صايرة هبة على سالفة أن أي قصة سواء كانت بلعبة أو فلم أو غيره تتطرق لموضوع من الأمراض النفسية مثل الاكتئاب أو القلق أو غيره تاخذ نوع من الحصانة وتُمدح على أنها شجاعة وكذا، وأشوف ذا الشي غلط المفترض نعاملها حالها حال بقية القصص ونحكم عليها بناء على حسن تناولها للموضوع لو أحسنت مدحناها ولو غلطت نذمها، ويمكن المفروض نعامل هكذا أعمال بحزم أكبر لأنها تتناول موضوع المفترض يكون مهم ما نجلس نسلك لقصة عادية طالما تجيب طاري الاكتئاب.
اول شيء.....مين قال عندها حصانة؟ بس صار كثير ما يتم السخرية منها خصوصا لالعاب الاندي وانه صار شيء مكرر ويتناولها بشكل واحد
خليني أمشي حبة حبة مع مشاكلي مع هذا الشي:
- سالفة أن سني يدفرها بالغلط وتموت ما عندي مشكلة معها، لأن هذا شي ممكن يحصل مع الأسف بس فكرة الشنق وتنفيذها غير مقنعة، أولاد أعمارهم 12 أو حولها يفكروا بشي كذا وينفذوه ولا كأنه شي؟ولو قيل لا بدت تجيهم أفكار ومشاعر سلبية مع الوقت، أنا الحين أتكلم عن لحظتها كيف أولاد بشخصياتهم هذي ما بس تجيهم هذي الفكرة لا يطبقوها فوق هذا.
الخوف من العقاب يخليك تسوي اي شيء، ومين قال انه الصغار ما عندهم افكار مجرمة؟ لما استرجع لاشياء اتذكر اطفال تحت سن العشر سنين كانوا يسووها مع الحيوانات انفجع كأبسط مثال، هذا غير انه ببساطة تأثير القصص على عقل الاطفال يعني، مهي ذاك الشيء الغريب المستحيل، نشوف اللي يتاثر بالتلفزيون ويشيل سكين ويقرر يحاول يقتل واحد قريب منه ك "لعبة" وهو مش مستوعب انه يسوي شيء غلط ، او بنت طفشت من بستها وتقرر تقتلها بدم بارد وتدفنها ورا بيتهم وتمثل قدام أمها انها زعلانة وتبكي وانه البسة راحت واختفت وهربت، عملت شيء مجرم بدون اي remorse وتكذب عشان تهرب من العقاب عادي جدا، كثير من البلاوي اللي تسمعها وصارت بالواقع
الأم والأب ويش موقعهم من الإعراب؟كيف تعاملوا مع هذا الموضوع؟ ما أذكر اللعبة تطرقت لهذا الشي، توني شفت
فيديو وذكر أوين الأب طلق زوجته عشان ما تحمل الموضوع والأم كانت تريد تحمي ولدها فغطت عليه، سؤالي هو فرضية الطلاق لهذا السبب بنيت على أي أساس ومتى صار الطلاق؟وهل هذا فعلا الي صار لهم؟وليش القصة ما تطرقت لهذه التفصيلة؟ لأن موقعهم من الإعراب بهذا الشي جدا مهم.
اللعبة ما ذكرت اي شيء عن الطلاق حسب ما اذكر اصلا، ذي فرضية افترضوها، اللي نعرفه انه البيت اتشتت وصار في حزن وانفصال بسبب الحادثة، وهذا شيء طبيعي جدا بحادثة صادمة زي كذا، الكل يلوم نفسه ويدخل بحالات اكتئاب
الحين الجثة ما بتمر لا على المستشفى ولا على الشرطة ولا على أي أحد؟ على طول الأهل شافوا الموضوع وفهموا السالفة وقرروا يحموا ولدهم وقالوا ندفنها على طول؟ علامات السقوط الي قتلتها ما بتكون واضحة لأي لأي شخص ممكن يشوف الجثة ممكن يلاحظ أن فيه شي غلط؟
ومين قال انه كل الجثث يتم تشريحها وفحصها اساسا، مش كل موتة يتم التعامل معها كأنها جريمة ويلزم فحص الجثة ومعرفة سبب الموت ومتى بالساعة
وهم كانوا ببلدة صغيرة ففرص حدوث هالشيء تقل بزيادة اصلا لانه بالعادة الخدمات ما تكون متطورة لهذا الحد
