الحلقة فيها حاجات كثيرة ممكن التعليق عليها و الأعضاء ماقصروش فى النقاش بصراحة
الساحرات و شخصياتهم الغريبة كانت أهم النقط فى الحلقة ، الإنطباع اللى اتكون عندى إن الساحرات بصفة عامة مش أشرار أو طيبين (يمكن باستثناء مينيرفا

) و إنما هم أقرب لشخصيات طفولية غير ناضجة ، لو اديت لعبة لطفل فهو ممكن يكسرها لأنه طفل مش لأنه شرير بس فى حالة الساحرات فمع القوة المهولة اللى عندهم العالم كله بقى أقرب للعبة ممكن كسرها (الشئ اللى عملته دافنى فعلا) و الشئ الواضح إنهم ماعندهمش استيعاب حقيقى لتبعات تصرفاتهم فى معظم الوقت
بالنسبة لتايفون فإهتمامها بسوبارو لدرجة إنها حلت مكان دافنى عشان تقابله كان لافت للإنتباه ، كان فيه نظرية بإن سوبارو يبقى Pride (نفس خطيئة تايفون) و فى الحالة دى فإهتمامها بمعرفته منطقى بما إنه خليفتها و إن كان ممكن يبقى فى أسباب تانية ، الشخصية تم وصفها من قبل إيكيدونا بالبراءة و القسوة فى نفس الوقت الشئ اللى كان واضح من تصرفاتها
بالنسبة لمينيرفا فحبيت شخصيتها و تصميمها

، مينيرفا شخصية بريئة فعلا و هدفها علاج اللى حواليها بس المشكلة إن مع قوتها اللى شفنا تلميح ليها فى الحلقة و شخصيتها ال Over the top فهى ممكن تتسبب بمشاكل بدون قصد
بالنسبة لدافنى فهى مرعبة لأكثر من سبب ، دافنى بتقول إنها عملت الوحوش لسد الجوع بس حتى لو هى بتصدق ده فعلا فأظن إن داخليا هى عندها سبب مختلف ، دافنى ماكنش عندها مشكلة فى إنها تدى تفاصيل عن الوحوش لسوبارو و ده منطقى مع مبدئها بإن الحياة ممكن تأكل أو تؤكل بس بمجرد لما سوبارو قال إنه هايقضى على وحوشها فكان واضح إن ده أثر عليها و كان عندها ثقة فى إن أى بشرى عادى مش هايقدر على ده ، الفكرة إن كون الوحوش بالقوة دى و كون إن دافنى مدركة تماما مدى قوتها و إن البشر العاديين مش هايقدروا عليها فده يخلينى أحس إن كلامها عن إشباع الجوع مش منطقى ، دافنى قالت إن الناس بيستخفوا بالشراهة و إن اللحظة اللى توصل لقمة الجوع ساعتها هاتعرف العالم اللى هى و الأرنب عايشة فيه و من كلامها فأظن انها عملت الوحوش كإثبات مستمر لقوة و تأثير الشراهة و عشان العالم يعيش بمبدأها إما أنك تأكل أو تؤكل و ممكن برضه عشان العالم يحس بالجوع اللى هى عايشة فيه
برضه كون إنها مقيدة فده بيدل على مدى خطرها و اللى واضح إنه مش مقتصر على القوة الجسدية فقط و إنما حتى مجرد النظر ليها ممكن يتسبب فى مشاكل و بصفة عامة هى شخصية أقرب لعدو بالنسبة لى
الشئ اللى لاحظته إن كل الساحرات بينادوا إيكيدونا ب Nicknames و أظن إن عندهم معزة ليها و من بعد لقاء الساحرات رجوع إيكيدونا كان راحة فعلا و حوارتها مع سوبارو كانت رائعة و حبيت جدا جانبها الطفولى خاصة المشهد لما قال لها إنها بقت زى العائلة و هى قالت إن ده مش هايأثر فيها و هى بتقدم له الشاى و البسكويت فى سعادة واضحة
الحلقة بتنتهى بالظهور المرعب و الصادم لساتيلا و اللى كان يليق بكل الهايب اللى اتعمل ليها و متفق مع
@MH MD فى إن ايميليا و ساتيلا شخصيتين مختلفتين و إن ساتيلا فقط استحوذت عليها بشكل ما بس بالنسبة لسبب ظهورها و معنى كلام روزوال فهانتظر لما الرؤية تتضح أكثر
فى ملاحظتين فى النهاية ، الأولى إن لو دافنى (خطيئة الشراهة) هى اللى عملت الوحوش فهل ده معناه إن الشخص اللى حصل على قوتها فى الوقت الحالى (الشخص اللى أكل ذكريات ريم) يقدر يعمل وحوش مماثلة ، أظن ممكن بس مش هاتبقى بنفس القوة لأن دافنى تبدو إنها فى مستوى تانى
الثانية تبقى إن الكلام عن قدرة الرجوع من الموت و كونها إنها Witch's Delusion ماكنش واضح بالنسبة لى و مش عارف هل هى مشكلة من الترجمة أم الإقتباس و اتمنى يبقى فى توضيح أكثر بخصوصها فيما بعد