أحداث الآرك بتبتدى بعد انضمام ناناتشى لريكو و ريج و بدأهم للرحلة من الطبقة الرابعة و معظم أحداثه بتدور فى الطبقة الخامسة و بتركز على المواجهة ضد الصفارة البيضاء بوندورد
الآرك إجمالا كان جيد جدا باستثناء بعض الجزئيات اللى هاتكلم عنها بعدين و أهم حاجة فيه كانت تطور الشخصيات الملحوظ :
شخصية ريكو كانت مزعجة لبعض المتابعين و البعض اعتبرها Useless (و ده رأى ماكنتش مقتنع بيه ) بس الآرك هنا وضح مدى أهمية ريكو و قدم تطور جيد لشخصيتها
ريكو ممكن ماتكونش بذكاء ناناتشى بس ده مش معناه إنها غبية بأى شكل و على العكس النقطة اللى بروشكا و حتى بوندورد لاحظوها هى إن بالرغم من تصرفاتها إلا إنها ذكية فعلا و مستوعبة للى بيحصل حواليها
الفكرة هنا إن من بين شخصيات الفريق ريكو هى أقرب واحدة لأنها تبقى مستكشفة حقيقية ، للسبب ده ماكانش عندها مشكلة فى فهم خطط بوندورد أو الطريقة اللى استخدمها فى عمل النسخ و ده اللى علق عليه بوندورد بإن ريكو تفكيرها قريب ليهم أكثر من اللى كان متوقعه
ريكو مستكشفة حقيقية و عشان كده عارفة المستكشفين بيفكروا إزاى و هى الأنسب للقيادة و ده اللى خلى ناناتشى بالرغم من ذكائها و خبرتها تعتبرها قائدة الفريق
ناناتشى كانت شخصية ممتازة كالعادة بس الآرك هنا استكشف شخصيتها أكثر
لفترة طويلة ناناتشى قررت إنها تموت مع ميتى و ماكانش عندها سبب للحياة بس بعد انضمامها لريكو و ريج ناناتشى ابتدى يبقى ليها هدف مرة تانية و أخيرا ابتدت تحقق حلمها الشخصى فى مغامرة لإستكشاف الهاوية
ناناتشى مابقتش مجرد مرافقة للمجموعة و إنما جزء منها و التفاعل بينها و بين ريكو و ريج كان ممتاز و كون إنها كانت مستعدة إنها ترجع للعمل مع بوندورد بالرغم من مدى خوفها منه و كرهها ليه يدل على كم مشاعرها تجاه ريكو و ريج
أحد المفاجآت كانت فى طبيعة عمل ناناتشى الصادمة مع بوندورد
، اللى مرت بيه ناناتشى طلع أسوء حتى من اللى شفناه قبل كده و اللى عملته حتى لو كان ضد إرادتها يفسر سبب عدم تعلقها بالحياة فى بداية ظهورها
فى الآخر ذكاء ناناتشى كان عامل أساسى فى المواجهة ضد بوندورد و هزيمته و أخيرا قدرت تتحرر منه بشكل نهائى
بالنسبة لريج التطور الأساسى ليه فى الآرك ماكانش فى الشخصية و إنما فى القدرات ، قدرات ريج كانت السبب فى وصول الشخصيات للمستوى ده و قطع يده كان ضربة قاسية ليه و للفريق فى نفس الوقت
الوضع كان هايبقى صعب فعلا للفريق بس اللى حصل هنا و نتيجة شحنه مرة تانية ريج استعاد جزء من ذكرياته خصوصه المتعلقة بطريقة تحكمه فى جسده و شفنا جزء من قدراته الحقيقية و اللى وصلت للمستوى اللى قدر فيه يواجه بوندورد بشكل متكافئ ، ريج عوض قطع يده بتحكم أكبر فى قدراته بس ده ما يمنعش إن وضوع قطع اليد لسه سايب أثر كبير
بالنسبة للشخصيات الجديدة اللى ظهرت فى الآرك فهما بوندورد و بروشكا
