أصحاب جيسي وظهورهم المفاجئ والنهائي في آخر حلقة، طريقة جريهم الغبية لسيارة والت كشفت انهم مو مجرمين، لكن مااتوقعتهم هم. أو المغتالين المكسيكان الأثنين دولاك اللي كانهم شخص ومرايته من تشابههم المجنون في مشيتهم وكل شي. تود وبروده اللي يقتل.
وماأدري فين قرأت أنه لازم ماانسى انه المسلسل عن والت، مو عن جيسي، مو عن علاقتهم الاثنين مع بعض...عن والت ووالت فقط. النقطة دي ماكنت هأستوعبها لحالي ابدا وكنت هأزعل من الحلقات اللي يختفي فيها جيسي، الكيمياء اللي بين الاثنين رهيبة جداً.
بالنسبة لي نهاية حلقة 15 كانت أقوى بالنسبة لي من نهاية 16، الموسيقى الرئيسية بترتفع ووالت تتغير نظرته باللحظة اللي تقول فيها ديك الحرمة انه والت اللي نعرفه راح...في نهاية كل سيزن الاقي نفسي بصفق للمخرج لا إردياً، لكن صفقتي راحت للمشهد دا، مو مشهد موت والتر
والمحامي سول، الشخصية اللي بسهولة ممكن تكون مكروهة من جميع المشاهدين، لكن ذكاء المخرج جعله من الشخصيات المفضلة عن الكثير وانا منهم، من أرهب الشخصيات الجانبية اللي شفتها بحياتي..أجل والتر يشتري صالون أظافر xD ؟
وشخصية جيسي اللي لاحظت انها مكروهة بشدة من الكثير هنا...انا أغلب الاحيان أفضله على والت :/ خصوصاً لما أفتكر كيف لما اضطر ينتظر والت بالساعات في المعمل وبدأ يسوي حركات طفولية جداً لانه حس بالملل، من السيزن الأول وهو يسوي كده كل مايستنى حاجة ويطفش...شخصية زي كده طبيعي ماهتتحمل تقتل أحد..عكس والت
عالعموم، أدري الموضوع مات من زمان، لكن ماقدرت أقاوم أني اكتب، بعد 6 حلقات متتابعة وغبت عن الدوام تاني يوم لانه النفسية تعبت معاه :satisfied: لازم أعطي المسلسل دا حقه وأقول أنه المسلسل الوحيد اللي قدر يصدمني مرة ورا الثانية ويخليني أتحسر من قلبي أو أصفق من السعادة لأني مااتوقعت الامور تمشي بشكل كويس طوال ال+60 حلقة

أرفع لهم القبعة إحتراماً