متابعتى للأنمى خلال السنة دى و حتى اللى قبلها كانت متقطعة و محدودة بسبب الإنشغال بس مؤخرا بقى عندى وقت و ابتديت اتابع بعض الأعمال الموسمية اللى فوتتها و ده انطباع عن بعضها (معظمها من خريف 2021) :
Tsuki ga Michibiku Isekai Douchuu أو
Moon-led Journey Across Another World : عمل إيسيكاى مقتبس من لايت نوفل من صيف 2021 و تم الإعلان عن موسم تانى ليه بس مش محدد امتى
بداية العمل ادتنى الإحساس إنه ممكن يقدم شئ مختلف و ممتع نسبيا بس للأسف العمل بيقع بسرعة فى مشاكل أعمال الإيسكياى المعروفة و إنطباعى الأخير عنه كان سلبى
البطل بيتم استدعاءه لعالم تانى بس بيتم رفضه بسبب شكله و تركه فى منطقة لل Non humans و بعد ما بيكتشف إن والديه كانوا من العالم الآخر بيقرر يتتبع أثارهم فيه ، النقطة دى كانت مثيرة للإهتمام بالنسبة لى بس العمل بعد كده تجاهلها تماما للأسف
النقطة الإيجابية اللى ممكن أعلق عليها فى العمل كانت شخصية توموى أو شين و اللى بتقدم دور مميز بالنسبة للنوعية دى من الأعمال ، توموى شخصية لافتة للإنتباه بصفة عامة و دورها يبقى خليط بين مدير أعمال للبطل و مخطط استراتيجى و حتى ممكن تعتبر القائدة الحقيقية للقرية اللى تم تأسيسها و لو تم استغلالها بشكل جيد كانت هاتعمل فرق بس للأسف انقيادها الزائد للبطل و المبالغة فى إعجابها بيه كان شئ مزعج فعلا و مش متناسب مع شخصيتها أو اللى كان ممكن تقدمه
بالنسبة للعيوب فهى كثيرة للأسف، البطل مالوش شخصية كالعادة ، البطل Over powered بشكل جنونى من البداية و بدون حتى ما يكون ده ليه أى علاقة بالقدرات اللى اكتسبها ، تكوين القرية (و اللى بيفكرنى بأنمى سلايم و ده مش شئ إيجابى) كان أسهل بكثير من اللازم و اللى يبقى شئ متكرر فى العمل و بيبقى شئ مستفز فعلا لما العمل بيوحى لك إن البطل ممكن هيواجه مشكلة أو تحدى عشان الموضوع يتحل بعدها بكل سهولة الشئ اللى بيديك إحساس إن مافيش أى نجاح حققه البطل كان مستحق بأى شكل و برضه إن مافيش أى تحدى حقيقى ليه ، ال Tone العام للعمل المفترض إنه أقرب للكوميديا بس مرة واحدة بيقلب جد بشكل غريب و يرجع للكوميديا بعدها مباشرة و بعض الحلقات بتديك الإحساس إن فى أحداث انحذفت و طبعا فى فانسيرفس ده غير مشاكل فى المنطق و القصة و ده اللى أنا فاكره بس و اظن فى تانى
مش هاقول إن العمل كان سلبى بالكامل بس للأسف العيوب مش بسيطة و العمل مش اللى انصح بيه
Saihate no Paladin أو
The Faraway Paladin: (خريف 2021) عمل مقتبس من لايت نوفل و تم الإعلان عن موسم تانى ليه ، الإنطباعات عن النوفل كانت إيجابية و كان فى حماس للعمل فى بدايته بس للأسف العمل عانى من النواحى الإنتاجية و الإخراجية الشئ اللى أثر على الإنطباع العام عنه و خلى استقباله ضعيف (برضه كان فى كلام عن حذف بعض التفاصيل ) بس بالرغم من كده فإنطباعى العام عنه كان إيجابى
العمل يعتبر إيسيكاى بس ما بيركزش على النقطة دى و إن كان بيستغلها فى بناء شخصية البطل بشكل جيد و بيقدر يتفادى مشاكل الإيسيكاى المعتادة ، بالنسبة للنقط اللى العمل بيعملها بشكل صحيح فهى:
-البطل أقوى بكثير من اللى حواليه بس على عكس المثال السابق فأولا قوته مش شئ غريب أو خارج عن المنطق بالنسبة للعالم و برضه مش شئ تم إهداءه ليه بدون سبب و إنما هى نتيجة تدريب شاق من الطفولة على يد أفضل الأبطال و حتى مع القوة دى فهو مش Overpowered و أكثر من مرة بيواجه تحديات حقيقة و بيرتكب أخطاء و لسه قدامه كثير من ناحية التطور
-شخصية البطل ممكن تعتبر مثالية بس العمل بيقدم ده بشكل منطقى و بيوضح أسبابه ، وليام فشل فى حياته السابقة و ماقدرش يقدم شئ لوالديه و تم اعطاءه فرصة تانية و تم تربيته على يد مارى و بلود و جاس و اللى قدموا له كثير و بالنسبة له فحياته التانية تبقى الفرصة لتصحيح أخطاءه و رد الجميل لوالديه و من هنا تقدر تفهم سبب تصرفاته و برضه حتى مع ده فهو مش شخص كامل ،الشئ اللى بنشوفه خاصة مع ظهور
