اسعار بناء المنازل تخطت مرحلة الجنون

[⠀⠀⠀]

السلام عليكم ورحمة الله وبركاته


اكتب هالموضوع بكل خيبة أمل بسبب ما شاهدته من صعوبات في البناء بعد تطبيق الاشتراطات الجديدة على المقاولين.

انا امتلك قطعة أرض ٤٠٠ متر وناوي ابني منها مايزيد عن ال ٢٠٠ متر وبعد ذهابي للمكاتب الهندسية صدمت بالتالي:

• سعر رسم خريطة البيت مع الخريطة الانشائية و التخطيط الكهربائي = ١٥٠٠٠ إلى ٣٠٠٠٠ ريال بحد أدنى.
• رسوم تأمين تصل مدتها ١٠ سنوات بنسبة 1.5% من تكلفة البناء الكلية.
• تكلفة رسوم رخصة بناء.
• تكلفة رسوم إشراف هندسي تصل إلى ٢٥ الف ريال.
• تكلفة رسوم تحليل تربة (حسب ماقريت).
• التكلفة الكلية تصل إلى ٥٥ الف ريال أو أكثر قبل بناء المنزل.
• أصبح سعر متر العظم ١٠٠٠ ريال بعد أن كان ٥٠٠ ريال (حسب كلام أحد المهندسين اللي قابلتهم اليوم) قالها لي وهو يشعل سجارته.

كل هذا بسبب الاشتراطات الجديدة اللي ينزلونها هيئة العقار. هذا يدفع المكاتب الهندسية للجشع في رفع الاسعار بعد ماكانت التكلفة الكلية قبل الشروع في البناء لاتزيد عن ٦٠٠٠ ريال بحد اقصى.

اللي يغبني اكثر واكثر هي المكاتب القذرة. لا نظافة ولا اسلوب ولا ملابس عدلة ولا احترام. يعني اذا بغيت تنصب علي على الاقل عدل من شكلك وملابسك ومكانك واسلوب تحدثك ولا تدخن قدامي.. حسسني انك احترافي اشوي.


الحين بعد هالصعوبات.. هل من المعقولة اني اتوجه لشراء الفلل الجاهزة!!؟

 

[Invader Zim]

الشكوى لله

 

[Raulioo]

حتى الوضع عندنا صاير كارثي
بديت اندم اني ما شريت بيت جاهز وفكيت راسي من الصداع هذا..خاصة مع تطبيق الضريبة المضافة معنا، شكله القرض الاسكاني اللي بيجيني أحسن أشتري فيه خبز وبطاطس..او أنصب خيمة وأعيش فيها

 

[Hugo]

اتوقع الحال من بعضه، بناء البيت في اي مكان وجع راس ومُكلف للمال و البدن.

الشكوى لله

ونعم المولى..

 

[Zechs Merquise]

يعني 14000 الف دولار و شوي و انت ما بنيت ولا شيء ؟ واااو

 

[Dark_N11]

و تشتري جاهز و تبدأ تكتشف الشغل التسليك
تصدع الجدران و انتفاخ البلاط

 

[⠀⠀⠀]

حتى الوضع عندنا صاير كارثي
بديت اندم اني ما شريت بيت جاهز وفكيت راسي من الصداع هذا..خاصة مع تطبيق الضريبة المضافة معنا، شكله القرض الاسكاني اللي بيجيني أحسن أشتري فيه خبز وبطاطس..او أنصب خيمة وأعيش فيها

انا كنت ناوي ابني ٢٠٠ متر واريح راسي والوالد مارضى قال ماتكفيك وعطاني ارض ٤٠٠ متر الله يجزته خير.. بس الظاهر بعد هالتعقيد المجنون والاشتراطات الدعم السكني ماعاد يخلص عظم الدور الارضي يا رجل..

شكلي بشتري من بيوت الكراتين المغشوشة اخرتها..

انا للحين منصدم.. عندي أرض وعندي دعم نص مليون ريال وعاجز ابني بيتي.. كيف اللي توه يدور ارض؟

 

[جون سيلفر]

الجاهز سمعته سيئة بعدما رغم ان فيه قرار تأمين مدري هل فعلوه بالشكل الصحيح ولا ..انا بالمستقبل ماودي ادخل تجربة البناء لأنها مجهدة بشكل كبير وفيها غش وتلاعب

 

[⠀⠀⠀]

و تشتري جاهز و تبدأ تكشتف الشغل التسليك
تصدع الجدران و انتفاخ البلاط

الغش عيني عينك موجود وتشوفه اثناء فترة العظم.. بس وش تسوي! هم حطوا الاشتراطات عشان يحدون من الغش والمكاتب الهندسية صارت تجلد ظهور المستفيدين.

 

[Invader Zim]

الوضع كل ماله يصير اسوء
اتذكر من ما كنت صغير وانا اسمع كيف الوضع بيصير افضل ولكن ما صار شي

 

[Hugo]

الحين مش مفروض تكون فيه لجنة مراقبة توقف هؤلاء عند حدهم و يكون في نظام صارم يمشون عليه الناس، الوضع عندنا في الدول العربية يرثى له..

 

[Invader Zim]

الحين مش مفروض تكون فيه لجنة مراقبة توقف هؤلاء عند حدهم و يكون في نظام صارم يمشون عليه الناس، الوضع عندنا في الدول العربية يرثى له..

الوضع كل ماله يصير اسوء
ما اتوقع يتحسن فجأة

 

[بندول]

دايماً اسمع من الشيبان ان الوضع في الثمانينيات/التسعينات كان افضل والاراضي تحصلها رخيصة والبناء وقتها كان مقدور عليه وما فيه غش والشغل أصلي وكيف متحسرين ما اشتروا اراضي اكثر وقتها او اشتروها في المناطق الفلانية الي قلبت مناطق تجارية وكذا. ويقولوا الوضع اللحين لا يطاق وصاير فيه تضخم مش مبرر ويكسر الظهر للمواطن العادي :/

 

[Mikau]

اللي يغبني اكثر واكثر هي المكاتب القذرة. لا نظافة ولا اسلوب ولا ملابس عدلة ولا احترام. يعني اذا بغيت تنصب علي على الاقل عدل من شكلك وملابسك ومكانك واسلوب تحدثك

 

[Veeto]

اسوء فترة بحياتي .. فترة البنيان .. استنزفت طاقاتي النفسية .. الجسدية .. المالية .. تجربة مريرة .. الله يساعدك مقدما

ما ابي ازيد مواجعك وتكاليفك .. بس نصيحة صادقة اذا تقدر تبدء مع مصمم داخلي قبل البناء بيكون افضل

انا تنازلت عن الاشراف الهندسي والمتابعه والتصميم الداخلي وفرت ما يعادل 100 الف ريال من هالامور (( بشكل تقريبي )) لكن ندمت لان هالامور استنزفتني جسديا نفسيا اكثر من هالمبلغ وعملت اخطاء داخلية كنت اقدر اتجنبها

وكراي شخصي بعد .. 200 متر قليلة .. فكر صح قبل ما تبدء

 

[Raulioo]

انا كنت ناوي ابني ٢٠٠ متر واريح راسي والوالد مارضى قال ماتكفيك وعطاني ارض ٤٠٠ متر الله يجزته خير.. بس الظاهر بعد هالتعقيد المجنون والاشتراطات الدعم السكني ماعاد يخلص عظم الدور الارضي يا رجل..

شكلي بشتري من بيوت الكراتين المغشوشة اخرتها..

