Kumo Desu ga, Nani ka
العمل بيدور عن طالبة فى مدرسة هاتموت هى و أفراد الفصل اللى معاها نتيجة أثر جانبى للصراع بين البطل و ال Demon Lord فى عالم تانى و هاتتولد من جديد فى العالم التانى بس كعنكبوت
وصلت للشباتر 100 من ال Novel بالإضافة لعدد من الشباتر الجانبية (على حد علمى فى أكثر من 300 شابتر مترجم) و ده انطباع مبدئى عن العمل
بصفة عامة العمل حتى الآن بيقدم قصتين ، القصة الأساسية بتركز على حياة البطلة بعد ولادتها فى العالم الجديد كعنكبوت فى كهف و محاولاتها للتأقلم مع وضعها الجديد و تطويرها المستمر لقدراتها فى عالم ليه نفس قواعد ألعاب ال MMO و القصة الجانبية (شابتر كل 10 شباتر أو أقل) عن حياة شخص تانى من أفراد نفس الفصل اللى اتولدوا فى العالم التانى بس المرة دى كبشرى
الحاجة اللى لاحظتها فى بداية العمل إن بإستثناء القصة الجانبية العمل مافيهوش غير شخصية واحدة بس و هى البطلة و إن العمل بالكامل عبارة عن متابعة لمغامراتها فى الكهف و محاولاتها المستمرة لرفع ال Level الخاص بيها ، المسألة كانت بالنسبة لى أقرب لأنك بتلعب لعبة MMO بشخصية معينة ( البطلة فى الحالة دى) و بتراقب تطورها و تقدمها فى اللعبة من إن إنها تبقى قصة عادية بالمعنى المعروف و الحقيقة إن بالرغم من الأحداث كانت جيدة فى البداية إلا إن كان عندى تساؤل إذا كان العمل كله هايكمل بالشكل ده
الوضع اتغير بشكل كبير مع تقدم الأحداث فى العمل ، البداية كانت مع القصة الجانبية و اللى كان عندى انطباع إن هدفها يبقى مجرد شرح النقط اللى هايبقى صعب معرفتها بخصوص العالم من وجهة نظر البطلة بس مع الوقت ابتدى يبقى فيها تطورات غير متوقعة و كم كبير من المفاجآت زى أحد ألغاز العمل الكبيرة (موضوع n% و النقط المتعلقة بيه) و ده بالتوازى مع أحداث رهيبة فى القصة الأساسية خصوصا مع الآرك الثانى فى العمل
أحد النقط الممتعة فى العمل هى إنك بتشوف تطورات جيدة فى القصة الأساسية و بعد كده ييجى شابتر جانبى يكشف مفاجآت أكثر بخصوص التطورات دى و يديها معنى و أهمية أكبر
مع الشباتر الأخيرة اللى قريتها بقى واضح إن ال Scale الخاص بالأحداث هايرتفع بشكل كبير ، فى بناء تدريجى و مستمر لحاجة كبيرة فى المستقبل خصوصا مع الأسئلة الكثيرة اللى ابتدت تظهر سواء بخصوص البطلة و اختيارتها من جهة أو التصرفات و الدوافع للشخصيات فى القصة الجانبية من جهة تانية ، اتجاه العمل مش واضح لغاية النقطة اللى وصلت ليه بس ال Potential كبير بالنسبة للأحداث الجاية
بالنسبة للمميزات و العيوب حتى الآن (لغاية شابتر 100) :
المميزات : بالرغم من إن مافيش غير شخصية واحدة و هى البطلة إلا إن متابعة مغامراتها كانت عملية ممتعة فعلا خصوصا مع الآرك التانى للعمل ، مع تقدم الأحداث القصة سواء الأساسية أو الجانبية بتبتدى تتطور و تبقى مثيرة للإهتمام بشكل كبير خصوصا مع ظهور عدد كبير من الألغاز و التساؤلات سواء بالنسبة للعالم او الشخصيات ده بالإضافة لل Potential الكبير للعمل
العيوب : بالرغم من إن مغامرات البطلة ممتعة إلا إنى ماحبيتش شخصيتها لأكثر من سبب

، الشخصية كانت عملية بشكل مبالغ فيه بالنسبة لى و مشاعرها مش واضحة ده إذا كانت موجودة خصوصا مع عدم إهتمامها سواء فى حياتها الأولى أو التانية بالعلاقات بين البشر حتى عائلتها فى تناقض واضح مع شخصيات القصة الجانبية
المبالغة الكبيرة فى بعض القدرات ، بصفة عامة مابحبش الشخصيات ال Overpowered بس واضح إن ده هايبقى جزء أساسى من العمل

ده بالإضافة للكم المهول من ال Skills و التفاصيل الكثيرة المتعلقة بيها و اللى ممكن تاخد أكثر من نصف شابتر فى سردها فقط ده غير تكرارها المستمر
بعض جزئيات القصة ممكن تكون مملة خصوصا فى البداية و بتعتمد بشكل كبير على حب المتابع لألعاب ال MMO