خلصت اللعبة :]
تقييمي الأخير هو 7 من 10.
السبب في التقييم يعود لكون اللعبة مكررة بشكل قاتل. بعد الدنجن الرابع, اللعبة صارت "رايح جاي" في نفس المناطق الثلاث الأساسية. وأغلب تقييمي كان مبني على مُقارنات مع أوكارينا أوف تايم (اللعبة الخورافية اللي لعبتها, وأول جزء لـ زيلدا ألعبه) فـ كانت معاييري عالية جداً وتوقّعت اشوف لعبة 10ـات فعلاً. لكن للأسف الألغاز كانت جدا straight forward ولا علقت بأي شيء على الإطلاق! بعدين وين الدجاج؟ جزء زيلدا مافيه دجاج؟! ميه! نرجع للخطّية في الألغاز, للأسف جزء سكايورد سورد ألغازه جداً سهلة وواضحة وضوح الشمس! يعطونك أداة, تناظر كيف تستعملها, وبعدين تلاقي كل شي في وجهك. حتى الألغاز مافيها تويست بحيث تقول "مُمكن استخدم الأداة بطريقة مُختلفة؟" لا, الألغاز مرة واضحة, تاخذ الأداة, تمشي, تستخدمها, تحصل مفتاح, تمشي شوي وتفتح الباب الوحيد المغلق في المنطقة! مقارنة بـ أوكارينا, اللعبة بقوة سهلة! أوكارينا كان فيها حسّ ضياع خارق! يعني تحصّل 3-4 مفاتيح قبل ماتقابل أول باب مغلق! فعلاً هالشيء يخليك تحس أن اللعبة تبي تضيّعك بشكل خارق! برضوا كان فيه ألغاز تجيب فيك الشيب, وامور مخفية بقوة. هنا كل شي في العلن, ومااذكر أن دنجن واحد طولت فيه لسبب غير اني "رايح جاي" وتمطيط ماله داعي أبدا! وسهولة سكايورد مبالغ فيها لدرجة أن Fi (أحد اسباب تقييمي المتدنّي) تقريبا تقول لك كل شي حتى لو ماتبيها تتكلّم! تعلّمك كل حاجة من تدخل الغُرفة! يعني سخافة, انا جالس امشي واطبّق الأوامر بس -_-"
من ناحية ثانية, التحكّم, هذا تقريبا أكبر علّة واجهتها في اللعبة. خلينا نتكلم عن الننشك شويّة, كـ لعبة بدايتها slow pace شوي, تقريبا تعوّدت على أسلوب التحكّم ولذلك ماعانيت إلى ماأخذت قدرة السباحة تحت الموية, وهنا بغت تجيني جلطة! الكل يدري أن الموشن مهما صار دقيق, مايمديه يكون بدقّة 100% واكثر من مرة قدام زعيم أنضرب بسبب ان الشخصية ماتعرف تضرب بالإتجاه اللي ابغاها تضرب فيه! هذا غير في الميني جيمز, تتطلّب منك تسوي شغل شبه بيرفكت, والموشن يخليك أبعد ماتكون من المرحلة هذي. بالتالي تعاني في الميني جيمز بسبب التحكُّم وليس بسبب لعبك شخصياً!
الزُعماء قتالهم بسيط جداً لدرجة الضجر, مامت ولا مرة عند أي زعيم, ولا حاولت حتى استخدم أي فيري عند أول 5 زُعماء لدرجة اني رميت العبوّات بعدما حسّيت أني لاأقهر :S وعلشان اكون صادق, الزعيم الأخير هو الوحيد اللي قتلني حتى مع وجود 2 فيريز معاي. والمرة الثانية في مقابلتنا, هزئته ببساطة. وبرضوا اللي اعجبني من قتالاتهم كلها, هي معركة الزعيم الرابع لأن قتاله حماسي وتحسّ فعلا أنك واقف في وجه زعيم قويّ (رغم بطئه وكونه فاتح نفسه لك ويقولك اضربني تكفى) لكن فكرة أنك تاخذ سلاحه وتضربه فيه, ذكرتني بـ جود اوف وار, وتمنيت باقي المعارك يكون فيها نفس حسّ الإبتكار بالقتال. وصح تذكرت, قتال الزعيم الثالث = نُكتة. هذولي من جدّهم؟!
😱 ولا انسى, مرحلة الصحراء تصميمها وافكارها بإستخدام القنابل..ألخ = نسخ لصق من لعبة Majin & the forsaken kingdom ومو مصدّق؟ رح ألعبها وبتلاحظ التشابه المُفجع بينهم! وهي تقريبا اسهل منطقة مرّت علي والسبب لأني مخلّص ماجن سابقاً فـ اغلب الأفكار متقاربة جدا في هذي المنطقة.
الساوندتراك في اللعبة عادي جداً, لكن اللي ماخلاني أعطي اللعبة 6.5 هو الـmain theme الأوركستراوي. فعلا ثيم يثبت في راسك وراح اتذكّره على المدى البعيد. اللحين باقي بس أحظر كونسرت يعزفونها فرقة اوركسترا قدامي وأكون سعيد جدا :] لكن باقي الألحان, من عادي إلى ممل.
حاجات سلبية بقوة, السكاي بقوة فاضية, مخلين لك مناطق شاسعة مافيها شيء :/ ليش؟ حاط لك كم جزيرة صغار مرة والمسافة بينهم فااااضية بشكل قاتل. تمل من السفر بين المناطق وماتشوف غير الجزيرة الوحيدة اللي انت متوجه لها تقرب منك ببُطئ مُضجر. أول شي كانت تجربة الطيران مرة مُمتعة, لكن مع الوقت صارت بايخة لأن كل شي لازم تسويه بهالطريقة. واللي مخلص اللعبة بيعرف انه لازم يمشور رايح راجع بين الجزر الثلاث الكبيرة اللي تنزلهم تحت, وبالتالي المفروض يكون فيه عملية تنقل مباشرة وسريعة بدال هبل الطيران. بعد 30 ساعة لعب يصير الطيران هو آخر شي ودك تسويه -_-"
برضوا السكاي لوفت (الجزيرة) تمنيت فيها سكّان أكثر. يعني اللحين الآلهة رفعت الجزيرة وتحاول تحمي "شعبها" اللي عبارة عن 10 اشخاص تقريبا؟ :/ وبرضوا الـ 10 هذولي مافيه أمل يتحرّكون أو يحسّون بالتغييرات العجيبة اللي قاعدة تصير في الجزيرة حقتهم (نص الجزيرة طاحت) ومع ذلك ماتغيّر فيهم اي شي. الجزيرة تحسّها ماتتفاعل مع الأحداث ابدا لول. اقلّها لو حطولنا كم scene يعرض فيها ذهول ورهبة السكّان من سقوط المناطق أثناء التقدّم بالأحداث, أو على الأقل لما تكلمهم, كان ودّي لو يجيبوا طاري الإشعاع الأخضر/احمر/اصفر اللي حوالين الجزيرة؟ ماعندك احد لول.
صحيح اللعبة فيها عناصر ابجريد عن السلسلة, مثل التطوير للأسلحة والأدوات. وجمع ماتيريالز.. هذي نقطة تحسب في صالحهم, لكن الملل الخرافي لما توصل في ثلث اللعبة (مخلص رابع دنجن) تقريبا ماتلاقي شي تطوره ابدا! كل الأدوات عندك وبكميات خارقة (نسبة الدروب في اللعبة عالي بزيادة) وتقدر تلفل كل شي خلال اقل من نص ساعة, وبعد كذا, انت لا تُهزم! والتطوير يموت لنهاية اللعبة :/ خطوة مااشتغلوا عليها صح فعلاً.
بشكل عام تقييمي لها 7/10 اتوقع انه يستاهل. وزي ماقلت, انا قارنت مع اوكارينا, لأنها الجزء الوحيد اللي لعبته من زيلدا (وفعلا عشقته) ومن شدة رهابته مااتذكر اني قدرت انزل العدس من يدي إلا لما خلصت اللعبة كاملة خلال يومين برغم صعوبتها! لكن هذي, بعد الدنجن الرابع قمت اتغصّب اللعبة تغصّب :/ اقلها كان فيها touchy ending نوعا ما...
:
