اذا... فيفا × بيس (2014) شرايكم؟

[king zell]

مجموعة كبيرة من الشباب هنا ما شاء الله حصلوا على فيفا 15 و جالسين يلعبونها الأيام الماضية

أيضا في كثير حملوا ديمو بيس خلال الفترة الماضية



أنا شخصيا شفت ديمو PES و مختلف كثير عن اللي جربته في E3، اللعبة حصلت على تحسينات كثيرة



بس دام الظروف أصبحت متكافئة الآن على الجيل الجديد، شرايكم باللعبتين و ايش عجبكم أكثر (جيمبلاي)؟

 

[Nasser]

2015*

للحين ما جربت بيس بالقدر الكافي للأسف. لكن من اللي جربته اشعر بالتغيير.

تبقى فيفا متفوقة في المجمل وبفارق.

 

[Unknown]

جيم بلاي ؟


فارق معي ومستمتع اكثر مع بيس وبعد سنين رجعوا لجذورهم اخيرا بعد مراحل تغيير كثيره
مشكلتهم انهم بكل جزء يغيروا كثير باللعبه .. الجيم بلاي الحالي اتمنى يثبتوا عليه ويطوروه

فيفا متفوقه بكل شي الا الجيم بلاي! مشكلتي دايم احبط من الجيم بلاي واحسه يكتمني
مرات افوز/ انهزم وانا ما استحق .. ما احس لعبي pure احس شي يدخل معي يا يضبّط او يخرب
كلامي مجمل لأغلب اجزاء فيفا ولعبت حدود 6-8 مباريات فيفا 15 .. ملاحظ المشكله باقي موجوده

 

[James Killer]

راح العبهم الاثنين ... واستمتع بيهم..خاصة اني من زمان على بيس لكن الحين بلعبها مع فيفا.

 

[PS]

انا والشباب اللي معاي في الميلس نلعب كل يوم فيفا ويوم نزل بيس شغلتها ولكن للأسف ماعجبت أحد و تم الرجوع لفيفا 15.

 

[النسر الأسود]

ديمو بيس نزل على الستور الأمريكي؟ ما لقيته!

 

[COOL&DANGER]

جربت الديمو حق اللعبتين فيفا تحسها لعبة مكتملة من كل الجوانب و قوائم اللعبة رائعة و تفتح الشهية للعب بيس تطورت كثير و أقدر اقول أنها افضل من فيفا بشيئين الأول الجيم بلي ممتع و أسلوب الدفاع أفضل عندي من فيفا رغم أن فيفا عندها جيم بلي صلب أيضاً و الشيء الثاني هو الرسوم محرك فوكس قدم رسوم ممتازة و أقوى من فيفا غير كذا فيفا تتفوق في كل شيء من حقوق الدوريات و الأطقم و الملاعب و الأطوار و القوائم و المعلقين و الأنميشن مع العلم أن بيس قدمت أنميشن خورافي في هذا الجزاء لكن يبقى الأحتفال بالأهداف تلقائي و مكرر .

 

[USefQ80]

فيفا ممتازه لكن يبيلها تعديلات خصوصا الحارس !
بيس 2015 بإختصار ( مرض ) ! ما قدرت العب اكثر من مباراة !

للاسف بيس انتهت و مالهم امل للمنافسه...

 

[SCREAMING_RAGE]

هل انا الوحيد اللي لاحظ ان فيفا 15 سرقت اشياء من بيس هذه السنة ؟؟

الالتفات الثقيل للاعبين و ثقلهم......... للحظات في فيفا15 تحس انك تلعب بيس !!
فيفا كان يميزها خفة اللاعبين و سرعة دورانهم......... فيفا15 تحس انك قاعد تسوق شاحنه يوم تلف بلاعب.

 

[PS]

هل انا الوحيد اللي لاحظ ان فيفا 15 سرقت اشياء من بيس هذه السنة ؟؟

الالتفات الثقيل للاعبين و ثقلهم......... للحظات في فيفا15 تحس انك تلعب بيس !!
فيفا كان يميزها خفة اللاعبين و سرعة دورانهم......... فيفا15 تحس انك قاعد تسوق شاحنه يوم تلف بلاعب.