انا للحين منصدم.. عندي أرض وعندي دعم نص مليون ريال وعاجز ابني بيتي.. كيف اللي توه يدور ارض؟

انا استخدمت كل اللي تبقى لي بعد الزواج ومع معونات من الاهل قدرت اخذ الارض.
البيت معتمد كليا على قرض بنك الاسكان، اللي كان بأيام العز يكفيك بالكاد لطابق واحد محترم، الآن الوضع صار مخيف جدا لأن البناء بالراحة بيتجاوز ال٦٠٠ الف وهذا هو الحد الأقصى للقرض الاسكاني
ولازم تقيس كل شي صح بما اني ساكن ايجار، وأول سنة فقط انت معفي عن دفع القرض.
يعني حسابات معقدة، وكله كوم وقضية المتابعة وهموم ومشاكل البناء الفعلي مع المقاولين كوم آخر.
لما يحين الوقت ..شكلي ببدأ أتدرب كيف اتريق واتغدى واتعشى على كسرة خبز من الان @@

 

[Invader Zim]

انا استخدمت كل اللي تبقى لي بعد الزواج ومع معونات من الاهل قدرت اخذ الارض.
البيت معتمد كليا على قرض بنك الاسكان، اللي كان بأيام العز يكفيك بالكاد لطابق واحد محترم، الآن الوضع صار مخيف جدا لأن البناء بالراحة بيتجاوز ال٦٠٠ الف وهذا هو الحد الأقصى للقرض الاسكاني
ولازم تقيس كل شي صح بما اني ساكن ايجار، وأول سنة فقط انت معفي عن دفع القرض.
يعني حسابات معقدة، وكله كوم وقضية المتابعة وهموم ومشاكل البناء الفعلي مع المقاولين كوم آخر.
لما يحين الوقت ..شكلي ببدأ أتدرب كيف اتريق واتغدى واتعشى على كسرة خبز من الان @@

شي محزن ان البيت تحول من شي اساسي الى حلم ذي الايام

 

[بلوط]

و تشتري جاهز و تبدأ تكتشف الشغل التسليك
تصدع الجدران و انتفاخ البلاط

طيب فيه شي اسمه سباك الي قلته ما يعتبر عيب قاتل ويظل الجاهز هو الخيار الافضل في الزمن هذا خاصة لذوي الدخل المتوسط

 

[⠀⠀⠀]

طيب فيه شي اسمه سباك الي قلته ما يعتبر عيب قاتل ويظل الجاهز هو الخيار الافضل في الزمن هذا خاصة لذوي الدخل المتوسط

ردمية اسفل البيت و القواعد و السقوف المصبوبة بدون حديد و الأعمدة اللي ميلانها 10 سنتي يعدلها سباك؟ هذي تحتاج تهدم فيها البيت عشان تصلحه.

كذلك عندك الحفر المغشوش اللي ماوصل للعزاز والردمية المشي حالك تسبب هبوط في المنزل.. تمشيها بسباك؟

صدق يا بلوط وصديقك علقم انكم شريران.. على الاذية متفقان.

 

[Hugo]

طيب فيه شي اسمه سباك الي قلته ما يعتبر عيب قاتل ويظل الجاهز هو الخيار الافضل في الزمن هذا خاصة لذوي الدخل المتوسط

السباك عندكم يصلح الجدران و البلاط، هذا سوبر سباك صراحة XD

 

[بلوط]

ردمية اسفل البيت و القواعد و السقوف المصبوبة بدون حديد و الأعمدة اللي ميلانها 10 سنتي يعدلها سباك؟ هذي تحتاج تهدم فيها البيت عشان تصلحه.

كذلك عندك الحفر المغشوش اللي ماوصل للعزاز والردمية المشي حالك تسبب هبوط في المنزل.. تمشيها بسباك؟

صدق يا بلوط وصديقك علقم انكم شريران.. على الاذية متفقان.

انا قلت بيت جاهز ما قلت بيت طين
وترا فيه بيوت جاهزة جودتها عالية المطلوب منك تنق فلوس بس عكس لو انك تسوي بيت من الصفر وتتعذب سنين

السباك عندكم يصلح الجدران و البلاط، هذا سوبر سباك صراحة XD

سباكنا اسمه ماريو

 

[Zechs Merquise]

السباك عندكم يصلح الجدران و البلاط، هذا سوبر سباك صراحة XD

ماريو ياكل فطر او باباي مع سبانغ

 

[Aleix]

