طيب نبدأ
المحسوب عالميا اقصد فيه جماهرية اولا وثانيا تأثير على الصناعة ، فرق لما كانت الاضافات في الالعاب اليابانية دروس لبقية الصناعة عن الان ، كيف ان التوجه الغربي جالس يضيف ويبدع والالعاب اليابانية يا دوب تلحق تصقل اشياء منتهين منها من ١٣ سنة
تمام، وش هالجيل اللي كانت فيه الالعاب الغربية تعطي دروس لبقية الصناعة؟ وشيء ثوري؟ مافي بالي غير موضة الباتل رويال، واللي هو نعم تاثير حقيقي.
بس هل في جنرا فعليا اتطورت؟ تطور حقيقي؟ وتاثير فعلي عالصناعة؟ غير خلطة يوبيسوفت من الجيل الماضي...مش شايف شيء.
بالمقابل، زيلدا نفس البرية، لعبة يابانية، اضافت شيءء جديد باقي الشركات الان تحاول تنتهج نهجه، ليش ما نحسبها؟ ليش ما نحسبها كشيء ثوري وتأثير حقيقي؟ وتعطي دروس حقيقية لبقية الصناعة؟
طيب العاب السولز؟ مش هي اثرت برضو على الصناعة بشكل كبير؟ وهي العاب يابانية؟ وأعطت دروس لباقي الصناعة؟ لدرجة حتى ستار وورز...نعم، ستار وورز! عنوان غربي بحت...من EA الغربية، استلهم من سولز وسيكيرو، مش هالشيء كبير ومهم؟ ليش نتجاهله ونقول والله الالعاب اليابانية مالها اي تاثير عالمي؟
تقولي زي ايش .. زي كه٣ وهيتمان .. زي دمك٥ وميجامان .. زي مجس٥ وبيس .. كلها معايير منتهية وتوجه ملخبط تحسسك انها مطورة لناس اول مرة تلعب العاب .. قارنها بالعاب صدرت على جيل بس٢ وبتشوف انها نفس الخلطة بس تصميم اضعف ، او محاولة تقليد ضعيفة .. عكس سابقا لما كان كل عنوان له وزنه
وايش اللي يخلي ذول معايير منتهية؟ وش اللي ناقص كه3 وهيتمان ودمك5 وميجامان ومجس 5؟ هل معاييرهم غلط؟ لا. هل اسلوبهم غلط؟ لا، وهنا ندخل لنقطة النقاش اللي وش يخلي معايير واساليب افضل واخس من غيرها، واللي هي نقاش طويل
-بس هيتمان غربية ترا! وممتازة جدا-
If anything، مجس5 لما ضافت معايير الغرب بالعالم المفتوح، النقطة ذي كانت فاشلة فيها، بس كجيمبلاي بحت؟ كتسلل؟ كخيارات؟ اللعبة نزلت في 2015 ولسه يضرب بها المثل بل ويعتبر من قمة العابها من هالنوع وانه محد وصل لها لسه.
كه 3 كجيمبلاي؟ من احسن العاب الاكشن اربيجي لسه، ميجامان 11؟ اكثر ميجامان متطورة وممتازة على صعيد اللعب! وفيها ميكانكس جديدة، عكس 9 و10 اللي شالوا كل الميكانكس ورجعوا لحد 2 حتى، مش حتى جيمبلاي 3.
دمك 5؟ احسن واعمق لعبة اكشن بحتة انصنعت لليوم مع خيارات هائلة وابداع بالاكشن بشكل غير مسبوق كجيمبلاي.
مافي ولا لعبة اكشن غربية وحدة بتتيح لك هالخيارات وتنفيذها ورا بعض بهالسلاسة والسرعة.
بس حتى بدون دمك 5، أصلا جنرا الاكشن كلها، اليابان طول عمره متفوقة فيه بدون منازع، بالجيل السادس والسابع والثامن وبيكون التاسع كمان، وش في العاب\سلاسل اكشن بحتة متفوقة على سلاسل نينجا جايدين وبايونيتا وديفل ماي كراي؟ مافي.
