نداء إلى أهل الكويت

[Ze Truth]

السلام عليكم


بإذن الله في فترة العيد انا زاير الكويت في فترة اسبوع. واعرف ما شاء الله ان عندنا مجموعة طيبة من الاعضاء الكويتين.


فحبيت نصيحتكم عن اماكن, مطاعم, منتزهات او اي شيء ممتع, واذا كان فيه مهرجانات او شيء في فترة العيد. وبرضوا اذا كان عندكم نصائح لشخص اول مرة يزور المنطقة.

 

[Sir Guts]

ماني كويتي لكن من كثر ماروح الكويت قاعدين يفكرون يجنسوني:laugh::

روح مجمعاتهم لأن ما شاء الله مجمعاتهم تنافس اوروبا! خصوصا 360

ما شاء الله من كثر ما المجمع كبير كل محل في منه 2 او 3 ما شاء الله

اذا رايح خط يفضّل يكون عندك Navigator و صدقني ابدا ما راح تضيع معاه

و الحين بيجونك حبايبنا الكويتيين و بيساعدونك اكثر من بمليون ألف مرة 🙂

 

[AL3TTR-M]

ماقد رحت للكويت الا مره
وماقدر اقولك غير الافنيوز ! اتوقع كل شي تبيه فيه !! خاصة السينما 🙁

 

[Sir Guts]

^

شكلي تخربطت بين 360 و الأفنيوز xD

 

[Painkiller Q8]

مرحباً فيك وحياك الله 🙂
الكويت فيها اماكن كثيره ومطاعم خياليه والخ....
بس تقدر تخلصها في 4 ايام تقريبا

اول شيء مجمع الافنيوز
"عملاق جداً" تقدر تتمشى فيه اكثر من 6 ساعات وتمتد إلى 8 ساعات اذا رحت السينما في نهايه الطلعه
مليان مطاعم ومحلات ماركات ومحلات متنوعه وسينما عملاقه جداً
وتحت السينما فيه محل الغانم للإلكترونيات ومع التحسينات الجديدة قسم القيمز بروحه صار كبير ويصل إلى 70 متر مربع مليان اجهزه وألعاب

مجمع 360 مجمع دائري كبير وتصير فيه احداث مختلفه احيانا مثلا معارض سيارات ومن هذي الامور .. حلو وشرح وفيه اكبر دور سينما في الكويت والآي ماكس ... راح يكون وقت مناسب تحجز لباتمان او بريف فلم بكسار في العيد
وطبعا فيه محلات كثيره

بخصوص السينما انصح بانك تحجز قبل الموعد بيوم لان صعبه تروح وتحصل مقاعد خصوصا في العيد :/ سجل في موقعهم Kncc واحجز منه !

مجمعات السالميه
الفنار - مارينا - سوق شرق
تقدر تخلصهم فيوم واحد مع غداء او عشاء وفي نفس المنطقه المركز العلمي والاكواريوم يستحق الزيارة وتخلصه في ساعتين مع فلم وثائقي

ومجمع "الرحاب" في حولي
هذا مجمع القيمرز الرسمي وسوق السودا عباره عن عماره من 3 ادوار وسرداب كلها للقيمز وتحصل فيه كل شيء يتعلق في القيمز اصلي او تقليد ، تقدر تأخذ فيه ساعات بس لانفكر تأخذ اهلك لان راح يكرهونك هههه

فيه مكان حلو في منطقه ابو حليفه او المنقف بس بعيد ،، طريقه 45 دقيقه من داخل الكويت
فيه مطاعم كثيره وقريب من مجمع حلو اسمه الكوت

واذا تبي شي او مساعده او تسير علينا حياك الله في اي وقت راسلني عل خاص وراح نقوم في الواجب 🙂


رحله سعيده

 

[dro]

العنوان ناقصه ... الحرب اقتربت ( & )

 

[persona]

اماكن

شارع الخليج العربي ، الافينيو للمشي والمطاعم والكافيهات ، 360 اذا بتروح سينما ، المدينة الترفيهية ، حديقة الشعب ، الاكواريم (لازم) ، أبراج الكويت ، برج الحمراء ، مجمع المهلب ، وفي مكان اسمه ..يوم البحار

​

http://www.e.gov.kw/sites/kgoarabic...uwait/ActivitiesInKuwait_AttractiveSpots.aspx

البرج الابيض ، مكان يتجمعون فيه لاعبين الاركيد والعاب القتال ، مجمع الرحاب ، اكبر مجمع يبيع لنا الالعاب ، سعر الالعاب اللي تنزل نار قليل تحصل ناس تبيع بضمير بس انصحك فيه اذا تدور على محلات تبيع مجسمات الانمي لون بيس وجريندايزر وغيرها ..

