رحلتي لأول معرض عالمي للجيمز .. Gamescom

[IBrAhiM_86]

السلام عليكم ..


ما اخفي عليكم اني لما حضرت معرض TG EXpo السنه اللي طافت .. جدا عجبني الوضع .. فتحمست اكثر اني احضر معارض عالميه ..

فكرت في E3 لقيتها صعبه وخاصه انه شهر 6 و اجازتي تبدأ شهر 7 .. فلقيت انه ماكو غير Gamescom ..


و الحمدالله بعد التوكل على الله حجزنا انا وصاحبي لـ Cologne المكان اللي فيه المعرض وكانت مدة اقامتنا بكولن يومين .. من 17/8 إلى 19/8 ..

خلال هاليومين مرتين رحنا المعرض من اصل ثلاثة ايام .. لانه اليوم الاخير رحنا كملنا رحلتنا لميونخ ..


بدت رحلتنا من مطار الكويت الى مطار فرانكفورت عن طريق طيران Lufthansa وبعدها الى بالقطار الى كولن ..

والرحله استغرقت 5 ساعات بالطياره .. ومحد طوف الوقت بسرعه غير Big Bang Theory وحبيب القلب شيلدن ..

واخيرا وصلنا مطار فرانكفورت .. مدة الرحله 5 ساعات من 12:30 لي 4:30 تقريبا ..

بعدها خذينا اغراضنا و جناطنا ورحنا لمحطة القطار وبانتظار القطار اللي بودينا لي كولن ..

وصل القطار و رحنا لمدينة كولن .. والرحله استغرقت قريب الساعه ..

اول ماوصلنا لاحظنا انتشار اعلانات المعرض في كل مكان ..

مدينة كولن جدا هاديه على عكس مدينة ميونخ والجو كان حار في النهار او بليل ..

واخيرا وصلنا الفندق RadissonBlu Koln ..

سوينا Check in و ريحنا شوي بالغرفه .. الغرفه كانت مريحه بالنسبه لشخصين ..

اليوم الأول .. Day One


عقب مارتحنا شوي .. طلعنا و الوجهه كانت معرضMesseplatz اللي يقام فيه حدث Gamescom ..

طبعا لحد هاللحظه مانمنا .. يعني رايحين سهرانين بس الحماس طير النوم من عينا ..


وصلنا المعرض وكان في شوية زحمه بره ..


رحنا عند كشك علشان يعطينا ربطات التقيم العمري .. وللاسف بوقتها نسيت الجواز و الـ ID بالفندق ..


الموظف مارضى يعطيني الربطه علشان ادخل فقعدت اساحل فيه لين اقنعته انه عمري 26 ورضى يعطيني ربطة 18+ ..


وصلنا دخلنا داخل و طلعنا التذاكر يسوون لهم سكان .. وبعدها دخلنا ..

طبعا دخلتنا كانت عشوائية يعني لا شفنا خريطة المعرض ولا شي ..


فأول صالة دخلناها كانت صالة شركات كمبيوتر مثل Samsung - Logitech - LG - Acer ..


سامسونج كانت مسويه مثل مسرح وتعرض فيه بطولات مثل فيفا والعاب الكمبيوتر الاستراتيجية ..

طلعنا من هالصاله اللي حتى رقمها ماعرفه ..


ودخلنا الصالة اللي وراها .. واول ما دخلنا شفنا باص خاص للعبة BorderLands 2 ..

كملنا طريجنا وصادفنا اقسام لألعاب ( BorderLands2 - Dishonored - Batman ArkhamCity WiiU ) ..


طبعا الشي اللي صدمني انه كل قسم في بره طابور طويل .. توقعت راح القى زحمه بس مو لي هالدرجه ..

عقبها توجهنا لقسم EA و الالعاب اللي اذكرها FIFA13 - Crysis3 - NFS MostWanted - Medal of Honor

مثل ماتشوفون طابور مرعب لميدل اوف اونر ..


رحت بوقف في طابور فيفا قلت بجرب الديمو .. انصدمت من الطابور .. هونت عساني ماجربتها ههههههه ..


موفرين فوق 20 جهاز وكل جهاز اثنين يلعبون وفوق هذا لازم تنطر بالطابور قريب ساعتين !!!

هذا ستيج نيد فور سبيد ..


كان ودي اجرب الديمو بس للاسف الزحمه لا تطاق وانا من النوع اللي ماحب الزحمه ..

وصلنا قسم Capcom و الالعاب المعروضه RE6 - DevilMayCry - LostPlanet 3

بعدها وصلنا لقسم Ubisoft و الالعاب كانت Assassins Creed 3 - Zombie U - FarCry3


ييت بجرب ديمو FarCry3 و انصدمت انه لازم انطر 300 دقيقه .. يعني قريب 5 ساعات .. يعني مالهم أمل !!!!

