أساكوسا بتصميمها و صوتها المميزين بتجذب إنتباهك فى البداية و حماسها الشديد للأنمى معدى خصوصا إنه بيظهر كشئ Genuine مع خيال واسع و أفكار بعضها ممكن يكون عدى على المتابعين فعلا ، أحد أحسن مشاهد الحلقة الأولى بالنسبة لى تبقى مشهد متابعتها لعرض الأنمى مع كانامورى و شرحها لتفاصيله ،حتى بالرغم من إن إهتمامى بالتفاصيل مش كبير كما ذكرت إلا إن شرحها الحماسى و السريع و اللى كان موازى للتطبيق العملى للى بتقوله على الشاشة كان مبهر فعلا بالنسبة لى
ميزوساكى تبقى بنت غنية عاوزة تبقى أنيميتور و حبيت إن موضوع إنها غنية أو مشهورة بيتقدم كتفاصيل بسيطة بتظهر فى حوارتها بشكل عفوى أو بشكل عام زى صورها فى المواصلات ، التركيز على ميزوساكى مش كبير و شخصيتها أقل فى التميز من باقى الشخصيات حتى الآن بس ده ما يمنعش إنها ليها لحظاتها زى النصف الثانى من الحلقة الثالثة
أخيرا الرائعة كانامورى و اللى أظن إنها بقت الشخصية المفضلة لمعظم متابعى العمل
، بالنسبة لى كانامورى تبقى من أحسن ما فى العمل و فى نفس الوقت أكبر نقط تخوفى منه (و إن كان ده قل مع الحلقة الثالثة)
كانامورى شخصية جادة و واقعية بتفكير مادى و بتقدم هنا شئ مختلف و غير معتاد على النوعية دى من الأعمال ، عادة فى الأعمال اللى الأبطال بيحاولوا يحققوا أحلامهم فيها الشخصيات زى كانامورى تبقى إما ضدهم أو بتبقى رافضة الموضوع فى البداية بس بعده كده بتبتدى تكتشفه و تنبهر بيه و تبقى واحدة من الأبطال بس هنا الوضع مختلف بشكل كبير
نقطة حبيتها فى العمل فى إنه بيحاول يقدم موضوع تحقيق الأحلام بشكل واقعى نسبيا، الخيال و الحماس لوحدهم مش كفاية عشان تحقق أحلامك و لو أساكوسا و ميزوساكى بالرغم من إمتلاكهم الموهبة كانوا لوحدهم ماكانوش هايوصلوا لحاجة بس إنت محتاج شخصيات زى كانامورى بتركز على الجانب الإدارى و المادى و فقط لما الجانبين بيتعاونوا مع بعض فساعتها ممكن تحقق اللى انت عاوزه و ده بينقلنا لمشهد مهم فى الحلقة الأولى
من بعد شرح أساكوسا الطويل لكانامورى فى عرض الأنمى كانامورى هاتعتبر إن الشرح ده مزعج بس فى نفس الوقت هاتعترف بإن صناعة الأنمى أعقد من اللى كانت فاكراه و ده هنا ليه أكثر من معنى
الأول بالنسبة لكانامورى نفسها إن حتى بعد متابعة عرض الأنمى فهى ماتأثرتش بيه زى أساكوسا ، كانامورى كانت و مازالت عندها قيم و أفكار مختلفة بشكل كبير عن أساكوسا و ميزوساكى و مش هاتبقى فى أى وقت محبة للأنمى بنفس طريقتهم و ده شئ واقعى و طبيعى إن مش كل الناس هاتحب الأنمى بس فى نفس الوقت هى مدركة إن الأنمى مش شئ بسيط و عندها فكرة عن كم المجهود المبذول فيه من جهة و قيمة الموهبة اللى عند أساكوسا و ميزوساكى من جهة تانية و ده المهم ، حتى لو كان هدفها الأساسى يبقى مصلحتها الشخصية مش صناعة الأنمى نفسها فكون إنها بتساعد أصدقائها مع تقدير ليهم و إقتناع بأهمية اللى بيعملوه يبقى كافى ، ده برضه ممكن ناخده على صناعة الأنمى بشكل عام ، البحث عن النجاح أو الربح فى حد ذاته مش مشكلة و إنما المشكلة فى عدم وجود توازن بين الجانب المادى و الفنى (الشئ اللى بنشوف تلميحات ليه فى الحلقات الثانية و الثالثة) و ده المعنى المهم من وجود كانامورى أو على سبيل المثال مشهد زى ده :
بالرغم من كل اللى قلته عن دور كانامورى إلا إنى فى البداية كان عندى مشكلة كبيرة تجاهها ، كما ذكرت دور كانامورى مهم بس المشكلة عندى كانت فى موقعها فى العمل ، كانامورى المفترض إنها طالبة فى نفس سن أساكوسا و صديقة ليها بس فى الحلقة الأولى بالذات هى ما إدتش الإنطباع ده و حوارتها كانت بتديك الإحساس إنها أقرب لمديرة أعمال أو واحدة أكبر فى السن بكثير من إنها تبقى طالبة ، برضه الإختلاف المهول بينها و بين أساكوسا يخليك تتسأل إزاى الإثنين يبقوا أصدقاء من البداية و الإحساس ده بيزيد لما أساكوسا تدخل فى النقاش مع ميزوساكى و ساعتها كانامورى بتبقى خارج الحوار كأنها مش جزء من المجموعة و إنما شخصية من الخارج و ده ضايقنى جدا فى البداية ، كانامورى لوحدها شخصية ممتازة بس كجزء من المجموعة فالوضع المختلف و حسيت إن فى التفاعل بينها و بين الشخصيات كان ممكن يبقى أحسن بكثير ، ده اتحسن بشكل واضح فى الحلقة الثالثة و أخيرا ابتدينا نشوف جزء تانى من شخصية كانامورى زى حوارها مع ميزوساكى و اللى يوحى إنها بقت صديقة لأساكوسا نتيجة إعجابها بحماسها الدائم
بمناسبة الكلام عن مشاكل العمل فأحد المشاكل كانت السرعة الكبيرة خصوصا فى أول حلقتين ، الحلقتين كان مستواهم ممتاز بس مع Setting مميز زى اللى فى الأنمى كنت أفضل لو العمل خد وقته فى استكشافه و فى عرض المعلومات بس ده برضه اتحسن نسبيا فى الحلقة الثالثة و اللى كانت أهدأ ، نقطة تانية بس دى أقرب لشئ محتمل من إنها تبقى مشكلة حقيقية هى التعمق فى تفاصيل الصناعة بشكل ممكن ثقيل على بعض المتابعين، حتى الآن ده ماحصلش فى العمل و الكلام عن صناعة الأنمى اتقدم بشكل جيد جدا و ممتع حتى بالنسبة للغير مهتمين بس اتمنى إن ده يستمر و الموضوع مايبقاش معقد مع الوقت
عظيم ولصق بمخي من اول ما سمعته بتريلر قبل عرض الانمي حتى، الانيميشن يزيده تميزا
