أظن إن الطريقة اللى انتهت بيها الحلقة ممكن ماتعجبش جزء كبير من المتابعين و ما اقدرش انكر إنها ضايقتنى فى البداية خصوصا إنى تابعت الحلقة بعد يوم شغل طويل

، بس بعد ما فكرت ابتديت أغير رأيى
فى البداية حقيقة السابع هتنكشف أخيرا و زى ما معظم المتابعين توقعوا الأميرة هى السابع فعلا بس المرة دى هانز هو اللى كشف الحقيقة مش أدليت ، هانز أثبت إنه ذكى جدا على مدار الحلقات بالإضافة لتفكيره فى جميع الإحتمالات الممكنة
تصرفات الأميرة الغريبة و شخصيتها الغير مستقرة كانوا مثار للشكوك و الحلقة بتأكد ده أخيرا بس المفاجأة كانت فى كم الجنون اللى الأميرة بينته فى الحلقة

بالإضافة إن استخدامها لقدرات ال Feinds دليل على إن تعاملها معاهم كان من مدة طويلة
الأميرة كان ممكن تقتل أدليت لما قابلته أول مرة و تخبى موضوع السابع بس ده ماكانش هدفها ، الأميرة كانت عاوزه ال Braves يشكوا فى بعض و يقتلوا بعض فى الآخر من غير ماحد ينتبه ليها ، فى البداية خلت الشك يتوجه ناحية أدليت فى الوقت اللى ابتدت تقنع فيه جولدوف إنه هانز هو السابع و بعد ما تتخلص منهم كانت غالبا هتتوجه ناحيه فلايمى بس اللى ماتوقعتوش إن أدليت قدر يتعامل مع الموقف الصعب اللى اتحط فيه و إن جولدوف هيتردد من موضوع قتل هانز و على حسب كلامها إنها كانت هتتصرف بطريقة مختلفة لو كانت عارفة كده ،حبيت جدا لما أدليت قرر إنه يقتلها بعد ماعرف شخصيتها الحقيقية

الكل سواء الأميرة أو حتى باقى الBraves أساؤا تقدير أدليت و ده اللى اتسبب فى اللى حصل فى النهاية ، أدليت ماعندوش قدرات زى الSaints و ماعندوش المهارات أو القوة اللى عند هانز و جولدوف بس قدرة أدليت على التكيف و التعامل مع المواقف المختلفة غير عادية ، أدليت مش البطل التقليدى بس مع كده قدر إنه يثبت إنه البطل المناسب لمهمة غير إعتيادية
النهاية الغريبة و اكتشاف إن موضوع السابع هيتكرر من جديد كان المشكلة الكبيرة فى الحلقة خصوصا موضوع ظهور الشخصية الجديدة فجأة ، على حسب كلام متابعى الرواية إن ظهور الشخصية و اللى حصل مش عشوائى و إن النقط اللى ما كانتش واضحة هيتم شرحها بالتفصيل بعدين و على الأساس ده تقبل النهاية بيعتمد بشكل كبير على إذا كان هيبقى فى موسم تانى و لا لأ و للأسف ما فيش أى أخبار حتى الآن و أظن إن احتمال عمل موسم تانى هيبقى قليل
بصراحة عاوز موسم تانى بأى شكل

، العمل كان من أحسن أعمال موسم الصيف و حبيته جدا و حتى لو كانت النهاية مفتوحة فالحقيقة إنى استمتعت جدا بمتابعة العمل و النهاية مش هتغير ده

كفاية بالنسبة لى إن العمل قدم شخصيتين من أكثر الشخصيات اللى حبيتهم فى الموسم و هما أدليت و الجميلة فلايمى

مشهد غيرة فلايمى فى نهاية الحلقة كان روعة
