*إحم*
قبل ما أبدأ اللعبة سويت ماراثون لأفلام هاري بوتر لأنه شفتها وانا صغير زمان، وبصراحة كان قرار صائب تمامًا لأنه اللعبة مليانه تلميحات لأشياء بالرواية والأفلام.
مثلا لاحظت وحدة من الأوراق في المكان اللي فيه الغرفة السرية بالفلم الثاني-اللي شافوا الفلم يعرفون مدخلها من فين وراح تحصلوه باللعبة- والورقة تحكي عن
أفعى!! وكمان سالفة
مقدسات الموت اللي تدور حولينها آخر فلمين لها ذكر كبير باللعبة!
ففعلا أنصح أي شخص يبني الـ Lore عن العالم بهاري بوتر قبل ما يلعب اللعبة، وكمان يفضل يشوف مقاطع تشرح ماضي الشخصيات لأنه الأفلام للأسف كثير أشياء ماوضحتها بشكل مباشر عكس الروايات على مايبدو، فالمقاطع هذه مكملة وصراحة عجبني أسلوب هالشخص بهذه
القناة بينلي أشياء كثيرة كنت فاهمها غلط خصوصا إني مو قاري الروايات@@"
عموما نرجع للعبة، كالعادة بعطي رأيي على شكل نقاط فضفضة:
* استغرقت اللعبة مني لتختيم القصة مع كثير من المهمات الأنشطة الجانبية حوالي
42 ساعة، وبعد ماخلصتها احتجت 26 ساعة إضافية حتى أجيب البلاتنيوم فالمجموع تقريبا 68 ساعة.
القصة:
* اللعبة كبداية فعليا تمتلك واحدة من أقوى المقدمات القصصية اللي مرت علي بعالم الألعاب، يكفي أول ماتبدأ تجيك رسالة تهنئك بالقبول بالمدرسة عليها ختم المدير! كمانا توفقوا في جانب التعليم(التوتوريال) بحيث دمجوا استكشافك بأول ساعة بتعليم بدون ما تمل من واحد على حساب الثاني .. وكمية الأسرار والتساؤلات كانت معقولة، وما اتكلم عن اللعبة بالنستولجيا ، عربية تطير... فجأة تنين، فجأة انتقال آني لمكان بعيد، بعدين انتقال لخزنة ، الانحباس فيها .. وأخيرا موعد اختيار المدرسة مع القبعة المتكلمة! هالاشياء المجتمعة لو أضفت عليها احساس الضياع والانبهار بأول كم دقيقة بمدرسة هوقورتس نفسها راح تعرف إن قدامك منتج مصنوع بكل حب، من فانز لفانز !
* شخصيات المعلمين في اللعبة وإن كان ماكان لها ظهور كثير خارج صفوفهم، لكن تقدموا بشكل ممتاز يحاكي الكاريزما المعتادة بأساتذة هوقورتس .. تمنيت فقط خلونا نتعمق أكثر بقصصهم من خلال مهمات فرعية، لكن لاحظت إنهم اكتفوا بكتابة اشياء عن ماضيهم منتشرة بأرجاء المدرسة وعليك التجميع.
* شخصيات الطلاب غالبهم بالمستوى العادي بصراحة، باستثناء سباستيان وبوبي وأمينس هذولا الثلاثة بالذات اندمجت بقصصهم كثير .. قصة سباستيان بالذات واضح تعتبر رئيسية أكثر من كونها جانبية، الجدير بالذكر عجبني التنويع في الشخصيات حتى يحاكوا طبيعة المدارس، تلقى الخجول، والمتنمر، والمشاغب وغيرهم
*القصة الرئيسة كما ذكرت بدايتها قوية وتسلسل أحداثها حلو بالذات للي يبغى يركز عليها ، لكن عندي احباط شوية من نهايتها ... حسيت فيه كم شيء ناقص أو كأنها فجأة كدا خلصت!
*المهمات الفرعية داخل المدرسة نفسها مستواها جيد وثابت، خارج المدرسة (العالم الخارجي) فيه تذبذب من مهام يوبوسفتيه إلى مهام ويتشرية! لكن الجيد عددهم ماهو بالقليل ولا بالكثير مرة.
وعلى ذكر المهمات الفرعية فيه مهمة كانت شاطحة وغريبة ، مستواها فاق توقعاتي من مهمة حسيتها بدت كبسيطة لين حسيت كأني بمهمة أهم من الرئيسة، بعد ماخلصتها اكتشفت انها المهمة الحصرية للبلاستيشن
شيء يقهر صراحة، لأني مرة استمتعت فيها وحسيتها فعلا مميزة غير إنها تعطي ميزة حلوة بالفلوس بعد ماتخلصها.
القيمبلاي:
أكثر شيء كنت متأمله من لعبة كهاقورتس انها تقدم قيمبلاي يخدم اللعبة نفسها وفقط .. وشكرا لها، لأنها قدمته فعلا، أسلوب القتال موزون ويخدم القصة والتوجه الفني للعبة ... أنواع الأسحار نفسها أكثر من كافِ إنك تنوع بينهم ، صح كان نفسي بأسحار أكثر ... لكن على عدد أنواع الأعداء في اللعبة وتكراراهم فهو متناسب.