هنا كلامي .. كلامي ان الالعاب اليابانية فقدت لمستها ، فقدت ابداعها ، فقدت رؤيتها ، عالقة في مساحة سالبة ، لاهي عارفة ايش تبغى ولا جمهورها ايش يبغى .. والسبب انهم للان حاطين اللاعب الياباني ك فئة مستهدفة اولى
كلامك غلط، وين فقد الابداع واللمسة بالالعاب المذكورة؟ العكس تماما، كلها العاب عارفة بالضبط وش تبغى، عارفة نقاط قوتها، وتلعب عليها وتتقنها، ووين العيب بهالشيء؟ لازم تتحول لمسخ غربي عشان تكسب ابداعها ورؤيتها؟ لازم يكونوا العاب عالم مفتوح بعناصر اربيجي خايسة محشورة فيها غصب عشان يتسمى تطور؟
الريدي بعضهم اصلا حاول يستهدف الغرب وطلع بنتائج مشوهة ، لكن صحيوا من غفلتهم ورجعوا لأصلهم وأبدعوا.
بيرسونا؟ مونستر هنتر؟ ياكوزا؟ دراغون كويست؟ ريزي؟ وغيرهم، افضل اجزاءهم كانوا آخر جيل، وليس العكس، اغلبهم وصلوا لجمهور عالمي اكثر من اي وقت مضى كمان، ليش؟ لأنهم حافظوا على هويتهم، تركيزهم ما كان على اللاعب الغير ياباني حتى.
شوف انا ما كنت ابغى اتطرق لاسامي العاب عشان ما تقلب لعبتي ولعبتك ، بس بما انك ذكرتها شوف قوة التطوير في ريد ديد وجاو وويتشر واساسن وكيف جالسة تضيف
ضحكتني صراحة بهالامثلة، لما تجي تنتقد الامثلة اللي فوق وبعدها...تحط اكثر اشياء safe ماشية على نهجها المعتاد، او تتغير لاشياء safe اخرى.
ريد ديد هي نفسها ريد ديد، وش اضافت كشيء ابداعي من 1؟ عالم اكبر؟ واقعية اكثر؟ بس؟ كلها اشياء بديهية تتطور، بس ويين ويين اللمسة الابداعية الفعلية المختلفة عن 1؟ مافي. بل تقدر تجادل ان التركيز الزايد عالواقعية بالانيميشنز وتصميم المهمات خلاها تكون اقل ابداعية حتى وأثقل كلعب، تتذكر دلس الزومبيز الخيالي الغريب في 1؟ مافي اي شيء ابداعي زيه في 2.
ويتشر؟ وش ضافت بالزبط؟ هي لعبة متقنة، ومتقنة جدا فقط، بس هل فيها حرية الابداع والخيارات لشيء زي سكايرم مثلا؟ هل فيها جيمبلاي خارق جديد؟ هل اضافت شيء جديد فعلي؟ لا
كل اللي سوته انها قدمت ربج غربي متقن بكتابة ممتازة، قدمت احسن بكج ربج غربي للمينستريم بشكل يسهل دخوله لأي شخص، ذي نقاط قوتها وخلاص، طيب تجديد بالجنرا؟ طيب الجيمبلاي؟ وش الشيء الجديد المميز اللي اضافته اللي لما تشوفه تقول "اه نعم ، ويتشر متميزة من هالناحية وتاثيرها يظهر لباقي الالعاب"؟ او "اه ويتشر كانت ثورية من هالناحية"؟ مافي، هل فيها جيمبلاي ميكانيك مميز اول ما تشوفه تقول "اوف مزروف من ويتشر" ؟ لا.
اساسن اساسن......لما قررت تغير وتضيف لنفسها...وش صار؟ هربت من اسلوبها القديم، غيرت الجنرا بأكملها، واتحولت ل....ربج غربية، هل الشيء يعتبر تطور؟ لا، يعتبر مجرد مجاراة للسوق والترند ، شافوا نجاح سكايرم وويتشر ودراغون ايج، وقالوا يلا نسوي لعبة ربج غربية كمان، بس كتطور فعلي بالجيمبلاي بالسلسلة؟ فعليا كثير من عناصر الجيمبلاي صارلها داونجريد بالحقيقة، التسلل والتسلق مش زي زمان وصار اسوا، وكونه كل شيء متعلق بالstats والارقام، يخلي كثير محتوى ماله قيمة وأهمية.
هل لما تغير جنرا مختلفة اصلا، يعتبر اتطورت؟ لا.
