فضفضة و تجربتي البسيطة في استعادة القرص الصلب الداخلي / اختفى و تحول لـ RAW

[Zorro]

مرحبا ..
مريت بمشكلة قبل كم يوم بالهارديسك الداخلي للـ PC ، فقلت انزل موضوع عشان يستفيد منه اللي يمر بنفس المشكلة وبنفس الوقت أفضفض شوي ..

عشان كذا حتشوفو الموضوع غير مرتب و بدون صور "لأنها ماهي ضرورية من وجهة نظري"..
طبعا فيه شروحات بالنت كثيرة ، تضيع بلد من كثرتها و خاصة لما يكون الواحد مستعجل و تحت ضغط نفسي بسبب اللي صار

----------------------------------------------------------------------------

​

الهارد ديسك الخارجي عندي طاح و ما اشتغل للأسف هو من النوع الكهرب الخارجي ، مب زي الفلاشة ، اي طيحة يتأثر
طبعا انجنيت بطبيعة الحال ، لأن حجمه 3 تيرا بايت مليان تقريبا وفيه انميات و أفلام ، و كثير منها ما شفت شي ، مالقيت فرصة يعني ..:emoji_sob:

المهم نزلت برامج كثيرة خاصة بالأقراص ، عشان اعرف المشكلة وين لكن فجأة و لسبب ما اختفى عندي 3 أقراص داخلية تبع ال PC من أصل 5 اقراص
هم في الحقيقة قرص واحد حقيقي لكني جزأتهم على 5 ، هنا انجنيت أكثر !!! تبا .. تبا .. تبا
اللي اختفو في ال PC هم :
قرص E ---> حجمه 25 جيجا
قرص D ---> حجمه 16جيجا
قرص F ---> حجمه 200 جيجا

بعد ما بحثت في النت لقيت طريقة بسيطة رجعت لي القرص E أما ال D و ال F مانفعت
الطريقة ببساطة :
من قائمة ابدأ تضغط بزر الأيمن للفأرة على ايقونة جهاز الكمبيوتر ، و ثم اختار إدارة/ Manage
ثم نافذة تظهر اختار بالأسفل ادارة الأقراص/ Disk management
بعدين على جهة الثانية شوف الأقراص المختفية ، اشر على القرص المطلوب اظهاره و اعرف حجمه ، لأن القرص لما يختفي
يختفي معاه جميع بياناته ما عدا الحجم الكلي للقرص ، تروح للقرص و تضغط على الزر الأيمن للفارة
وتختار تغيير حرف محرك الأقراص و المسارات / change letter
ثم اختار اضافة /Add ثم أشر على الخيار الأول و من جنبه اختار الحرف اللي كان عليه قبل E مثلا و حتعرفه من حجم القرص .. ثم موافق
اذا القرص مافيه مشاكل فراح يظهر معاك بشكل طبيعي على جهاز الكمبيوتر مثل ما ظهر عندي القرص E ..
فجربت الطريقة هذه على القرصين الباقيين ، فظهرو على جهاز الكمبيوتر لكن طلعت رسالة انه يطلب مني فورمات !!
و تحولو القرصين لنظام RAW بدل NTFS اللي كانو عليه قبل ، وماصار يفتحو !!

رجعت للنت مرة ثاني و جربت برامج كثيرة و مشهورة باسترجاع البيانات و الملفات المحذوفة على مدح الناس ..
والبرامج حقت الأقراص كانت :
EaseUS Partition Master و Active @partition و Mini Tool Partition و Hard Disk Sentinel و غيرهم ..
وكذلك برامج استعادة المحذوفات مثل :
Disk Drill و EaseUS Data Recovery و Partition Table Doctor و غيرهم ..
فيا إما البرنامج يطلب الفورمات عشانه RAW أو ما يتعرف على القرص تماما ، فأضطر أثبت برنامج ثاني غيره و أجربه
وكل برنامج يطلب Deep Search
يومين تقريبا على هالحالة المملة ، اجرب البرنامج الفلاني كذا مرة ثم و اجرب غيره ، و الجيد فيهم يستعيد لي الملفات لكن بأسماء غريبة و من غير ترتيب ولا مجلدات !!! فقط كتصنيفات : ملفات Pdf ، ملفات فيديو ، ملفات مضغوطة و ملفات صور .. يعني لا أسماء ولا ترتيب ...
وهذا الحل غير عملي إطلاقا بتاتا الـبتـة البـتـة :emoji_rage:..

