نقاش مانجا المانجا Shingeki no Kyojin ( الصراع ضد العمالقة )

شابتر 114

الشابتر وضح أخيرا شخصية زيكى و أهدافه الحقيقية و اللى كانت غير متوقعة بالنسبة لى

شخصية زيكى كانت غامضة على مدار الأحداث ، من اللى شفناه كان واضح إنه ماعندوش ولاء لمارلى بس فى نفس الوقت ماحسيناش إنه مهتم بشكل حقيقى بإيلديا و الخطة اللى عملها توحى بإنه كان بيشتغل لحسابه
توقعت إنه ممكن كان بيعمل ده عشان يبقى هو المتحكم فى إيلديا بس الحقيقة إن شخصيته ماكنتش واضحة و ماتوحيش بهدف محدد ، ده مايمنعش إنى اتفاجئت من إن هدفه الحقيقى هو القضاء على إيلديا :frowning:

فى المقابل اللى شفناه من جريشا ماكنش مفاجئ ، من خلال الشابتر واضح إن إيرين مشابه لوالده فى التفكير و الشخصية فى الوقت اللى زيكى كان مشابه لجده
سواء إيرين أو جريشا فالإثنين عندهم نفس الغضب و النظرة الضيقة اللى بتعميهم عن رؤية أى شئ باستثناء هدفهم ، هدف جريشا مش سيئ فى حد ذاته بس الطريقة اللى خدها عشان يحققه كانت خاطئة
فى سبيل تحقيق هدفه جريشا تجاهل مشاعر ابنه تماما و تعامل معاه كأداة فقط و خلى غضبه هو اللى يتحكم فيه و النتيجة كانت واضحة و ده اللى إيرين بيعمله حاليا مع اصدقائه

نقطة لفتت إنتباهى فى الشابتر و هى إن لما زيكى عرف إن حركة المقاومة انكشفت الإختيار بالنسبة له كان إنه يموت مع والديه أو إنه يبلغ عنهم ، زيكى ماحطش أى إحتمال لإبلاغ والديه عن اللى بيحصل و محاولة الهروب من الوضع و كل اللى عمله إنه حاول يقنعهم بالتوقف بدون إبداء السبب ، الفكرة هنا إن زيكى كان مقتنع إن اللى بيعمله والديه خطأ و إبلاغه عنهم ماكنش بدافع الكره فقط قد ماهو نتيجة عدم إقتناعه الحقيقى بإهدافهم و رغبته فى إنه يوقفهم و ده الشئ اللى جريشا ماقدرش ينتبه ليه بالرغم من وضوحه

النقطة المهمة هنا تبقى إذا كان ده هدف زيكى فإيه هو هدف إيرين
صعب جدا اتخيل إن إيرين ممكن يوافق على خطة زيكى ، إيرين من نوعية الشخصيات اللى لو اعتبرت باقى العالم يبقى العدو فساعتها الحل هو القضاء عليه (أو على الأقل ده اللى أظنه فى الوقت الحالى) ، على الأغلب إيرين بيستغل زيكى زى ما هو استغل باقى الشخصيات و ساعتها زيكى فى إنتظاره مفاجأة حقيقية لما يقابل إيرين بس ده لسه ماوضحش إيه هى خطة إيرين بالضبط ؟

بالنسبة لنهاية الشابتر فبالرغم من المعروف عن العمل إلا إنى ماظنش إن دور ليفاى إنتهى هنا و اتوقع إنه لسه عايش
 
شابتر 115

الترجمة اللى نزلت حتى الان مش جيدة فى بعض النقط بس الفكرة الأساسية واضحة

هانجى قدرت تهرب مع ليفاى و من طريقة تقديم المشهد واضح إنه عايش و إنها إدعت إنه ميت عشان تحميه

فلاشباك زيكى استمر و وضح لقاءه بإيرين و أظن إن إيرين خدع زيكى عشان يتعاون معاه ، ايرين ممكن يكون عنده بعض المشاكل مع اللى أبوه عمله بس قتل بعض الناس لتحقيق الهدف الأساسى شئ مر بيه إيرين قبل كده و حتى ليفاى اتكلم عنه فى الشابتر اللى فات و القضاء على إيلديا بالكامل مايتفقش بأى شكل مع شخصيته و أهدافه

المفاجأة تبقى البنت اللى ظهرت و اللى على الأغلب تبقى يمير فريتز نفسها ، مش هاستغرب لو كان وعيها مازال موجود بشكل ما حتى الآن ، فى الآخر و زى ما إيكزافير قال شعب إيلديا متصل ببعضه كأنه جزء من جسم العملاق الأصلى
السؤال يبقى إيه هدفها و ليه ساعدت زيكى ، هل هى مقتنعة بأهدافه أم هل فى شئ تانى غير معروف ؟ عموما تدخلها بيدى الأمل فى إننا ممكن نعرف حقيقة حصولها على قدرة التايتنز و إيه هى طبيعة القدرة بالضبط و اللى ماكنش عندى أمل كبير فى معرفتها

النهاية مع بيك كانت مفاجأة بس ماظنش إنها هاتوصل لحاجة ، من اللى عرفناه عنها بيك ذكية جدا بس ماظنش إن عندها أى فرصة أمام إيرين بس ممكن الموضوع يكون جزء من خطة أكبر