من المعيب إنك تقرأ مراجعات تطغى عليها سلبية في السرد و تعطيك انطباع بأنك أمام منتج نصف مخبوز،، ممل ومكرر أو حتى ما يتعدى كونه استعراض تقني،، لكن تتفاجأ في النهاية بأن التقييم النهائي جيد، أو 8 من 10، أو تواجه تفسيرات مثل (( الألعاب مو مطلوب منها تكون ممتعة)).. هههه عشنا و شفنا..
من المعيب كذلك تتهجم على مهنية المراجع ونظرته للمنتج والعمل الفني وانت ماجربته حتى, كلنا نظرتنا للالعاب تختلف وكل شخص يشوفها بشكل معين ويعطي جوانب منها اهمية اكبر في عملية تقييمه
اذا انت همك كله في الالعاب المتعة اجل الله يهنيك اقدر اجادل كذلك انه منتجات نينتندو تقدم اكبر متعة مقارنة بالبقية, ويبدو انه كذلك لازم هي برضه تكون الاعلى تقييما لانه بالاخير الهدف الاوحد من الالعاب هو المتعة
وش نظرتك للالعاب ياليت تحدد حتى نقدر نناقشك فيها, هل هي المفروض تكون لعبة وتقدم متعة مثل ماتقول هنا ام انها منتج فني متكامل زي ماتدعي كذلك في باقي ردك؟
3- المجموعات الي تنادي بالحرية الإبداعية المطلقة و الي تستمر دائما بمهاجمة كبار الناشرين على تدخلهم في قرارت الإنتاج و تعديل التوجه أو إلغاء المشاريع،، فكرة ان أن الشركات الكبرى عبارة عن مؤسسات رأسمالية وحشية همها مضاعفة الأرباح فقط والمنتجين عبارة عن أشخاص لا يفقهوا شيء في الصناعة فكرة ساذجة، بل و غبية، و مبنية على أوهام و افتقار للمعرفة + الخبرة.. ترى طبيعي و منطقي وممكن يحصل ان المنتجين والتنفيذيين يتدخلون في القرارات التصميمة والابداعية تفاديا لكوارث فنية أو تجارية أو ببساطة لعدم ثقتهم بالمشروع أو مناسبته لتوجه الشركة... أتمنى هالشي أصبح واضح و قابل للتصديق.. مافي ناشر ما يخاف على سمعة ألعابه ومستواها أو يقدم الأرباح التجارية على باقي العناصر بدون تفكير... هالفكر موجود في داخلك لأنك عايش في قوقعتك الخاصة وما تدري العالم كيف يسير،،
كلامك صحيح بلا شك عن اهمية المنتج وكيف انه يقدر يحول العمل الجيد لعمل ممتاز بتدخلاته وربما كوجيما كان يحتاج شخص من هذي النوعية
لكن برضه انه جالس تدخل التنفيذيين في المعادلة وتساويهم بنفس دور المحرر وهذا غلط
وماني فاهم على اي اساس تقول مافيه ناشر مايخاف على سمعة العابه واحنا نعيش بعالم موجود فيه امثلة كثير بتدخلات من الناشر كسرت اساس او توازن اللعبة بسبب طلبات مثل اللوت بوكسز
فيه شركات حاليا سمعتها بالحضيض لكن هل هذا غير من سلوك التنفيذيين؟ الجواب لا, طالما افكارهم جالسة تطلع فلوس طز في اللعبة ومدى عدالتها
نعم الشركات لها توجه معين لكن كذلك فيه شركات تعطي حرية ابداعية اكثر من غيرها, استديوهات سوني العالمية مثلا والتوجه السينمائي لكن بالاخير الاستوديوهات لها حرية ومن جديد هالحرية لها حد معين
مافيه احد انكر هذا الامر وبصراحة بديهي جداً
لكن يمكن بنهاية المطاف انت اللي عايش في قوقعة مقابلة وتعتقد انك تعرف بالضبط كيف تسير الامور في العالم بينما البقية جهلة ومايفهمون
5- عجيب و غريب في نفس الوقت أنك تدعي أن مناصر / fan/ أو معجب بأعمال أو إنتاجات شخصية إبداعية معينة في حقل أو مجال ما، ثم تقرر إنك تتجاوز إصدار من إصدارته المرتقبة فقط بناء على الآراء والانطباعات الي استقيتها غيرك.. امم وش هالبربسة؟؟ اذا انت معجب حقيقي فالمفروض تشكل تصورك الخاص. وبالعكس المفروض تكون متحمس لسبر أغوار هالشخصية الي انت معجب فيها و بإنتاجها حتى تستزيد أكثر من فكرها و أسلوبها و تستشرف ما يمكن أن يأتي منها مستقبلا،، حتى و إن شاب رحلتك شوية منغصات أو ما ارتقت التجربة العامة لآمالك وتوقعاتك المسبقة،، يا أخي مثل ما يقولون العوض ولا القطيعة،، على الأقل يجيك شي من ريحته...
صعب أتخيل وجود ُمعجب بمؤلف موسيقي يقرر أنه ما يسمع ألبومه الأخير فقط لأنه سمع من غيره أن الألبوم "مش لهناك"،، الحقيقة احترت وش اسمي هالموقف هل هو تبعية أو انهزامية أو إعجاب مزيف أو كلها مع بعض
من جديد تشبيه غير موفق هنا, بالبداية انت تنتقد الفانبويزم في الصناعة بعد كذا تجي تطلب من الفان انه يضحي ب60 دولار - واللي اغلى منها بكثير - وقته عشان عمل فنانه المفضل
الالبوم الموسيقي بالنهاية كم راح يكلف؟ حاليا مجرد اشتراك شهري ب10 دولار في خدمة ستريمنق واذا كثرت ساعة سماع وصلى الله وبارك, هل هذي نفس 60 دولار و40 ساعة من حياتك تروح؟ قطعاً لا
واقدر اجادل كذلك ان الموسيقى تعتمد على الذوق بشكل اكبر من الالعاب, الالعاب لها توصيفات اوضح فمثلا لما اشوف اجماع على التكرار وانا شخص مايتحمل التكرار فغالباً ماراح يعجبني باللعبة
الحقيقة احترت وش اسمي هالموقف, هل هو فوقية او نظرة قاصرة او تنظير او كلها مع بعض
للامانة انا اشوف ردك مثري للعملية النقاشية في الموضوع واتفق مع جزئيات كثير فيه, لكن نغصه وجود التهجمات الغير مبررة فيها واللي بصراحة تعطي انطباع انا جالس انوركم واوضح لكم بديهيات الامور اللي مافيه غيري احاط بها علماً