Punished Noctis
A Silver Bullet
اوكى ياكوزا 4!
ياكوزا 4 لعبة مثيرة للإهتمام لعدة أسباب. السبب الأول هو أن 3 كانت تحسسك انها ختامية كويسة جداً لقصة كازوما كيريو وطبيعي تكون مهتم تشوف إيش بيسووا بالشخصية بعد اللي حصل هناك. السبب الثاني ييجي كنوع من الرد على الأول، في كون اللعبة أول ياكوزا مش من بطولة كيريو بالكامل. في ياكوزا 4 في 4 شخصيات رئيسية، ولو ركزت شوية مع القصة بتلقى ان كيريو حتى مش جزء محوري منها، هو بس "موجود فيها". بسهولة أقل الأبطال اهمية في القصة هنا.
مين الأبطال؟ عندك الـ Loan Shark المرابي اكيياما. هذا البطل المرة كوول. انسان chill ورايق وحابب حياته وحابب الناس، وقصته مربوطة بشكل لذيذ وذكي بقصة ياكوزا الأولى. اللعبة تبدأ مع اكيياما وخلصت وهو لسه شخصيتي المفضلة فيها، وأحسن إضافة جديدة لعالم ياكوزا من الإضافات اللي قدمتها 4. اكيياما زي ما قلت انسان جداً رايق ومش فارقة معاه الدنيا وهذا الشيء لوحده يخلي اللعب به تجربة مختلفة تماماً عن اللعب بكيريو. سالفة أنه loan shark جداً انتيريستنج برضو ومهمات جانبية كثير مبنية حوله وتستغلها. اكيياما روعة.
سايجيما هو شخصية كنت متحمس لها كثير من التلمحيات اللي قدموها عنه في ياكوزا 4، وكان قد الحماس صراحة. سايجيما قريب كثير من كيريو في كونه انسان مرة قوي، مرة جاد، مرة شهم. الفرق بينه وبين كيريو ان بوصلته الأخلاقية مش مثالية زي كيريو، وسوى عدة غلطات بحياته، واحدة منها كانت مرة كبيرة وهي بداية قصته هنا. اللي حبيته اكثر من شخصية سايجيما هو علاقته مع ماجيما جورو. اعتقد هذه أول مرة في السلسلة ماجيما يلعب دور كبير بالقصة أكثر من انه بس منافس/صاحب كيريو، والدور كان ممتاز. سايجيما برضو مرتبط في قصته بشخصية معينة من ياكوزا 3، واللي سووه بهذه الشخصية كان جداً ممتاز في رأيي.
بعدها عندك تانيمورا. محقق شاب مات والده وهو يحقق في قضية من 25 سنة، وتانيمورا يحاول يعرف مين قتله وينتقم له. قصة تانيمورا و"نوع" شخصيته جداً مكررة وهذا الشيء خلى حماسي له في البداية ضعيف. لحسن الحظ الولد عنده اشياء تميزه، على رأسها انه مش شرطي مثالي، في الواقع هو فاسد حبتين. يقامر وقت الدوام ويبتز المحلات لتدفع له فلوس حماية. للأسف اللعبة ماتركز على هذه الجوانب وفي الواقع تنساها تماماً لاحقاً اما القصة تحمى. في النهاية اعتقد ان تانيمورا كان شخصية كويسة جداً، لكنه أكيد الأضعف بين الثلاثة الجدد.
ومن ثم يبقى لك كيريو حبيب الملايين.
العبة مبنية على ياكوزا 3 وتشبهها كثير، مع الفرق الجوهري ان هذه المرة في 4 أبطال ولكل بطل أسلوب لعب مختلف. تقسيم القصة مش زي زيرو اللي تنط بين الأبطال كل شابترين. هنا اللعبة مقسمة لـ Parts وكل Part من بطولة شخصية معينة، تخلصه بعدها تنقل للشخصية اللي بعدها. اعتقد أنهم ماوفقوا كثير في هذا التوجه ومنطقي كونها محاولتهم الأولى. اعتقد أنهما ما مستروا فكرة الشخصيات المتعددة هذه إلا مع زيرو. 4 أبطال مرة كثير، وإعطاء كل منهم بس جزئية قصيرة من القصة هو توجه.. غير مشبع.
لكن الجيمبلاي فنان صراحة. اكيياما سريع ويشبه كثير الـ Rush Mode اللي عند كيريو في زيرو وكيوامي. مش مميز كثير لكن ممتع كفاية كونه اول شخصية وجزئيته اقرب لتوتوريال.
سايجيما بطيء وقوي ويشبه الـ Beast Mode لكن برأيي جداً احسن، ويمكن الاسلوب القتالي المفضل عندي بالسلسلة للحظة. هنا هجماتك اغلبها charge based لكن ماتقدر تشحنها قد مابدك زي زيرو/كيوامي، هي تشحن لثانية - ثانيتين بعدها تنفك اوتوماتيك. اه وهنا عندها ارمور بمعنى ان لو انضربت وانت تشحن الشحن مابيروح. فالقتال هنا عنده momentum جداً ممتع وإدماني اما تتعود عليه.
تانيمورا عنده اكثر اسلوب قتالي مثير للإهتمام في السلسلة. الولد ضعيف ومايقارن بدببة الياكوزا ابداً، فيعتمد على الدفاع أكثر. عندها زي parry mechanic انك تنتظر العدو يهاجم وتعرقله بعدها تبدأ الكومبو حقك. اللعب بتانيمورا يغصبك انك تلعب بأسلوب مختلف عن اي شخصية ثانية في ياكوزا. صعب، بس جداً ريواردنج. الزعيم الأخير له واحد من هايلايتس السلسلة كجيمبلاي.
وكيريو زي ماهو، حبيب الملايين.
اه وقبل ما انسى، عملوا شيء لذيذ هذه المرة في كاموروتشو هو انهم وسعوا فيها فيرتيكالي. بمعنى ان صار تقدر تطلع على السطوح وتنزل تحت الأرض. اللعبة ما استغلت هذا كثير، لكن كانت اضافة موفقة وتغيير طيب.
اوك القصة.
هنا الموضوع يعقد شوية وهذا المعتاد من السلسلة صراحة. الباكج القصصي الوحيد المتكامل من السلسلة للحظة هو زيرو. من بعدها كيوامي/1 اللي عندها بلوت ممتاز لكن كان ناقصهم الخبرة انهم يطبقوه صح، 3 اللي عندها احسن لحظات السلسلة لكن بنفس الوقت عندها اسوأها وأكثرها غباوة، والحين 4.... 4 زي 3، في أنها تبتدي جداً ممتازة وينزل مستواها لاحقاً، لكنها تختلف عن 3 في أن افضل لحظاتها مش بنفس القوة، وأسوأ لحظاتها مش بنفس السوء. 4 اثبت في المستوى، لكنها مش بنفس الـ memorability كقصة.
يلا سبويلرز.
------------------------------------------------------------------------------------------------------------------------------------
اوكى مبدأياً احب اقول ان اللي سووه بهامازاكي يمكن تشيزي شوية لكن جداً ممتاز. جداً حبيت علاقته مع سايجيما، ولحظاته مع كيريو لاحقاً. حبيت الشخصية جداً وتمنيت انهم مايقتلوها لكنهم فعلوا، لسبب واحد لو تفكر فيها. ان هامازاكي قتل قبل كدة. هذه مشكلة كبيرة في السلسلة وبرزت بأبشع صورها في 4. الفريق مؤمن ان كل الأبطال والشخصيات "الطيبة" لازم يكونوا ملائكة.
شخصية غلطت وقتلت واحد؟ لازم تكفر عن ذنوبها بأنها تموت. وبالغالب بطريقة غبية. الشيء هذا مرة ينرفز والمرة هذه كان له ضحيتين، هامازاكي وياساكو.
