hits counter

ألعاب الفيديو والتفوق الدراسي .. بينهم علاقة ؟؟ *أصحاب العيون الحارة برا*

آحسآس قال:
^

كلام جميل .. أضيف على كلامك أن أختبار القياس والتحصيلي أيضاً معيارين جيدين لـ قياس مستوى التعليم العام .. وأكبر دليل على ذلك الفروق الواضحه مابين درجات المدرسة ومابين درجات القياس مثلاً ..
أنقر للتوسيع...

انسى.gif

القياس والتحصيلي اختبار مرة وحدة لكل شي سوا وكلهم اختيارات. يعني ياتصيب ياتخيب لناس كثيرة ماعندها ادنى فكرة عن الدراسة. والتحصيلي بالأخص عبارة عن مُراجعة معلومات سطحية جدا للكُتب والمناهج اللي درسناهم في الثانوية كلها واللي هي بالإعتبار سطحية كذلك مُقارنة بالمناهج الخارجية. يعني لو ماتدرس له ابدا وتعتمد على معلوماتك العامة يمديك تجيب 60% من الإمتحان وانت مغمّض. خصوصا قسم اللغة الأنجليزية اللي حتى مايطلب منك تكتب قطعة مكوّنة من 4 سطور. وهنا SAT test (اللي هو اختبار قبول الجامعة في امريكا) نفس القياس لكن مش بس اختيارات, بل يعتمد على الكتابة الحُرّة برضوا والتفصيل بالمعلومات واغلب قسم الكتابة من الأسئلة تتطلّب من الطالب انه يفكّر بأسلوب ناقد ويفصّل كل شي يعرفه في كل سؤال ويروح يدعي ليل نهار على مدار الأسبوعين انه ينقبل بالجامعة, علما ان قسم الكتابة (اختياري) لكن مافيه احد قد قابلته هنا ماشدّ حيله فيه واعتبره جزء اساسي من الإمتحان لأن الإختيارات يدرون انها ماتقدر تحدّد مستواهم الحقيقي. لكن في القياس عندنا اللي تجيب فيه 90% وانت منسدح, الدليل واحد من الدفعة حقتي اللي دخلت الإمتحان يحلف انه يرسم رسمه حدودها الدوائر المُضللة وبالأخير انا جبت 89 وهو جاب 92

اللي من جد يقهر انا شفت كُتب اول ثانوي هنا لمادة الماث ولاحظت بنفسي كيف اننا حنا اللي مكتشفين الجبر وماندرس منه شي طول فترة دراستنا تحت ظل التربية والتعليم غير تشابتر واحد في كتاب اول ثانوي الفصل دراسي الأول, وبعده ماشفت منه شي غير في ثالث ثانوي تشابتر في الأخير تقريبا, والمُشكلة هو نفس التشابتر اللي في اول ثانوي لكن موسّع اكثر بكم كلمة حذفها المُدرّس قبل الإمتحان وقال ماراح تنفعكم في امتحان الوزارة -_-"
وهنا اول ثانوي ياخذون الجبر 101-102 كـ مادة إجبارية كاملة ولما تدخل الجامعة تكمل علطول, في السعودية تاخذ الجبر في جامعة فهد في سنة الفاونديشن
 
التعديل الأخير:
انا اشوف ان الموضوع ماله اي علاقه بالتفوق الدراسي ابدا...وبعض الأحيان يكون له علاقة بتدني المستوى الدراسي للأسف...و الأسباب معروفه

لاكن انا ملاحظ الجيمرز عندهم لغة E من جيدة الى ممتازة لان اللاعب يحاول يلعب اللعبة كاملة و يفهم القصة كاملة ولهاذا السبب تلقاه يهتم بالأنجليزي لانه مارح يفهم اللعبة الى من خلالها ( انا شخصيا لم اهتم بالE كثيرا الا بعد ما صرت ارغب بهفم اللعبة وقصتها كاملة..
 
تعديل : الرد موجه لـ عمر *_*

أنا ماقارنت بين الدراسة هنا والدراسة بالخارج .. الدراسة بالخارج مختلفه تماماً عن الدراسة المحلية وتتفوق بمراحل .. اللي اقصده أنا أن أختبار القياس طريقته مختلفه تماماً عن الطريقة المتّبعه في الدراسه بشكل عام .. الدراسه عندنا بشكل عام تركز على " التلقين " وماتركز على الإستنتاجات أكثر .. فلما يدخلون الطلاب على أختبار القياس فـ راح تلاحظ أن الجميع بلا إستثناء يستصعب الأختبار " سواءً الطالب حل بالصدفه أو ماحل .. بالنهاية الأختبار وضّح تماماً المنهج السيء في الدراسه وتأثيره على الطلاب بشكل عام " ..

فلذلك راح تلاحظ أنخفاض واضح جداً في معدلات الطلاب .. من طالب ياخذ 99 أو 95 مثلاًَ بالمدرسه إلى طالب ياخذ 70 أو 65 بالقياس " وأعرف ناس كثيييير صاير لهم مثل هذا الشي " .. هذا يدل على إيش .. يدل على أن منهجية الدراسة بشكل عام منهجية سيئه .. مجرّد أختبار أستنتاجي بسيط يعتمد على الأختيارات يستصعبونه الطلاب ويجعلون منه شي صعب جداً .. حتى الطلاب المتفوقين بمدرستهم واللي يعتبرونهم الأساتذه طلاب " قدوه " للآخرين ماقدرو أنهم يوظفون " إمكانياتهم " لهذا الأختبار .. ليش .. لأنهم تعوّدو على منهجيه سخيفه جداً بالمدرسة .. فلما أختلفت المنهجيه بهذا الأختبار وأصبحت أكثر أستنتاجاً وتفكيراً إستصعب عليهم الأمر ..

تعديل : طلعت من فكرة الموضوع شوي معليش ..

أممم .. مثل ماقال الأخ عمر بالضبط .. ماتقدر تقيس على الناس عامة أبداً لأن القدرات بشكل عام تختلف من شخص لـ شخص .. يمكن شخص تكون قدراته عاليه ويحب الفيديو قيمز فلذلك تشوفه متفوق في دراسته .. ويمكن العكس .. قدراته ضعيفه بالدراسة ويحب الفيديو قيمز .. فـ مانقدر نقول " الفيديو قيمز = التفوّق " ..
 
التعديل الأخير:
كلام جميل .. أضيف على كلامك أن أختبار القياس والتحصيلي أيضاً معيارين جيدين لـ قياس مستوى التعليم العام .. وأكبر دليل على ذلك الفروق الواضحه مابين درجات المدرسة ومابين درجات القياس مثلاً ..
أنقر للتوسيع...

اذا رجعت للمقاييس حتى اختبار القياس (النكتة) لا يعتبر مقياس بأي شكل من الأشكال + انا اشوف سبب الخوف منه هو طريقة الأسئلة الغبية لدرجة إن الواحد يجاوب من عنده بدون حتى محاولة تفكير ..

فلذلك راح تلاحظ أنخفاض واضح جداً في معدلات الطلاب .. من طالب ياخذ 99 أو 95 مثلاًَ بالمدرسه إلى طالب ياخذ 70 أو 65 بالقياس
أنقر للتوسيع...

في الثانوي كثيرة المواد التافهه اللي تحسب عليها النسبة (علم أرض وحاسب و أدب) وتفرق معاملة المدرسين اللي تكثر هداياهم آخر السنة .. بعكس القياس اللي مركز على الرياضيات (الوحش الدراسي) وعلى اللغة العربية .. وطبعاً بدون ما انسى الأسئلة الغبية والاختيارات اللي تفتح مجال كبير إنك تجيب الأجابة الصح بالصدفة

فلذلك لو تحاول تسوي اختبار بمعنى اختبار (اختبارات اليومين هذي فضيحة) في المدرسة بنفس المواد اللي موجودة في اختبار القياس اجزم إنك راح تحصل الدرجات نفس درجات القياس وممكن أقل بعد ..

بمعنى آخر .. اللي حاب اوصل له القياس ليس مقياس للتفوق ولا حتى الذكاء
 
بالنسبة لي .. بالفصل ممكن اغلبهم جيمرز.. لكن كود -_-

و اتوقع تعتمد على تنظيم وقتك .. و انا اقول مافيه واحد اذكى من الثاني .. تعتمد على عزيمتك و اصرارك .. يعني ياتصير مهمل و ذكي او مهتم و ذكي ..