و بالصدفة وما احلاها من صدفة طحت على هالبرنامج 4.2 Disk Internals Partition Recovery
و طلع لي كل الملفات و الفولدرات بأسمائها الفعلية و الترتيب الأصلي للقرص F ابو 200 جيجا
يلزمك في هالحالة تستعيدهم على هارد خارجي و بعدين تفرمت القرص F و ترجع تنسخهم من جديد ..
نفس الحركة رجع لي القرص D ابو 16 جيجا ، البرنامج بحسب ما قرأت انه مايرجع المحذوفات ، فقط للي عنده مشكلة بالهارد ..

و الحمد لله رجع كل شي مثل ماكان تقريبا ، لأن القرص F أبو 200 جيجا رجع لي منهم 180 جيجا تقريبا ، احسن من لا شي
والقرص D تقريبا رجع كل شي ..

نصيحة ::: دائما لا تلجأ لعمل فورمات دامك محتاج بياناتك ، حتى لو أخذ منك وقت طويل :::

---------------------------------------------------------------
​

الحين مشكلتي مازالت مع الهارد الخارجي اللي اعتبره مصيبة المصايب
3 تيرا بايت ماهي قليلة ، 5 سنين يمكن عشان يصير فل ، و هو سبب المشكلة فوق ، يمكن عشاني شغلت برامج كثير حقت الأقراص و صار عبث ما بدون قصد و اختفو .. وجاري البحث عن حلول ، و اذا استجد شي بحدث الموضوع للفائدة ..

وسلامتكم من الحذف وطياح الأقراص ..

 

[MH MD]

بأسأل ابسط سؤال وغالبا جربته لكن....هل وديت الهاردسك الخارجي لأي محل؟ وش نوع العطل والطيحة؟ هل الكمبيوتر ما ينتبه انه في هاردسك موصول بالجهاز اصلا؟
ما اعتقد ان تجربتي بتفيدك بس بأذكرها على كل حال، صارتلي مشكلة تتعلق بها قبل فترة...وبفترة اعني سنة ونص، الهاردسك ابو 1 تيرا طاح واتكسر جزئيا من فوق، وصار ما يقدر يشتغل على الجهاز، استسلمت للأمر الواقع وتركت أمر الهاردسك لفترة بسيطة...سنة ونص بس....جزء منه لأنه وقت خراب الهاردسك كنت مشغول جدا ونسيت امره.

لكن المهم قبل 3 أشهر تقريبا اتذكرت أمره وقلت خليني اوديه لمحل، مش خسران شيء، اللي عمله لي انه فكك case الهاردسك الخارجي بكبره، شاف المكونات الداخلية ولقى قطع متفتتة ما تشتغل، لكن الهاردسك الرئيسي نفسه كان سليم، كل اللي عمله انه استخرج الهاردسك الاساسي وحطه داخل هيكل ثاني تماما وصار كأنه اشتريت هاردسك جديد مختلف تماما (@) واستعدت ملفات مهمة ما كنت مدرك اني مفتقدها ومحتاجها :")

هو يمكن انت جربت توديه عند محل وما نفع وبالغالب نوعية مشكلتك مختلفة، بس ما اشوفك ذكرت هالشيء

 

[Zorro]

@MH MD
انا للحين ما وديته لأي محل أبخليها آخر خيار ، لأنه اعطال الهارد ديسك بزنس ممتاز للأسف و استغلال سيء للأسعار والظروف
أما مشكلة الهارد الخارجي أن الكمبيوتر ما يتعرف عليه خير شر ، مع أن مؤشر الكهرباء في الهارد شغال بمجرد ما يتوصل بـ USB