ياساكو كانت شخصية كويسة وكان ممكن تروح اماكن انتيريستنج لو عاشت، لكن، يلا.
القصة بدأت مرة قوية بيوميات اكيياما ثم رحلة سايجيما للبحث عن الحقيقة. حسيت ان القصة على طريقها انها تصف مع زيرو، لكنها بدأت تتهاوى من أول ما بدأت جزئية تانيمورا. اكثر شيء نرفزني هو موضوع الـ Rubber Bullets هذا اللي ابداً مش منطقي وتلفيق بالغصب علشان سايجيما يصير بريء ماقتل احد في حياته - زي ماقلت فوق، حاجة تنرفز -. لكن سالفة الشرطي اللي اصلاً ياكوزا متنكر والياكوزا اللي اصلاً شرطي متنكر كانت مرة تنرفز برضو.
دوجيما دخل في الموضوع عرض وماحسيت انه كان ينبغي يكون فيلين، لكن اللعبة كانت محتاجة 4 فيلينز علشان الـ 4 ابطال يقاتلوهم بشكل ملحمي والفلوس تطاير في القتال الأخير. القتال الأخير كان من اكثر الحاجات الهايب في حياتي فبسامحهم.
------------------------------------------------------------------------------------------------------------------------------------
هي القصة بشكل عام تهاوت بشكل كبير بثلثها الأخير، لكن زي أي ياكوزا، لسه كويسة وممتعة جداً. يكفيها شرفاً انها قدمت ليا شخصيات مثل أكيياما وسايجيما، بعض من اروع الشخصيات وأكثرهم كاريزما في اي لعبة فيديو. لكنها خلتني اتمنى ان الكتاب يبتدو ياخذوا قصص السلسلة بشكل أكثر جدية - وهذا اللي حصل لاحقاً فعلاً في زيرو -.
إجمالاً.. السلسلة للحظة مازال مستواها تصاعدي! وهذا شيء طيب جداً. كيوامي < 3 < 4 < زيرو. ولو أن كقصة بحط 3 فوق 4.
بعدها عندك Dead Souls!
اوك، الحين هذه لعبة فعلاً مثيرة للإهتمام!
ماكان عندي نية العبها قبل ما اخلص السلسلة، لكنها كانت عند صاحبي اللي استعرت منه 3 (ترافيا: هذا يخلي صاحبي واحد من الـ 9 آلاف شخص في العالم اللي اشتروها في اللانش) فقلت ليش لا. نلعب السلسلة كلها بالترتيب.
انا كنت داخل على اللعبة ناوي اني استحمل الجيمبلاي واستمتع بالقصة.. واللي حصل يكاد يكون العكس! ديد سولز لعبة خفيفة جداً على القصة! بالكاد فيها قصة! هذا شيء غريب جداً من فريق ياكوزا، اللي توقعت انهم يلعبوا لعب بموضوع الزومبيز هذه. في حاجات كثير كوول كانوا يقدروا يسووها بالشخصيات في زومبي سيتينج، لكنها ماحصلت. في الواقع، هذه اكثر ياكوزا للحظة تركز على الجيمبلاي!
والجيمبلاي جداً مثير للإهتمام! هو cluncky وكثير اوقات بتحس انك تحارب التحكم والكاميرا، لكن هذا جزء من التشارم! لأن اللعبة تعطيك احساس لعبة PS2 نزلت قبل ما Resident Evil 4 تحط الستاندرد للجينرا! جداً غريبة جداً غير تقليدية جداً عندها افكار ماشفتها في اي مكان ثاني، هذا لأنها في غالبها غير عملية لكن مميزة ياخي!
