أولا القتال ماكانش مجرد مواجهة صعبة ضد شيطان قوى فقط و إنما كان مواجهة بين الأفكار و القناعات و الأهم بين الروابط و المشهد الأخير بالذات قدم مواجهة بين الروابط الحقيقية لتانجيرو ضد الروابط المزيفة لروى
القتال أظهر الرابط بين تانجيرو و والده عن طريق الأسلوب القتالى اللى تعلمه منه و الرابط بين نيزوكو و عائلتها و اللى خلاها تحتفظ ببشريتها حتى بعد تحولها و الأهم الرابط القوى بين تانجيرو و نيزوكو ، الإثنين اشتركوا فى المواجهة و بتناغم حقيقى يدل على قوة العلاقة بينهم و ده قصاد الروابط المزيفة المبنية على الخوف لروى و اللى الخيوط تعتبر تجسيد ليها ، ده اللى خلى القتال ليه Emotional Weight حقيقى و خلى إنتصار تانجيرو و نيزوكو ليه معنى أكبر من مجرد الإنتصار على شيطان قوى
ده ينقلنا للنقطة التانية و هى الأوست ، كان ممكن استخدام أوست حماسى عادى فى القتال بس فريق العمل قرر استخدام أوست جديد باحساس مختلف مع تركيز على إظهار المشاعر و ده كان قرار موفق، فى الآخر المشاعر و الروابط تبقى أساس القتال و نقطة قوته و الأوست عزز منها بشكل كبير و كان روعة
آخر نقطة تبقى الإخراج و تصوير المشاهد ، فى مواجهات الأنميشن فيها كان ممتاز بس الإخراج عشوائى لكن هنا الوضع مختلف و الإخراج و زوايا التصوير كانوا ممتازين و خلوا كل مشهد ليه تأثيره و قوته و على سبيل المثال طريقة تقديم مشهد استيقاظ نيزوكو و استخدامها لقدرتها لأول مرة كان أكثر من رائع
.
