Old Hunter
True Gamer
اهلا ، اليوم انا راح اكتب عن تجربة شخصية حصلت لي، والدافع وراء كتابتي اني حبيت اشاركم باحداث القصة لانها ما انتهت الى الان ،
طبعا كلنا سمعنا/استخدمنا التسوق الالكتروني ، ومن منا لا يعرفه ؟ شعور جميل انك ترجع من الجامعة او من برا البيت بشكل عام
وتشوف شكل الباكج اللطيف امام باب الشقة ، ترتسم على وجهك ابتسامة خصوصا اذا كان شي من زمان وانت تستناه، كولكتر
او اي شي اخر ..
انا اسكن في مجمع سكني، عبارة عن شقق متقابلة ، واحقاقا للحق هناك الكثير من الناس اشكالهم تثير الشك في هذا المبنى ،
عموما ، اغلب وقتي يكون في الجامعة او خارج الشقة ، وبالعادة لما استلم ظرف ، تجيني رسالة على الجوال ان الظرف امام باب منزلي
( وهنا هو مفتاح الموضوع، هذا غلطي تماما اني سمحت لهم بانهم يتركونه ، معطيهم الاذن ) ولا هم عادة لازم تكون موجود عشان
توقع ، او يسوون اعادة جدولة. السكن الي كنت فيه قبل ، كانت تجلس اغراضي امام باب المنزل بالايام ولا احد يشيلها " امان اكثر " .
عموما اول موقف كان لي هو مع لعبة Kingdom Hearts II وصلت عند الباب ، مع ان اللعبة صغيرة جدا وكان بامكان موظف الـ UPS او
Fedex يحطها في صندوق البريد ، بس العجز ما خلاه ، مجرد ما رجعت البيت مافيه اي ظرف امام الباب مع انه اكيد توصل .. استغربت
شوي وقلت معقولة انسرق ؟ وفعلا الظرف انشال من امام باب منزلي ، تواصلت مع امازون ، عطوني خيارين ، بديل او تعويض .. اخترت
بديل طبعا ، وجاني البديل.
المهم ، انا استغربت وقتها وقلت يمكن حصل خطأ او اي شي ، وصل البديل والامور صارت تماما ، بعد عدة ايام كنت مستلم باكج اخر،
هنا المصيبة وهنا انا بديت فعلا اتنرفز ، طلعت الصباح ، الساعة ٩ قريب من شقتي فيه محل كوفي Coffee garden قلت بتقهوى وكذا ،
طبعا طلعت امشي ، الكوفي يبعد تقريبا ١٠ دقايق من البيت ، وانا في نص الطريق ، جاتني رسالة " تم ايصال الباكج " على طول لفيت
ورجعت للشقه ، اقل من ٥ دقايق ، والباكج مأخوذ ، وواضح انه مشيول لانه كان تحت " مدوسة الولكم " الي قدام الباب وكانت مرتفعه
ولا فيه شي ، فعلا جن جنوني وقتها ، وجا في بالي انه انسان مترصد لي ، والي يقهر اكثر هو وش يبغى بالفيديو جيمز اساسا ؟
المهم فعلا كنت غاضب ، كنت احس بالاهانة اكثر من اي شي ، يعني انسان متقصد لك ، تحس انه يهين كرامتك للامانه قبل كل شي ،
والمشكلة مالي اي عداوة مع جيراني ، عموما كلمت المانجر تبع العمارة ، وقلت له الموضوع قال ما نقدر نسوي اي شي ، تواصل
مع شركات التوصيل وخلهم ما يخلون الباكج امام بابك ابدا ، قلت اوك .. بعدها طلبت بديل من امازون وجاني ونبهت عليهم يتواصلهم
مع شركات التوصيل انهم ما يخلون الباكج ابدا لانه صار كذا و كذا.
طبعا الباكج الي انشال ، Action figuers لشخصيات ون بيس ، ومانجا One Punch Man .
الجزء التالي في قصتنا ، هو اني نبهت على امازون مرتين انهم يتواصلون مع شركات الشحن ، لانهم لما يرسلون لي بديل يكلفهم اكثر
فافضل لهم يشدون من ناحية هالنقطة ، واكدوا لي انه ما راح يصير مره ثانيه ، للاسف ، الشي هذا تكرر مره ثانيه مع النسخة الخاصة
للعبة Life is Strange ، وقتها انا فعلا انزعجت ، يعني بشكل غير طبيعي ، طبعا كل الطلبات هذي Pre Orders ولا حبيت اوقفهم ،
لاني كل مره اقول مستحيل يتكرر الموضوع. عموما ، فكرت مليا في الموضوع ، وقلت الغضب الزايد ما راح يحل شي ، فبعدها بفترة وصلني
النسخة الخاصة لـ Legend of Zelda Twilight Princes وكان صاحبي في البيت، قلت له يستلمها لما تجي لاني في الجامعة ، الرجال
راحت عليه نومة، ولا استلمها ولا شي .. وبرضوا انسرقت.
هنا انا كانت نهاية شخصيتي اللطيفة ، كلمت واحد من اصحابي ، عنده GPS Tracker صغير جدا ، بعدين حطيت كم باكج قدام الباب وهمي ولا زال الشخص يسرقهم ، عموما ، واحد من الباكج كان داخله غرض فعلا " والتراكر " عشان ما ينتبه للتراكر خليت الباكج داخله شي ،
سبحان الله كان فيه شخص متوقع انه هو في نفس المبنى ، شخص جدا لطيف وبابتسامه دايمة ، ويسلم .. والخ . عموما رحت دقيت
بابه ، اول كلمه صدمته فيها قبل Hi او اي شي ثاني " وش استفدت وانت تسرق الاغراض من قدام بابي ؟ " طبعا ، هاجمني باسلوب
همجي بالكلام ، هم يقولون كذا ، رد الصوت بالصوت .. مع اني ما رفعت صوتي ، قلت له ابغى الباكجات كلها ، وابغى اعتذار منك افضل لك
ولا ما راح اوقف الا عند البوليس،
الرجال تاسف واعترف بخطاه ( المشكلة ابو عيال ) وكبير في العمر ، بس ما اعرف وش السبب فعلا ، بس فعلا حسيت ان كرامتي انهانت
كثير ، خصوصا انه يقابلني بابتسامة دايما " متخيلين الم الطعنة الي تحس فيها ؟ " ، تدرون وش الغريب في الموضوع ؟ الباكجات كلها
مسكرة ما فتحها حتى ! .. وعجزت اعرف وش السبب ، اخذت اغراضي ومشيت من عنده ، وعلى طولت رحت للشرطة وقدمت بلاغ فيه .
وسلامتكم ،
قصة حصلت لي وحبيت اشاركم فيها : ).