و الحمد لله نسبتي فوق 95%
 
كنت متفوق لين المتوسط تقريبا لكن بعدين صرت مهمل لكن درجاتي الدراسيه (في المدرسه) عادية , لكن القياس الحمدلله كانت النسبة مرتفعه.. و في الجامعة متفوق الحمدلله
 
اختبار القياس ماهو مقياس أبداً والاسباب قلتوها
 
الاحظ ما يذم اختبار القياس الا الي جاب العيد فيه
 
^
فيه احد ماجاب العيد فيه :sweat:
 
اللي حط القياس وقراراته واحد متخلف ... أجل 20% بس على شهادة الثانوية.
 
^
لا الحمد لله اختبرت مرتين وسويت سكيب للثالثة .. والرابعة اختبرتها قبل اسبوعين تقريباً

اعلى درجة 84 يعني ما جبت العيد
 
اممم لو ان الموضوع متعلق بالدراسة الجامعية كان راح يكون ادق

دراسة المدرسة = 0
 
اللي حط القياس وقراراته واحد متخلف ... أجل 20% بس على شهادة الثانوية.
أنقر للتوسيع...

شيء يقهر من جد .. 12 سنة دراسة وفي الأخير 20% على الأقل احترموا عقولنا وخلوها 50%
 
Smile Face 100 قال:
شيء يقهر من جد .. 12 سنة دراسة وفي الأخير 20% على الأقل احترموا عقولنا وخلوها 50%
أنقر للتوسيع...

صحيح بس اتوقع سووا هالشي عشان ما يكلفون على حالهم و يسوون رقابة صارمة للمدارس الاهليه
 
Smile Face 100 قال:
اذا رجعت للمقاييس حتى اختبار القياس (النكتة) لا يعتبر مقياس بأي شكل من الأشكال + انا اشوف سبب الخوف منه هو طريقة الأسئلة الغبية لدرجة إن الواحد يجاوب من عنده بدون حتى محاولة تفكير ..



في الثانوي كثيرة المواد التافهه اللي تحسب عليها النسبة (علم أرض وحاسب و أدب) وتفرق معاملة المدرسين اللي تكثر هداياهم آخر السنة .. بعكس القياس اللي مركز على الرياضيات (الوحش الدراسي) وعلى اللغة العربية .. وطبعاً بدون ما انسى الأسئلة الغبية والاختيارات اللي تفتح مجال كبير إنك تجيب الأجابة الصح بالصدفة

فلذلك لو تحاول تسوي اختبار بمعنى اختبار (اختبارات اليومين هذي فضيحة) في المدرسة بنفس المواد اللي موجودة في اختبار القياس اجزم إنك راح تحصل الدرجات نفس درجات القياس وممكن أقل بعد ..

بمعنى آخر .. اللي حاب اوصل له القياس ليس مقياس للتفوق ولا حتى الذكاء
أنقر للتوسيع...

أنا عارف حبيبي أن الأختبار تافه ونكته مثل ماقلت وعارف ان الأسئله غبيه .. المشكله هنا اللي كنت أقصدها هو أن حتى والأختبار " تافه " الطلاب عانو منه .. حتى والأختبار نكته الطلاب عانو منه .. حتى والأختبار غبي الطلاب عانو منه .. هذا يدل على إيش ؟ .. يدل على أن المنهج الدراسي تبعنا أساساً كله غلط بغلط .. مجرد أختبار بسيط ومليان خيارات وإجابات واضحه جداً الطلاب يستصعبونه ويجعلون منه شي خرافي .. هذا دليل على أن الطلاب ما أنبنو صح من المدرسة أساساً ..

وفعلاً اوافقك .. القياس مو مقياس للذكاء .. لكن " ثقافة الطلاب " عندنا جعلت منه شي خرافي .. وهو لا شي ..

الاحظ ما يذم اختبار القياس الا الي جاب العيد فيه
أنقر للتوسيع...

ملاحظتك خاطئه .. ذميت في القياس أكثر من مره لكن هذا مو دليل على أني جبت العيد فيه .. الحمدلله جايب درجه ممتازة جداً بالقياس وبالمدرسه .. وأعرف شخص " سوداني الجنسية " يذم في الأختبار ذم مو طبيعي وهو جايب 98 فيه ..
 
بالنسبة للموضوع, الجيمنج بالغالب يخلي الواحد ينصرف عن المذاكرة وبكذا تنزل درجاته.. بس الناس الي يعرفون ينظمون وقتهم يقدرون يدفرون وبنفس الوقت يبدعون.. ومثل ما قالوا الشباب, بالغالب الدوافير جيمرز لأنهم ما يطلعون من البيت كثير أو لأنهم يحبون التفكير مع الإستمتاع بشيء معين..

