Tiny
Hardcore Gamer
قبل عدة اشهر كنت ابحث عن لعبة تستحق التحميل من البلس، خلال البحث لقيت لعبة اسمها inscription، بصراحة ما اعرف شيء عن اللعبة ولا بحثت الا عن تقييماتها وكانت ممتازة.. الاختيار كان اشبه بأيام الطفولة لمن تذهب للمحل وتختار على حسب شكل الغلاف
حملتها ولعبتها حدود ساعتين او اقل.. كانت ممتعة بس ما كنت افهم اشياء في اللعبة، زي ليش لمن اخسر ينعاد كل شيء؟ ليش كل ما العب احس ما اتقدم في اللعبة
بكل امانة كنت مستمتع والمفترض ابحث شوي عن اللعبة، ولكن انشغالات وامور اخرى أجبرتني اترك اللعبة حاليًا على الاقل (ما كان عندي نية ارجع لها، يمكن لان العاب البطاقات ما تستهويني كفاية)
مرت الايام والاشهر وظهر لي فيديو عشوائي لأحد الاشخاص يمدح اللعبة وكل شيء فيها وقد ايش قصتها ممتازة واللعب ممتع، و وصفها كأكثر لعبة بطاقات استمتع فيها
ما اخفيكم تحمست ارجع العبها، خصوصًا انها ظلت موجودة في الجهاز.. رجعت وقررت اعطيها حقها وزيادة وافهم كل شيء ما فهمته وأبرز شيء هو ليش ما احس اني اتقدم؟
واكتشفت ان نظام اللعبة روقلايت، وعشان اكون صريح تجاربي مع هذا الجنرا محدود وكل تجاربي كانت تبعدني عن هالالعاب بعد فترة وجيزة
إلا هذي اللعبة، كل شيء في هذا النظام يخليها امتع وافضل، كل خسارة تحمسني اعيد من جديد مع بطاقات جديدة وفكر جديد
ايش اقدر اقول؟ هذي افضل لعبة بطاقات في التاريخ؟ تجاربي لهذا النوع محدود.. اللعبة الوحيدة البطاقات اللي العبها وانا مستمتع كانت يوغي
—
الآن ببدأ اتكلم عن اللعبة وبطبل شوي تحملوني، اللعبة ترميك في كوخ معزول مظلم، لا تفسيرات، لا توضيحات، الشيء الوحيد الموجود معك هو شخص او وحش او كائن غريب لا ترى ملامحه والشيء الوحيد اللي تشوفه هو عيونه ويده القبيحة اللي يظهرها اذا خسرت
من هذا الشخص؟ ليش تلعب معه أو تلعب معه أو تلعب معه بلا توقف؟ خاطفك؟ كائن غريب او انسان هذا؟ لي بعد كل خسارة يرميك في غرفة منعزلة ويلتقط لك صورة تضعها في الكرت؟
اسئلة كثيرة بتدور في ذهنك، ماراح تلقى اجابة الا لو تقدمت في اللعبة، قصة ممتازة وبتشدك من اول لحظة
وأعتقد احتاج اتكلم ان كيف لعبة بطاقات فيها قتال زعماء؟ كل زعيم له اسلوب وكل زعيم له ميوزك خاص به، وكيف من الاساس لعبة بطاقات تمتلك ساوندتراك زي هذا…
اذا الكلام هذا مو كافي انك تتحمس تجربها على الاقل، فأظن اذا عرفت انها من الناشر Devolver Digital فهذا سبب اضافي تلعبها
احتاج لاعبين اكثر يلعبوا هذي الماستربيس، بتجمع بطاقات وبتدمج بطاقات وبتفكر كثير خلال القتال مع البوسز فايت، تجربة استثنائية ومختلفة لان متأكد كثير مثلي لا يحب العاب البطاقات او تستهويه
ابي اضيف شيء أخير غريب اذا سمعته ولكن اذا لعبتها بتفهم المعنى، اللعبة صحيح لعبة بطاقات ولكن انت بتلعبها بثلاثة اساليب مختلفة وتوجه فني مختلف، نفس القوانين ولكن كل شيء ثاني يتغير لدرجة بتبدا تحس انك تلعب لعبة جديدة
حطها في قائمتك وعطها تجربة.. اذا ما فهمت شيء اطرحه هنا او ابحث عنه، بتلعب واحدة من افضل الالعاب مع قصة بتذهلك كل ما تتقدم، لا تتردد!
التعديل الأخير:
