أنا لاعب بيسي وما مشتري البس5 وجهاز البس4 لما كان عندي أغلب ألعابه رقمية، بالتالي الأشرطة -بحاول أعتمد هذا المصطلح - المفروض ما تهمني، الموضوع كله الأصل ما يعنيني لأن لا ناقة لي ولا جمل، لكني مهتم شوية عشان أعلّق على الموضوع من ناحية أوسع واستغله عشان أعيد لذاتي نَفس الكتابة لأني من دهر ما كتبت شي طويل.
قريت أغلب الردود بالموضوع، وشفت كم مقطع وبأمانة ردة الفعل بنظري مبالغ فيها، يمكن لأني أشوف أننا صرنا ناخذ الترفيه بجدية مفرطة وصرنا نعامله على أساس كونه شي من أصول الحياة، تأمل في الألفاظ المستعملة لوصف قرار سوني ونقاشه بالنت وأتصور سهل تفهم مرادي، لدرجة ننسى أن هواية الألعاب غير أنها هواية والأصل تكون شي جانبي تراها هواية مكلفة مقارنة بأقرانها وكل مرة تصير مكلفة أكثر، وهذا طبعا شي خايس لكنه واقع لحد ما.
مدرك أن الفقرة الماضية ممكن تكون قاسية وما أظن تيجي أحسن مكان أطرحها فيه، لكن ترانا نفس المنتدى المهتم بنقاش "ثقافة الألعاب" أكثر من الألعاب نفسها 🙄
عموما لو نرجع للموضوع قليلا، أقول أنا لا مع سوني ولا غيرها، أظن طول فترتي بالمنتدى ما كان عندي انتماء لجهاز معين أو شركة معينة أو حتى استديو، دايما تهمني اللعبة واللاعب حصرا، القرار في جوهره قطعا ضد الزبون، لأنك قبل عندك خيارين تلعب نسخة رقمية أو شريط الحين مجبور على الشريط.
وبعد هذه المقدمة الطللية، خلينا نقسم الموضوع لعدة محاور، منظور الشركة، منظور اللاعب وسوالف عامة.
ليش سوني اتخذت هذا القرار؟
لو تفكر فيها، سوني جادة بالموضوع، الظاهر عشان نسبة الألعاب الديجتل 85% بمقابل 15% شرايط، بس السالفة ما هنا، سوني تمتلك ال blu ray ومصانعه إذا ما غلطان، وفيه تكلفة تشغيل وتوصيل وعمال وغيره، الله أعلم لو موضوع الطباعة لما يكون من شركة طرف ثالث ياخذوا نسبة من الربح ويرموا التكاليف عليهم، بس هم يدعوا أن صافي الربح من الديجتل أقوى وهذا منطقي.
الي يؤكد جديتهم بالموضوع أنهم ناويين يغيروا شغل مصانعهم، غالبا بيحولوها ل data centers حال الغباء الاصطناعي عشان يزيدوا هامش الربح ونحوها من أمور، ما عندي مصدر بس توقع مني.
ونفس الشي حاطين خبر متجر الفيتا والبس3 معه، هم عارفين من تجربة سابقة لما حطوا الخبر الناس انجنت وتراجعوا عنه، الحين حطوها مع قرار مزعج أكثر عشان يغطي عليه، حركة PR كلاسيكية جدا وممتازة، والصمت فترة عشان الناس تستعوب الموضوع ولما يرجعوا يتكلموا يطنشوا السالفة، على أساس هذا قرارنا وتقبله، الي أشوفه من خلال هذا سوني ما متخذة القرار بيوم وليلة، واضح شي مدروس.