المهم, بالنسبة لسالفة القدرات والتحصيلي هنا.. بصراحة, أنا مع أن الثانوية 20% فقط لأنه الدراسة عندنا مهزلة! أنا تخرجت من الثانوي بنسبة 94,8 بأقل مجهود يذكر! تجي بعض الأحيان إختبارات نهائية ما أذاكر ولا أهتم لها أبداً ! وبالمناسبة مدرستنا هي مدرسة الظهران الحكومية الي تعتبر بشكل عام من أقوى الثانويات تعليم.. ومع أنها بشكل عام متفوقة على أغلب المدارس الثانوية الأخرى لكن تبقى تعيسة جداً!
يمكن بس مدارس الظهران الأهلية ومدارس الجامعة ويمكن مدرسة واحدة بالرياض الي فعلاً ممكن تقول مدارس بمستويات تعليم ممتازة ونسبة الثانوية فيها تبين شيء!
القدرات بثانويتنا ناس جايبين نسبة 99% ويشوفونهم الباقين على إنهم دوافير وبالقدرات ما يقدرون يجيبون 70! السبب أنه نظام التعليم الثانوي عندنا علمنا أن نحفظ قوانين ونحط فيها أرقام ونحسبها بالحاسبة بعد مو بمخنا.. بينما فالقدرات يشوف قدرتك على إستعمال الجبر والتفكير المنطقي والي ما تدربنا عليه بالثانويات فيطلع الطالب الي مخه فعلاً نظيف عن غيره.. ونفس الشيء ينطبق على التحصيلي الي يجيب لك أساسيات بالثانوية ويركبها شوي على بعض ويجيك الطالب أبو 99% الي المفروض إنه عارف كل شيء بالثانوية كما تقول نسبته ويجيب لي 65%

الحمدلله أنا بالقدرات كنت الثاني على مدرستنا بدفعتي وحصلت على 92% وبالتحصيلي كنت الأول على دفعتنا وحصلت على 95%
والثانوية بسبب إني كنت مطنشها أخذت 94,8%
 
صحيح بس اتوقع سووا هالشي عشان ما يكلفون على حالهم و يسوون رقابة صارمة للمدارس الاهليه
أنقر للتوسيع...

هذا الي يرفع ضغطي ! طيب اذا انتو تعرفون أن التعليم العام فاشل والمدارس الأهليه ( عن تجربة ) تعتبر مصخرة بالتعليم .. ليه ماتحسنون الحال بدل ماتدمرون الطالب بأختبارات زي القياس والتحصيلي وبعدها السنة التحضيرية !
 
حتى والأختبار غبي الطلاب عانو منه .. هذا يدل على إيش ؟ .. يدل على أن المنهج الدراسي تبعنا أساساً كله غلط بغلط .. مجرد أختبار بسيط ومليان خيارات وإجابات واضحه جداً الطلاب يستصعبونه ويجعلون منه شي خرافي .. هذا دليل على أن الطلاب ما أنبنو صح من المدرسة أساساً ..
أنقر للتوسيع...
اسئلة اختبار القياس مالها اي علاقة بالمناهج الدراسية ، الاختبار يقيس قدرة الطالب على الاستيعاب والاستنتاج ، اعتقد انك تقصد الاختبار التحصيلي ؟
عموما المشكلة في الفرق الكبير بين درجات معظم الطلاب في الثانوية ودرجتهم في التحصيلي اعتقد سببه المدارس نفسها ،
كل المدارس (الامن رحم ربي) تحدد للطلاب جزء بسيط من المنهج هو الي يجي منه الاختبار ، وينجح الطالب بتقدير ممتاز ،
لكن بيجيب العيد طبعا في الاختبار التحصيلي لان المعلومة عنده ناقصة ومعظم المنهج ما قرأه حتى مجرد قراءة
 
بالمناسبة حتى الجامعات الأمريكية الأفضل بكثير من جامعاتنا وفي دولة بشكل عام ثانوياتهم أقوى بكثير من ثانوياتنا, أغلب الجامعات تعتمد بشكل عام على درجة الطالب بإختبار الSAT ( الإختبار الي تم نسخ فكرة القدرات منه ) أكثر من أي شيء آخر عند القبول!
وتقريباً نسبة الثانوية أكثر الجامعات تحطها كشيء جانبي جداً!!
وفيه الجامعات القوية جداً الي تهتم بإختبار الSAT II ( المنسوخ منه التحصيلي ) أكثر من كل شيء!
 