وعليكم السلام ورحمة الله وبركاته

متفائل الأمور تتحسن مع الوقت
ابحث أكثر واسأل خبراء في الموضوع واستخير

أيضا فيه توجه للدولة بزيادة عدد تملك المواطنين للمنازل
وربما تصل تسهيلات جديدة

لا تستعجل

أذكر كان فيه لجنة استشارية سعودية جديدة لتقييم المنازل
لكن ما عرفت كيف ألقاها

 

[ALONE]

طيب فيه شي اسمه سباك الي قلته ما يعتبر عيب قاتل ويظل الجاهز هو الخيار الافضل في الزمن هذا خاصة لذوي الدخل المتوسط

واضح انك ماتعرف اي شئ نهائيا نهائيا عن البناء

اجل السباك يصلح مشاكل الغش في المباني الجاهزة

الله يصلحك يابلوط

 

[Raulioo]

الحل الوحيد لشراء بيت جاهز..انك تبحث عن بيت كان بانيه صاحبه لنفسه او او عائلته وثم اتغيرت الخطط لسبب ما وقرر يبيعه
أما تشتري بيوت تجارية بانيها صاحبها للبيع والاستثمار..هذي ابعد عنها لان اساسها والرخص اللي فيها بتخليك تشتري سعرها مرتين بالتصليحات والصيانات.
هذا الزمن السماسرة لوحدهم عصابة مافيا للاراضي او البيوت..لما تدفع بس بتكتشف طول السلسلة اللي كنت تدفع لها @@

 

[Zechs Merquise]

الحل الوحيد لشراء بيت جاهز..انك تبحث عن بيت كان بانيه صاحبه لنفسه او او عائلته وثم اتغيرت الخطط لسبب ما وقرر يبيعه
أما تشتري بيوت تجارية بانيها صاحبها للبيع والاستثمار..هذي ابعد عنها لان اساسها والرخص اللي فيها بتخليك تشتري سعرها مرتين بالتصليحات والصيانات.
هذا الزمن السماسرة لوحدهم عصابة مافيا للاراضي او البيوت..لما تدفع بس بتكتشف طول السلسلة اللي كنت تدفع لها @@

في كثيرين يبيع البيت لان فيه عيوب و يريد بناء بيت جديد بدون هذه العبوب

 

[بلوط]

واضح انك ماتعرف اي شئ نهائيا نهائيا عن البناء

اجل السباك يصلح مشاكل الغش في المباني الجاهزة

الله يصلحك يابلوط

مدري وش تسمون الي يصلحون بس كل مشكلة ولها حل هذا مقصدي

 

[Arashi]

وفي دول ثانيه تحصل لك بيت ايش حلوه جدام بحيرة وز وما يجي نص الاسعار اللي عندنا في الصحرا >_>

 

[Veeto]

مدري وش تسمون الي يصلحون بس كل مشكلة ولها حل هذا مقصدي

سمعت المثل .. ساس الخراب اذا لقيته هده
البنيان فيه مشاكل بسيطة .. وصعبة ومقعدة ومستحيلة
وما يحلها ليك شخص واحد .. وعادة بالبنيان تصليح المشكلة مكلف جدا جدا لانك بتضطر تعمل اشياء اضافية حتى لو هي مو خربانة بتضطر تبدلها

 

[bXNmbQ==]

ابختصر لك الوضع

الحكومة حاليا خطتها انها تحول اغلب الاعمال الى الشركات ,

ماتمنعك انك تبني بيتك بنفسك لكن عليك ضريبة اما الشركات او المؤسسات المعتمدة ماعليها ضريبة - رابط هنا

ماتمنعك كفرد انه يكون لك محطة وقود تشغلها بنفسك بس العائد الي يجيك اقل من عوائد الشركات المعتمدة و التكاليف عالية ماتقدر من خلالها تربح - رابط هنا

ماتمنعك انك تفتح متجر صغير مثل البقالة بس الاشتراطات والرسوم عليك اكبر بكثير من الرسوم على المتاجر الكبيرة

انا بس حبيت اوضح لك توجه الدولة اليوم وسبب انك تشوف هذي الامور