وعشان لا تشك بنفسك ، شعبنا يحب الخز بشكل مو طبيعي هههههههههه​

 

[pacino]

للاسف التنمية بالكويت متوقفة من بعد الغزو ..المهم ما علينا ..الشباب ذكروا اغلب الاماكن السياحية
بالاضافة لو عندك اطفال اخذهم لمجمع اسمه ديسكفري مجمع جميل للاطفال
لو تحب التزلج روح لصالة التزلج بجانب مجمع ديسكفري تقريبا

لازم تروح المركز العلمي وبعدها تطلع تتمشى في الشاطيء الي جدامه..
احجز للسينما او المسرحيات قبل وقتها لان دايم ما تلقى حجز بهذة الفترة
روح لمجمع 360 واقعد بركن القهاوي بالطابق الارضي..جميل جدا خصوصا القعدة الخارجية اذا كان الجو هادي ومعتدل


ملاحظات مهمة جدا:

للاسف الكويت ما ترقى للبلد السياحي..اهي فيها اماكن حلوه و ممتازة لكن خدمة السياح فيها ضعيفه جدا جدا

1-لذلك احجز فندقك من النت او حاول تعرف اماكن الفنادق لان فنادق الكويت قليلة جدا جدا ومعضمها فنادق عالمية
2-المواصلات فيها كذلك ضعيفة..اذا رحت بتاكسي لمجمع وانت عارف انك بتتأخر فالافضل انك تاخذ رقم التاكسي علشان ما تقعد بالليل بروحك لوول!!
3-اخذ معاك GPS لان الاماكن السياحية مترامية الاطراف ..مو مثل دبي على سبيل المثال.
3-راح تلاحظ ولله الحمد ان الشعب طيب وراقي وحضاري..لكن للاسف بسبب الشؤون السياسية اهملت السياحة بالكويت..ماودي ادخل بتفاصيل اكثر بسبب قوانين المنتدى

ومثل ما قالوا الشباب الخز عادة صارت لووول سواء من الشباب او البنات

 

[Xeon-Q8]

ماقصروا الأخوان غطوا كل شي تقريبا ، الكويت صغيره واللي ذكرناه هو الموجود بس ههههههه

بس حاب انبهك لشغله ، الكويت تشهد هالسنتين زحمه غير طبيعيه وصلت لحد لايطاق ، استعد انك تقعد في الطريق ساعات

وحياك الله بديرتك وبين اخوانك

 

[خالد العجمي xXx]

حياك الله في ديرتك الثانيه🙂

مثل ما قالو الشباب ولا يطوفك المركز العلمي جدًا ممتع وازيد ع المجمعات

مجمع الكوت فيه قهاوي حلوه اطل ع النفوره مع مقطع سفونيات ولا اروع 🙂

 

[AL3TTR-M]

^

شكلي تخربطت بين 360 و الأفنيوز xD

ماعرف 360
انا والله اكذر الافنيوز اعجبني لدرجه ودي اعيش بالكويت علشانه 😀

 

[Sir Guts]

^

افنيوز هو الكبير؟ اذا هو اذا هذا المجمع احيي الكويت عليه ما شاء الله!

 

[persona]

المجمعات التجارية المشهورة بالكويت فيها سينما ، الافنيوز هو المجمع الكبير فيه سينما لكن مو بقوة 360 ، 360 له نص طابق كله سينما...

سوق شرق\الكوت اذا تحب مجمع يطل على البحر.