عمرها الالعاب ما كانت تأثر على دراستي ، ودايما كانت نسبتي بالدراسة ايام الثانوية ما تقل عن 92% لكن يوم جيت على آخر سنة " ثالث ثانوي علمي " اللي كان يفترض اني اشد حيلي فيها لانها سنة تحديد مستقبل ومصير ، صار العكس واكلتها على راسي وجبت 87% بالعافية وبطلوع الروح ، من اول يوم حطيت ايدي فيه على ‏ 1 Gears of War‏ ونسبتي بلشت تنزل عن التسعينات من وراها ، ابتداءا من اول ما دخلت اللعبة البيت: الاول ثانوي ( 91.5% ) ، الثاني ثانوي ( 89% ) وسنة الثاني ثانوي بالتحديد ما اذكر اني فتحت كتاب فيها الا قبل الاختبارات بايام ، لانها كانت سنة تعمقت فيها بشكل كبير مع جيرز وبلشت ادمنها ، ختاما في الثالث ثانوي علمي ( 87% )

لحد يسألني شالسبب ، لكن جيرز 1 بالذات ماعرف ليش ادمنتها وما قدرت اسيطر على نفسي بالدراسة من وراها ، لهتني بشكل كبير لكن الحمدلله الامور عدت على خير وما أثرت على مستقبلي الدراسي ..
 
person-x قال:
اسئلة اختبار القياس مالها اي علاقة بالمناهج الدراسية ، الاختبار يقيس قدرة الطالب على الاستيعاب والاستنتاج ، اعتقد انك تقصد الاختبار التحصيلي ؟
عموما المشكلة في الفرق الكبير بين درجات معظم الطلاب في الثانوية ودرجتهم في التحصيلي اعتقد سببه المدارس نفسها ،
كل المدارس (الامن رحم ربي) تحدد للطلاب جزء بسيط من المنهج هو الي يجي منه الاختبار ، وينجح الطالب بتقدير ممتاز ،
لكن بيجيب العيد طبعا في الاختبار التحصيلي لان المعلومة عنده ناقصة ومعظم المنهج ما قرأه حتى مجرد قراءة
أنقر للتوسيع...

يعني المدرسة مالها أي دور في تقوية الأستنتاج والأستيعاب لدى الطالب ؟ .. 6 ساعات يومياً في المدرسة .. معقوله كل هذي الجلسة ماراح تأثر فيك سلبياً أو أيجابياً ؟

المدرسة لها دور كبير جداً جداً جداً .. لما تصير إدارة المدرسة إدارة " مثقفه " ولما يصيرون المدرسين مدرسين أكفاء وعلى مستوى عالي راح تشوف تطوّر من جميع الجهات .. راح تشوف إبتكار وراح تشوف ذكاء عالي وراح تشوف أشياء مختلفه جداً عن الأشياء اللي نشوفها في الوقت الحالي .. المدرسة لها دور كبير في تطوير الطالب .. لكن اللي نشوفه حالياً هو " هدم " أكثر من أنه تطوير .. " كبت " جميع مهارات الطالب والتركيز على التلقين أكثر .. هذا الشي عوّد الطلاب وخلاهم " يستنكرون " أي أختبار أستنتاجي أو إستيعابي مهما كان .. حتى لو كان الأختبار سخيف وبسيط جداً راح تشوف أن " معظم " الطلاب يستصعبونه " مثل ماهو صاير حالياً في إختبار القياس " ..

طلعنا من الموضوع كثير صراحه *_*
 
Jonas قال:
الاحظ ما يذم اختبار القياس الا الي جاب العيد فيه
أنقر للتوسيع...
انا واحد ماجبت العيد الا 2 مرة من ال4 مرات "وكانت جيدة بالنسبة لاغلب درجات الطلاب" .. واقول انه اختبار ماله اي لزمة يحطون عليه نسبة القبول اعلى من الثانوية -____-"
 
معلومه بسيطه :-

ترا الثانوي الحالي مايعتبر احد فيه متفوق ابداً

انا اخذ نسبة 96%

واقولك نسبه بس خربطه خربطه خربطه

لا درسة للنهائي ولا فتحته الا بيومه 24 ساعه انمي (تارك الالعاب لي سنه الى سنتين )

القياس اخذ 74 %

بس تبي معلومه انا مااعرف ايش هو الجذر والخربطه هذي

القسمه مااعرف اسويها الضرب اقعد اجمع لمين يطلع لي الناتج يعني 5*5=25 + 5 = 30 اذا 6*5 = 30 وهكذا

ماحفظت اي ابيات الانجليزي اسوء واحد في النطق

بتستغرب ليش قلت كذا بس عشان تعرف حنا قد سئين

ابعود للغه الانجليزيه هذي اللغه عشان تعرفون اننا رايحين فيها

يقولك المدرس اقرأ مثلا المقطع الفلاني

تقعد تقرأ الاخطاء الي عليك = 1000000000000000000000000 مليون خطأ ولا يصححها لك لا بس اذا جت كلمه وقفت عندها ذيك الساعه صححها لك

الله يعين على التحصيلي ابجيب ام العيد فيه لان معلوماتي صفر
 
آحسآس قال:
يعني المدرسة مالها أي دور في تقوية الأستنتاج والأستيعاب لدى الطالب ؟ .. 6 ساعات يومياً في المدرسة .. معقوله كل هذي الجلسة ماراح تأثر فيك سلبياً أو أيجابياً ؟

المدرسة لها دور كبير جداً جداً جداً .. لما تصير إدارة المدرسة إدارة " مثقفه " ولما يصيرون المدرسين مدرسين أكفاء وعلى مستوى عالي راح تشوف تطوّر من جميع الجهات .. راح تشوف إبتكار وراح تشوف ذكاء عالي وراح تشوف أشياء مختلفه جداً عن الأشياء اللي نشوفها في الوقت الحالي .. المدرسة لها دور كبير في تطوير الطالب .. لكن اللي نشوفه حالياً هو " هدم " أكثر من أنه تطوير .. " كبت " جميع مهارات الطالب والتركيز على التلقين أكثر .. هذا الشي عوّد الطلاب وخلاهم " يستنكرون " أي أختبار أستنتاجي أو إستيعابي مهما كان .. حتى لو كان الأختبار سخيف وبسيط جداً راح تشوف أن " معظم " الطلاب يستصعبونه " مثل ماهو صاير حالياً في إختبار القياس " ..

طلعنا من الموضوع كثير صراحه *_*
أنقر للتوسيع...

المدرسه مالها اي دخل اذا صار منهج الوزاره سيء

المدرسين ممتازين بس قولي كيف المعلم يشرح شيء للطلاب وهو عارف ان الطلاب مش قادر انه يجاوب عليه ؟

الاستعياب ولاستنتاج صعبه اذا كان الطلاب ماشي على نظام معين

يعني انا كطلاب ماستخدم مخي بالحسابات الرياضيه فقط احسب بالحاسبه كيف تبيني اجي في اختبار القياس واطلع لك الجذر واضربه وكذا

انا كطلاب كيف تبين اعرف معنى كلمه في التاريخ الجاهلي القديم وانا ماقد قريت قصيده او نثر ؟
 
^

المدرس الممتاز بيفيدك ويحسن مستواك ويعطيك أساس قوي حتى لو كان المنهج زفت, لأنه ببساطة ما راح يلتزم فيه بشكل كامل, يعني إذا الكتاب حاط طريقة غير علمية لحل مسألة رياضية تعتمد على الحفظ بدون الفهم, المدرس يطلع الطريقة العلمية الي فيها فهم ويعلم الطلاب.. وبالفيزياء على سبيل المثال يسوي إثبات لصحة القانون..

بس مشكلتنا منهج ومدرسين كلها على بعضها..
الحين أنا ببرنامج أرامكو لCPP أو مثل ما تعرفونه بإسم المركز الي ندرس به الCPC .. ورغم أننا نكره بعض المدرسين بسبب تشددهم بالدرجات, لكن فررررق بالشرح بينهم وبين مدرسين الثانوية! وكل واحد عنده مذكراته ويعطيك إستراتيجيات كثير للحل بعيد عن المنهج!
وبالكيمستري المدرس شرح كيفية حل بعض المسائل عن طريق الكالكولوس مع أنها مو بالمنهج..

يعني يبقى المدرس له أثره!
أنا ولله الحمد بالثانوية مريت على مدرسين رياضيات ممتازين وإستفدت بحصصهم رغم المناهج السخيفة..
 