بقية المقربين من العايلة على طول صدقوا سالفة سني وباسل أنهم لقوها مشنوقة؟ محد فكر أن لحظة هذا مناقض كثير لطبيعتها وشي مستبعد تسويه؟ وما أتكلم لحظتها أتكلم بعدين لأن لحظتها الصدمة ممكن تمنعهم من التفكير، من معرفتهم لها محد منهم يحاول يحقق بالموضوع بشكل أو آخر؟
وليش هالشيء مشكلة؟ ياااااااا كثر ما تشوف حالات انتحار حقيقية بالواقع وتشوف انه المقربين اساسا ما يشوفوا اي شيء غلط او مريب بتصرفات المنتحر، يتعامل معاهم بشكل طبيعي جدا لحد آخر لحظة لحد ما تحصل الصدمة، بالعكس ذا اكثر شيء طبيعي وواقعي بالموضوع، انت ما تقدر تدخل مخ أي واحد وتعرف خبايا نفسه، هذي من جهة
من جهة ثانية، من بداية اللعبة من تشوف اختفاء الاخت بالواقع وتلميحات موتها وبعدين تشوف الماضي، يجي ببالك نظرية انها انتحرت فعلا، ومنها تلاحظ تصرفاتها وتشوف انه هالشيء ممكن يحصل، كانت عليها مسؤوليات كثيرة، وكانت تحت ضغط كبير وبمرحلة حرجة من حياتها، هذي اسباب شائعة تادي للانتحار عند المراهقين، تقدر تسترجع هاللحظات وتشوف "مؤشرات" وتقول نعم هذي كانت اسباب تأدي لها
والطبيعي انك بحالة زي ذي اصلا ما توصل لمرحلة التشكيك بموت المنتحر ولومه و "اصلا هو كان سعيد جدا وتصرفاته عادية، كيف انتحر؟!"، خلاص هي حاجة وحصلت، بل الشيء المش طبيعي انه تفكر انه يمكن صارت جريمة ضد المنتحر ذا، اذا مافي اي سبب يخليك تفكر كذا
هل القصة ضروري البنت تُقتل بهذا الشكل عشان توصل لنا ثيمات الأمراض النفسية الي مرت بيها الشخصيات؟ ما يصير مثلا يكون شافوها ماتت قدامهم بحادث سيارة وتمشي بقية الثيمات بشكل أو اخر؟ولما أتكلم عن الثيمات أتكلم عن سوالف مثل إيذاء النفس، والاكتئاب والقلق والتعامل مع هذه الأمور، بالإضافة لشعور الندم وحالة سني بأنه يصير انطوائي بشكل مرضي.
نعم كان "ضروري"...اوكي هو مافي اي شيء ضروري بأي قصة، بس اتخاذهم لهالطريق أدى لتناول الموضوع بشكل مختلف من اساسه، كونها انتحرت او ماتت بحادث كان بيكون اسباب شائعة ومتوقعة وندخل بثيمات شفناها بأعمال ثانية كثير، لدرجة صارت ميم اصلا "العاب الاندي المستوحاة من ايرثباوند اللي تناقش الاكتئاب"، من اول وهلة تعتقد انه ذي لعبة ثانية برضو من هالصنف
طيب ليش الكاتبة اتخذت هالطريق؟ لأنه العقدة اللي تأدي للاكتئاب والانطواء هنا تخلي تعاطي الموضوع مختلف تماما ما شفته بأي لعبة ثانية صراحة، روح لأي عمل ثاني يتناول هالمواضيع، بتشوف بالعادة الحل انه يتم تخطي الموضوع والنظر للمستقبل والانفتاح مع وجود اصدقاء جدد يطلعوك من القوقعة ويخلوك تتجاوز الماضي الاليم وكذا
بس هنا العقدة نفسها خلت هالموضوع صعب جدا، جدا لدرجة انه حتى بنهاية اللعبة تركت لك حرية تخيل كيف اصحابه تعاملوا مع واقعه، ما حصلت على "نهاية سعيدة" فعلا
لأنه الحادثة قد ما كانت مفجعة له، قد ما هي مأساوية برضو، لكن برضو هو كذب عليهم بالنهاية وغطى فعلته....اللي عملها بالغلط، شيء ما يقدر يسامح نفسه عليه ابدا، وهو حزين بشأنه، وقلق جدا من ردة فعل اصحابه تجاه الجريمة اللي صارت، ايش بيكون مصيره، هل بيزعلوا منه، بيغضبوا منه، بيتعاطفوا معه، بيبلغوا عليه، خيارات كثيرة ممكن تحصل بسبب هالشيء وهذا اللي يخلي نهاية اللعبة مميزة وممتازة هنا، راحت باتجاه غير متوقع وبشكل ما يترك للبطل مخرج او مهرب سهل وهو يواجه هذه الحقيقة.
