Colorization
True Gamer
مورتال كومبات داخل غلاف صغير عشانها نسخة مراجعة. ركزوا على بانجو، ما عليكم من لعبة ميدواي التعيسة.
بإختصار: AAA+++
الكتيب الداخلي ملون (هالنقطة تهمني) مع وجود بوستر جميل لشخصيات اللعبة.
بما إني ما لعبت غير دقيقة ونص من الديمو فآنا ما عندي إنطباعات قوية غير العروض والصور الرهيبة اللي كنت أشوفها. هذا ما يعني إني ما كنت متحمس، رير ما سوت أي لعبة مستواها أقل من ممتاز هالجيل (بالنسبة لي) لذلك ما كنت متوقع شي أقل. البداية رهيبة حيل وكوميدية بشكل أسطوري (المفروض رير تقدم دروس كوميدية للمطورين)، وبعدها تبدأ اللعبة بشرح فكرتها بشكل مبسط ودوري للشخص حتى ما يضيع. تقدر تتحكم بشخصية بانجو بشكل طبيعي: تمشي، تقفز، تضرب الأعداء، لكن بنفس الوقت اللعبة تعتمد على المركبات إعتماد شبه كلي وهذا شي ماهو سيء أبدا. حسب ما فهمت فيه طريقتين لصنع المركبات، إما إنك تصمم من مخيلتك مع الحفاظ على قواعد التصميم (وجود عجلات ومحرك..الخ)، او إنك تشتري\تحصل على مخطط جاهز (blue print) فيه مركبة جاهزة، وعشان تبني هالمركبة لازم يكون عندك القطع اللازمة. القطع هذي تشتريها عن طريق أحد الشخصيات، والشراء يتم عن طريق نوتات موسيقية تجمعها بكل مكان. النوتات الموسيقية مثل الفلوس الصفرا بألعاب ماريو، هي العملة الرسمية بعالم بانجو. المركبات تختلف من ناحية السرعة وعداد الوقود وقوة المحرك وقدرة إستحمال العجلات وهكذا، وأيضا فيه أكثر نوع من المركبات: المراكب الأرضية ممتازة للسفر الأرضي بينما تكون بطيئة على الماء. في نوعين إضافيين وهم المركبات البحرية والمركبات الجوية لكني ما جمعت لهم أي مخطط أو قطع حتى الآن لذلك ما أقدر أعطي إنطباع عن إستخدامهم.
كل عالم مقسم إلى مجموعة أجزاء (Acts)، كل جزء يحتوي على مجموعة تحديات وكل تحدي تخلصه يعطيك قطعة أحجية (مثل النجوم بماريو). كل تحدي لعبته (واعتقد كل تحدي باللعبة) فيه عداد وقت، بالبداية اعتقدت إنه شي ممكن يكسر صفو اللعبة لكنه شي عادي وما يخرب أي جزء من متعة اللعب والإستكشاف. مستحيل يخلص عليك الوقت وانت تحاول تسوي التحدي، لكن عداد الوقت مقسم إلى ٣ ألوان: اللون الأول أزرق، اذا خلصت التحدي قبل لا يعدّي الأزرق راح تحصل على قطعة الأحجية بالإضافة إلى تروفي خاص (ما اعرف شنو فايدته للحين)، العداد اللي بعده لونه اصفر، إذا خلصت التحدي وانت على الأصفر راح تحصل على قطعة الأحجية لكن التروفي ما بيكون من نصيبك، والعداد الأخير هو الأحمر، اعتقد هو مجرد تنبيه إنك قربت لنهاية الوقت المخصص لك فالتحدي. الشخص اللي فقط يبي يستمتع بالبلاتفورمنج يقدر يلعب كل التحديات بشكل عادي، والشخص اللي وده يتحدى نفسه يقدر يلعب مع مراعاة إنه يخلص التحدي بسرعة.
حتى الآن خلصت جزئين من التشابتر الأول (اعتقد ٥ تحديات). أول تحدي كان هو إني أوصل لمكان محدد على الخريطة (اعتبرها مرحلة تدريبية). التحدي اللي بعده كان سباق مع أحد الشخصيات، السباق كان ممتع جدا وما واجهت أي صعوبة او عراقيل فيه. في تحدي عجبني حيل خاصة لما جبت فيه التروفي، وهو إنه فيه ٣ صخور بركانية موزعة داخل المرحلة بأماكن مختلفة ولازم ترميها عند جدول الماء (فيه أكثر من "نهر صغير" بمرحلة التشابتر الأول)، إستمتعت وانا ادز الصخور من على التلال بسرعة ودقة والإنتقال من صخرة للثانية. هي مهمة صغيرة وبسيطة لكنها عجبتني بسبب إنها تستفيد من عوامل المرحلة نفسها ومو مجرد "روح هناك\تعال هني".
اللعبة فيها طور تصوير، صورت صورتين لكن للأسف ما اعرف شالمشكلة وما قدرت ارفعهم على سيرفر رير. كاميرتي خلصت بطاريتها لكني قدرت أصور صورة وحدة:
حبيت إنه البيئة تتفاعل معاك بشكل كلي (دعمت شجرة بالغلط وطاحت عنقوصتها لول).
نقاط سريعة:
- رسوميات مذهلة جدا جدا جدا جدا (كعادة رير)
- موسيقى ممتازة ومناسبة لأجواء اللعبة المرحة
- حس فني عالي أكان في تصميم المراحل أو الشخصيات أو شيء فردي آخر
- وجود المركبات إيجابي جدا وأحيي رير على المخاطرة بخلق شي فريد من نوعه وممتع بنفس الوقت
- كوميديا ذات جودة أسطورية. رير أفضل مطور كوميدي بالتاريخ بجانب Telltale Games
- ألوااااااااااااااااااااااااااااااااااان!!!! :0
بينما المطورين نايمين في شهر عسل وشغالين إصدار ألعاب السنة الماضية مع غلاف جديد، رير تخطو الخطوة الكبيرة وتقدم لعبة ذكية، جميلة جدا وفريدة من نوعها (اقسم بالله حرام سعرها ٣٥، تستاهل ٦٠ بالراحة). جالاكسي خطفت الأضواء بشكل مذهل السنة الماضية، والحين الدور على بانجو يخطف أضواء السنة هذي.
شكرا رير.