صراحة كنت ناوي اضيع وقتي واشرح كيف الجيمبلاي يشتغل لكن مافي أمل. لازم تلعب هذا الهجين الغريب من ريزدينت ايفل الكلاسيك، ريزدينت إيفل 4، ماكس باين، وديد رايزينج لتعرف كيف يشتغل. هل هو كويس؟ لا. هل مافي تكرار؟ إلا اكيد في تكرار. هل هو ممتع وإدماني مرة؟ أيوة!
اللعبة فيها كذلك احساس العاب سيجا التجريبية الغريبة القديمة هذا اللي ما اعرف كيف اوصفه لكن كلكم عارفينه يعني. وهذا الشيء خلاني احبها اكثر.
الشيء اللي فعلاً كويس في اللعبة ومش بس charming هو قتال الزعماء! صراحة كنت كثير مفتقد قتالات الزعماء بألعاب الشووترز.. وديد سولز وفت وكفت من هذه الناحية. اللعبة متروسة زعماء وكل واحد عنده جيميك واسلوب قتال مختلف. الزعماء يذكروني بـ - آسف - دارك سولز بحيث انهم يسووا انيميشنز معينة لتعرف ايش الضربة اللي بتجيك قبل ماتجيك، ويعطوك فرصة تتفاداها. اللعبة فيها نظام تفادي جداً reliable بإينفيزبلتي فريمز كثيرة جداً فاجأني وخلى القتالات هذه مرة ممتعة.
عجبني برضو كيف الشخصيات الأربعة كل واحد يعطيك شعور مختلف ومنظور مختلف عن حادثة الزومبيز هذه. اكيياما مش مستوعب اللي حاصل بس عادي يسلك ويعيش مش فارقة معاه - أحب الرجال هذا والله -، كيريو جداً متنرفز ومركز على استرجاع هاروكا، جودا مالعبت ياكوزا 2 فمش متأكد بالضبط بس كأنه في رحلة تكفير عن الذنب؟، وجورو ارهب شخصية لأنه جداً جداً جداً مستمتع بالموضوع
الرجال ما صدق يطلعوا زومبيز جد وكأنه طفل في مدينة ملاهي. انبسطت له والله. والمشهد الأخير ياخي !أكبر مشاكل اللعبة الصراحة هي البريفورمانس. المحرك المعاق هذا مش مصمم ليستحمل بارتكلز وإنفجارات، والفريم ريت يهبط كثير.. كثير كثير كثير كثير! المشكلة الكبرى ان الفريم ريت مربوط بالجيمبلاي، فاما يهبط اللعبة سرعتها تنزل وتصير سلو موشن حرفياً. الموضوع هذا يحصل كثير مرة بالنصف الثاني وخرب علي متعة الجيمبلاي كثير صراحة.
اللعبة برضو جداً مكررة خارج البوس فايتس، ومحاولات التنويع في غالبها غير موفقة.
والقصة مش موجودة اغلب الوقت. واما تكون موجودة تكون خايسة.
والجانبيات في اللعبة هي الأضعف في السلسلة.
لكن لسه! سبين اوف مسلي! لو كان فيه قصة زي الناس بدل التوجه الغريب اللي اتخذوه هذا، وبدون مشاكل بريفورمانس، كان بيكون بمعزة الأجزاء الرئيسية. بشكله الحالي هو بس بريك مسلي ولطيف بين ياكوزا 4 و5.
وأوك خلص الموضوع..... ماعدا أني عايز اتكلم عن حاجة اخيرة بسرعة!
من فترة لعبة ديمو Yakuza 6... وعندي كم كلمة اقولهم عنه.
اللعبة تستعمل محرك جديد إسمه الـ Dragon Engine. المحرك هذا مبني من الصفر للـ PS4 وتقنياً ياكوزا 6 هي أول ياكوزا نيكست جين. الموضوع هذا جاء مع تضحياته طبعاً، كون اللعبة نزلت من 1080P @60FPS في زيرو وكيوامي لـ 900P @ 30FPS. والـ 30 مش ثابتة حتى. تنط وترجع كثير.