 

[s3rorh]

دامك بتروح اسبوع افضل حل هو أنك تاخذ شقه مفروشه بحولي .. ألي فيها مجمع الرحاب .. وتعطيك وايد مزايا من حيث الموقع .. وتعطيك السهوله بأنك تصل لأي مكان تبيه بالكويت .. وبوقت قياسي رهيب !!! .. طبعا تجنب تسكن وسطها ... بل بأطرافها *بخصوص شلون تحصل الشقق .. الشباب بيفدونك لأني ما اقدر اسأل لك دام اني برا الكويت ألحين 🙁*

عموما أنا ياي علشان سبباً معين .. وهو
4 شغلات لازم تسويهم ... والحلو بأنك تقدر تسويهم بيوم واحد .و إجباااااري تخصص يوم .. وتمشي على هالمخطط .. و بخليهم على نقاط لك للسهوله :

1- تقعد الصبح ... تروح لمطعم عصفور كناري ... فقط لا غير .. *لا يخدعونك المقلدين بتزويد حرف ولا كلمه:sarcastic:* ... وأطلب منهم ريوق .. ألي تشتهيه ... بس بشرط تاكل فلافلهم *بمجرد ما بتدخل .. بيعطونك وحده علشان تذوب معاها .. وهااا قول لهم يكثرون خبز :inlove: *.. اويلي .. على مسبحه مالتهم .. عذاااااب

عقب ما تخلص تروح لمجمع الرحاب *ألي صاير بنفس الشارع* ... افتر .. لغايه ما يجي الظهر

2- توجه لسوق المباركية و موقعه بالعاصمه .. يم البورصة والمسجد الكبير .. أبد كلش محد يضييييعه ... تبي معلومات أكثر ! شوف هالفيديو

[video=youtube;izEB7OMrX3Y]http://www.youtube.com/watch?v=izEB7OMrX3Y[/video]

بعد ما تستمتع بالسوق ... و أول ما تبدأ تحس بالجوع ... تجاااااااااااااااااااااااااااااااااااااااااااااااا اااااااااااااااهل .. واعيد ... تجااااااااهل كل المطاعم الفالصوا ألي برا .. وادخل داخل السوق .. وتوجه لمطعم

الشمم

وأطلب كباب منهم .. أو اي شي تحبه .. وموقعه نهايه سوق الخضار .. وقبل سوق التمر ...
ومن مميزات سوق المباركيه ألي ما ذكروها بالفيديو فوق .. يمه مجمع البلووكات ..صاير ورا سوق المباركيه ... وفيه افضل مكان يبيع خام للدشاديش-الثوب .. والعبايات .. هذا اذا كنت ناوي تجيب هدايا لأهلك أو تشتري لك !! .. وايضا فيه سوق المخازن .. على ايامي .. الشباب كلها تشتري منه ... وما ادري اذا للحين ولا الكل صار يهتم بالماراكات ... بس لبسهم عجيب للشباب .. وهذولي كلهم يم سوق المباركية .. وتروح لهم كلهم مشي

3- خلصت فراره وتبي تروح تشوف لك فلم سينما .. بس قبلها تبي تتمشى بمكان يطل على البحر وساحر وذووق !!؟

سوق شرق .... ارقى منه مافي. .. وحييييييييييييييييييييييييييييييييييييل قريب يم المباركيه .. 10 دقايق بالسياره .. إذا مو اقل

[video=youtube;2HBz2fSMuXg]http://www.youtube.com/watch?v=2HBz2fSMuXg[/video]

هذي الواجهه الأماميه للسوق .. ألي تطل على الشارع ... أدحل السوق وتمشى فيه .. واستانس ... وعقب ما تخلص الفلم ... الجهه الخلفيه للسوق .. ابو الروقاااااااااااااااااااااااان !! وتدخلك جو ... عمري ما راح احس فيها أو بروعته .. إلا بهالمكان * خاصه بعد ما تكون دخلت الفلم .. وخلص على الساعه 1 بليل * ... عالم ثااااااااااااااااااني !!!