جاو نفس الشيء، وصلت لطريق مسدود بالاسلوب القديم المحلوب بست العاب وما عرفت تطور فيه، وش كان الحل حقها؟ تغير الجنرا تماما برضو، صارت اكشن اربيجي ممطوطة بأرقام ودروع ومدري ايش، كريتوس الجبار الخارق اللي كان يقفز قفزات ضخمة ويقاتل آلهة اقوياء وهو عاري الصدر، صار ما يعرف ينط ويحتاج يلبس دروع بstats عشان يقاتل اقزام ضعيفين
وطبعا جزئيات مشي كثير طويلة مملة والغاز نايمة تصير مملة جدا من المرة الاولى، وكابوس وقت اعادة اللعبة، البوسز العظماء بالثلاثية القديمة والمبهرين واللي يتركوا انطباع قوي عندك؟ صارت اضعف نقطة بالجديد وقليلين ومكررين ويجيك كوري بارلوغ يرميلك عذر بايخ زي وجهه ويقول "معليش تصميم الزعماء كان صعب وبنحتاج عشرين سنة عشان نخلصهم"
بينما العاب يابانية "متخلفة" باسلوب تصميم "قديم من الجيل الخامس" زي العاب سولز وكه 3 ودمك 5 وغيرهم يقدمولك لستة زعماء ممتازين كثيرين متنوعين عادي جدا، بدون اعذار وبدون 20 سنة تطوير.
وقارنها مع ريزي ودمك وفف وكه ومونهان والخ بينها وبين نفسها
كلها العاب ممتازة وبعضها افضل من الامثلة اللي ذكرتها فوق او يجاريها، ما ينقصها شيء.
ريزي تقدم افضل اجزاءها ، سواء ريميك ريزي2 اللي يعتبر من افضل العاب الرعب بالجيل، او 7 و8 اللي يقدموا التجديد اللي تطمح له
أو دمك اللي قدمت افضل جزء لها وحافظت على هويته بدل ما تتحول لمسخ داونجريدي.
او كه اللي اغلب النقد لها من ناحية قصصية بالحقيقة، او السهولة، بس الجيمبلاي نفسه، خصوصا مع الدلس يعتبر من افضل الاجزاء وتطور فعلي، وقدم تشكيلة زعماء قد يعتبروا الافضل بالجيل، واذا واحد بيعترض على هالنقطة ويقول غلط، بيحط لعبة يابانية ثانية انيواي زي سولز وسيكيرو وغيرها.
مونستر هنتر؟ تقصد تلك السلسلة الضخمة اللي وصلت بشكل عالمي اخيرا واتوسعت لأنها اتطورت بشكل ضخم عن سابقتها كمحتوى وانتاجية وجيمبلاي؟ وش مشكلتك معاها بالضبط؟ بالعكس السلسلة ذي من افضل قصص النجاح والتطور هالجيل.
فف خايبة ذو اتفق (&) بس ذي مشكلتها.
ولاحظ كيف الالعاب ذي متنوعة، من جنرات مختلفة تماما، رعب، اكشن، اكشن اربيجي، صيد وحوش
بس لما تقوللي امثلة على تفوق الغرب وتسردلي العاب متشابهة؟
ريد ديد؟ عالم مفتوح
ويتشر؟ ربج غربي
جاو؟ ربج غربي
اساسنز؟ربج غربي عالم مفتوح
شايف اللي اقصده؟ تشابه، كلهم نفس الشيء، نفس المجال، مافي ابداع فعلي، مافي تطور، ذا اللي اقصده بالضبط لما اقول ان "المعايير العالمية الحديثة" هي مضروبة من اساسها وغلط وما تعني تطور فعلي او حداثة، مجرد اضافة ارقام للدروع والاسلحة ما عاد يهمني ولا عمره كان يهمني اصلا.
اليوم اللي تجي العاب دمك وميجامان وريزي وبيس يقرروا انه خلاص بنصير العاب عالم مفتوح بعناصر اربيجي عشان "نتطور" و"نواكب المعايير العصرية"، هي اليوم اللي كل هالسلاسل بتسقط فيها وما بتعني لي أي شيء، ما بسميها تطور حتى، بسميها هروب من هويتها والشيء اللي تبدع فيه، فقط عشان ناس مملة مفهوم الابداع والتطوير حقها هو انها تعمل فارمنج وجرايندنج عشان تطور الخوذة الفلانية وترفع درجة التحمل حقته من 5619 الى 7432 عشان يهزم الصرصور اللي الدمج حقه 6310، ملل، مفهوم التطور والمعاصرة قلب شغل ومش متعة.
