هندسة مدنية أو إعلام ؟ الرجاء المساعدة ..

[BioMario]

السلام عليكم ورحمة الله وبركاتة ..

شباب قريباً إن شاء الله رح احدد مستقبلي و محتار بين تخصصين وهم الهندسة المدنية و الإعلام ..
موب عارف شو أدخل .. إلي اريدة هو تخصص حلو و اضمن مستقبلي منه ..
الإعلام ممتاز لكن في الحقيقة احس مستقبلة جداً عادي لكن يقدر يبدع ويكون شيء كبير ويقدر يشتهر و يكبر ويوصل لمراتب أعلى من الهندسة ..

الهندسة المدنية بدون أعلى شك كل شي مضمون لك و راتب أعلى بكثير من الإعلامي
لكن المشكلة أكره شي اسمة رياضيات

عموماً أريدكم شباب تساعدوني لأني فعلاً اشوف عمري تايه بين التخصصات وموب عارف شو أدخل هل في تخصصات أخرى حلوة ..
إلي احبة انا الكمبيوتر و الجرافكس بشكل عام ..
المشكلة دام اني احب الجرافكس و الكمبيوتر بشكل عام طبعاً هذا موب يعني اني ادخل الإعلام ..

عموماً اتمنى المساعدة شباب فعلاً احس بحالة صعبة -__- ..
ما اعرف اي تخصص اختار و بالأخص محتار بهذا التخصصين وياليت لو تعطيوني اقتراحات و فوائد من اي تخصص تقولونه لي

 

[Tomb raider]

نصيحه تخصص ما تحبه لا تدخله !
انا مثلا ما احب الرياضايت ومستحيل ادخل الاكاونتنج !
اذا ما تحب الرياضايت ومب شاطر فيه لا تدخل الهندسه !

 

[Hardcore Gamer]

اذا ما تحب رياضيات ... او تكرهها .. .ما اشوف فيه داعي تحط الهندسه براسك

 

[Bounty]

لكن المشكلة أكره شي اسمة رياضيات

حط في بالك انك بتقعد بهالتخصص 5 سنوات .. فهل تقدر تتحمل 5 سنين من كرهك للرياضيات ؟


الإعلام مستقبله واعد وحلو بس حط في بالك اذا تبي تدخل اعلام لازم تثبت نفسك في الساحه .. و تشتغل اكثر .. وكثر ما تشتغل كثر ما تحصل .. والاعلام تقدر تتوظف بأكثر من شغله على ما اعتقد ..



الهندسه تقدر تبدع فيها .. بس انت حطيت نهايه للموضوع بأنك تكره الرياضيات .. والهندسه ما تتساهل من هالناحيه ..


بالنهايه القرار لك وانت الي اتحدد مستقبلك بتوفيق من رب العالمين إن شاء الله ..

 

[Mada Mada Dane]

انا دخلت مستقبلي علشان المستقبل, ما احبه عادي جدا, بديت استمتع فيه مؤخرا على خفيف, حببت نفسي فيه يعني ..

فنصيحتي لك " ادخل الي تحبه " .. و ماعليك من اي احد, والي كاتبه لك ربي بيصير ..
Humans look for the experience of being alive, و بتلقى هالشئ بالي تحبه, مو تضيع عمرك علشان كم قرش, يعني لاتفكير كثير وش بشتغل و مستقبل بهذا التخصص و هاذاك التخصص, هذا فكر فيه بوقته, والي كاتبه لك ربك بتحصله, فانت حاليا روح مع الي تحبه وتحس انك بتبدع فيه ..

والله يوفق ..

 

[BioMario]

انا الصراحة من يوم كنت في الصف الأول ثانوي كنت حاط في بالي واحد من الثالثة ..
هندسة مدنية - إعلام - محاسبة ..

المشكلة الرياضيات أكرهه لكن موب اني موب شاطر فيه .. الحمد لله أخر امتحان جبت A
بس أكرهه أكرهه ,الخوف من المستقبل .. الهندسة مستقبلها مافي داعي اتكلم الكل يعرف انها شيء ممتاز
و الإعلام من جميع النواحي يخوف و خصوصاً الوظائف او بشكل عام مستقبلة

 

[Zero]

الهندسة المدنية بدون أعلى شك كل شي مضمون لك و راتب أعلى بكثير من الإعلامي
لكن المشكلة أكره شي اسمة رياضيات

ما تحبه اوكي ، لكن هل أنت غير جيد في الرياضيات ؟ لا .
الإعلام ما بتلقى له وظائف في قطاعات حكومية اعتقد ، وأنا تخصصي كذلك .