------------------------------------------------------​

::::: تحديث 2 :::::
قبل كتابتي للموضوع كنت فكيت غطاء الهارد الخارجي ، أو بالأصح كسرت جزء منه لأنه بدون مسامير
لأن الهارد لما اهزه ما يطلع صوت ، فبالغالب مافي شي مكسور بوضوح ، فقلت لعل وعسى لو افتح الغطاء ألقى شي مرتخي سلك ما او قطعة أو ماشابه فتنحل المشكلة ( حنا مساكين اللي مانفهم بالصيانة ، دايما نظن دايما ان المشكلة مجرد سلك ولا مسمار نشدهم او شي نلصقه و هوووبا تنحل المشكلة )
طبعا بعد مافتحته ماشفت شي غريب ، كل شي بمحله و سليم ، فشبكته مباشرة بالكمبيوتر ، كمان ما اشتغل !!
جاء على بالي احتمالية انه صار مشكلة بالكهرب وصار ضعف بالتوصيل "" عسى فرج يكون عسى :: نعلل أنفسنا بعسى ""
شلت القطع الزايدة من الهارد و حولته لهارد داخلي و شبكته لعل وعسى تضبط الأمور كما قال الشاعر اللي فوق :emoji_point_up:
للأسف مانفعت ولا الكمبيوتر اتعرف عليه ! تــبــا
كل اللي استفدته من فك الكمبيوتر وتحويل الهارد من خارجي لداخلي اني نظفت الجهاز من الغبار اللي فيه

ومازال جاري البحث عن حلول ..

انتظرونا في التحديث 3 اللي ما ادري متى بيستجد
لعل وعسى اجيكم و المشكلة محلولة

 

[Zorro]

بالمناسبة
اللي عنده تجربة بأعطال الهارد او الفلاشات ، بتفضل يذكرها مشكورا مثل ما تشرفنا بتجربة @MH MD
لعل و عسى نستفيد ..

*** هاليومين وانا ابحث في النت قرأت عن تجربة غريبة في إحياء القرص الصلب !
بجربها و ارد لكم بتحديث جديد

 

[MH MD]

انا للحين ما وديته لأي محل أبخليها آخر خيار ، لأنه اعطال الهارد ديسك بزنس ممتاز للأسف و استغلال سيء للأسعار والظروف

اتفهم ليش تفكر كذا ، اي مشكلة تجيني على طول ابحث عن حلول لها لو اقدر احلها بنفسي، متضمن مشكلة الهاردسك اللي ذكرتها، بس كانت مشكلة هاردويرية بالنهاية وحتى لو ما وديته المحل عشان يصلحه، لازم اروح للمحل بجميع الاحوال حتى اشتري القطع ، بهالحالة هي قطعة وحدة اللي توصل من الهاردسك الفعلي للكمبيوتر

القطعة اللي ماسكها بيده هي اللي واجهت مشكلة معاها وهي اسمها SATA to USB adapter ،وفعلا خرابها خلى الكمبيوتر ما يتعرف على الهاردسك برضو مع انه وقت ما اوصله كان يظهر نور انه شغال، بس بحالتي كان النور يشتغل لثواني ويطفى مع الهاردسك، بالعادة وقت ما اوصل الهاردسك وامسكه الاحظ صوت خفيف وحركة بداخله وهالشيء كان دلالة ان الهاردسك الاساسي لسه شغال، جربت تلمسه عندك وتتحسسه بعد ما وصلت للكمبيوتر؟

المهم القطعة اللي فوق تقدر تشتريها لحالها وهي رخيصة، بس لازم تكون حذر بفك الأصل وتركيب الجديدة، الشيء ممكن تسويه لو عندك الادوات اللازمة وهي سهل تفكها، بس وقتها الاريح تخلي خبير يتعامل مع الموضوع، اللي اتعاملت معاه كان كويس وما طلب اكثر من 80 ريال للسالفة كلها متضمنة القطعة،بينما اعرف ناس واجهتهم مشاكل هاردسك والمحلات طلبت منهم اسعار استغلالية زي 500 ريال او اكثر

