انتهيت من الرحلة، 70 ساعة، والكثير من الإرهاق الجسدي و النفسي...
و آلريدي اشتقت لسام و بي بي )":
اياً كانت ردة فعل اللاعبين و الرأي العام اللي تكون حول اللعبة،
Death Stranding تجربة غريبة مختلفة وفريش ولا لها مثيل في السوق، هي لعبة متفردة بكل شيء ومن العلامات الفارقة هذا الجيل
هي ببساطة درس حياتي تم إيصاله بطريقة عبقرية إستشعرتها مع أولى ساعات لعبي.
عالمنا التعيس هذا مليان بالمشاكل والهموم اللي تهد الحيل وتخلق بداخلنا كمية من الكره والبغض له ولكل مافيه
وقد نرى انفسنا على حق اننا نحمل هذي الأحاسيس الثقيلة على النفس، ونختار العزلة والإنقطاع عن كل ما حولنا اعتقاداً بأنه هذي أفضل وسيلة لعيش حياتنا بسلام
وهذا اللي كان يظنه صاحبنا سام (أنت)...ولكن لا!
الحياة ما خلقت ولا يمكن تستمر بهذا الشكل، العالم اللي نعيش فيه ما خلق إلا لأجل عمارته وهذا الهدف مستحيل يتحقق و احنا على هذا الحال
الأمر اللي يخليك تضحك تعجباً، ان الآثار المترتبة على اختيار الناس للكره والعزلة وغيرها من الأحاسيس السلبية هي اللي تدفعهم للإتجاه المعاكس بدون شعور منهم !
اللعبة وصلت لي الدرس هذا بشكل اكثر من رائع
عالم اللعبة المصمم كلغز ماهو إلا صورة للحياة اللي اعيشها... الجبال والمنحدرات وكافة انواع العوائق هي الصعوبات اللي يواجهها كل شخص في حياته
الحبال و السلالم هم الأشخاص اللي حقابلهم في حياتي واحتاج اتواجد بينهم و اتواصل معهم للإستمرار فيها
اوقات كثير امر بمراحل عصيبة في حياتي، مليانة جبال تكسر الظهر، ونشّالين، و BTs و امور تخليني احس اني وحيد في هذي الدنيا ومحد حاس بالمعاناة اللي انا فيها
لكن فجأة القى ذاك الشخص اللي يمد لي يده عن طريق سلم معلق في مكان ما، او حبل تركه ممدود، او حتى عن طريق كلمات تشجيع ومواساة يرسلها..
الإحساس وقتها حقيقةً لا يوصف، والأجمل ان هذا الإحساس يخلق بداخلي دافع لتقديم المساعدة بدون تردد ودون انتظار اي مقابل
لو ذاك الشخص و انا وبقية الناس اخترنا العزلة لأي سبب كان، ما كان استمرينا في الحياة، وحصل "الإنقراض" اللي اللعبة تتكلم عنه.
اللعبة مو كاملة مثل ما توحي فيه ردودي هنا
نعم فيها منغصات وقرارات خاطئة هنا وهناك، لعل ابرزها pacing القصة وبعض الشخصيات الضعيفة و مواجهات الزعماء
وإيضاً اختزال جزء كبير من القصة في نصوص تقرأها، و النصوص هذي ماهي إلا وجهات نظر كوجيما في بعض جوانب الحياة وهذا اللي خلاها ممتعة بالنسبة لي
تمنيت لو انها كانت على شكل كاسيتات، حتكون جداً مناسبة.
عموماً انا مبسوط من وجود Death Stranding وجداً ممتن لكوجيما على تقديمه لتجربة مثل هذي.
وهي من الألعاب القليلة اللي ما اقدر اقترحها لأي احد، لأن لايمكن توصل فكرتها إلا عن طريق تجربتها
.
.
.
بس المهم الآن.. الواحد ايش يسوي؟
. انا بالفعل بدأت انسى القصة وشخصياتها وتفاصيلها بسبب الطريق ذا.
