الكف عن الفعل أسهل من الفعل
فيه ناس كثيرة تظن إنه العناية بجسمها تتطلب تغيير جذري شاطح !!
الاستمرار على دايت - الاشتراك في نادي - كثرة استهلاك الخضار والفواكه - تحضير أكل خالي من الزيوت وهلم جرا
هذا التفكير قد يكون غير عملي بل محبط في بعض الأحيان لأنه يوهم العقل بالحاجة لمجهود هائل
لتحقيق هدف صعب , فالي يحصل في النهاية هو استمرار لفترة قصيرة ثم الانقطاع ..
الحل الي طبقته ونفع معي هو إني ما أسوي شي - ايه حرفياً ما اسوي شي يضر جسمي
مثل مو مكتوب في العنوان فوق كفيت عن بعض الأفعال الغبية الي كانت تأذي جسمي بشكل كبير
مثال:
الوبال الي فوق هذا كله ^ قطعته
ما أخذ مشروبات غازية - ما أخذ شوكولاته أو شيبس - قاطعت المأكولات السريعة
أكلي صار مقتصر عالي بالبيت رغم انه مو كله صحي لكنه مو كارثي
وكل ماحسيت اني اشتاق لهالأشياء أشرب موية
هذا الشي طبقته لمدة ستة شهور والتغير الي لاحظته كبير
أول شي عيوني صارت صافية واللون الاصفر الشاحب تحول لأبيض
شفايفي لونها فتح وماعاد احس فيها تشقق مثل أول
شعري رجعت له لمعته أول كان باهت شوي
أكثر من شخص يشوفني يقول أشفيه وجهك منور
مستوى النشاط والتركيز عندي عالي
الي فهمته من الدكتور لما حكيت له إنه الكبد عندي صارت نظيفه
وإني غسلت جسمي من أثار هذا الأكل
طبعاً ماني قاعد أقدم معلومة جديدة معروفة أضرار الـ junk food
ومعروف أثار الانقطاع عنه - الشي الجديد الي أقدمه هو إني أروج لفكرة الكف عن الفعل
بس وقف عن الأشياء المضرة - وقف ببساطة - أعطي جسمك فرصة يخرج هالمواد كلها وشوف الفرق