بالنسبة للنقط الإيجابية ، الكاتب قدر فعلا يتجنب الإحتمال الأسوء و يحل عدد من المشاكل اللى ظهرت فى الآرك
أولا بالنسبة لأكبر مشكلة و هى قدرة إيرى فتعامل الكاتب معاها كان جيد جدا
قدرة إيرى كان ممكن تعمل خلل مهول فى التوازن فى العمل و تقتل أى Tension بس الشابتر هنا حط حدود كثيرة بالنسبة ليها
إيرى بوضعها الحالى ماتقدرش تستخدم قدرتها لأكثر من سبب منها عدم قدرتها على التحكم فيها أو معرفة مداها و حالتها الصحية نتيجة كل اللى مرت بيه ده بالإضافة إنها مازالت طفلة صغيرة و اللى حصل لميدوريا كان وضع استثنائى و ده مش كل حاجة ، حتى لو إيرى حاولت تتدرب على التحكم فى القدرة فكون إنها ما تقدرش تستخدم قدرتها إلا على البشر معناه إن دى هاتبقى عملية فى صعبة جدا و خطرة و حبيت تحليل Eraserhead للوضع و إنهم مايقدروش يعتمدوا عليها
إيرى ممكن ترجع تانى و يبقى ليها دور فى العمل بس ده مش هايبقى قبل فترة طويلة جدا
ثانيا بالنسبة للخسائر فى جهة الأبطال ، النقطة دى كان فى قلق كبير من ناحيتها سواء بسبب قدرة إيرى أو وجود المصل المضاد بس تم حلها (جزئيا)
فقدان ميريو لقدرته مستمر و مش هايتم حله بسهولة و إن كان واضح من اتجاه الأحداث إنها هاترجع فى وقت ما بس الأهم إن هو اللى حصل لنايت آى و كون إنه توفى نتيجة إصاباته فده يرجع التوازن فى العمل و يوضح إن المواجهات مش هاتبقى سهلة و بسيطة و فى احتمال لخسائر حقيقية و مستمرة
المشكلة هنا إن النقط السلبية كانت أكبر من الإيجابية بالنسبة لى
أول مشكلة كانت فى تفسير نايت آى لعدم موت ميدوريا ، الكاتب كان عنده أكثر من طريقة لتفسير اللى حصل بشكل مقنع
على سبيل المثال إن ده بسبب قدرة إيرى بما إنها تقدر تعمل Rewind للإصابات و الأضرار بمعنى إن المستقبل اللى شافه نايت آى حقيقى بس فى كل مرة إيرى كانت بتعمل له Rewind و بتمنع حدوثه بس للأسف الكاتب اختار أسوء طريقة لتفسير اللى حصل
، موضوع الطاقة الناتجة عن التمنى يبقى خطأ فادح يرجع للمتابع ذكريات قوة الصداقة فى باقى أعمال الشونين ، الكاتب كان على الأقل ممكن يكتفى بالجزء اللى قاله نايت آى بخصوص شكه فى تغيير المستقبل
لو افترضنا إن سبب عدم قدرة نايت آى على تغيير المستقبل هو إن محاولاته ماكانتش جدية كفاية بسبب شكه و عدم اقتناعه بالفكرة فده كان ممكن قبوله نسبيا بس النقطة اللى أضافها ماكانش ليها أى داعى و اتمنى إنها تبقى خطأ فى الترجمة بس للأسف ماظنش إن ده الوضع
المشكلة التانية كان فى البناء الخاطئ لأحداث الآرك و اللى خلى شخصية زى أوفرهول و حتى نايت آى و غيرهم تبقى Wasted potential
بداية ظهور أوفرهول فى العمل كانت رهيبة و كنت متحمس ليه جدا بس اتفاجئت بصراحة لما المواجهة ضده بدأت بعد تقديمه بشكل شبه مباشر ، الكاتب كان المفترض إنه يعمل تمهيد مناسب للمواجهة عشان لما تحصل يكون ليها تأثير أكبر على المتابع بس ده ماحصلش هنا للأسف و بصراحة استغربت جدا من إن دور أوفرهول انتهى هنا بالشكل ده
طريقة تقديم اوفرهول و استعداده للمواجهة مايتناسبش أبدا مع الطريقة اللى تم اكتشافه و هزيمته بيها و اللى إدتنى الإحساس إن الكاتب عاوز يقصر من طول الآرك بأى طريقة ، أسوء مثال لكده هو فريق أوفرهول و اللى تم تقديمه أثناء المواجهة مباشرة من غير أى بناء او تمهيد عشان يتم هزيمته بنفس السرعة
، الشئ المزعج و اللى ابتديت ألاحظه إن معظم الأشرار فى العمل بيغطوا وجوهم لسبب أو لآخر و بصراحة ابتديت أحس إن الكاتب عنده مشكلة فى رسم الوجوه دى و ده بالنسبة لى بيقلل و احيانا بيمنع القدرة على التواصل بين المتابع و الشخصية و بيدى الإحساس إنهم مجرد شخصيات جانبية مالهمش دور حقيقى ، الكاتب كان عنده فرصة لحل المشكلة لو كان دور اوفرهول لسه مانتهاش بس بعد اللى حصل فى الشابتر اللى فات واضح إن ده احتمال مستبعد
نفس الوضع مع باقى شخصيات الآرك و إن كان بدرجة أقل ، فى مشكلة عبد الله كان انتبه لها فى موضوع الانمى و هى إن الكاتب عنده مشكلة فى تقديم الشخصيات الأنثوية ، الدليل على كده الدور المحدود جدا لأوراراكا و تسو فى الآرك ، أصلا الشخصية الثالثة فى فريق ميريو كان ممكن حذف دورها من غير تأثير على الأحداث و على عكس الباقى ماتمش التعمق فى شخصيتها بأى شكل
، باكوجو مايستحقش إنه ينجح فى الإختبار بأى شكل و تعامله مع موضوع الإنقاذ كان كارثى و اتضايقت فعلا لما الكاتب لمح إنه ممكن ينجح فيه بس فى الآخر ده طلع مجرد ترولة من الكاتب و باكوجو خد اللى يستحقه 
