أخذتها , و خلصتها ... ما قدرت تهزم أسطورة السلسلة SoT لكنها تبقى لعبة محترمة بحبها الفانز و غيرهم بس لازم الواحد يعطيها فرصة D;
القصة ... 7.0
القصة عادية جدا , و في أشيا مشلحة من ألعاب ثانية حتى , بس شخصيا عجبتني الحوارات الاختيارية بين الأمير و ايليكا . معلومات ايليكا عن المناطق كانت فلة و بعض السوالف كانت كوميدية , شخصية الأمير مغرورة بس فيه شي يخليه ممكن يصير محبوب . عموما القصة مو ذاك الشي المهم في لعبة مثل PoP لكنها اضافة حلوة عشان تعرف على الأقل ليش تغامر p=
اللعب ... 8.5
طريقة اللعبة الأساسية نفسها ما تغيرت , حركات و قفزات بهلوانية عشان توصل لأماكن مستحيلة , و هذا أكثر شي ممتع في اللعبة . هذا الجزء لاحظت فيه تفرع الطرق و هذي اضافة جميلة , بس تجميع الـLight Seeds فكرة غبية عشان تضطر تمر بكل الطرق المتفرعة و تطول عمر اللعبة . كان ممكن يستغنون عنها و يلغون الـTeleport و خلاص عشان الواحد يصير حر في اختيار كل طريق و لا يتكيسل في المشي بعد ما يجمع كل القوات و يصير همه بس يعدي اللعبة . القوات نفسها طريقة حلوة عشان ما تقدر تروح لكل منطقة من البداية , بس فيها مشكلة بعد و هي تشابه القوات الى حد ما , و شخصيا كنت أتمنى يكون استخدام القوات يحتاج خبرة و يتنفذ بانسيابية أكثر . بالنسبة لسهولة اللعبة فما هي سهلة لدرجة تخلي الواحد يكرهها , أشوف نظام اللي يخليك ترجع لاخر محل وقفت عليه يغث أكثر من انك تعيد قفزة وحدة غلطت فيها في SoT مثلا (لما توصل لمنطقة مليانة قفزات و صحون و تغلط غلط سخيف في نصفها بتفهم قصدي بعدين لول) , لكن مشكلته انه أقل متعة . المشكلة انه الواحد بعض المرات يصير ما له خلق و يبغي يحط حرته في الأمير و يقتله أو يبغي يسووي قفزة مجنونة عشان يشوف المنظر و هو يطيح بس ايليكا ما تخلي هذا الشي يصير أبدا . أما على أسلوب القتال فما كان عندي مشكلة مع خصم واحد دائما و أشوفها طريقة ممتعة و غالبا ما راح يمل منها الواحد في عمر اللعبة . الألغاز مع قلتها و سهولة أغلبها بس في كم لغز عجبني و سووى تغيير في جو اللعب العام .
الرسوم ... 9.0
اختيار الـCell-Shading أشوفه صائب , المناطق صايرة زاهية بالألوان و تحسسك بالفرق قبل و بعد "المعالجة" . تصميم الأمير و ايليكا عجبني بشكل عام و تصاميم الزعماء كان لا بأس بهم , أما المناطق فكانت "جيدة" بس كنت أتمنى أكثر بصراحة , كنت أتمنى شي يدخلك في جو فارس غصبا عنك مو لمستين هنا و لمستين هناك و خلصنا (فقدت الأمل اني أشوف شي متكامل في هذي الناحية مثل SoT خلاص) .
الموسيقى ... 8.0
حلوة , لا أكثر و لا أقل . في وحدة أو ثنتين شدوا انتباهي بس بشكل عام كانت عادية . شخصيا أنا من النوع اللي يحب كل منطقة يكون لها موسيقى مميزة أكثر من انه يكون في مجموعة من الـtracks يتغيرون في كل حالة أو وضع , بس للأسف هذي هي الطريقة مع PoP . أداء الأصوات كان جيد و مثل ما قلت قبل حتى كان ممتع في أغلب الأحيان في المحادثات بين الأمير و ايليكا . المؤثرات الصوتية كانت جيدة الى ممتازة في بعض الأحيان .
كلمة أخيرة
PoP تجربة أقل ما يقال عنها ممتعة , بين حركات الأمير البهلوانية و قتال الوحوش الاستعراضي و عنصر الاستكشاف المتقن صعب تمل منها و غالبا بتاخذ جلسات قليلة و مطولة عشان تنهيها . سهلة الاقتناء لمحبين السلسلة و الجدد عليها , و ما أشوفها تكجولت بالصورة السيئة اللي يتخيلها البعض , أصلا PoP من أول و هي مو هدفها تكون لعبة صعبة لكنها مزيج بين متعة اللعب و النظر . في النهاية كل ما توقعته و كنت أنتظره من PoP حصلته موجود فيها , للأسف كان الشي الوحيد اللي حصلته فيها و ما فاقت توقعاتي و خلتني غصب عني أقول عنها SoT الجديدة , لكن بدون نقاش أقدر أقول عنها أفضل ما قدمته UbiSoft لنا بعد أسطورة السلسلة =)
التقييم النهائي ... 8.5
:
