AM152
True Gamer
الاسم: A Place Further Than The Universe - Sora yori mo Tooi Basho
النوع : مغامرة ، حياة يومية
تاريخ العرض : 2 يناير 2018
عدد الحلقات : 13
الاستديو: Madhouse
المخرج : Ishizuka, Atsuko من أعمالها No Game No Life
العمل Original
نبذة:
تاماكى مارى (كيمارى) فى السنة الثانية من المدرسة الثانوية و عندها إحساس إنها أهدرت وقتها فى الفترة دى و عاوزة تبدأ فى عمل حاجة جديدة ، الوضع هايتغير لما كيمارى هتقابل شيراسى ، بنت عندها إصرار غريب على الذهاب للقطب الجنوبى لدرجة إنه بقى اسمها بين باقى الطلبة بس على عكسهم كيمارى هاتعجب بالإصرار ده و هاتقرر الإنضمام ليها
رأى شخصى :
ماكانش عندى توقعات كبيرة بخصوص العمل بالرغم من إن فكرته شدتنى بس ابتديت اسمع عنه مدح كثير (خارج المنتدى فقط ) و ده اللى شجعنى على متابعته و بعد ما شفت أول خمس حلقات أقدر أقول إن العمل Underrated بشكل محزن فعلا هنا
فى البداية العمل بيحاول يكون واقعى نسبيا ، فكرة ذهاب مجموعة من فتيات الثانوية للقطب الجنوبى صعب تقبلها و عشان كده العمل بيقضى جزء كبير منه فى محاولة عمل طريقة مقنعة لتحقيق الهدف ده ، ده ممكن يضايق البعض لأن الرحلة مابتبدأش مباشرة بس على العكس ده كان عامل إيجابى ، الفكرة هنا مش الرحلة نفسها قد ماهى فكرة التغلب على مخاوفك عشان تبدأ حاجة جديدة و الحلقات الأولى بتستعرض شخصيات العمل و مخاوفها بشكل جيد فعلا ده غير إن أحيانا التجهيز للرحلة بيبقى جزء من متعتها
النقطة الثانية هى شخصيات العمل ، الشخصيات فى معظم الوقت تديك الإحساس إنها واقعية و مش خالية من العيوب و ده يخليك تقدر تتعاطف معاها و تحبها ده غير إن التفاعل بينهم ممتاز و من أحسن جزئيات العمل
الأرت و الإخراج يبقوا عوامل إضافية للمتابعة و مستواهم كان رائع ، حبيت تعابير الوجه بالذات و اللى قدرت تعبير بشكل جميل عن مشاعر كل شخصية
فى نقطة كانت لافتة للإنتباه بالنسبة لى و هى الإعلانات او اللافتات بجانب الشخصيات فى بعض المشاهد و اللى بتبقى متفقة مع حالة الشخصية فى الوقت ده
العمل ممكن مايعجبش البعض خصوصا من محبى الأكشن أو لو كنت متوقع إن التركيز هايبقى على الرحلة فقط و فى شخصية معينة ممكن البعض (و أنا منهم) يعتبرها مزعجة بس فيما عدا كده العمل حتى الآن ممتاز بالنسبة لى و تجربة تستحق المتابعة
التعديل الأخير: