تقـــرير مصور لـ Qosmio X505

[Al Pacino]

السلام عليكم ..



سواليف ماقبل شراء الاب توب اذا مو مهتم عد هالنقطه :

بعد ماحترت فتره طويله بين الاب توبات وضعت بين الغالي والي فوق حاجتي وبين الرخيص والي قد لا يلبي طلباتي .. طبعا اهم شي بالنسبة لي بلاب توب الجديد هو الالعاب .. وما اتكلم عن كل الالعاب بل الالعاب الاستراتيجيه بشكل خاص لوجودها الحصري على الـpc .. استشرت وبحثت وقلبت بالنت وزرت المحلات جرير اكسترا وغيرها .. الميزانيه بالبدايه كانت بحدود الـ 4000 وكنت حاط عيني على لاب توب اسوس بجرير سعره تقريبا 3800 .. وكنت باخذه لولا اني شفت هالكوزمو بأمازون بسعر ممتاز الي هو 1000 دولار ( مايقارب الـ 4 الاف ريال ) وشدتني شاشته الـ18.4 فقلت اسال اصحاب الحراج الالكتروني كم راح يكلفني مع الشحن والضرائب والعموله وكل شي .. بعد ماراسلتهم فكرت بالموضوع شوي وقلت اني باخذ الاسوس بس وبلا طلبيه بلا وجع راس .. نمت قمت الا رساله من الاخ التاج الذهبي تقولي ان التكلفه بتكون علي بحدود الـ 4300 وتحمست صراحة ! لاب توب بهالمواصفات وبهالسعر وقلنا نتوكل على الله وناخذه .. للأسف حظي ماكان ماشي ذاك اليوم بحيث اني يوم راسلت الاخوان باليوم الاول كان سعره الف دولار بينما اليوم الثاني يوم صملت على الشريه تغير البائع وصار سعره الف وميه دولا .. يعني سعره بدون شحن او شي ثاني مايقارب 4300 .. بـ بالاخير اتضح انه بيكلفني حول الـ 4500 مع احتمالية زياده السعر حسب الحجم الفعلي للسلعه لان امازون مو مضبوطين بالحجم تمام .. عموما الحسبه الاخيره طلعت 4700 .. الاب توب وصل بعد 15 يوم من الطلب وتم عن طريق الاخ التاج الذهبي الي سعدت بالتعامل معه

Qosmio X505-Q860​

مواصفات الجهاز :

المعالج : i5 سرعته 2.4

كرت الشاشة: NVIDIA® GeForce® GTS 360M

الرام : 4 جيجا ddr3

الهارديسك : 500 جيجا

شاشة : ال سي دي 18.4 رزلوشن 1680x945


باقي المواصفات هــنا


ننتقل للصور :

محتوى مخفي: كبيره شوي

للأمانه يوم طلبته ماكنت متوقع هالحجم الكبير ..​

الشاحن ضخم !​

كرتونه :​

تجربتي له :​

اول ماوصل لي طبعا انصدمت بحجم الشاشه الكبير والاب توب اجمالا .. بس سرعان ماتعودت عليه .. اللون الاسود والاحمر جذاب جدا ومميز .. الكيبورد انجليزي وكنت ناوي اطبع عليه بس شفت السالفه ممكن تاخذ يوم ومافيه شي مضمون وشفت نفسي اقدر اكتب عربي بدون ماشوف الكيبورد فقلت بلاش وجع راس .. اللمس الي على يسار الكيبورد حساس جدا ويضايق اذا كنت تكتب بسرعه ممكن تلمس بالغلط بس انا عطلت اغلب ازرار اللمس لانها اصلا ماتفيدني وتفيد غالبا الي يحب يسمع شي وهو على الاب ويتحكم بإيقاف المقطع مؤقتا ولا الانتقال للمقطع التالي او فتح مجلد الميوزك مباشرة .. الصوت بالاب توب ممتاز جدا والسماعات الي فيه عاليه بالصفاء والنقاوه خاصه اذا كنت تسمع شي وضوحه ممتاز .. خلوني اتكلم عن اهم نقطه والي تحمست اشتري هالاب توب عشانها الا وهي الالعاب :​