*أحسه حاقد علي ليش صورته*

خلصنا وبعدها رديت لقسم Capcom ولا مسوين مثل عرض للعبة RE6 ..


كان في شخصيات Cosplay مثل ايدا و زومبيز ..


الناس كانت متفاعله معاهم بشكل كبير وصار فيه توزيع تيشيرتات و اكسسوارات اللعبه ..

و بعدها مريت على الحب TombRaider <3 ..


بس احبطت اني ماقدرت اجرب الديمو من الزحمه .. واحبطت بشكل عام انه اغلب الاماكن زحمه بو ساعتين وانت طالع :crying: ..

و انا قاعد امشي شفنا هالاخ اللطيف قاعد .. شكله كاره الدنيا لوول ..

وصلنا لقسم Konami و الالعاب الموجوده MGRising - Castlevania - PES2012 ..


القسم كان بارد مافيه شي يحمس ..

كملنا لين وصلنا قسم SONY .. وبصراحه القسم الوحيد اللي احسه منظم ومرتب ..

وصلنا لقسم الـ Vita وكان في وايد اجهزة للتجريب و الحلو انه حاطين كراسي وقعدات ارضيه ..


واخيرا قدرت اجرب اول ديمو في المعرض واهي لعبة LittleBigPlanet Vita ..


اللعبه كانت روعه وماحسيت بإختلاف بينها وبين نسخة PS3 .. والحلو انه محد كان وراي فشبه خذيت راحتي لو ما موظفة سوني قاعد تقرق على راسي ..

وبعدها حصلتلي الفرصه انه اجرب لعبة All Star .. والحق ينقال ماعمري جربت ماريو سماش ولا هالنوعيه من الالعاب ..
بس ككل اللعبه كانت حلوه وحماسيه .. صاحبي كان لعيب فيها و اكثر من مره طلع الأول ..

هذا واحد من المتحمسين لـ Sweet Tooth لوول ..

هني شياب متحمسين لـ SlyCooper 4 .. شكلهم حراميه لوول ..

و قدرت اجرب لعبة LBP Kart .. اللعبه عجبتني وحسيتها قريبه من ModNation ..

وبعدها شد انتباهي طابور لقسم Last of us .. وحلفت حتى لو الطابور 10 ساعات .. راح اجربها يعني راح اجربها ..

وهني صار وياي موقف خايس .. عقب ماوقفت بالطابور و نطرنا قريب ساعتين ونص ..


وصل دوري جان يسألني وين الـ ID .. طبعا انا ويهي انصفق لاني ناسي الـ ID و الجواز ..


وريته ربطة 18+ .. قالي شلون عطوك الربطه وانت ماعندك جواز او ID !!!


حاولت اتبع معاه اساليب ملتويه و ساحلته بجم كلمه بس مارضى و طلعني من الطابور T-T ..


بس قالي تعال باجر بالـ ID وراح ادخلك على طول بدون لا تنطر بالطابور ..


دخل صاحبي و طبعا بالاخير طلع عرض Presentation لـ الديمو الاخير المختلف عن E3 ..

[video=youtube;GApCMW1F7a0]http://www.youtube.com/watch?v=GApCMW1F7a0[/video]



عقبها ردينا الفندق مبجر لانه وقتها كنا سهرانين وتعبنا من النطره على Last of us ..​

 

[IBrAhiM_86]

اليوم الثاني .. Day Two



قعدنا من النوم مبجر علشان نروح قبل الزحمه ..

*غرفة عزابيه*



وصلنا المعرض و دخلنا من البوابه الرئيسيه ..


دخلنا وانصدمنا من الزحمه .. وبعدها استوعبت انه اليوم السبت .. والسبت اجازه عندهم ..


فأغلب اللي كانوا موجودين طلاب مدارس .. وللأسف ..

نطرنا في القهوه على ما تخف الزحمه .. وبعدها دخلنا قبل الافتتاح بنص ساعه ..

مكلمكم اخوكم ابراهيم ..




أول مادخلنا الصالة رحنا على طول وجربنا لعبة Tekken Tag ..


اللعبه كانت حلوه بس للأسف كنا نلعبها على Xbox360 و أنا ماعرف العب بتحكمها ..

وحده لابسه Cosplay لشخصية MineCraft ..


بعدها مريت على صالة Call Of Duty .. والصدمه انها صالتين وكل صالة تنطر فوق ساعتين !!! ..

بعدها صار موقف لصاحبي انه تلفونه انباق .. و رحنا لمكتب المفقودات يمكن احد يكون لقاه ورده للمكتب ..


بس للاسف راح عليه للأبد
:sadwalk:
..




بعدها قررنا نكمل بالمعرض .. وصلنا لقسم FIFA13 واكتشفنا انه الطابور صار دبل عن اليوم اللي قبله ..