حط اللعب على السريع وستمتع.

أنا اسوي هذي الحركة في كل أجزاء فيفا وماواجهت حركت الثقل.

 

[منتقي]

بالنسبة لي ، هذي السنة ولأول مرة منذ سنوات ، بيس تتفوق على فيفا من خلال الجيم بلاي


بيس اصبحت ممتازة وممتعة ومحبوكة بشكل كبير

 

[zlatanovic]

ما استعبد ابدا ان اللاعبين يتحولون من فيفا لبيس هالسنة او حتى السنة اللي راحت. 14 & 15 من فيفا اجزاء سيئة مقارنة بـ 11 12 13، ولو ان 15 افضل من 14 بشكل بسيط.
عن نفسي ما جربت بيس، ولا راح اجربها في اي وقت قريب الى ان يصلحون مشكلة الاونلاين والسيرفرات الضعيفه اللي ما يلعب فيها احد. غالب لعبي اونلاين، فعشان كذا مضطر على فيفا.

 

[game for new]

قلتها في موضوع الديمو واقولها احين بيس اتطورت بشكل خرافي هذا السنة الصراحة انا من النوع اله مايهمني حقوق الملاعب ولا حقوق الاندية اهم شيء عندي متعة الجيم بلاي والتكتيكات وبيس قدمت لي ه الشيء بشكل سلس وممتع جدا .... اذا تاخد الكورة بكرستيانو او تاخدها بميسي تحس بفرق كبير هذا الشيء اله كان نفتقده في كارثة بيس 2014.

اتمنى يثبتوا على الجيم بلاي في جميع العابهم القادمة فقط يطورونه كل سنة شوي غير هذا بيس عندها حقوق دوري ابطال اسيا وعندها رؤوف خليف معلق اتمنى التوفيق للعبتين في قادم المواعيد.

 

[Raulioo]

بدون طور مثل الالتمت تيم ما في امل احول لبرو بيوم من الايام..مثل ما قال زلاتانوفيتش الاوفلاين خارج الحسابات بالعاب الكرة، وفيفا تتميز بالسيرفرات الثابتة -مع ان كبواتها بدت تكثر هالفترة- لكن وضعها لا زال ارحم بكثير..أغبى شي عملوه انهم شالوا اشارة الاتصال بالمباريات مع الخصم..متأكد انهم بيصلحون هالمصيبة باحدى الحديثات.
الجزء الحالي لما تتقنه وتعرف توقف اللاعبين الصواريخ -اكبر السلبيات الحالية- وقتها بتكون نقلة ايجابية بالنسبة لك من 14..مع ان تبقى الحركة مالها داعي، تستغرب كيف انهم بدوا الثورة بـ09 مع أفضلية اللاعبين السريعين..وظلوا يعدلون هالسلبية لين ما وصلوا للتوازن المطلوب..واخرتها جو وخربوها بـ 15 ..وزادوا الطين بلة لما خلوا الشد من الخلف بيتسبب ببلنتي بضغة زر :/ ..ما تقدر تفهم بعض القرارات التطويرية

 

[X-SRI-X]

بصراحة لعبت كل اجزاء فيفا تقريبا لكني ما زلت افضل بيس عليها .. متعود على الجيم بلاي تبعه اكثر ...

 

[Unknown]

بدون طور مثل الالتمت تيم ما في امل احول لبرو بيوم من الايام

هالسنه بيكون في طور جديد ومشابه للالتمت تيم اسمه MyClub
غير الاطوار السابقه مثل الماستر ليق اون لاين وكن اسطوره الخ الخ

تفاصيل MyClub لحد الان ماطلعت .. لكن موجود له صوره

اخيرا بيكون فيه تحديث اسبوعي للاعبين .. وكل 3 شهور تحديث لشكل اللاعب

السنه هذي اشتغلوا بضمير .. بس باقي نشوف التطبيق والاون لاين :sweat_smile:​