عموما شوف اللي يميل له قلبك ، لا تدخل حاجة ما تطيقها وأنا أخوك صدقني الحاجة لما تحبها بالرااااااحة تمشي فيها عكس لما تكرهها أو مو حابها ، أنا ما أطيق الرياضيات ولا أطيق ريحته لذلك ابتعدت عن الهندسة واخترت شيء أخف من هالناحية وهو الـMarketing .

عموما كشخص كاره للرياضيات ، مستحيل أدرس طول 4-5 سنين حاجة أكرهها ، لأني لو درست أحس أني بنفجر .

 

[hamad 11]

الله يوفقك علي.

ما ابي اردك عن حلمك لكن لازم اخبرك بهالشي.. هندسة مدينة يفضل انك تبتعد عنها, لو جيت قبل 4 سنوات كان زين.. لكن الحين تارسين البلد وموب محصلين شغل.

بالنسبة لي إن شاء الله ناوي على هندسة طيران, هذا أكثر تخصص هندسة ما عليه ضغط الحين + احب الطيران.

بس طبعاً ما رح اسوق طيارات بس مجرد صيانة وفحص طائرات .. الخ

 

[SALAH]

والله يا علي رأيي انك تبعد عن التخصصين وتشوف شي ثالث أنسب لك ..

بالنسبة للهندسة ما انصحك , أولا زي ماقالك حمد ما ملاقيين وظائف , وانا شغال بشركة ادارة مشاريع هندسية وشايف الوضع وشايف اطنان الـC.V's اللي عندنا ..بالنهاية اختاروا واحد عنده 9 سنين خبرة ومش بسهولة ! ..زيد على هذا ان الوظيفة كلها أساسا قائمة على الرياضيات و الزوايا القائمة bla bla فلو انت ما تخبها اتركها من الحين أحسنلك ..

وبالنسبة للاعلام فنصيحة من الآخر ....لاتروح لو شكلك مو كشخة و موديرن و الا بيرفضوك :yuck:
هذا لو بدك تظهر عالتلفزيون , اما بقية الامور فمالها مستقبل تقريبا ..
الا لو بدك تصير مطرب 😎..الكلام بيتغير !


نصيحتي لك انك تختار مجال تعشقه وتحبه , ترى رح تظلك تشتغل فيه للبقية الباقية من حياتك..فكر زين ولا تتسرع

 

[Naif]

إلي احبة انا الكمبيوتر و الجرافكس بشكل عام ..

ليش ما تدخل تخصص في الـIT؟

الإعلام ما بتلقى له وظائف في قطاعات حكومية اعتقد ، وأنا تخصصي كذلك .

الحين في الامارات معظم القطاعات الحكومية تتجه للخصخصة. يعني غالبا ما بيحصل وظيفة في مكان حكومي بدون ما يكون موظف لشركة خاصة ماسكة القسم. (على الاقل كذا الحال مع اقسام تقنية المعلومات في عدد القطاعات الحكومية)

 

[BioMario]

هو فعلأص الهندسة المدنية تارسة الإمارات بشكل موب طبيعي ..
بس نايف نفس الطينه الـ IT تارس الدنيا !
----------------------------
ياليت شباب كل واحد يحط تخصصة مع السلبيات و الإيجابيات بليز شباب :cryy:

 

[Colorization]

ادخل اللي تحبه. دخلت هندسة مدنية اسبوع واحد وطلعت لتخصص آخر، الهندسة المدنية حسب اللي اعرفه كلها مخططات ومواد هندسية ما اطيقها بالمرة (رسم هندسي يدوي وCAD بشكل مكثف).

ياليت شباب كل واحد يحط تخصصة مع السلبيات و الإيجابيات بليز شباب

هندسة نفط وغاز. الإيجابيات (بالنسبة لي طبعا): المواد حلوة (تركز على الكيميا اكثر من الفيزيا والرياضيات)، الوظيفة بتكون ممتعة وpractical. السلبيات: مادري لو هذا الشي بكل مكان؛ لكن الدوام بعيد عن البيت (اعتقد مشوار ساعة؟). ما عندي مشكلة لكن في ناس تعتبر هذا الشي عائق أساسي.

 

[Humam]

بداية و قبل كل شيء أتمنى لك كل التوفيق يا علي في حياتك المهنية و ان شاء الله ربنا بيوفقك لما فيه سعادتك..

بخصوص الهندسة بشكل عام, فمش شرط انك تحب الرياضيات حتى تحبها أو تتوجه للتخصص فيها, الرياضيات في الهندسة مجرد وسيلة لتحقيق أشياء أخرى, يعني انت ما راح تتخصص رياضيات و ماراح تبحث في الرياضيات أو تحاول تبدع شيء جديد فيها حتى تقول هذا الشيء, في الهندسة في مهارات ومعادلات محددة هي الي تحتاجها فقط ( مثل معادلات الانتقال الحراري لطلاب الهندسة الميكانيكية - سلسلة فورييه لطلاب الهندسة الكهربائية..الخ )..

يعني إذا انت مستواك في الرياضيات عادي مش معناته انت مش ممكن تكون مهندس جيد, هي معادلات محددة الي تحتاج انك تتمرن عليها, ومع الوقت ما بيكون معاك مشاكل.. أعرف شباب في الهندسة المدنية متخرجين لكن فقط باقي لهم الكورس الرابع في الرياضيات الي هو أصلا متطلب في ثاني سنة لطالب الهندسة الكهربائية..

ثانيا, الهندسة المدنية بالتحديد وبحكم علاقتي مع أكثر من شخص في هذا التخصص, فأعتقد إنه أقرب للمواد الفيزيائية, معادلات الضغط و الحركة والقوة و الاحداثيات, الثيرموداينمكس- داينمكس- والاستاتيكا, هذي هي مبادئ هذا التخصص الي لازم تكون لك قاعدة صلبة فيها من البداية, و للأمانة فهم مش بذيك الصعوبة و بإمكانك تسأل أكثر من شخص, أنا شخصيا درست Statics, اذا ابغى اصنف صعوبتها فما أقدر أقول أنها أكثر من متوسطة.

هذا للتوضيح فقط علي.. لكن حط في بالك كلام الأخوان من الامارات طالما انتم من نفس البلد, أنا مستغرب ان المهندسين المدنييين عندكم مش محصلين وظائف لأن قطاع العمران والمقاولات في الامارات ماشاء الله مزدهر جدا..

انت اسال وابحث و صفي دماغك بعدين اختار الشيء الي تجتمع فيه رغبتك و الي تقدر من خلاله تضمن مستقبل وظيفي ممتاز..

بالتوفيق ان شاء الله.

 

[Naif]

هو فعلأص الهندسة المدنية تارسة الإمارات بشكل موب طبيعي ..
بس نايف نفس الطينه الـ IT تارس الدنيا !

الـIT مليون فرع و صدقني في وايد فروع لين الحين ما عندنا عمالة مواطنة لها بالشكل الكافي.
ليش ما تدخل شي له دخل بالغرافيكس ديزاين؟ اذا كنت حابنه وايد
شفت هذا المعهد في دبي: http://www.sae-dubai.com
اعتقد تخصصاته تعجبك.

ياليت شباب كل واحد يحط تخصصة مع السلبيات و الإيجابيات بليز شباب

Information Systems الايجابيات: في الوسط، ما بين الادارة و العملي. مش مملة وايد دراسته (على الاقل مواد التخصص). السلبيات: مش هو التخصص اللي كنت اريده. لكن الحين "سعيد" نوعا ما اني دخلته.

 

[Humam]

نسيت أنبه على شي جدا مهم علي.. اصحى تختار تخصص معين فقط لأنه سهل و تحس انك ممكن تمشي فيه بسهولة من غير جهد ( يعني فلة و بريكات ودوام خفيف..الخ ).. صحيح انه ممكن فيها راحة لفترة الدراسة, لكن لازم تفكر في مستقبلك صح و ترسمه من الآن, يعني حط في بالك ان مافي نجاح يجي من دون تعب وعمل متواصل..

 

[persona]

الهندسه بكبرها رياضيات.

فنصيحتي لك " ادخل الي تحبه "

اتفق معاك

الـ IT تارس الدنيا !

هالتخصص متفرع لـ
ITC
ITBA

ياليت شباب كل واحد يحط تخصصة مع السلبيات و الإيجابيات بليز شباب

تقنيه معلومات الحاسب الالي

ايجابيات
تخصص فيه علوم الكومبيوتر من برمجه\هندسه شبكات\نظم معلومات بس مو بالعميق تاخذ من كل صنف جزء من المعلومات.