وبعدها مرينا قسم Crysis 3 و قرر صاحبي انه يجرب الديمو ..


وانلطعنا قريب 4 ساعات :/ .. جربت الديمو وبصراحه ماعرفت ألعبها لانه اول جزء ألعبه لـ Crysis ..

بعدها رديت للقسم Last of us و معاي الجواز ودخلت على طول بدون نطرة طابور ..

طبعا اللي بالطابور حقدوا علي لوول ..


عقب ما خلصنا قررنا انه نتغدا وبعدها رجعنا الفندق للتعب والارهاق ..


وفعلا النطره بالساعات تتعب الجسم ..







بالأخير الحمدالله قدرنا نروح معرض Gamescom
😡
.. والمعرض كان رائع ومنظم .. بس الشي السيئ انه ماجربنا ديموات اهم اللالعاب ..


وان شاء الله مو أول مره اروح فيها معرض عالمي ..


واشكركم على المتابعه
:happy:
..​

 

[i7asan]

استمتعت في قرائة الرحلة والتغطية.. التصوير مرتب وبسيط اهنيك عليه
اتمنى يوم من الايام تحصل لي فرصة اروح معرض من معارض الالعاب.
سالفة الانتظار شكلها مملة، انا اكره انتظر فترة طويلة عشان اجرب او اخذ حاجة

 

[midoyemen]

ماشاء الله موضوع مرتب وسلس وادخلتنا معك في جو المعرض , حلم حياتي يوما ما ا احضر معرض للالعاب مثل اي 3 او جيمزكوم بالمستوى العالمي .... اعجبتني الصور المتنوعة في الموضوع ^_^ بالتوفيق لك في تغطية المعارض القادمة 🙂

 

[Nintendo]

موضوع جميل جدا جدا جدا اخ ابراهيم، التغطية بالصور والقراءة للفوز دائما

ولو انك متأخر علينا شوي لانه المعرض خلص من فترة ولكن مايمنع الإشادة بعملك الممتاز

 

[Karim le BOSS]

رهيب الموضوع جدا

حمستني معاك

 

[Raheem]

الموضوع خفيف وجميل
اقلك اخ ابراهيم اذا بتدخل المعرض لازم تدفع فلوس؟

 

[q8-gamer]

موضوع جميل ومرتب استمتعت بالقراءة ... وان شاء أحظر معرض اي 3 في يوم من الأيام

ليش ما يشوفون لهم حل مع الزحمة .... يعني ما يتوقعون انه العدد اللي يستقبلونه راح يكون كبير

 

[kiryu]

تغطيتك مررة ممتازة لكنك تأخرت كثير فيها و أحسن بكثير من التغطيات الأخرى اللي باليوتيوب اللي أنا للحين ما إستفدت حاجة منها
مشكوور أخوي

 

[XORO]

تغطية ممتازة جدا

وخاصة وصف الرحلة والمعرض بالصور

 

[Akh Morn]

وعليكم السلام، ما شاء الله، الموضوع مرتب وممتاز. استمعت بقراءته صراحةً.
إن شاء الله تصير لي فرصة مستقبلاً وأحضر E3 🙁.

 

[Unknown]

بعدها رديت للقسم Last of us و معاي الجواز ودخلت على طول بدون نطرة طابور

الحين الي جاي من برا البلد .. له الاولويه يجرب ؟

 

[midoyemen]

الحين الي جاي من برا البلد .. له الاولويه يجرب ؟

لا هو ذكر سابقا انه ماقدر يدخل بدون اي شي رسمي يدل ان عمره اكبر من 18 يعني جواز او بطاقة فوعدوه لو جاب اي شي رسمي بيدخلوه على طول ثاني يوم بدون طابور سواء جواز او بطاقة يعني الجنسية مالها دخل بالاولوية !

 

[IBrAhiM_86]

مشكورين شباب .. اسعدتوني بردودكم الطيبه ^^ ..

و بالنسبه لتأخري في الموضوع .. بالاساس انا مقرر اول ما ارد انزل الموضوع لكن نسيت ..

و تذكرت يوم أشوف موضوع يوم اللاعبين .. فالسموحه عالتأخير ..


أخ am606
اي نعم اخوي الدخله بفلوس ..
اهم 4 ايام .. كل يوم له سعره وخاصه انه نهاية الاسبوع سعر التذكره تفرق عن الايام العاديه ..

الحين الي جاي من برا البلد .. له الاولويه يجرب ؟

رد عليك اخ ميدو .. انا باليوم اللي قبله كنت واقف بالطابور بس كسروا فيني لانه مامعاي جواز او اثبات ..
فقالي تعال اليوم اللي وراه ومعاك الجواز وادخلك على طول :happy: ..