أقدر أتفهم منظورهم، شركة همها تضخيم الأرباح -حال كل شركات الدنيا- وشافت فرصة عشان تحول مصانعها لشي أربح لهم في مقابل سلوك الزبون الرقمي الي يتناسب مع قرارهم، تفهمي له لا يعني موافقتي عليه أو تعاطفي مع القرار، لكن هل القرار بيدي أصلا؟
منظور الزبون
يجوز أنه اختلاف طبايع بس أول شي أفكر فيه لما تجيني مشكلة هو كيف أحلها، لما تجيك مصيبة تقدر تعصّب/تنهار/تسوي دراما أو أنك تتقبل الموضوع وتفكر بالحل، هذا ما شي تسويه بين يوم وليلة وإنما طبع تطبّع نفسك عليه، القرار ما بيدك فليش تعصب أو تسوي دراما؟ لعلها نصيحة مبتذلة، بس يمكن سوني كانت تريد تجس النبض من سالفة نسخة البس5 دجتل وهنا أحسن مكان نناقش موضوع رقمي ضد الشريط.
أتصور الناس الي تحب الشريط لأنها:
- من هواة التجميع
- يقدر يبيعه أو يعيره
الي يحب الرقمي:
- أريح
- أسرع
- ما يريد يسوي زحمة بالغرفة
ولا واحد أحسن من الثاني، كلهم تقدر تلقى تخفيضات وتقدر تاخذ حساب صاحبك عشان تلعب اللعبة لو نتكلم عن الإعارة، سالفة أن حسابك يتهكر نفس سالفة أن البيت يحترق، شي مؤسف ممكن يصير.
بس المشكلة ما هنا، بالبيسي عندك متاجر واجد، وعندك GOG فوق أنه بعطيك ملكية كاملة للعبتك، يقول تقدر تسترجع فلوسك خلال 30 يوم بصرف النظر عن عدد ساعات لعبك، وعندك مواقع كثر تعطيك أكواد أرخص وحتى موقع
is there any deal يسوي مقارنة بين مواقع المفروض أنها موثقة.
البس5 حدك تشتري لعبة من متجر يعطيك حساب مشترك بسعر رخيص، أو ممكن "تتقاط" مع صاحبك، المشكلة ما هنا، المشكلة بموضوع الملكية الرقمية.
فيه كثير ألعاب تحذف من المتاجر لمختلف الأسباب، عن نفسي بستيم عندي DuckTales: Remastered بس أقدر أنزلها وألعبها عادي، حركة سوني أنهم حذفوا الأفلام والمسلسلات من متجرهم وهي سلعة الناس اشترتها شي يخليك صعب تثق بسوني، وهنا المفورض يكون الكلام والنقاش مش على سالفة أصلا النسبة دقيقة أو غيره، بنظري في موضوع أهم ينظر له ويناقش.
لو غصب المستقبل رقمي وين حقوق الملكية للمستخدم؟ ليش ما يقدر بسوي حساب family share نفس ستيم؟ ليش مستوى الدعم الفني تعبان؟ حكّوم حسابه انسرق وبلع العافية مع أنه تكلم وصنع ضجة، هذه الأشياء لو كنت مستخدم سوني بخاف منها وبتخليني أفكر جد أنقل لمكان اخر.
وعندي سؤال شديد الصراحة، لو شخص حسابه تهكر وتواصل مع الدعم الفني وسحبوا عليه، هل نقدر نلومه لو تحول للبيسي وصار يقرصن الألعاب الي اشتراها؟ أو هكر جهازه وجلس يلعب ألعاب مقرصنة؟ ما أقول تصرفه صحيح أو غلط، ولا أقول قول القانون فيه لأن قانون الملكية الفكرية معروف، بس جد تراه "القرصنة مشكلة خدمة"، عمرها ما كانت مشكلة سعر.
مشكلة أخرى هي الاحتكار مع موضوع التسعيرة الديناميكية مال سوني، الحين متجر واحد تتحكم فيه وإذا تدفع أكثر اللعبة تكون أغلى؟ شي طالع من خيال عالمي ديستوبي قح.
أيش نسوي؟
سوي حملة إعلامية، قاطع خليك قد كلمتك، أسحب عليهم خليك ذيب وبقية السوالف الي تكلمت عنها بموضوعي مال نينتندو بهذه الفقرة.
الحل المقترح:
نقاطع ننتندو أولا ونضبط علاقتنا معهم ثانية.