بالنسبة لبوندورد فما عنديش تعبير مناسب أقدر اوصف بيه الشخصية و كل اللى أقدر اقوله إنه غير آدمى أو زى ماقال هابو ده وحش بيتخفى فى صورة آدمى
اللى عمله فى بوندورد فى تجاربه يبقى من أسوء الحاجات اللى شفتها و مش فى عالم المانجا و الأنمى فقط
و الفكرة إنه عمل كل ده من غير أدنى إحساس بتأنيب الضمير أو حتى أى إحساس من أى نوع
الغريب إن تعلقه بناناتشى كان حقيقي و اظن إن سبب اهتمامه بيها هو إحساسه إنها مشابهه ليه (من ناحية الذكاء و الطموح ) و إن هى اللى ممكن تكمل من بعده حتى بالرغم من رفضها الواضح
بالنسبة لبروشكا فدى كانت من أقسى الجزئيات فى العمل
الكاتب أبدع فعلا فى تقديم بروشكا بألطف و أحسن صورة و خلاك تتعلق بيها و تحبها و كل ده عشان الصدمة من اللى هايحصلها بعد كده تبقى أكبر و بصراحة الجزئية دى كانت العيب الأساسى فى الآرك بالنسبة لى
انا تقبلت العنف و المشاهد الصعبة فى الآرك اللى فات بس اللى حصل هنا على مستوى تانى و بصراحة الكاتب بالغ فعلا فى اللى عمله سواء مع بروشكا أو باقى الأطفال
اللى حصل تجاوز الحدود و فيه مشهد معين باعتبره إجرام من الكاتب لأكثر من سبب
(ممكن مايكونش واضح لبعض المتابعين بس مش هادخل فى التفاصيل)
بالنسبة للأحداث الآرك كان مليان بالتطورات و المعلومات المهمة، الآرك كان فيه معلومات كثيرة بخصوص الطبقة الخامسة مع عدد كبير من أثار الهاوية خصوصا اللى بيستخدمها بوندورد بس دى الجزئيات اللى كانت مهمة فعلا بالنسبة لى:
المواجهة ضد بوندورد كانت أكثر من رائعة
و اللى ساعد على كده الآرت الممتاز خصوصا فى مشاهد هجوم ريج ، مشهد النهاية بالذات كان روعة و حبيت إن اللى إدى الضربة القاضية ماكانش ريج او ناناتشى و إنما ريكو نفسها
طريقة النزول للطبقة السادسة كانت أصعب من اللى كنت متخيله بكثير للدرجة اللى خلتنى اتساءل إزاى كان بيتم نقل المعلومات منها للطبقة الخامسة بالطرق اللى تم شرحها قبل كده و هل فى طرق تانية للنزول غير دى
بقاء الفريق فى Idofront حتى بعد اكتشافهم لعدم امكانية النزول وقتها كان غريب لأنهم فى الحالة دى هايبقوا فى أرض بوندورد و تحت سيطرته و مستغرب فعلا إنهم ماحاولوش يبحثوا عن طريقة تانية من البداية بالرغم من إن عندهم فكرة عن الوضع من أوزين (حتى لو ماكانتش وضحت لهم الصورة كاملة)
الآرك أكد على موضوع ال 2000 سنة اللى تم ذكره فى الشباتر الخاصة، الموضوع بيرفع ال Scale للعمل بشكل كبير لأنه بكده مش هايبقى مجرد مغامرة للقاع و إنما محاولة لمنع الكارثة اللى بتحصل كل 2000 سنة و اللى المفترض إنها هاتحصل قريب و موضوع مرض عيد الميلاد يبقى مجرد البداية ليها :emoji_thinking:
أحد مفاجآت الآرك إن باقى الصفارات البيضاء (واكونا و سارجو) نزلوا للطبقة السادسة فعلا و ده معناه إن المواجهات ضدهم لسه مستمرة و ممكن يواجهوا واحد فى كل طبقة