4- خلصت من الأجواء الرهيبه !!! .. تبي تعيش تجربه أحلى !! .. اركب سيارتك ... وأطلع من سوق شرق .. نزل جام سيارتك .. واتمشى على سرعه 80 كيلو ... بشارع .. الخليج .. واتجه للمارينا مول ... مع تشغيل اغنيه راقيه مثل ألي موجوده فوق بفيديو سوق شرق !!!
بعدما توصل للمارينا مول ... دق فوق تحت .. وارجع لسوق شرق ... وإذا كنت تحب التمشي على البحر !!! جهه ماكدونالدز ألي بشارع الخليج ... توفر خوش مكان للتمشي !!! .. تتمشى وتسمع صوت البحر .. لغايه ما تنسى روحك !!
بعد ما ترجع لسوق شرق ... وأنت بسيارتك .. لا تنزل منها !! واتجه لمنطقه بيتك .. بس قبلها تذكر مطعم عصفور كناري !!! ألي بنقطه 1 !!! .. اطلب منه سوبر فلافل كا عشا ... وأدعليلي




بنهاية الرد .. خنقتني العبرة .. ودمعت شوي 🙁 ... أأأأه .. مشتاق لج يا كويت 3>

 

[Vorg Zangief]

لا تنسى تروح المركز العلمي 😀
عبارة عن اكواريوم و حيوانات برمائية و برية اخذ فرة في الاكاواريوم و بعدها شوف شنو فيه افلام بالايماكس تبع المركز . بالغالب افلام علمية 3 دي (افلام قصيرة) . جداً ممتعة و مشوقة (على حسب الفيلم طبعاً )
-- -- --
و عندك المجمعات . 360 و الافنيوز . لازم تروحهم . و اليوم اللي تبي تروح فيه الرحاب . ادخل مجمع المهلب دامه في نفس المنطقة و فيه سينما بعد . و مطاعم الى ما هنالك 😀
ولو تبي تروح مدن العاب عندك المدينة الترفيهية + حديقة الشعب
اذا رحت حديقة الشعب لازم تجرب قطار الموت + قلعة الرعب + القفز بالحبل 😀 (لو كنت ما تخاف المرتفعات )

و لو تبي ملعب عشب صناعي مكيف . جنب الابراج الاجار ساعة 55 دينار 😀
و يا هلا و سهلا فيك في بلدك 😀

 

[Painkiller Q8]

ماشاءلله كم عضو من الكويت في المنتدى؟؟

ماتبون نتجمع على يوم؟؟ نطلع مكان او حياكم الله عندي في البيت 🙂

ادري محد راح يهتم .. بس برمي الفكرة دام أنكم حول الموضوع

 

[ALONE]

ونعم والله بأهل الكويت

ماشاء الله الشباب ماقصرو وردودهم مفيدة لصاحب الموضوع ولكل شخص يفكر يزور الكويت

بأذن الله قريب انا وعيال خالتي بنروح للكويت :inlove:

 

[خالد العجمي xXx]

^
^

خالد ياليت والله نتجمع في قهوه ولا مجمع ولا اي شي🙁

 

[G4mer]

بحط الموضوع في المفضلة لأنه الكويت دخلت راسي XD

 

[pacino]

و بالمناسبة الوجه الثالث من مجمع الافنيوز(phase 3) راح يفتتح هالسنه .مثل the walk بدبي لكن بسقف شفاف مغطى علشان الجو الحار
[video=youtube;kUI3uOEXSiU]http://www.youtube.com/watch?v=kUI3uOEXSiU[/video]

 

[Rain]

واو ردود الشباب فعلا تشجع

 

[Sov]

إشتقت للكويت بسبب الردود 🙁

 

[USefQ80]

نصيحة عشان تفتك من الزحمة حاول طلعاتك كلها تكون من الصبح يعني الساعة 11 بالكثير 12 انت بالمكان اللي تبي تروحله
الرحاب يفتح 9:30 و يسكر 1:30 و بعدين يفتح 4:30 و يسكر 10:30 ( اذا بتروح روح الصبح او اول ما يفتح العصر 🙂

360 المطاعم اللي فيه قليله مقارنه بالأفنيوز و المحلات اللي فيه 90% منها ماركات عالمية بس الأفنيوز في جذي و جذي
+ بالأفتيوز في الكترونيات الغانم ( X-Cite )
الفنار مجمع ممل و ما انصحك فيه و المارينا من الأشكال اللي تشوفها هناك ودك بس تمشي و تتهاوش !

و اذا ودك بمكان معين سامع عنه او مطعم حاضرين 🙂

 

[Talal kinenju]

يكفي شوفت الأبراج

 

[NOBLE]

الاكوواااااااااااااااااااباااااارك

 

[D.K]

أهم شي مطعم ميس الغانم.