السلبيات
التشتت في الدراسه يعني مره اذا تدرس نظم معلومات يبيلك حفظ اكثر من حفظ واذا برمجه يبيلك فهم لانها سوالف Logic اكثر.
دسمه مواده.

 

[Zero]

ياليت شباب كل واحد يحط تخصصة مع السلبيات و الإيجابيات بليز شباب

Marketing & Management
الإيجابيات بالنسبة لي : أريح من الهندسة والرياضيات أقل ، كذلك عندي اهتمام فيه وحاس أنه المجال اللي يناسبني وبقوة ، الوظائف كثيرة جدا بعد التخرج وبمرتبات مرتفعة في مختلف القطاعات : بنوك ، شركات قطاع خاص .. إلخ .

السلبيات : الناس لما يسمعوا اسم التخصص خصوصا لما ما يكون عندهم فكرة عنه لول ، وكما أن كثير من الناس ماخذين فكرة غلط في غلط عن التخصصات الإدراية وبس همه يدخل هندسة ( هذا الكلام عن جامعتنا للأسف ) .

 

[BioMario]

نسيت أنبه على شي جدا مهم علي.. اصحى تختار تخصص معين فقط لأنه سهل و تحس انك ممكن تمشي فيه بسهولة من غير جهد ( يعني فلة و بريكات ودوام خفيف..الخ ).. صحيح انه ممكن فيها راحة لفترة الدراسة, لكن لازم تفكر في مستقبلك صح و ترسمه من الآن, يعني حط في بالك ان مافي نجاح يجي من دون تعب وعمل متواصل..

فعلاً هذا شيء مهم همام ..
لو الدوام يكون 15 ساعة يومياً وفي الأخر برتاح رح ادخل هذا التخصص ..
موب مهتم وايد بسالفة التعب و الراحة ..

شباب إذا مثلاً احب الجرافكس موب أحسن اخليها هواية ولا اتخصص ..؟
على فكرة شباب محمد سعيد حارب إلي مسوي مصليل فريج هو ما يخصة بالجرافكس ولا اي شي من هذا القبيل ..
على على فكرة شباب رئيس قسم الجرافكس لشركة WB العملاقة هاوي جرافكس محترف ..
يعني موب إذا بخليها هواية أحسن ..؟

وشباب شو ريكم بتخصص هندسة شبكات او علوم أغذية ( علوم الأغذية ) كنت حاطها في بالي من الثنوية ..؟

 

[*legend*]

علم الرياضيات و علم الهندسة بالرغم من كونه متداخل الا انه كل علم له اتجاه مختلف ...
فترك كل اقسام الهندسة بسبب كوني اكره الرياضيات حقيقة مش مبرر مقنع, فإذا كانت عندي قدرة اني امشي فيه فهذي نعمة , اما اللي يكره المادة بسبب ضعفه فيها و قدرة المحدودة فهذا معذور ... , كل اللي دخلوا الهندسة و نجحوا فيها كانوا هواة للرياضيات ؟ الرياضيات مادة ثقيلة بطبيعتها لكن امتلاكك قدرة على تحملها بتكون مفتاح للكثير من المجالات , سواء بالهندسة او غيرها ... و لا تستكثر عدد الكورسات فلو صفيت نسبتها من باقي المواد تلاقيها ما تتجاوز 15-20 % منها .... و مهما كانت صعوبتها او تعقيدها , فاستخدام التطبيقات الرياضية بباقي تخصصات الهندسة بيكون بشكل مخفف او أساسيات رياضية "غالباً" ... فما راح تحتاج تدخل في اثباتات لكل قانون رياضي و قاعدة , لكن راح تستخدم القانون او القاعد فلازم تعرف كيف تتعامل معه ...
انا حقيقة ما انصح بالاعلام و لا بالهندسة المدنية , و عن مجال التصميم فإذا عندك ميول تصميم فأعتقد تخصصات الجيرافيكس كويسة لك , الأركتكشر بعد لو عندك ميول للتصميم الثلاثي الأبعاد, لكن محتاجة خيال ... و ممكن ايضاً الهندسة المدنية لو كانت مطلوبة بسوق العمل عندكم

و ركز على كلام همام , بجد كلام منطقي و من زاوية عقلانية , و عن الكلام عن الستاتيك , فهي داخلة بالميكانيكا اكثر من كونها بالهندسة المدنية , لكن تنسب للمدنية لأن الاجسام في حالة سكون , بينما الميكانيكا تدخل فيها الحركة

موفق ان شا الله

 

[Tomb raider]

تخصصي

Marketing
الايجابيات : طبعا بالنسبه لي ، استراتيجيات الشركات وكيف تقنع الزبون وكيف ترضيه واحب سوالف المنافسات اللي تستوي بين الشركات ، المواد حلوه ومو وايد صعبه ! تخصص مطلوب عندنا وايد .