أتصور واضح مما طرحت سابقا أن ننتندو شركة تحب مص دم الزبون، بالتالي هنا العلاقة غير مضطردة، الطبيعي العلاقة بين الزبون والشركة تكون متساوية، للشركة الحق تعرض منتجها بسعرها ولي الحرية أشتري أو لا، ولي الحق أنتقدهم وأقاطعهم، وهم لهم الحق يبرروا موقفهم.
لو ننتندو أسعارهم استهبالية أقل حقوقي أقاطعهم وأحاربهم إعلاميا وتكون فيه حملة مقاطعة لين يتعدلوا، هم يستجيبوا لها أو لا هذا موضوع ثاني، الموضوع موضوع مبدأ، وموضوع إني ما أريد أشارك ولو بشكل غير مباشر بمالي وأقول لننتدو صح عليكم.
فيه شي شفته لنفسي لما زرت نزوى -ولاية جميلة بعُمان- ولاحظت كثرة لافتات ممنوع التدخين، حتى فيه صبغ للجدران لهذا، وما شفت أي محل يبيعها، عندنا بمسقط عادي الدكان بالحارة يبيع دخان أحيانا، هناك الموضوع مختلف، ولما سألت أحد أصحاب المحلات هناك قال لي الناس كلهم وقفوا وقفة رجل واحد أنه محد يشتري ولا حد يبيع، والي يبيع نقاطه لدرجة حتى المحلات بمحطات البترول قليلة تبيعه، وطبعا لا تستغرب سالفة "العتاب" الي يصير لأي مدخن، وهذا لو طبق مع المقاطعة لنجحت، الدخان يطلع فلوس بشكل ما تتخيله، لو نتكلم بعقلية مادية صرفة هم خسرانين، لكن أخلاقيا ربح البيع.
وهذا مثال يتيم على كون المقاطعة ممكن تنجح، والسالفة سالفة مبدأ وسالفة اتفاق عليه ومحاربة الغلط بالقوم والفعل الذي لابد يتمد لعتاب غير المقاطع، ما معقولة نشتكي من أسعار الألعاب الباهضة 70 بعدها نمشي للنتندو عبثهم بالتسعيرات عموما، مشكلة ال 70 مشكلة ارتفاع السعر عن القيمة وهذه حاصل ب 80 و 90 وأسعار الريمستارات.
أنا مدرك إني لما أتكلم ممكن طالع شكلي كذا:
لكن الحق أن كذا:
ومدرك إني أقول هذا ومع الأسف أثبت الجيمرز كذا مرة أن صملتهم غير متحققة وكلمتهم لا تتحدد، لكن الواحد أحسن يبدأ بنفسه ويطبق كلامه وبعدها يصير خير.
"كذا كذا اللعبة بتبيع"
قبيح هو إعلان الهزيمة قبل بدأ المباراة، واستحقار المرء لأفعاله بشع، وكأن العبرة بأن تبيع اللعبة أو لا تبيع، أإذا فعل كل الناس غلط أنت تقر أنه غلط أتفعله بحجة الخوض مع الخائضين؟ وإذا فعلوا كلهم صواب أصبت معهم؟
وعموما طالما الموضوع يتحول لمستقبل رقمي أتمنى النقاش ينجر لموضوع الملكية وحقوق الزبون الرقمية، وعسى يوصل للاتحاد الأوروبي هو الوحيد الي ينشد فيه الظهر مع الأسف، المفروض أن النقاش وضجيجه يصنع وعي يولد فعل بدل أن يبقى الموضوع محصور بالشاشات، لكن مجتمع الألعاب أثبت أن حتى مقاطعة لعبة صعبة عليهم إلا حفنة من الشجعان، وعموما الموضوع يذكرني مع الفارق بحركة stop killing games، من الحالات الرائعة الي الموضوع ينتقل لحراك قانوني وشغل نظيف بما تيسر.
زبدة الكلام، طالما الموضوع مجبورين عليهم يا أصحاب السينو، يا أنك تتقبله أو تتخذ قرار جاد، بكل الحالتين القرار مش قرارك ولا قراري مع الأسف، لكن التعامل معه بيدك.
