شالحل مع فشل فحص العين ؟

[W.W.W]

صار لي سنين كل ما رحت محل نظارات مره افصلها بشكل كويس ومره تجيني نظاره كأني غاطس في ماء او نظاره كأني حول وتجيب لي الصداع :/

يا شيخ والله تعبت , ما ادري هو فشل في الدكتور الي يفحص ؟ ولا المشكله مني لاني قدمت له نتائج مختلفه عن الي اشوفها ؟

توني مفصل نظاره من 3 ايام , النظر فيها ممتازه كوضوح , لكن اصبحت اسوأ من النظاره السابقه في التركيز -_-"
صاير عندي عين تشوف ممتاز وعين اقل منها واحس اني مش مرتاح معاها

انا حصلت لي اصابه في العين اليسار من قبل كم سنه وتعالجة بمراهم وقطرات , ما اعرف هل هي السبب ؟ وحتى لو , مش مفروض الدكتور لو هو شاطر يسألني لو حصلت لي حاله اصابه ؟
وبرضو عندي ارهاق في العين وجفاف هل لها علاقه بفشل الفحص ؟

مب عارف كيف اتصرف , ارجع للمحل نفسه ؟ اشوف لي مستشفى بفلوس يفحص لي مره ثانيه واترك محل النظارات يولي ؟

هل في مستشفى في الدمام ممتاز يفحص كويس ؟

 

[Sage]

من اللي قاعد اشوفه الحل بسيط. روح دكتور عيون و اشرحله السالفه و قوله يفحصك؟

 

[fatal framer]

من اللي قاعد اشوفه الحل بسيط. روح دكتور عيون و اشرحله السالفه و قوله يفحصك؟

بالضبط اخوي عبدالله روح دكتور للعيون في عيادة خاصة او مستشفى خاص تكون سامع عنه انه شاطر والناس تمدحه
الدكاترة بمحلات النظارات يساعدونك بس لو في مشكلة داخلية في العين نفسها لاسمح الله ماراح يعرفون
لما تروح دكتور في مستشفى خاص غير الفحوصات اللي يسويها بيحطلك قطرة في عينك
علشان تتسع حدقة العين وهذا افضل شي للفحوصات
لازم يكون معاك احد لانك بعدها ماراح تقدر تسوق بروحك من اتساع حدقة العين راح تلقى الرؤية مشوشة

 

[شيطون]

وحتى لو , مش مفروض الدكتور لو هو شاطر يسألني لو حصلت لي حاله اصابه ؟

وانت منتظر الدكتور يسالك ايش معك
المفروض تساله انت وتشرح له المشكلة

 

[fatal framer]

عبدالله الدكتور شعرفه تدري جم واحد مار عليه
يمكن اهو باليوم الواحد يشوف الف حالة
من صجك تبيه يسال كل واحد عن حالته
اذا احنا ننسى شلون الطبيب ماينسى

 

[FALCON-WARS]

ممكن يكون عندك مشكلة مش قصر او طول نظر. احجز عند دكتور عيون يسوي لك فحص كامل للعين وحاول يكون معروف عشان الاجهزه تكون متطورة, واذكر له كل تفاصيل حالتك(الاصابة،حكه او جفاف الخ) وان شاء مافيك الا العافية. العين عضو حساس جدا ومن غيره الانسان يجيه عجز غير عن بقية الاعضاء فنصيحه اهتم فيها.

 

[ELOO]

صحيح أحتمال يكون عندك مشكلة , أو ممكن قدمت نتائج مختلفة عن اللي بتشوفها
والمهم أنك تكون مواظب في لبس النظارة =)
ونصيحة أهتم بنظرك
لا تقلق عادي جداً , ولكن حاول قدر الأمكان تخصص لك وقت للجلوس على الأنترنت , هذا له تأثير كبير بمشاكل العين ><

 

[Zero_IYAD]

عبد الله, الشخص يلي يعمل فحص العيون - يلي عادةً يكون مجاني في محلات النظارات - 99% يكون مش طبيب, مجرد فني أو موظف و الفحص المجاني مجرد وسيلة تسويقية, و ضررهم أكبر من فائدتهم.
دائماً عوّد نفسك تزور طبيب أخصائي عيون قبل تفصيل أي نظارة, و خذ النتائج على ورقة و اطلب من المحل يفصّل النظارة بناءً عليها.
أنا طبيب, و استمريت أستعمل نظارة خاطئة لـ10 شهور سببت تراجع بعيوني و تعلمت بالطريقة الصعبة! لا تثق بأي شخص مالم يكن أخصائي و شهادته على الجدار خلفه.

 

[Arashi]

الجفاف والارهاق سبب اساسي ان فحص النظر يفشل..هل يقطرون عينك قبل الفحص؟
واحتمال تحتاج فحص انحراف العين والضغط وسُمك غشاء العين والقرنيه....وكذا شغله ممكن تأثر عالنظر
واذا حاس ان الاصابه لها علاقه فنصيحه افحص عند جراح ليزك وخله يسوي لك فحص شامل...حتى لو مب ناوي تسوي ليزك ترى دكاترة الليزك ممتازين وفحصهم ادق مليون مره من العاديين

كانت عندي مشكله اني لو سويت نظاره 6 على 6 اصدّع ولا اقدر اتعود عليها..ولو شوي خففت طبعا ما اجوف 100% عدل....لين فحصت ليزك وطلع العيب من عيني
وكان الليزك الحل الوحيد (بالنسبه لمشكلتي) 😀

وماتجوف شر ^^

 

[fatal framer]

افكر اسوي ليزك بس مادري انطر جم سنة زيادة ممكن يطلع جهاز يديد يكون افضل او اسويها الحين
في احد سواها غير العضوة اراشي ممكن يفيدنا
متى قدر يشوف بعد العملية وجم يوم استعمل النظارة والقطرات

 

[بندول]

افكر اسوي ليزك بس مادري انطر جم سنة زيادة ممكن يطلع جهاز يديد يكون افضل او اسويها الحين
في احد سواها غير العضوة اراشي ممكن يفيدنا
متى قدر يشوف بعد العملية وجم يوم استعمل النظارة والقطرات

اخوي العود سواها قبل كم سنة و اذكر قعد شهر بعد العملية بنظارات شمسية في كل الأوقات و قطرات لكن نظره بعدها صار مثل الطير في السما ما شاء الله.

و هي على حسب فحصك عند دكتور الليزك بعض الناس يمنعون عنهم العملية بسبب اعتلالات موجودة عندهم في العين من الولادة.