السلبيات : في مواد صعبه مادتين او ثلاث ، + في دكارته الله يهديهم بس + لما تشتغل في التسويق وخصوصا لو مدير في شي احس انها مسؤليه وايد كبيره :/

 

[hussien-11]

بالتوفيق علوش وين ما تروح تستاهل كل خير

طبعا انت تعرف اني ادرس جرافيك ديزاين ، و سبق و تكلمنا عن هالشي .. بس لو كان في اي شي تحب تعرفه عن التخصص ( طبيعة الدراسة و المواد - مجالات العمل ) انا حاضر ، بس سؤال : هو التخصص يتدرس عندكم بالجامعات و لا بس معاهد ؟

اخيرا .. ما أنصحك بالإعلام .. بغض النظر عن باقي الخيارات ..
​

 

[Mada Mada Dane]

فعلاً هذا شيء مهم همام ..
لو الدوام يكون 15 ساعة يومياً وفي الأخر برتاح رح ادخل هذا التخصص ..
موب مهتم وايد بسالفة التعب و الراحة ..

شباب إذا مثلاً احب الجرافكس موب أحسن اخليها هواية ولا اتخصص ..؟
على فكرة شباب محمد سعيد حارب إلي مسوي مصليل فريج هو ما يخصة بالجرافكس ولا اي شي من هذا القبيل ..
على على فكرة شباب رئيس قسم الجرافكس لشركة WB العملاقة هاوي جرافكس محترف ..
يعني موب إذا بخليها هواية أحسن ..؟

وشباب شو ريكم بتخصص هندسة شبكات او علوم أغذية ( علوم الأغذية ) كنت حاطها في بالي من الثنوية ..؟

خخخخ لا تخصصت هندسه ما بيكون عند وقت تصير " هاوي محترف " للجرافكس, ولو ودك تكون " هاوي محترف " مفروض بديت تصير محترف من ايام الثانوي, فانسى الفكره خخ ..

الهندسة المدنية اسهل تخصصات الهندسة عموماً, و الهندسة بشكل عام يحتاج رياضيات, لازم تكون ممتاز في الرياضيات علشان تطمح للافضل, على الاقل هذا عندنا بجامعتنا هنا باريزونا, ما ادري عن الشباب الي يقولون ما تحتاج رياضيات واجد, ممكن لو تفهم البيسك بتعدي الكلاس بــ C او بالـكثير B .. لكن لو تبي تبدع لازم تكون فاهم رياضيات, بالتطبيقات الهندسية و الرياضيات مكملين لــ بعض ..

عموما تخصصي هو

هندسة كهربائية: تخصص صعب, لكن مستقبل له بكل مكان, اكثر من المدنية بكثير بامريكا هنا, و السعودية عندنا, وبأي دولة بالعالم, و العالم في نقص مهندسين كهربائيين فمجال التوظيف مفتوح باي دولة لك تبيها ..

سلبيات: صعب, و ممل نوعا ما, ولازم تحبه علشان تقدر تمشي فيه, انا ما اكره, اقدر اقول احبه كفايه على اني اقدر امشي فيه بدرجات حلوه, بعض المواد مره تجذبني, وبعضها احسه ثقيل, وعموما احب الفزكس و ناخذ كلاسات فزكس كثيره باول سنتين وهذا محببني بالتخصص ..

 

[game-R]

الهندسه المدنيه

تعنى بالتالي
تحليل الانشاءات ,تصميم الخرسانه المسلحه , هندسة النقل , شبكات المياه والصرف الصحي , المساحه وتطبيقاتها , ادراة المشاريع الهندسيه

ومستويات الرياضيات 4 مستويات يتشارك فيها اي مهندس في اي تخصص
وهي تركز على التطبيقات (قانون وكيف تطبقه ) موعلى الاستنتاجات (مالنا صلاح كيف جا)

تخصصي هندسه مدنيه وواضح اني <tgman> من الفرح فيه ولله الحمد
واي سؤال انا حاضر

 

[BioMario]

أشكركم شباب على تعاونكم معاي و ما تقصرون ..

