الشئ اللى لاحظته إن الشخص اللى يعتبر الشرير الرئيسى سواء فى الموسم الأول أو التانى ظهوره بيبقى محدود جدا فى العمل ، فى الموسم الأول أساس الفساد كان ياكوشيما و اللى ظهر من خلال الصور أو المشاهد الصامتة فقط و فى الموسم ده تاكاكورا و اللى ماظهرش غير فى مشاهد محدودة بس ده مايمنعش إن الإثنين كان ليهم وجود محسوس و مؤثر فى العمل
شخصية تاكاكورا بالذات حرقت دمى جدا

، الشخص ده ارتكب كم مهول من الجرائم تتضمن الفساد و إشعال حرب ضد اللاجئين و اللى كانت هاتوصل لإبادة جماعية ليهم مع خسائر فى الأرواح من اليابان ده غير تعاونه مع أمريكا و اللى كان هايحول اليابان لتابع ليها و مع كده كان عنده الجرأة لإعتبار إنه ماعملش حاجة غلط و ماكتفاش بكده و إنما هاجم كايابوكى و اعتبرها جبانة لأنه افتكر إنها استعانت بالصين كأن خيانته لصالح أمريكا ماتحسبش ، السجن أو الإعدام مش هايبقوا كفاية بالنسبة للشخص ده و الشئ المزعج إن طريقة تفكيره موجودة فى الواقع و عدد من السياسيين بيعملوا جرائم و كوارث فى الوقت اللى بيعتبروا إنهم ماعملوش أى خطأ و إن تصرفاتهم كانت للمصلحة العامة
بالنسبة لجودا فكان شخصية مثيرة للإهتمام و ظهر ك Master Mind صعب التعامل معاه و الحقيقة إن خطته كانت على وشك النجاح لولا عدد من العناصر الغير متوقعة بالمرة زى تضحية التاشيكوما (و اللى كانت جزئية ممتازة فى العمل ) ، موقع جودا ساعده فى التحكم فى المعلومات و التلاعب بكل من حوله و حتى مع وجود شخصيات زى أراماكى و الميجور فالمواجهة ضده كانت فى غاية الصعوبة و كل شئ كان بيتحرك على حسب خطته بس فى الآخر جودا حصل على النهاية اللى يستحقها و اتفاجئت من طريقة تقديم المشهد بس حبيته
تطور شخصية الميجور كان من أهم النقط فى الموسم ده ، كما ذكرت فى ردى السابق ماحبيتش شخصية الميجور لأكثر من سبب بس الموسم حسن نظرتى ليها نسبيا
الموسم عرض جزء من ماضى الميجور و اللى وضح بعض النقط بخصوص شخصيتها بس فى جملة معينة كشفت حاجات كثيرة بالنسبة لى و هى لما اكتشفت فى أحد الحلقات إن الشاب اللى كان معاها فى الحلقة تورط فى عملية مع أحد العصابات و قررت تساعده و قالت إنها ماكنتش فاكرة إن لسه عندها القدر ده من المشاعر
اللى أظنه إن الميجور نتيجة لأنها بقت سايبورج كامل من الصغر حصل لها نوع من ال Detachment بين العقل و الجسد و كما ذكر الأخ
@LOG_65 فهى كانت بتتصرف بشكل أقرب ل Gamer فى لعبة إفتراضية من إنها شخص حقيقى ، نفس الشئ حصل ل Kuze بس Kuze قابل اللاجئين و كون علاقات معاهم و تدريجيا ابتدى إنه يحس إن عقله و جسده مرتبطين و أظن إن ده حصل مع عدد من الشخصيات اللى بقت سايبورج كامل بس الميجور ماقدرتش تعمل كده و على العكس قررت التخلى عن مشاعرها و الإنفصال عن الواقع تماما كطريقة للتعامل مع الوضع بس من حين لآخر بيحصل موقف يرجع لها المشاعر اللى ظنت إنها فقدتها زى اللى حصل مع حالة الشاب ، يمكن اللى زود من الإحساس بفقدان الميجور لمشاعرها يبقى طريقة الأداء الصوتى لشخصيتها و اللى كانت باردة و ثابتة فى معظم الوقت بشكل يديك الإحساس إنها مش هاتهتم حتى لو العالم انتهى بس ده اتغير نسبيا مع التقدم فى الحلقات
مقابلة الميجور لKuze بالذات كانت نقطة تحول خصوصا بعد ما عرفت إنه كان الطفل الى قابلته فى صغرها و إنه مر بنفس ظروفها و ده يمكن اللى رجعها لأرض الواقع و خلاها تحس إن الموضوع مش لعبة و لأول مرة شفنا الميجور و هى بتتصرف كشخصية بشرية حقيقية و بتاخد قرارات خاطئة ، الميجور كونت بعض المشاعر تجاه Kuze نتيجة تشابه الظروف (مش حب بالضرورة ) و حتى اعترفت إنها إلى حد ما بتعتمد على باتو و كانت هاتستسلم تماما فى الحلقة الأخيرة بس تماسكت فى آخر لحظة و فى مشهد رمزى متعلق بالتفاحة يدل على إنها اختارت طريق مختلف عن Kuze فى النهاية
أظن إن الإختلاف بين شخصية الميجور فى المسلسل و الفيلم راجع لإختلاف كاتب السيناريو و الهدف من العملين بس ممكن نفترض إن الميجور فشلت فى التخلى عن مشاعرها بشكل تام بس فى نفس الوقت ماقدرتش تبقى بشرية و ده اللى دخلها فى حالة الحيرة اللى شفناها فى الفيلم