وبالتوفيق وان شاء الله تنحل مشكلتك ^_^

 

[Zorro]

@MH MD
القطعة هذه سليمة للأسف ، لأني لما فكيت الهارد مثل ما ذكرت فوق :: بالتحديث 2 :: كان سليم ، مثل أي جزء ثاني ظاهر لي ، ولو فرضا كان فيها مشكلة ، انا شبكت الهارد داخلي مع الكمبيوتر و برضه ما اشتغل !!
في الغالب - وأتمنى اني اكون غلطان - المشكلة داخل علبة القرص نفسه لكن بأي جزء للحين ما اعرف ..

سعيد باهتمامك و المناقشة معك ..
دمت بكل الود ..

 

[ASWD]

صادفت نفس المشكلة ويا الوسترن ديجيتال ابو كهرب.حاول ينتحر وطاح من فرق الطاولة وخلاص ما تعرف عليه الكمبيوتر مرة ثانية ولا قام يشتغل الضوء حق الباور

فكيته وشلت الهارد من الكيس حقه وفصلت قطعة الادابتر اللي توصل فيها واير التشغيل لانها ماكانت بلت ان.رحت شريت قطعة اسمها ساتا كونڤرتر بدينارين ونص=٢٥ ريال وفيه انواع كثيييرة وهذي شكلها مثل اللي اخذتها
https://m.ebay.com/itm/SATA-PATA-ID...ble-for-Hard-Drive-Disk-2-5-3-5-/401509312755

شبكته على الكمبيوتر بواسطتها واخذت ملفاتي منه والسلام.هالحادثة صار ليها فوق خمس سنوات اذا مو اكثر.وللحين هالقطعة والهاردديسك موجودين .ولو اني ما استخدمه لانه حق ديسكتوب بس فيه للحين ملفات تخصني

 

[Zorro]

@ASWD
القطعة هذه اعرفها ، استخدمته زمان مع هارديسك وكان جدا منقذ بوقتها ، لكنه للأسف ماراح ينفع مع حالتي هذه ، لأنه فيه باور اصلا و ايضا شبكت الهارد بالكمبيوتر "داخليا" ، يعني بنفس الأسلاك لكن للأسف ما اشتغل !

بالمناسبة ..
الأدابتور أو المحول اللي ذكرته أنت فيه ناس للآن ماتعرف انه موجود بالسوق ، ويفك أزمات كثير ..

أشكرك للمرور و عرض تجربتك ..

 

[DINO CRISIS]

حصلت معي مرة انه كان عندي هاردسك خارجي ، سقط على الأرض ومع الأسف ذهبت البايانات كلها وما اشتغل

وذهبت لأحد المحلات وطلب مبلغ 1500 أو 1000 ريال وقتها وما دفعت وقال لي اذا البيانات غير مهمة ما في داعي تخسر فلوسك واشتري واحد جديد

ومع الأسف كان فيه بعض الأشياء المهمة بالنسبة لي لكن في النهاية قررت أشتري واحد جديد

وصارت معي حالة انه الجهاز ما يتعرف على بعض الهادرسكات الخارجية الا اذا غيرت اسمائها

 

[Zorro]

وذهبت لأحد المحلات وطلب مبلغ 1500 أو 1000 ريال وقتها وما دفعت وقال لي اذا البيانات غير مهمة ما في داعي تخسر فلوسك واشتري واحد جديد

هذه مشكلة أغلب المحلات إذا ماكان كلهم ، المبالغة في السعر ، يعاملون الزبون كأنه شركة و يهمها البيانات اللي في الهارد و بتدفع اللي قدامها واللي وراها ..
أتفهم أن بعض الحالات يحتاج الى تعب في الشغل ، لكن مش معقول انه يطلب مبلغ يوازي ربع أو نص راتب وأحيانا قد يكون راتب عند البعض !!
زمان سمعت بمبالغ خيالية ، أقلها كانت 5000 ريال "سعودي" ، الشغلة هذه لو منتشرة كان لقينا بعض التنافس ، لكن للأسف محتكرة ..

