نرجع مرا ثانية مع التحديث السنوي للمانهوات الي قرأتها @_@
ذي السنة للأسف رجعت للعادة التعيسة في تصفح كل شيء يطلع في وجهي ,_, لكن ذي المرة بس المانهوات وما رجعت للمانجا. ما رح احسب المانهوات الي تصفحتها لأن فكرة أني اجلس اجمعهم كلهم هنا طالعة جحيم فبذكر بس المانهوات الي قرأتها.
أعمال انتهت:
ما في. ذا عذاب المانهوات.
أعمال وقفتها:
ما في. ذا عذاب القناعة.
أعمال كملت فيها:
سنة أخرى من الفصول الي تنزل كل ما طلع البدر. "أوه شكلها فصول طويلة!" الفصل يخلص في أقل من الدقيقة. "أوه شكله القصة والرسم كويسين" قصة تحت الميد ورسم متوسط. "ليه مكمل فيها؟" لنفس السبب الي فاقدي الشغف لسه مستمرين في الحياة.
سنة أخرى من الضياع الكلي. ضياع يحسسك الكاتب مجبور يخلص العمل في ال 10 فصول القادمة... لكنه له سنتين بذا الضياع وما خلصها @_@ في شيء تغير في خطط الكاتب ما اقدر احط اصبعي عليه. بس آخر كم فصل صاروا أكثر بشرية وصرت اقدر افهم ايش جالس يحصل ومين ذي الشخصيات بشكل أحسن... متأخر شويتين؟ xd بس يا ريت السنة القادمة تكون أحسن للعمل لأني فعلا لسه أشوف فيه متعة وبوتنشل قهر ضاع بذا الشكل.
بعد ما حصلت حيطوس مرتين بسبب صحة الرسام. رجعت كملت أخيرا بشكل مستمر! لساتها قمة الضحك @_@ عادي تمر عليك فصول كثيرة من دون ولا ذرة آكشن ولسه تقدر تشوف نفسك مستمتع بس مع فصلات البطل. هي ممكن من أكثر الخيارات الآمنة لو سألني أحد ايش المانهوا المفضلة عندي عشان تكون هي جوابي. لو بخلي عيب فيها بيكون ال 0 رومانس. مش لازم هاريم بس خلوا ولو بنت واحدة تحب البطل؟ مش منطقي يكون في رجل مثله في العالم وما تنجذب له أي فتاة بذا الشكل @_@ الموضوع حتى البطل نفسه تكلم فيه وكيف عمره ما دخل في علاقة. متفهم سابقا قبل ما يقاتل كونه كان شخص مضطهد في المجتمع وبعد في حياته السابقة يوم كان مظهره وتصرفاته توحي لك أنه 100% مجنون, لكنه الآن شاب حليو وبعد مش بالجنون السابق حقه.
إيماني بكونها ذات بوتنشل عالي طالع في محله @_@ كان فيها أكثر فصل أثر فيني وخلا عيوني تدمع >_< فصل درامي يحسسك أنه الحدث ذاك لنا سنين ننتظرة وهو حرفيا ما له غير سنة! انكتب وانرسم بشكل عظيم جدا جدا جدا. لأي درجة حبيته؟ اذكر وقت ما خلصته رحت كتبت ثريد عنه وحطيت كل البانلات الي كانوا فيه وجلست اعلق على كل واحدة منهم ,_, غير الفصل ذاك المانهوا بشكل عام لطيفة جدا وتبني قوة البطل بشكل كويس. هو عبقري ما يطلع غير كل قرن لكنه لسه ضعيف مقارنة بمعظم الشخصيات الثانية حتى بعد كل الي مر فيه. لكن السنة القادمة ما عندي شك ولدي رح يصير بقوة باقي الفرسان وبعد رح يتزوج صديقة طفولته ويخلف من عندها 3 بيبيز ورح اصير جد 🙏
تقريبا مكمله على نفس وتيرتها في بناء العالم والشخصيات. في طموح كبير من الكاتب أن يخلي عمله قصة ضخمة. لكنها بالنسبة لي مش هايب. هو استمتع في فصولها لكن ما عندها مكان مميز في قلبي. ممكن عشان البطل لسه ما حصل على علاقة رومانسية؟ كان في تلميحات بس في الفصول الأولى وبعدها ذيك الشخصية حرفيا ما شفناها السنة كلها! ويمكن حتى السنة القبلها ما كان لها أثر @_@ بس يلا مسامحه على اهدافه ذي العملاقة جدا والي تحتاج لنا نفس رحلة ون بيس عشان يقدر يحققها.
هي كمان مرت بحيطوس طويل نوعا ما. الآن بعد ما صرت اتابعها أسبوعيا بدل التجميع صرت استثقل فصولها نوعا ما. ال Pacing فيها من أبطأ ما مر علي في حياتي. الشيء ذا كمان كان موجود في الفصول الي كنت مجمعها لكن يوم صارت أسبوعية عندي صارت المشكلة واضحة بشكل أكبر. يعني عادي حدث قصصي بسيط ياخذ أكثر من فصل بس عشان يوريك الحدث كيف حصل من كل النواحي ومشاعر وتفكير الشخصيات قبله وخلاله وبعده. ايش كان الحدث الخطير ذا؟ تلاقي شخصية تعثرت ولا لزقت علكه في شعرها... تعذيب نفسي يتفوق على المسلسلات التركية @_@ بس الصراحة مرات تكافئك على صبرك وتقدم لحظات لطيفة.
الأرك الحالي طالع نوعا ما كاجويا جولي شيك بس كويس أنه لفترة مؤقتة بس وبعد الكاتب مش شخص تعرض للخيانة من زوجته ورح يخلي الشخصيات تمر بنفس المشاعر عشان يعوض عن الخلل الي ما تعالج داخله.
بدأتها كمان في 2023 لكني نسيت اتكلم عنها ذيك السنة @_@ بدايتها كانت حدها مميزة. لكنها تبدأ تسلك الطريق المعتاد زيادة وحاليا أحداثها لسه مش واضح فين رح تروح. لكني مستمتع فيها جدا واشوف الشغالين عليها جالسين يطبخوا كويس + اشم رائحة سفينة رح تنطلع مع السنة القادمة 🥺
لا عاد تكتب رومانس يا كاتب يا وسخ. رومانس الشخصيات الجانبية كويس عشانه مبني بشكل مقبول لكن الشخصيات الرئيسية نهائيا ما ينبلع. الموضوع طلع من العدم وصار التركيز عليه رئيسي. لو كان مبني بشكل كويس؟ كان رح يكون كويس عندي جدا عشان العلاقة ذي ابي اشوفها! لكن علاقتهم الحالية الطريقة الي وصلوا لها مش راضي عنها. يا ريته السنة القادمة يرجع يركز على الآكشن فقط ,_, ...
شايفين التعاسة لوين واصله لدرجة خلاني أتمنى يسحب على الرومانس ويركز على الآكشن؟
مانهوا ثانية نزل مستواها بعد ما صارت أسبوعية معي. من كبرت البطلة والعمل بشكل عام أخذ دروب تدريجي. افتقدت جدا دخلات جدها الي كانت تجي معاها شيلات ,_, حتى كثير شخصيات ثانية ادوارها صارت شبه مهمشة والتركيز راح على الشخصيات الرئيسية في أحداث مش جوي. اما بالنسبة للرومانس الي بدأ بين البطلين... يع. مش جوي إطلاقا. في مشكلة في الكوارية مع كتابة الرومانس يوريك كيف فعلا أن مجتمعهم فيه أكثر بيئة سامة بين شركاء الحياة.
أعمال بدأتها:
من أكثر المانهوات متعة قرأتها ذي السنة @_@ جامعة لك مليون فكرة لكن بنفس الوقت تعرضهم بشكل مرتب ومش عشوائي. بطلة كويسة. شخصيات جانبية مش مزعجة. القهر الوحيد؟ الموسم الأول له فوق ال 5 شهور موقف! ليه؟ مش كأن الرسم كان أحسن شيء عشان يتعب الطاقم لذي الدرجة @_@ البريك المبكر الطويل ذا الصراحة ضرها عندي ونساني الكثير عنها.
كويسة. مش فكرة حديثة بس تطبيقها مش بطال والشخصيات الجانبية في العادة مع كذا قصص يكونوا تعيسين لكنهم هنا تحسهم لهم فعلا شخصية @_@ وقفتها في نقطة مبكرة وبنتظر يصيروا المترجمين ثابتين في ترجمتهم بعد ما تركونا أشهر من دون تحديث بس عشان يرجعوا مع وجبة كبيرة من الفصول ,_,
بدايتها مرا كويسة @_@ نوعا ما بعدين يصير ال Pacing فيها شويتين ممل. امنياتي لها بس تحصل على رومانس حقيقي! كل بنت تطلع واتعشم فيها أنها رح تقع في حب البطل تصدمني في كونها مش مهتمة فيه زي كذا! هاااا؟ كيف ممكن تفوتوا على نفسكم بطل زي كذا؟ شكليا؟ حلو. قوته؟ الأقوى. شخصيته؟ نوعا ما متفهم هنا سبب جمودهم تجاهه لكن المفروض هم الي يبذلوا جهدهم عشان يلينوا شخصيته الغليظة!