 

[Veeto]

قهر .. غيروا وظيفتي .. سابقا كل اسبوع انا بالكويت يوم على الاقل .. تباااا
شعب حبوب وراقي جدا .. الافينيوز رهيب .. والمجمع العلمي لا يفوتك .. سوق شرق بعد عجيب
كنت حاط مخططات اشوف فيلم بالايماكس .. بس توقيتات سفراتي الاخيرة كانت سيئة جدا كلها مطار + شغل + مطار

عجبتني سالفة الخز :laugh::

 

[النسر الأسود]

عندي سؤال رغم إنو بعيد عن مسار الموضوع لكن بستفيد من تجمع أهل الكويت 😀

هل في ألعاب 3DS ريجن أوروبي وفين؟ حسب معلوماتي الرحاب المكان الأفضل لكن هل عندهم ريجن أوروبي؟

 

[USefQ80]

^^
اي شي تبي ريجن اوروبي على طول رووح الكترونيات الغانم ( X Cite )
كل الألعاب و الأجهزة اللي عنده ريجن اوروبي و له افرع كثيرة !! و انصحك تروح اللي بلأفنيوز قبل جم شهر عدلوا الديكور و صار شي مرتب و في قسم كبير للقيمرز 🙂

الرحاب في محلات كثيييييررة بس للأسف مرات تشوف اسعار مبالغ فيها ! و تحصل كل شي تبي هناك لكن الألعاب اغلبها ريجن امريكي 🙂

 

[Snake-87]

الشباب ما شاء الله ما خلو شي إلا وذكروه تقريبا .. حياك الله بديرتك الثانية : )

- لا تروح الرحاب الصبح بالعيد مسكر .
- حاول طلعاتك كلها الصبح ... بالليل زحمة زحمة زحمة زحمة بالمجمعات وخصوصا بالعيد .
- للأسف ما تقدر تحجز بالسينما بالإنترنت لأن ما عندك بطاقة السينما على ما أعتقد ... وإذا تقدر أول ما توصل تقدر تروح أي سينما وتحجز منها مباشرة حق بالليل لأن ماكو حجز تقريبا بالعيد .
- Google maps شغال بالتلفون بالجي بي أس إستخدمه إذا تبي تبحث عن شي .
- إلكترونيات الغانم (x-cite) عنده ستور أونلاين تقدر تتسوق منه إذا تبي ويوصل لي الفندق إذا تبي تتفادى الزحمة .. في شغلات موموجودة بالسايت والعكس صحيح .
- عندك مجمع الرحاب للجيمز والأكشن فيجرز والألعاب المستعملة بالسرداب .. وتحصل أسعار حلوة بإلكترونيات الغانم للألعاب القديمة .
- سينما 360 وسينما الأفنيوز أحسن سينمتين بالكويت .. والوحيدين إلي فيهم آيماكس .
- مارينا كريسنت .. مجموعة مطاعم عالبحر متصلة بجسر على مجمع المارينا .. مكان حلو جدا جدا ولكن تم إكتساحه من قبل إخواننا من أهل الشام .. بتشوف وايد سوريين و لبنانيين هناك .
- الزحمة الخيالية بتشوفها بثلاث أماكن إلي إهي أحدث المجمعات .. 360 والأفنيوز و برج الحمرا .

بما أن الشباب ذكرو كل شي ... بتخصص لك بالمطاعم إلي هي عزيزة على بطنك جدا .
وأنصح فيها بشدة بما أن الكويت صارت ديرة المطاعم :

Solo Pizza

http://solopn.com/

مطعم يطبخ فيه كويتيين .. الطباخ دارس بإيطاليا وعنده رخصة عالمية . ما أبالغ أفضل بيتزا على الإطلاق .. إسأل عن بيتزا سموكي وبالنهاية لحف بطنك ببيتزا نوتيلا وإدعيلي .
مواقيته تفرق عن بقية المطاعم فراجع الموقع أو تويتر علشان تعرف متى يفتح .

تفاصيل أكثر
http://www.meenakon.com/7269.html
مكان المطعم سيئ وبين عمارات قديمة ولكن راح تشوف كل زباينه من الناس الراقية وراح يعجبك أكله أكيد .