شاكر لك المرور للموضوع ..

 

[Pineapple]

لهذا السبب انصح الناس انهم يستخدمون الخدمات السحابية في تخزين الملفات المهمة افضل شي توفره لك هو ان متى ما بغيت ملف تسحبه دون اللجوء للهارديسكات بما انها معرضة للتلف و انصح الناس كذلك انهم ما يقسمون الهارديسك الى بارتيشنات يخلي ssd sata 250gb لنظام التشغيل فقط و بعض البرامج الخفيفة و هارديسك ميكانيكال للالعاب و البرامج الكبيرة ١ او ٢ تيرا و يريح نفسه اما اذا شخص جهازه لتعديل الفيديوهات و اليوتيوب و ادوبي بريمير و سوني فيجاس فبالتاكيد يجيب ssd ssd nvme سريع و هارديسكات احجام كبيرة للتخزين.

 

[Zorro]

لهذا السبب انصح الناس انهم يستخدمون الخدمات السحابية في تخزين الملفات المهمة افضل شي توفره لك هو ان متى ما بغيت ملف تسحبه دون اللجوء للهارديسكات بما انها معرضة للتلف

الخدمات السحابية أنا متفق معاك في فائدتها ، لكني في حالتي ابدا ماتنفع ..
انا اغلب ملفاتي فيديو و صوت ، الخدمة السحابية غير مجدية لبيانات حجمها كبير جدا لكنها للملفات العادية ، اتفق معك بقوة .. ( كلامي بناء على سرعة النت والأبلود في معظم مناطق بلادنا العربية )
أما انا فنصيحتي لأفضل طريقة لحفظ الملفات الكبيرة هو اقراص الديفيدي DVDs و بس
ولو كانت قرص بلوراي يا سلام ،،، احسـن و احسـن
لا فلاشات ولا هارديسكات ، هذولا اقرب اقرب طيحة أو أي سبب ثاني "أو حتى ممكن بدون سبب" تروح في شربة ماء !!
عيب الديفيديات انه حجمه محدود 4.7 جيجا لكن اسعارها رخيصة (طبعا اتكلم على النوعية اللي تنحرق عليه مرة واحدة مش اللي قابل تنحرق عليه كذا مرة) ، اما "الدبل لاير" ابو 8 جيجا ما اتوقع انها عملية عشان اسعارها مقارنة باللاير واحدة ..

و انصح الناس كذلك انهم ما يقسمون الهارديسك الى بارتيشنات يخلي ssd sata 250gb لنظام التشغيل فقط و بعض البرامج الخفيفة و هارديسك ميكانيكال للالعاب و البرامج الكبيرة ١ او ٢ تيرا و يريح نفسه اما اذا شخص جهازه لتعديل الفيديوهات و اليوتيوب و ادوبي بريمير و سوني فيجاس فبالتاكيد يجيب ssd ssd nvme سريع و هارديسكات احجام كبيرة للتخزين.

اللي مقتدر ماديا اوكيه ، انا معك
بس احب اقول انه اللي مايقدر على نصيحتك لازم يقسم الهارد الداخلي أقل شي قسمين ..


شاكر لك مرورك اخي ..