بالنسبة للألعاب فأنا جربت عدة العاب ومنها Empire Total War , The witcher , Mafia II, R.U.S.E وجميعها اشتغلت بجودة الـHigh بشكل ممتاز بس خاصية الانتي لايزنق " الي تخلي الحواف باللعبة ناعمة " اذا شغلتها تبدا اللعبة تقطع بس الي اعرفه ان هالخاصية يفضل تشغيلها اذا كان الرزلوشن نازل بينما اذا كان الرزلوشن عالي زي الي عندي فـ هالخاصية تقل فائدتها .. بالنسبة لـ كرايسس اللعبة اشتغلت معي على الHigh بس تجي بعض الاماكن الضيقة والي يصير فيها تفاصيل كثير تبدا اللعبة تقطع فـ انزل الجودة لـ Mid .. الى الان انا راضي تمام الرضى عن اداء الجهاز معي بالالعاب واتمنى ان يستمر معي بالمستقبل على هالنحو .​

ملاحظة : الموضوع كتب ايضا بمنتدى البوابة الرقمية ..

الي عنده اي استفسار انا بالخدمه​

 

[Al Pacino]

للأمانه الصورة الاولى جت معي بالصدفه .. توني احس برهابتي بالتصوير ! << لاتدققون حيل بالصور الباقيه ..

 

[Superx]

مبروك .. تتهنىء فيه ان شاء الله.

 

[alakafi]

الف مبروك ,

محتوى مخفي: :)

بس مو قادر اوقف عن التفكير ليش ماشريت بي سي بهالسعر و جبت مواصفات مضاعفة عن الي عندك , مادام اللابتوب تبعك فجميع الأحوال ماراح يتحرك كثير

 

[Al Pacino]

لاني ابغى لاب توب احركه بين وقت وآخر + مني حريص لدرجه كبيره على العاب الـpc + انا اصلا ما أحرك الاب توب كثير فـ شفت هالاب توب هو المناسب لي .

 

[zlatanovic]

ما شاء الله << عن العين >ـ>
الصراحه شكله ممتاز ومواصفاته ممتازهـ , واهم شي باللاب توب انك تكون راضي عنه والا غير كذا ما يهم ..
+ ما كأن حجم الشاشة مبالغ فيه ؟؟ انا زمان كان معي 17 وكنت اتعيجز اشيله معي بكل مكان .. لكن انت ادرى باستخدامكـ !
مبروكـ عليكـ وان شاء الله يدوم لكـ =)

 

[PS]

TOSHIBA

مبروك عليك أختيار موفق من أفضل الماركات و الاجهزة.

 

[Al Pacino]

انا زمان كان معي 17 وكنت اتعيجز اشيله معي بكل مكان .. لكن انت ادرى باستخدامكـ !

انا لقيت له شنطة اصلا عشان اقدر انقله ! رحت جرير واكسترا وبست وكلهم ماعندهم شنطة للـ 18.4 -___-"

 

[xz995]

شنطة مدرسة هي الحل

 

[Nintendo]

شنطة مدرسة هي الحل

او شنطة سفر

عالبركه الجهاز سعود وتشكر على التقرير

 

[G4mer]

مبروك مبروك 🙂
يتكسر بعزك خخخخخ
عندي سؤال ؟
البطاريه كم تدوم يعني ...يوم تخلص من شحنه كم ساعه يتم عندك قبل ما يفظي ؟
لأنه ما شفت أحسن من بطاريات apple الي تدوم ست أو سبع ساعات

 

[Al Pacino]

اوه سوري توني اشوف الردود .. الله يبارك فيكم ..

البطاريه ماتطول صراحة بحكم حجم الجهاز واستهلاكه بس تقريبا يقعد حول الـساعه وربع ساعه ونص على على الوضع العادي .. بيقعد اكثر لو خليته على وضع توفير الطاقه ..