ما أدري شلون كانت النهاية السيئة في بيرسونا 4 الأصلية، لكن النهاية السيئة تصير هنا إذا ما دافعت عن Namatame في المستشفى. وقتها يتم إعتقاله و يعترف بجرايمه (ما عدا أول جريمتين) و يوقف التحقيق في القضية، و يودعونك أصدقائك وداع بارد و تخلص اللعبة.
ماري ما يكون لها دور إلا في النهاية. في معظم اللعبة ما تشوفها إلا في الـVelvet Room أو إذا قررت تقضي وقت معاها عشان تبني علاقتك معاها. من خلال الوقت اللي بتقضيه معاها بتعرف إنها فاقدة لذاكرتها، و إن الشي الوحيد اللي تعرفه هي إنها مب من العالم الحقيقي (لأنها جاية من الـVelvet Room)، و الشي الوحيد اللي يربطها بماضيها هو مشط شعر قديم عندها. أتوقع لازم تكمل الـSocial Rank معاها عشان تفتح السيناريو الخاص بها.
بعد ما تهزم Ameno-sagiri بيختفي الضباب من العالم الحقيقي و بتختفي معاه ماري. إذا رزت الـVelvet Room بتقول لك مارقريت إن ماري راحت تؤدي مهمة خطيرة، و إن لك الخيار إنك تساعدها ولا لأ. إذا قبلت إنك تساعدها بتقول لك مارقاريت إنها بتحاول تحدد مكان ماري و بتتصل عليك بين كل فترة و فترة عشان تعطيك المستجدات.
في وقت من الشتاء تقرر إنت و أصدقائك إنكم تطلعون تتزلجون على الثلج. بالصدفة تحصل تلفزيون يقودك إلى منطقة جديدة من عالم التلفزيون، و تقابل داخله مارقريت. مارقريت تقول لك إن هذا هو المكان اللي فيه له ماري. من هنا تدخل الدنجن و تقابل فيه ماري، لكن شكلها يكون مشوه و مختلف. بتقول لك إنها إسترجعت ذاكرتها و عرفت من هي في الحقيقة. بتقول لك إن إسمها الحقيقي Kusumi-no-Okami، و إنها جزء من قوة عظمى مثل Ameno-sagiri و Kunino-sagiri. بعد ما هزمت Ameno-sagiri إختفى الضباب في العالم الحقيقي لأن ماري سحبته كله إلى داخل جسدها. إذا بقى الضباب لفترة طويلة داخل جسمها بيسيطر عليها و بتتحول إلى كائن شرير، لذلك ماري تقرر إنها تقتل نفسها عشان توقف هالشي. في البداية هي تهاجمك و تدخل في معركة معاك عشان ما توقف في طريقها، لكن بعد فترة بسيطة تستسلم و تقول إنها ما تبي تقاتلك. إنت تقرر إنك تنقذها بأي طريقة، فتطلب منها إنها تستلم للضباب و إنها تتحول لوحش، لأن إذا فيه طريقة لإنقاذها فهي إنك تهزم الوحش اللي بتتحول له. ماري تستسلم للضباب، تتحول لوحش، إنت تهزمه و تنقذها.
بعدها بتحصل على مقطع أنيميشن لطيف، فيه البنات يسبحون في الـHot springs و ماري معاهم بمناسبة إنقاذها
بعد ما تقابل Izanami بتكلمك عن ماري، و بتقول لك إنها ما كانت تستحق الإنقاذ و إن دورها الوحيد كان التخلص من الضباب. أيضاً بتقول لك إنها هي اللي أعطت ماري المشط القديم، لأن المشط يمثل الفصل اللي صار بينها و بين ماري (المشط في الثقافة اليابانية له علاقة بالفصل أو التفرقة).
بعد ما تهزم إينازامي و ترجع للـVelvet Room، بتشوف ماري مرة أخيرة. بتقول لك إن في الحقيقة هي و إينازامي و الـSagiris الإثنين كلهم في الحقيقة هم جزء من قوة وحدة (اللي هي ماري) إسمها Inazami-no-Mikoto، مهتمها هي حماية البشرية و تحقيق أمانيها. بتقول لك إن هالأجزاء اللي إنت هزمتها كلها رجعت لها، و إنها قريباً بتكون قوة وحدة، بعدها تشكرك ماري على إنقاذها و إعادتها إلى طبيعتها، و تختفي من الـVelvet Room.
بعد نهاية اللعبة فيه إضافة حصرية لنسخة جولدن، ترجع فيها لـInaba بعد كم شهر من نهاية اللعبة. ما فيها شي مهم (غير إن أشكال الشخصيات تتغير شوي)، لكن تطلع فيها ماري كمذيعة للنشرة الجوية في التلفزيون.
