انا الحقيقة نصف رمضان الان اشرب البروتين وعلى كلام المدرب ينفع كثير..
نصيحة. خل البروتين على جنب الحين وركّز فقط على المحافظة على وزنك بقدر الإمكان. شهر رمضان هو لشيئين فقط: إما الكت -التنشيف من الدهون- أو المحافظة على الوزن. أما مسألة زيادة وزنك؟ فهذي إنساها تماماً، إلا إذا كانت عندك قدرة أكل أسطورية تخليك قادر على أنك تغطّي الـ 2000 سعرة في ثلاث وجبات، فهذا موضوع ثاني *_*
بعد ماينتهي رمضان، ونبدأ بأيام عيد الفطر، سو حاجة مهمّة وهي، حوّل وزنك من الكيلو إلى الباوند -الموضوع بسيط، عن طريق جوجل-. الرقم اللي بيطلع لك هو نفسه الحاجة اليوميّة للبروتين، فمثلاً، إذا كان وزنك 160 باوند، فهذا يعني بأنك تحتاج 160 جرام بروتين باليوم. باوند واحد = جرام بروتين واحد.
في بناء العضلات عندك حاجتين مهمّة لا ثالث لهما:
1- السعرات الحرارية، وهي أهم عنصر معرفي للإنسان الرياضي، واللي يجعله فارق عن بقيّة الناس. معرفة الإنسان لجسمه ولسعراته الحرارية تجعله قادر وبكل سهولة أنه "يتلاعب" بجسده زي ما يبغى، يزيد وينقّص، فمثلاً، إذا زدت 300 إلى 500 سعرة عن رقمك الرئيسي -2000 في حالتك-، فهذا يعني بأنك تزيد وزنك وتبني عضلات إضافية، إذا نقصت 300 إلى 500 عن رقمك الرئيسي، فهذا يعني بأنك تخفف وزنك .. أو تنشف الدهن المكتسب من زيادة الوزن.
وبناء العضلات زي كذا ترا: زيادة وزن وبناء عضلات، ثم تنشيف دهن، زيادة وزن وبناء عضلات، ثم تنشيف دهن < على هذي الحالة بتكون حياتك المستقبلية، حتى وصولك إلى أعلى مرحلة من الجينيتكس الخلقية اللي عندك، اللي ماتقدر تتعداها -غالباً بتوصل إلى أعلى مرحلة من شكلك الجسدي بعد السنة الرابعة أو الخامسة من اللعب الدائم. اللعب الدائم "الصحيح". أحط على كلمة صحيح ألفين خط .. لإن البعض يظن بأنه وصل إلى أعلى مرحلة، وهو أصلاً ماهو قاعد ياكل صح، ولا يلعب حديد "صح" برضو-.
2- البروتين، لأي شخص يبغى يبني عضلات، البروتين هي الحاجة الثابتة اللي ما تتغيّر في حياته. هي أهم عنصر يجعله قادر على المحافظة على عضلاته، سواءً بالتنشيف، أو البناء. إذا كنت بتبني .. لازم تاكل بروتين كافي، وإذا كنت بتنشف؟ برضو لازم تاكل بروتين كافي -وفي حالة التنشيف، فالبروتين لازم يكون أكثر من مجرّد وزنك بالباوند، لإن الجسم بيفقد العضلات بسهولة في هذي الحالة، والمحافظة عليها تتطلّب بروتين زائد. إذا كان وزنك 160 باوند مثلاً، فتحتاج إلى 200 جرام بروتين أثناء التنشيف .. للمحافظة-.
معرفة هذولي الشيئين هم المفاتيح الرئيسية لفعل أي شيء ببناء العضلات. بناءً عليها تقدر تزيد من عضلاتك ووزنك، وبناءً عليها تقدر تخفف دهونك متى ما حسّيت أن الدهن زاد كثير.
وصدّقني. الموضوع ممتع جداً! كونك تشوف الناس تحاول تسوي رجيم، وتضرب عن الأكل بشكل .. خاطئ، علشان تخفف وزنها، وكونك تشوف ناس تحاول تبني عضلاتها على مدى سنوات بس ماهي عارفة، أو تشوف ناس "مليانة دهن" حرفيّاً وماهي عارفة تنشّف، فبتحمد ربّك وتحس أنك .. فارق فعلاً. أنت بمعرفتك لجسدك وخصائصه تقدر تتلاعب بميزانية السعرة الحرارية وتحقق أهدافك زي ما تبغى، وبكل سهولة.
بناء العضلات، والنادي بالنسبة لي، ماهم لأجل التزيّن والقوّة ومدري إيش .. بناء العضلات عبارة عن معرفة الإنسان لجسده. معرفة وش يحتاج، ووش ينقصه، تكوّن مثل العلاقة مابينك وبين جسدك، اللي تقدر تضبطّها وتتلاعب فيها زي ما تبغى .. على مزاجك. هذي قوّة معرفيّة يتمنّاها ناس كثييير ترا.
تعديل: وايش كنت تفكر فيه يوم اخترت اسم عضويتك؟
كنت طفشان وأنا أختار الأسم .. فقلت:"ماله داعي أفكّر"، والنقاط كانت هي النتيجة *_*