مينيلدور و اللى حبيت طريقة تعامل العمل معاه و كونه Equal و مش مجرد تابع (برضه عكس المثال السابق)
-حبيت الجو الهادئ للعمل
للأسف كما ذكرت مشاكل العمل الإنتاجية و الإخراجية مش قليلة و اثرت عليه و إنطباع متابعى الرواية كان سلبى بسبب الحذف ، برضه هدوء العمل ممكن يتحول لملل عند نسبة من المتابعين بس بالنسبة لى العمل كان تجربة جيدة و على الأقل كان مثال لتطبيق جيد الإيسيكاى من ناحية الفكرة و ممكن أدى الرواية أو المانجا فرصة فى وقت ما
Selection Project : عمل Idols من خريف 2021، أعمال ال Idols مش ليا بس لسبب ما قررت أجربه و إتفاجئت إنه بياخد نفس فكرة عمل تانى و هو Idoly Pride مع بعض التعديلات و بشكل صعب تجاهله و أنا هنا باتكلم عن نقطة أساسية فى العمل و مش التشابه العادى (
فكرة الأيدول المشهورة اللى بتموت و بيتم زرع قلبها لواحدة تانية و اللى بتشارك فى المسابقة مع أخت الأيدول بدون علمها) ، فى الآخر سواء العمل ده أو التانى فماحبيتش الإثنين بس رأيى ما يعتبرش مقياس بالنسبة للفئة دى من الأعمال و إن كان العمل ده يحسب ليه إنه حاول يدى دور حقيقى للشخصيات الجانبية عكس الأول و كان تجربة أحسن إلى حد ما
Takt Op. Destiny: العمل مقتبس من Mobile Game على حد علمى و تم عرضه فى خريف 2021 ، الفكرة العامة جيدة و الأنيميشن مميز فى بعض المواجهات بس للأسف ماحسيتش إنه تم تطبيقها بشكل جيد ، البطل كان مزعج خاصة فى البداية بس بيتحسن و بيبقى مقبول مع الوقت بس فى المقابل الأشرار كانوا غير مقنعين و خططهم كانت خالية من أى منطق و النهاية كانت غريبة

، بصفة عامة هو عمل متوسط
Kyuuketsuki Sugu Shinu أو
The Vampire Dies in No Time : عمل كوميدى من خريف 2021 و ليه موسم تانى هايعرض فى شتاء 2023 ، توقعاتى كانت ضعيفة بخصوص العمل بس طلع جيد و كان ممتع و مسلى فى معظمه و عجبنى إن العمل ماركزش على نقطة إن ال Vampire ضعيف و إنما قدم أفكار متنوعة ، يمكن الشئ السلبى كان إن شخصية الصياد رونالدو و اللى بيقوم بدور ال Straight man عادة كانت عصبية بزيادة و مزعجة أحيانا بس إجمالا العمل كان مسلى و ناوى أتابع الموسم التانى إن شاء الله
Sakugan : (خريف 2021) عمل مغامرة و خيال علمى مقتبس من Novel (مش لايت نوفل) و كان عنده Potential كبير مع Setting مميز و فكرة مبدئية جيدة ، للأسف العمل بعد كده بيتحرك بشكل عشوائى و ماتقدرش تعرف هو عاوز يقول إيه بالضبط و كالعادة هو إقتباس غير كامل و مافيش اى كلام عن موسم تانى ، برضه الشخصية الرئيسية مزعجة جدا و أكثر من مرة بتظهر فرصة عشان تطور شخصيتها بس بتعدى بدون ما يحصل أى حاجة بشكل غريب
Senpai ga Uzai Kouhai no Hanashi : (خريف 2021) عمل سلايس أوف لايف مع كوميديا خفيفة، العمل مش مميز بس مش سيئ و ينفع كتسلية خفيفة لو عندك وقت
Eighty Six : عمل مقتبس من لايت نوفل من 23 حلقة تم عرضه على كورين فى ربيع و خريف 2021 ، العمل كان تجربة مميزة فعلا مع قصة مؤثرة و شخصيات جيدة و أوست ممتاز ، بعض النقط الدرامية كانت زيادة بالنسبة لى بس إجمالا كان تجربة متميزة فعلا و انصح بيه ، شخصية لينا بالذات كانت من أحسن ما فى العمل و حبيت جدا إصرارها و تمسكها بمبادئها و إزاى شخصيتها اتطورت بشكل تدريجى،
مشهد لقاء لينا مع شين قرب نهاية العمل و قبل ما تتعرف عليه كان أكثر من رائع و تلخيص ممتاز لشخصيتها و الأثر اللى سابته على شين
بكده انتهيت من معظم أعمال السنة اللى فاتت اللى كنت عاوز أتابعها و حاليا بتابع الأعمال اللى فاتت من السنة دى