Elevation Burger

أفضل برغر بالنسبة لي .. شغله كله طبيعي . في فرع بالأفنيوز ولكنه مسكر للصيانة في توسعة للمجمع .. حاليا فتح فرع جديد ببرج الحمرا الجديد .. برج فيه أرقى الماركات العالمية وتوه فاتح وفيه حوالي 4 أدوار سوق ودور سينما.
هذا البرج إستخدموا تصميمه في فلم سبايدر مان الأخير كمبنى أوسكورب ، فيه شركة سينما يديدة بتفتح ومفروض فتحت حق العيد أول شركة بالكويت غير شركة السينما الكويتية (سنسكيب) . ما جربناها بعد .

يعتبر البرج ثاني أطول برج خرساني في العالم وثاني أطول برج في الشرق الأوسط وداخل في قائمة أطول 12 برج في العالم.

خيارات ثانية للبرغر :
Fat Burget ثاني أحلى برغر عندي وموجود ببرج جاسم وفرع ثاني ما ادله .
shake shake سوه ثوره لما طلع بالكويت .. طق مو مطبيعي وزحمممة عليه وتحصله بالأفنيوز .. فيه دهن وايد بس حلو .

فات برغر مشهور بترديد الطلب من قبل جميع العاملين .. لما تطلب من الكاشير يقول طلبك بصوت عالي وراح يردد الطلب كل الي بالمطعم وراه .


للأكل الكويتي لازم تجرب مطعم كافيه بزّة .

فيه ريوق ممتاز وغدا ممتاز بعد سوالف عيوش ما عيوش ولمسة المطعم على كلاسيكيات الكويت القديمة بالإضافة إلى أغاني كويتية قديمة مسجلة حديثا وحصريا للمطعم من مطربة نسيت إسمها .

http://www.meenakon.com/7082.html
في أكثر من فرع شوف إلي يناسبك .


تبي شي صحي ؟ عندك مطعم loFat

عندهم ستيك مع صلصلة خيالية .

بدر البدور .. أفضل شاورما كباب بالتاريخ

p.f.changs

مطعمي المفضل
مطعم صيني ممتاز جدا جدا جدا جدا جدا جدا جدا
أطلب منه لحم منغولي وعيش خضار ومشهور جدا بمقبلاته الداينميت شرمب .
موجود بالأفنيوز وعالبحر .

أشهر مطعم ياباني بالكويت (ماكي) .. ممتاز بس أسعاره مرتفعه شوي وأنا أفضل غيره .
تا تا مي + ساتشي

عندهم أم الربيان مو طبيييعي

إذا لك بالياباني أو تبي تجرب .عطني خبر أعطيك شتطلب .. طبعا ما آكل ني أنا كله مطبوخ .




للحلويات في أكثر من مكان أنصح فيه
تشوكليت بار

موجود بالأفنيوز وبالمارينا عالبحر وأماكن ثانية .. أنصح بطلب إسمه براوني صاندي .
وأيضا مشهورين بالباستا بالصلصة الوردية (قول له يحط مشروم زيادة )
http://thechocolatebar.com.kw/

http://www.ilsul6ana.com/wp-content/uploads/2011/11/55.jpg

Marble Slab
موجود ب360 وبجمعية ماذكر وين

أحلى محل برد بالنسبة لي .. إطلب : فانيلا فرانش + سويس تشوكليت + براوني + عصاة بسكوت + شوية صلصة ككاو .. إمممممممممممم
http://4.bp.blogspot.com/_JUfBbVlJk-s/SX2vHIYEzkI/AAAAAAAAALk/5yprwrmc_KI/s1600-h/12012009119.jpg

محل برد ثاني كولد ستون

يسوون حركات بهلوانية ويلعبون فيه .. لذيذ وتحصله بالأفنيوز .

محل بوضة عربية ممتاز جدا .. موجود بحولي ويسكر بنص الليل تقريبا .

كوكيز :
the baking try caffe

مشهورين بالكوكيز .. شي ممتاز


ودي أساعدك أكثر ولكن مو موجود بالعيد للأسف وأي إستفسار ما يردك إلا لسانك . وحياك الله بديرتك الثانية ^^