السنة القادمة مؤكد أننا موعودين بجرعة آكشنية عالية منها. خلاص باقي شويتين ونحصل أول قتال يخلي البطل يعرض قوته الحقيقة.
أكثر عنوان في الحياة يستخدم الإيسيكاي من دون سبب! حرفيا بس في كم جزئية تكلم فيها ل 5 ثواني داخليا عن كونه من عالم مختلف وبعد في مرة بس تذكر أنه اعتنى بقطة مشردة في بانل واحد. هذا كل تطبيق الإيسيكاي هنا. ليه؟ ولا له دخل في قوة البطل ولا في العالم نفسه! حتى ذكريات البطل كلها تتكلم عن رحلته السابقة قبل احداث القصة نفسها في العالم الخيالي ذا! احس الكاتب خلاها إيسيكاي بس عشان في أحد عصبه من دار النشر وقال له "خليها إيسيكاي!" وطلعت معانا ذي النتيجة @_@ بس مش مخربة على العمل tho. العمل نفسه كويس جدا والبطل فعلا تحسه من ذا العصر ومش دلوع مرمي في ذي البيئة الي تتطلب رجال اشداء. تحتاج رومانس وأشوفها تقدر تحصله. البنوتة الي شعرها بنفسجي عشقي ,_, مرة لطيفة وأتمنى تصير بنت البطل الي ترافقه في رحلته حتى لو مش لازم الآن ويكون بعدين بعد ما تنحل مشكلتها ,_,
من زمان عن هاريم كويسة تتمنى كل البنات فيها تفوز ,_, مشكلتي معاها الوحيدة أن البطل حاليا واضح لأي بنت فيهم يميل. ميلانه ذا جالس يقتل كل أمل في أنه ينتهي مع باقي البنات وأتمنى مستقبلا الكفة تميل ويحصل تغيير لكن مش تغيير مقرف زي الي يحصل في موشوك وأمثاله. أوه والآكشن والرسم بالمناسبة لطيفين. وبعد الريجريشن حقها فيها تويست نوعا ما رهيب لكنه لسه جالس ينطبخ وبدري على التأثيرات الكبيرة قصصيا تبعه @_@
حسب ما اذكر سمعت أن الاستوديو الي شغال عليها ياباني؟ يفسر الكثير ليه تحاول تكون Edgy بذا الشكل المثير للشفقة @_@ سمعت الرواية نفسها كانت كويسة وتفسر كل شيء يحصل بشكل منطقي لكن الي حاصل في المانهوا أن كل تصرفاتهم مطلعتهم كأنهم مجانين... الحين اليابانيين خربوا المانجا وجالسين يحاولوا يخربوا المانهوا بعد؟
>السنة القادمة رح يصير الهاريم رسمي فيها ورح نشوف نزاع البطلات على البطل
الفصول القصيرة رح تقتلني! جدا حابها لكن بالكاد القصة جالسه تمشي آخر كم شهر وكل فصل جالس يحسسني أنه طولها يقل واقدر أشوفها على نهاية السنة القادمة تصير بانل واحد أسبوعيا ,_,
بطلة القصة تحسها نسخة من أبطال الشونين من العصر الذهبي لصناعة الأنمي (2014 وما حولها). هل الشيء ذا شين؟ لا! كلنا نبي بطلات قويات يحبوا ياكلوا كثير وما يهتموا بشكلهم ولا العلاقات العامة وعندهم بوتنشل ما له أي نهاية. هذه هي البطلة القوية الي الحريم يتمنوها أخيرا حصلت مانهوا لنفسها 👍 المشكلة الوحيدة هنا أن الي يقودها في رحلتها هو بشري حصل له إيسيكاي وصار جريمور يعلم الناس السحر في أحسن طريقة. يعني في النهاية بطلتنا القوية لسه عايشة في ظل الرجل الحامي 🥺
ما عندي أي فكرة ايش الفقرة الي كتبتها فوق بس المانهوا كويسة فعلا.
مانهوا الأميرة الي أهدت العرش لأخيها طواعة. آخر كم فصل من عندها رجع الرسم تحسن فيهم بشكل عام... كملوا على ذا المستوى ولا تخلوني اندم على أن تبنيتها من بداياتها ,_,