كمان حبيت إن سحر الظلام في اللعبة اختياري بالكامل حتى ما يأثر بالتجميعات أو الجوائز باللعبة ... مالي نفس أتحمل عواقب افعالي الفظيعة بلعبة طويلة مثلها ونفسي استخدم افادا كادبرا واهايط بسحر الظلام
اللي بالمناسبة مو كل المدارس زي هوقورتس يعتبروه محرم أو مظلم فقعدت أرقع على قراري بتعلمهم
وعلى ذكر سحر الظلام تراه فعلا بروكن! خصوصا فيه ميزتين من المميزات اذا فتحهم تخليي كل شخص متأثر بسحر الظلام في الساحة يموت بمجرد ماتطلق افادا كادبرا، فيعني إبادة جماعية، ادمنته فترة بعدين تركته لأنه سهل اللعبة فوق سهولتها .. وعلى ذكر السهولة ، أفضل اللعب بالهارد في اللعبة لأنه يخليك تستفيد بالكامل من الخيارات المتاحة مثل الجرعات والنباتات اللي على قلتهم حلوين.
العالم:
*على كثر مالعبت ألعاب خرائطها ضخمة ماقد حسيت بشعور الضياع اللي حسيته بين جدارن مدرسة هوقورتس .. المدرسة ماهي بذاك الكبر ترى، لكنها متشعبة بشكل فظيع! المدرسة تسبب ادمان لمحبي الاستكشاف لأنها تحسها ماتخلص، كل شويه تكتشف مكان جديد فيها، وبعد فترة تكتشف شيء جديد بالمكان الجديد، الأزقة والبيبان والجدران والتفاصيل في التماثيل والرسوم جدا مبهرة، الجرافكس بهذا الجيل خدم اللعبة صراحة وصور أفضل صورة ممكن نتصورها بخيالنا عنها حتى .. مهما تكلمت عن جمال المدرسة ماراح يوفيها، لكنها أقوى نقطة قوة باللعبة ولو كان مافي غيرها لكفت.
* العالم الخارجي على الجانب الآخر كتوجه فني جميل وساحر، لكن فيه تكرارية وتمطيط وتعبئة لكل متر بنشاطات يوبوسفتية .. لكن الخبر الجيد إنه ممكن كشخص حاب يلعب كقصة وتنويع بسيط ماراح يمل منه ابدا على العكس، احساس الملل ماجاني إلا يوم قررت اجيب البلاتنيوم واشطب كل شيء بالخريطة وهالشيء اتوقع متكرر بألعاب الـ RPG
الجدير بالذكر فيه ألغاز ممتعة سواء بهوقورتس نفسها أو العالم الخارجي، وعندي نصيحة لأي شخص حاب يختم كل شيء باللعبة إنه بالبداية يتقدم بالقصة لين يفتح أهم مميزت كفتح الأقفال بالمستوى الثالث وبعدها يبدأ براحته يستكشف لأنه الاستكشاف بالبداية بيضيع على الفاضي واحيانا صعب تلقى نفس المكان مرة ثانية @@"
*فيه اشياء تبدو بسيطة لكن جدا مريحة، مثل مجرد ماتحصل على اللبس خلاص يصير شكله ثابت عندك وتقدر تختاره حتى لو بعته
*مع إني شخص ما أهتم بالأمور الـ Custom وتكوين غرفتك والملابس، لكن واضح إن فيه شغل جدا ثقيل على هذا الجانب من تنوع الملابس والديكورات اللي تقدر تحطها بغرفتك .. صيد الحيوانات كنشاط فرعي ماشدني كثير لكن وحدة من الـ Vivarium ادمنت التجول فيها بسبب هالاوست الرهيب:
جبلي نستولوجيا من كرتون
الأحلام الذهبية
*المستوى التقني باللعبة أعبتره معقول، لعبت بطور المتوازن وما خربت اللعبة معاي إلا مرة وحدة، معظم القلتشات تتصلح من نفسها كانت بدون ما أضطر أقفل اللعبة،
* آخر نقطة حاب أتكلم عنها البلاتنيوم، تروفي التجميعات اللي يخليك تجمع كل شيء باللعبة جلطني فوق 600 حاجة ، تحديدًا تجميعات مدرسة هوقورتس مرة متعبة، قعدت ألفلف بساعات حتى أدور كم ورقة وصندوق مدري اللي دساهم ايش كان يفكر! على سبيل المثال
فيه وحدة من التجميعات ماتقدر توصل للغرفة اللي هي فيها إلا يوم تطفي نار دفاية بغرفة ثانية ! المشكلة مو هنا، الدفاية مايطلع لونها أزرق مع رفيليو فصعب تتوقع وراها شيء إلا يوم تدقق مرة إن في وراها ممر! هذا غير إنك مهدد بالقلتشات إنه ماينحسب لك زي ماصار مع بعض الللاعبين .. المهم كويس عدت على سلام وجبته.
بالأخير أشوف جدا توفقوا في اللعبة وأفضل ماصور عالم هاري بوتر أكثر من الأفلام نفسها برأيي، أتمنى نشوف أجزاء مستقبلا عن مدرسة Beauxbatons او Durmstrang
لأنه هاللعبة أعطت هوقورتس حقها بالكامل والمكمل.
تقيمي : 9/10
اللعبة أعتبرها ممتازة وموزونة كلعبة، لكن ذائقتي دائما تميل للقصة الأساسية كأهم وآخر لمسة في التقييم، وأشوف كان فيه نقص فيها بالنهاية وإن عوضتها أشياء كثيرة.
ممكن نطلع بشي خرافي إن شاء الله..