اتفق معاك كل جيمر اعرفه كان دافور ليش من تجربه لأنوا ما يطلع برا البيت اكثر شيء ممكن يطرح مستواك هو الطلعات اتذكر اول ثانوي كنت كل ليله سمره مع الشباب لين الصبح وفي النهاية 81 -____-

بخصوص المدارس هنا وليش 20% على نسب الثانوي احد منكم درس بمدرسة اهلية ؟ اعرف ناس طول السنة غايب وما شفتوا الا في الأختبارات ونسبة +85 @_@ انا ثالث ثانوي بأهلية لو يحسبون غايب انفصلت + من بدية السنة الشنطة زي ما هي ما تغيرة XD وعلى الأختبارات النهائية العب ماريوا واتفرج كود جيس وطالع بـ98% (الرياضيات ما تتعدا 10 صفحات ) يا شيخ لو قالوا حط لنفسك نسبة استحيت احطها ^^" التعليم منتهى عندنا والقدرات اختبرت اختبارين كلها استعديت له بلعب فاينل فانتسي وجيب 79\78 XD (من جد منقهر اني ما استعديت صح بس الحمد لله النسبة تتخلني في اللي ابيه ) والتحصيلي اي جيمر يعرف شوي انجليزي راح يضمن 20 من قسم الأنجليزي ^^"
 
slifer dragon قال:
^

المدرس الممتاز بيفيدك ويحسن مستواك ويعطيك أساس قوي حتى لو كان المنهج زفت, لأنه ببساطة ما راح يلتزم فيه بشكل كامل, يعني إذا الكتاب حاط طريقة غير علمية لحل مسألة رياضية تعتمد على الحفظ بدون الفهم, المدرس يطلع الطريقة العلمية الي فيها فهم ويعلم الطلاب.. وبالفيزياء على سبيل المثال يسوي إثبات لصحة القانون..

بس مشكلتنا منهج ومدرسين كلها على بعضها..
الحين أنا ببرنامج أرامكو لCPP أو مثل ما تعرفونه بإسم المركز الي ندرس به الCPC .. ورغم أننا نكره بعض المدرسين بسبب تشددهم بالدرجات, لكن فررررق بالشرح بينهم وبين مدرسين الثانوية! وكل واحد عنده مذكراته ويعطيك إستراتيجيات كثير للحل بعيد عن المنهج!
وبالكيمستري المدرس شرح كيفية حل بعض المسائل عن طريق الكالكولوس مع أنها مو بالمنهج..

يعني يبقى المدرس له أثره!
أنا ولله الحمد بالثانوية مريت على مدرسين رياضيات ممتازين وإستفدت بحصصهم رغم المناهج السخيفة..
أنقر للتوسيع...

بالضبط .. قلت الكلام اللي كنت بقوله ..

المدرس إذا كان فعلاً " مدرّس " لابد أنه يكون شامل ويكون دوره " تربوي وتعليمي وتطويري وتثقيفي " أكثر من أنه دور " تلقيني " فقط .. لأنه في النهاية قاعد يربي ويعلم " أسس " مجتمعه .. فـ إذا كان تعليمه وتطويره سيء .. فـ راح يكون " هو " من ضمن الأسباب العديدة اللي جعلت من المجتمع مجتمع " بدائي " ..
 
التعديل الأخير:
انا اقلك ليش الداوفير ما يخرجون من البيت كثير و مالهم علاقات اجتماعية كثيره فالجيمز من اهم وسائل الترفيه عندهم ..
أنقر للتوسيع...
بالغالب الدوافير جيمرز لأنهم ما يطلعون من البيت كثير أو لأنهم يحبون التفكير مع الإستمتاع بشيء معين..
أنقر للتوسيع...
اتفق معاك كل جيمر اعرفه كان دافور ليش من تجربه لأنوا ما يطلع برا البيت اكثر شيء ممكن يطرح مستواك هو الطلعات اتذكر اول ثانوي كنت كل ليله سمره مع الشباب لين الصبح وفي النهاية 81
أنقر للتوسيع...

الردود هذي اشوفها الأقرب منطقية بخصوص الموضوع

اقلبوا الموضوع الى نقاش التعليم السعودي
أنقر للتوسيع...
هههه شيء طبيعي أي نقاش يأخذ منحنى آخر + التعليم السعودي يستاهل السب في أي وقت :sarcastic:
 
يجب تسجيل الدخول أو التسجيل كي تتمكن من الرد هنا.
عودة
أعلى