اللعبه حلوه وبداية ممتازة للأساسيات اللي صنعت ألعاب عظيمه من بعدها.
- الجيمبلاي وسرعته ما توقعتهم زي كذا صراحة، ممتازين ومستغرب التبطئ اللي صار بدارك سولز الأولى. صح أنه أبدا ما يقارن بالقمة اللي وصلت لها سرعة وسلاسة الجيم بلاي ببلودبورن وسولز ٣ بس كبداية كانت شي حلو خاصة تحركات اللاعب نفسه، وهو أصلا البطئ الوحيد تلاحظه بتحركات بعض الأعداء والزعماء.
- الليفل ديزاين يختلف مستواه من لوحة للوحة مرات يكون ممتاز ومرات مشي حالك، بس طبعا ما يتقارن بأي جزء جا بعده ودارك سولز ١ كانت النقله الحقيقية لعظمة الليفل ديزاين عند الفريق.
- صعوبة اللعبه معتدله بس فيه عيوب قاتله باللفل ديزاين وهو الأماكن الضيقه واللي كانت موجودة بدارك سولز الأولى بس هنا أكثر، مت كثير منها وبشكل غبي صراحة يا اما ان الكاميرا تتغير بسرعه أو عدو يدفك سواء من قريب أو من بعيد. ضايقتني جدا هالنقطة وما أشوف أنها جزء من الصعوبه بقدر ما أنهم حاطينها لترفع الضغط واشوا انهم استغنوا تدريجيا عن هالحركه.
- لول اللعبه الوحيدة من السلسله اللي فيها مقالب وأفخاخ بشكل غير متوقع أبدا وترول حقيقي.
- الهيلث سيستم مريح جدا مقارنة بألعاب سولز بس أبدا ما فيه ذيك المتعه اللي بالاستس فلاسك وكيف أنه عندك عدد محدود ما تقدر تاخذ غيره الا عند النقطة الثانيه، فعشان كذا ما مت كثير أبدا لأنه مستحيل ينتهي الهيلث ايتمز، وحتى عند البوسس نفس الكلام وما تحس بالمسؤولية. بس للأمانه شخصيا بعد ماراثون طويل للسلسله كنت مبسوط أشوف شي يخليني أروق أكثر.
- توزيع الأدوات والأسلحه وعددها جدا جدا سئ، كل اللي تلقاه باللعبه هو أحجار بأحجار، ما فيه أي شي مفيد تلقاه والأحجار نفسها مقسمه تقسيم كبيييير جدا وحوسه غير طبيعيه، أما بالنسبة للأسلحه والدروع فمن البدايه يعطونك كم سلاح ممتاز وما تحتاج أبدا أنك تغيرهم وما فيه دافع حقيقي أصلا يخليني أغيرهم وغير أن الأسلحه والدروع والأرمورز قليله وما فيها تميز أبدا.
- اللوحة الأولى ولوحة الستورمز أفضل لوحتين باللعبه وخاصة اللوحة الأولى جدا جدا ممتازه.
- توزيع السولز والكميه اللي تاخذها من كل عدو غبيه جدا وما تحسها متوازنه أبدا، ويمكن سالفة التيدنسي أثرت بزيادة على هالشي بعد.
- الزعماء جدا ممتازين وتقريبا أغلبهم بفكرة معينه وموب قتال تقليدي(اللي أحبه بالمناسبه)، فأعطوا احساس مختلف وخدموا بطئ الأعداء باللعبه. أفضل بمراااحل من دارك سولز الأولى اللي ما فيها الا كم بوس حسيت انهم صدق يسوون.
- الايتم بردن زين أننا افتكينا منه لأنه ما كان له داعي وأشغلني كثير على غير فايدة.
بشكل عام مثل ما قلت بداية حلوة للسلسله مع أنها هي الأضعف فيهم وبوضوح وماني متخيل احساس انفجار المخ اللي حسيتوا فيه بالنقله بين ديمونز سولز ودارك سولز الأولى، أتوقع كان احساس عظيم.
سعيد جدا أني أنهيت هاذي السلسله العظيمه اللي كنت أكرهها للنخاع بأحد الأيام، رحله جميلة خلال الأربع شهور الأخيرة اللي بديت فيها السلسله من بلودبورن ومتحمس جدا لتكملتها بدي ال سي الحب دارك سولز ٣ وبأي مشروع مكمل لهالإرث من مايازاكي.
-