شو رايكم بالـ Network Engineering ؟
تخصص حلو وفيه بعد الأشياء إلي كنت احلم بها + مطلوب و بكثرة عندنا

 

[Magical Dreamer]

أشكركم شباب على تعاونكم معاي و ما تقصرون ..

شو رايكم بالـ Network Engineering ؟
تخصص حلو وفيه بعد الأشياء إلي كنت احلم بها + مطلوب و بكثرة عندنا

السلام عليكم ورحمة الله وبركاته ..

النتورك تخصص زين ومطلوب مثل ما قلت هو مب تخصصي لكن خذت مواد نتورك ، بشكل عام التخصص مب صعب لهالدرجة لكن عدد اللي يدخلون هالتخصص كبير جدا

بجامعتنا عند البنات سنويا 40 بنت تدخل هالتخصص ويكون فيه زيادة يبغونه بعد

تخصصات الآيتي وايد لكن اول شي انصحك فيه هو النتورك وفيه الـInformation system و Computer Science كلها تخصصات ممتازة اظن بالـComputer science راح تاخذ اشياء عن الجرافيكس.

تخصصي Computer system engineering تخصص مظلوم عندنا بالجامعة وبالعافية 10 يدخلونه حتى العجيب إنه هالتخصص ما ينفتح إلا للبنات دايما ما يكون فيه عدد كفاية من الطلاب
التخصص حلو وخصوصا إنه عندنا مادة عن الروبوتات ولاب حقها ومشاريع على الـcell processor .

 

[King Wario]

مستقبلك اهم من حبك للدراسة ..

انا كاره حياتي في كليتي .. بس دام بحصل شهادة قوية ، ما عندي مانع اكره نفسي 5 سنوات

 

[Naif]

النتورك تخصص زين ومطلوب مثل ما قلت هو مب تخصصي لكن خذت مواد نتورك ، بشكل عام التخصص مب صعب لهالدرجة لكن عدد اللي يدخلون هالتخصص كبير جدا

بجامعتنا عند البنات سنويا 40 بنت تدخل هالتخصص ويكون فيه زيادة يبغونه بعد

لوول كنت احسب بس الاولاد اللي مشهور عندهم النتوورك.. نحنه كلهم يروحون يا سكيوريتي يا نتوورك. بالغصب تحصل اي تخصص ثاني مفتوح (خاصة مع اعدادنا الصغيرة)

مادتين الهاردوير اللي اخذتهم في الجامعة خلتني ما افكر ابدا بالـComputer system engineering.
Computing Systems عند باراساد (اللاب) كان عذاب لوول.. و بعدها الـArchitucture عند وليد و أسئلة امتحاناته اللي ما اعرف من وين ييبهن.

 

[Nix0-san]

Do what the heart wants
أحلى شيء بالحياة , تختار الي تحبه وتقدر تبدع فيه .. وانت الصراحة قدمت خيارين مختلفين كلياً , يعني مهما اعطناك نصائح انت تعرف مسبقاً الي تبيه .

أهم شيء لاتكون من الناس الي تعاني من يوم ليوم وهي تدرس تخصصات مو مناسبة لهم , وبعدها يعيش و يكره حاله والمجتمع وعمله , ولا معظمهم يدركوا الأمر بعد فوات الآوان ...
وآخر همّك الحين يكون الفلوس والراتب و فكرة المجتمع والسمعة و خرابيط ثانية تخلي الناس تعاني ..

::

 

[BioMario]

تصدقون شباب اني اليوم توني ادري ان الـ IT يتفرع إلي تخصصات كثيرة ..
عموماً الـ Civil Engineering كنت أريدة لكن كنت عارف اني بتعذب فيه و الصراحة كنت ناوي ادرس شي فيت كمبيوتر وفية تثنيات مثل الـ Network Engineering
عموماً الحمد لله اليوم عرفت وايد عن التخصص ..
و احتمال كبير أدخل Network Engineering والحمد لله مثل ما اشوف ان الوضايف له كثيرة و تخصص ممتاز و مناسب لي وايد ..

 

[hussien-11]

مستقبلك اهم من حبك للدراسة ..

انا كاره حياتي في كليتي .. بس دام بحصل شهادة قوية ، ما عندي مانع اكره نفسي 5 سنوات

صراحة انا اتفق مع كلام سلطان هنا ، لكن في حالة وحدة ، انك تعرف نفسك "قدها" ، اذا مو قد انك تدرس شي تكرهه هنا كلام ثاني لأنك ممكن تتعرض للفشل و تحول لأقسام أخرى .