 

[Zorro]

::::: تحديث 3 :::::

كنت فتحت الهارد الخارجي و ركبته كداخلي على الكمبيوتر و ما اشتغل خير شر مثل ما ذكرت في التحديثات فوق
فطلعته من الجهاز و حاولت ارجعه مثل ماكان كهارد خارجي و اركب غطائه ، و اسوي عليه تجربة غريبة كنت قراتها في النت ، لكن جاني فضول اجرب اشبكه على ال USB و اشوف ..
بقدرة القادر اشتغل الجهاز و تعرف عليه الكمبيوتر لــكــن بمحدودية
شاف انه فيه قرص اتوصل فيه ، لكن يحتاج فرمتة فقلت مب مشكلة ابد ، عندي ذاك البرنامج الرهيب
Disk Internals Partition Recovery
راح يفيدني مثل ما افادني في بداية الموضوع مع الهارد الداخلي ابو 200 جيجا

المهم ياجماعة للحين البرنامج يبحث عن الداتا من 24 ساعة و ما صار شي !!! لكن فيه مشكلة شائعة في الويندوزات لما اي برنامج ينشغل بعمل معين ، ان البرنامج لا يستجيب Not Responding !!
لكن لمبة الهارد ديسك شغالة "وميض يشتغل و يطفي" blinking من 24 ساعة
يعني ان البرنامج متصل بالهارد و يسوي شغل ..
لكن فعليا انا ما ادري هل البرنامج يعمل بحث ولا معلق !!
لأن لما عملت حسبة بسيطة تقريبية الهارد اللي في بداية الموضوع ال 200 جيجا لما جربت عليه البرنامج نفسه اخذ تقريبا نص ساعة عشان يخلص بحث
الهارد خارجي 3 تيرا = 3000 جيجا ، يعني المفروض ياخذ تقريبا حول 7 ساعات و نص
ولو زاد ساعة او ساعتين لا مشكلة .. لكن الى الآن 24 ساعة !!

انا محتار لأن ان البرنامج لا يستجيب . أقدر اوقف البرنامج اجباري من مدير المهام لكن اخاف جدا اكون مثل "الشخص اللي ضرب بفأسه حجر 99 مرة و وقف لأنه تعب و طفش ، ولو كان كمل الـ 100 ضربة كان انكسر "
مش متاكد من القصة لكن اهم شي المغزى

هل فيه نصائح او اقتراحات ؟؟
يا اوقف البرنامج .. يا اعطيه فرصة ، لكن لمتى ؟!!

تبا لـ " البرنامج لا يستجيب "

 

[Zorro]

::::: تحديث 4 :::::
مرت 30 ساعة على تعليق البرنامج و وقفت البرنامج من مدير المهام ..
ورجعنا من أول ومن جديد ، جاري البحث عن حلول اخرى !!

 

[AnD_SaMa]

هل وصلت لحل لأن عندي هارد نفس المشكلة

 

[Zorro]

هل وصلت لحل لأن عندي هارد نفس المشكلة

للأسف لا .. ماصار شي جديد ،،
و ناوي اجرب نفس البرنامج هذا 4.2 Disk Internals Partition Recovery اللي بالتحديث 3
مشكلة هالبرنامج بالإصدارة 4.2 المتوفر انه يعلق ، اظنه عمل معاي نفس الحركة لكن بالهارد الداخلي ، لكن لما خلص شغله بعد فترة رجع وكمل عادي ..
المرة هذه راح اشبكه على جهاز مستقل و معالجه اقوى شوي و اتركه على راحته كذا يوم ، و اشوف ايش اخرتها ..


*** طيب ايش مشكلتك بالضبط ؟؟ و ايش المحاولات اللي جربتها ؟

--------------------------------------------------------------​

ما ادري اذا طلبي هذا مخالف او لا .. إذا مخالف اتمنى مسح الجزئية اللي تحت فقط ..


:: ملاحظة ::

اللي له خبرة ممتازة بالبحث او له بالتَووررنيت - تعمدت اكتبها خطأ - و يقدر يبحث لنا البرنامج هذا
Disk Internals Partition Recovery لكن بإصدارة اعلى من 4.2 أيا كان و كامل ياليت يرسل راابطه ع الخاص .. يسوي فينا خير ..
لأني قلبت النت فوق تحت و مالقيت غير الإصدارة 6 لكن ينقصه التـف-عيـ-ل ..