نصيحة للعيد: إذا جاكم أحد معزوم في بيتكم وشعرت بأن أحد أفراد المعزومين ساكت ومنطوي على نفسه ولا يسولف مع أحد حاول أنك تجلس جنبه وتسولف معه وترحب به بصوت منخفض بينك وبينه، مجهود يتطلب منك دقيقتين ثلاثة بس
غالباً هو يشعر بالغربة والشعور هذا بيبقى معه ويتزايد لو كان أسير للصمت، فأجلس جنبه وحادثه بأمور بسيطة: يالله حيه كيف حالك؟ من زمان ما شفناك عاش من شافك والله، وش أخبار الوالد والوالدة والأخوان؟ علمني تبي شاهي بسكر ولا بدون؟ تامر أمر يبو فلان.. بس لحظة عن اذنك بخلص شغلة وبرجع
وبس... تنتهي السوالف هنا، لا تكثر زيادة.
أنت بجلستك جنبه وبحديثك، اللي ما يهم محتواه بقدر ما يهم مبادرتك نفسها، أشعرته بالأمان. لو ابتسم لك ولمح أنه يبي يسولف زيادة فيا هلا ومرحبا أبرك الساعات، بس إذا رجع ينطوي على نفسه فأنت تركت له بصمة والبصمة هذي ليس بالضرورة أن يقدرها بابتسامته، اللي يمكن يعجز عنها لسببٍ ما، بل بالإمكان أن يقدرها بصمته، وهذا شيء أعظم، وإن رفضها جملةً وتفصيلاً بإمتعاضه فبسلامته أنت سويت اللي عليك
أقول ذا الشيء لأني الاحظ كثرة اللامبالاة عند الشباب بالذات. مالهم خلق لأي شيء للأسف أعلى درجة من العطاء عندهم هو أنه يصب لك قهوة وشاهي وغيره؟ دبر عمرك وش تبي بعد؟
قلوب الناس تهوى تلقي الاهتمام وألذ درجات الاهتمام هو خصوصيته، فخصص الناس بإهتمامك وعطهم لذة التكريم والتقدير، مثل ما تبي الناس يقدرونك قدرهم
