لو تستطيع الدراسة في جامعة بريطانية أو أمريكية موجودة على أرض الكويت فذلك قد يكون أفضل لك

 

[Nintendo]

الاستخاره فيصل اول شئ ..

استشارة الاهل امر ضروري جدا .. وبعدين فيصل لازم اول شئ تحدد وش هدفك من الدراسه .. اذا كان ودك تخصص بشئ او مجال سمعته طيبه عندكم بالجامعه ليش التعب والغربه ..

فيه نقطه ثانيه يمكن مالي دخل فيها ولكن يرجع الامر ايضا فيصل لشخصيتك .. يعني اذا كنت من النوع اللي يقدر يمشي نفسه بدون اهل واصدقاء وتشوف في نفسك القدره على حفظ نفسك من كل المشاكل توكل على الله وسافر وراح تتعلم الاعتماد على نفسك من خلال السفر والدراسه بالخارج ..

عموما نتمنى لك التوفيق في اي اختيار تختاره وان شاء الله نحتفل معك بالشهاده 🙂

 

[Az(e)z-N]

سبحان الله ...كنت افكر بوضع نفس الموضوع..خصوصا انه فيه بعض الاعضاء ممن يدرسون بالخارج

حتى انا صراحة افكر بالدراسة في الخارج,حاليا في بالي اني ادخل كلية هندسة في اي جامعه في امريكا او بريطانيا..الحمد لله الامل موجود في بالي اني احصل على شهادة ذات تخصص نادر,نسبتي بالثانوية تساعدني ولله الحمد...

لكن يا ريت لو الأخوه ينصحونا من الناحية العملية...شلون نظام الدراسه هنالك؟..هل فيه مضايقات...نظام الدراسه بشكل عام...يواجه صعوبات؟...الوحده قاتله؟..او فيه اشياء تصرفك عنها..كــ السكن مع عرب ؟

 

[Ash]

بما انه التخصص هو نفسه الي بدرسه بالخارج , و متوفر بجامعة الكويت , و بما انه ما زالت رغبة الدراسه بالخارج فيني , قررت أني أدرس بجامعة الكويت , و الماجستير و الدكتوراه برى ان شاء الله , أتمنى أكون اخترت الخيار الصحيح , ألف شكر جميعا على النصائح .

 

[Tomb raider]

اشوفه قرارك صحيح اخوي فيصل ..
انا حاليا ادرس في دبي ..بكلريوس ...وافكر في الماجستير يكون في الخارج او بعد اكمل هنا في دبي ..لأني اكره الغربه بصراحه (مجرب الغربه ..وحتى ويا اهلي احس اني غريب )

 

[Death match]

اخوي ash ما ازيد على كلام الاخوان لكن جامعة الكويت تعطي بعثات بعد التخرج للطلبة المتفوقين لتمثيل الكويت 🙂 وان شاء الله تحقق احلامك

 

[Golden_Sun]

اهم شي تكون مرتاح بقرارك.. والله يوفقك

انا بو بيدي ومعدلي يسمح كان الصراحة رحت بعثه حتى لو التخصص اللي ابيه موجود بالكويت (وهو فعلاً موجود) ..
وتجربة انك تسافر تدرس في الخارج انا بنظري اشوف مميزاتها كثيرة..وتغطي على سلبياتها اللي تحوم حول ابتعادي عن اهلي واصدقائي << الاصدقاء اهم P: .. هم اللي فعلاً بشتاق لهم!

عموماً انا افكر اني اكمل دراستي بالخارج (ماستر!) بعد ما اتخرج من جامعه الكويت - CBA =)

 

[dragonwarrior]

والله الدراسة بالخارج جدا مفيدة ...أنصح أنك تطلع و تشوف خصوصا أنك توك متخرج.
خذها منى الدراسة بالخارج (أمريكا) والله بتعطيك شغلات كثيرة , الصراحة خذها من مجرب الدراسة بره فيها عوار قلب و ضيق صدر و وحشت الأهل و الربع بس مع هذا صدقني بتكسب أشياء كثيرة! أهمها الأعتماد على النفس! أبوك عمك خالك جدتك مافي أنسى الواسطات أنت هناك بروحك ولازم تمشى نفسك بنفسك بتشوف أشكال و أجناس من البشر بتعرف على ناس من جميع بقاع الأرض لوووول و و أهم شىء راح تحس بالنعم اللي أنت عايش فيها الحين بالكويت ! من جد الأنسان ما يعرف قيمة الشىء حتى يفقدة! , و مثل ما قالوا للسفر فوائد عدة. فكر و لا تتسرع و أهم شىء أنت نفسيا ودك تسافر و تشوف ؟
أعرف تاس كثار راحوا أمريكا و ما أرتاحوا ورجعوا الكويت و كملوا هناك. يعني لا تتسرع و الحمدلله فتحوا جامعات كثيرة الحين . 😎 أرجوا أني ما أكون عفستك

 

[Bounty]

قرارك زين و الحمدلله انك انت الي قررته ..


و حط في بالك ترى الغربه ... صعبه حيل .. بس لما تتعود عليها و تتعرف على شباب فيهم خير صدقني يقل عندك احساس الغربه حيل حيل حيل ...