بس التضحية كانت وورث إت! لأن المحرك الجديد مش بس جرافيكس بل يسمح بتجربة seamless أكثر من أي وقت مضى! مافي اي وقت انتظار بين الاستكشاف والمعارك! تقدر تدخل وتطلع من المباني مباشرة بدون لودينج سكرين! كل اوبجيكت في اللعبة تقريباً interactive بفيزيائيته الخاصة! اللعبة فعلاً كأنها ياكوزا نيكست جين!
لكن احساسها غلط. وما اعتقد انه بسبب الفريم ريت كوني لعبت اجزاء الـ PS3 وكانت 30 فريم عادي. الحركة بكيريو كانت جداً مزعجة في الديمو، خصوصاً انه صارت حركته الديفولت بطيئة ولازم تضغط زر ليجري، وهذا شيء غير عملي ابداً للسلسلة. صار سهل جداً تخبط في اشياء وتعرقلك كثير. والأهم من كل هذا، القتال شعوره غلط. مدري لو بيتغير رأيي اما العب اللعبة كاملة لكن القتال صار جداً... ناعم ومظبوط فيزيائياً بزيادة. مش عنده نفس ثقل وimpact القتال المعتاد في ياكوزا. مش مساعده انه صار ستايل واحد بدل الـ 4 ستايلات من زيرو/كيوامي، والهيت موفز اصبحت اقصر بكثير وأقل "كوميكية". آه والكاميرا مشكلة حبتين وتتحرك مع نفسها بزيادة.
الديمو اعطاني الإحساس انهم بالغوا بجعل هذه اللعبة tech demo، لدرجة ان الموضوع أثر سلباً على الجيمبلاي - وحسب الإنطباعات، المحتوى -. بصراحة، تمنيت يصبروا على مغامرتهم هذه لـ Shin Yakuza مع البطل الجديد، ويركزوا على تقديم ختامية اسطورية لقصة كيريو بمحرك 5/زيرو/كيوامي. لكن يلا حصل خير، من اللي شفته متوجس من اللعبة.
عموماً.. الخطوة الجاية؟ ياكوزا 5. لكن اجازة الصيف خلصت والمقدرة على الماراثون انتهت.. وفوق كدة هذه بتكون آخر ياكوزا باقية لي العبها لحد نزول 6 في مارس.
فقررت شيء!
باخذ راحتي بالكاااامل مع ياكوزا 5.. اللي عليها اجماع انها ادسم واضخم جزء في السلسلة. راح اخلصها 100% واجيب البلاتينيوم تروفي (يمكن). بآخذ راحتي على الآخر واما تنزل 6 في مارس بكون جاهز لأعطي ختامية قصة كيريو المعاملة اللي تستحقها.
اكتشافي لسلسلة ياكوزا كان أحسن شيء صارلي ترفيهياً هذا الصيف.
شكراً سيجا.
وأتمنى ان كلكم تروحوا تلعبوا.. لايك.. ناو... لايك... زيرو عليها تخفيض على البسن الأمريكي... بس انا لو مكانكم ما بستعمله... بستنى التخفيض يخلص وبدفع عليها 60$ لأن هذا اقل شيء تستحقه. بسوي اكاونت ثاني وأحط فيه 60$ ثانية واشتريها مرة كمان وأتبرع بيه لواحد.. الواحد هذا بيلعبها وبيخلصها وبيروح يشتريله نسخته الفيزيكال الخاصة بـ 60$ ليحطها على رفه... علشان اما يصحى من النوم مفجوع.. ينظر للرف ويشوف ياكوزا 0.. ويبتسم وتنزل على خده دمعة ويتذكر ان في خير في الدنيا.. ويرجع ينام.
ياكوزا 0 خلابة ياخي. ياكوزا كلها خلابة. بس 0 اخلب.
يلا روحوا اشتروها: https://store.playstation.com/#!/en-us/games/yakuza-0/cid=UP0177-CUSA05070_00-YAKUZA0AMERICA00
