خلصتها.
بداية قبل ما أسرد السلبيات والإيجابيات لازم بعد ما خلصتها أقارنها بسلسلة سولز, دارك سولز 3 وبلودبورن تبطي تجيب مستواهم لا من قريب ولا من بعيد ولا بأفضل شابتر فيها، دارك سولز 1 ممكن أقارنها فيها بمستوى البوسس غير كذا أي شي ثاني بكفة دس1 وبالراحه. ديمونز سولز ممكن تقارن فيها، لعبة ببوسس ممتازين ومراحل عادية مع أن ديمونز تتفوق بس هي أقرب وحدة لها، وأتكلم عن شخص لعبهم كلهم ذي السنه فما لعبت ديمون على وقتها.
اوكي بسم الله:
+ نظام وضعيات الأسلحه ممتاز ويعطي تنوع كبير جدا بأساليب اللعب ويعطي لكل نوع من الأسلحه قيمة اضافية، أتمنى أشوفه بألعاب أكثر خاصة الألعاب اللي تكون بأسلحه محددة مثل دمك ونينجا جايدن.
+ الأتموسفير بأغلب المراحل ممتاز واللعبه مظهريا جميلة.
+ الــ 60 اطار مسويه شغلها والمفروض خلاص تصير أساس بكل الألعاب خاصة اللي فيها الكثير من الأكشن.
+ الشوتينج باللعبه ممتاز وله تأثير كبير خاصة على الأعداء العاديين.
+ توزيع البونفايرز ممتاز، خاصة عند البوسس.
+ فيه بوس ضفدع ياخي هذا لحاله ايجابيه، تصميمه خورافي جدا جدا وقتاله كان ممتع.
+ نظام الجارديان سبيريتز(الالتمت) خورافي، تصميمهم وتنوعهم رهيب وقوتهم ممتازة وتفك لي أزمات كثير عن البوسس.
+ الثيم سونج الأساسي للعبة جميل جدا.
+ البوسس بالأغلب ممتازين وومتعين، وتحركاتهم سهل أنك تحفظها.
+ السلاح أبو سلسلة رهيب ومميز جدا.
+ تطوير السكيلز للأسلحه اضافه ممتازة وتعطي تنوع وكومبوات ممتازين.
+ التغيير السريع بين الأسلحه وبين الأدوات والاختصارات الكثيرة حاجة جيدة وأحب التركيز على سهولة الاستخدام.
+ الكيبولس فكرة حلوة وتعطي شعور بالاحترافية خاصة لا جا الضباب اللي ما يمديك تشيله الا فيه.
+ نص اللعبه الأول (أفضل من الثاني بكثير).
- تنوع الأعداء مهزلة وزباله، اللعبه من بدايتها لنهايتها ما فيها الا كم عدو و 5 منهم بتشوفهم بكل مكان وبيبثرونك فيهم بشكل غبي جدا جدا والباقين بتشوفهم بشكل نادر جدا. زبالة هي أكثر كلمة محترمه أوصف فيها تنوع الأعداء.
- اللفل ديزاين يتراوح بين العادي والسئ مع أن السئ يغلب عليه، تصميم المراحل ميت جدا وما فيه أي شي مميز ومافيه أماكن تبقى بالذاكرة أبدا. تحس أن اللعبه المفروض أنها تكون خطية بعدين تفلسفوا فيها وفتحوها شوي، والمشكلة لا فتحت لك اللعبه كم مسار تصير ضياع بسبب اللي قلته وهو أنه مافيه أماكن تعلق بالذاكرة. وبعض المراحل عبارة عن متاهات بشكل مقرف جدا جدا.
- سالفة أنه اذا خلص الستامينا يصير لي ستن ما كان لها داعي والمفروض أني ما أقدر أهاجم فقط وموب أتجمد مكاني، عانيت كثير عند البوسس بسبب هالنظام الغبي خاصة أن الصد ما ينفع كثير ضد ضربات البوسس واللعبة ما فيها الاعتماد على الانفيزبل فريم مثل دارك سولز.
- البوسس يدمجون دمج عالي جدا وغير منطقي وأغلبية البوسس عندهم ضربه وحدة تنهيك.
- البوسس تانكز والدامج اللي ياخذونه قليل، والقتالات تاخذ وقت طويل وهاذي غلطه جدا تضايق بلعبة بلعبة بذا الأسلوب.
- القصة من أولها لآخرها مالها داعي والمفروض الجهد اللي حطوه فيها حطوه بشي ثاني، مستوى قصصي يفشل خاصة هالأيام اللي حتى الأندي صارت تحترم عقولنا من هالناحية. لو مخلينها شي بسيط ومفهوم كان أريح لهم وأريح لنا.
- الإستكشاف باللعبة سئ وبدون هدف.
- الأسلحة اللعبه توزعها عليك توزيع وبشكل زايد عن اللزوم، ما فيه سلاح معين تثبت عليه وتحس بقيمته فما أدري ليه حاطين خيار تطوير السلاح وأنا بعد 10 دقائق بيجيني 5 أفضل منه.
- الآيتمز باللعبه كثيييييييييييره يبي لك ملخص خارجي تقراه عشان تفهم كل شي.
- الجدران المخفيه فكرتها سيئة والإحساس بالسعادة لما تلقى جدار مخفي بدلوه هنا بهم وغم لأني لازم أقاتل عشان أمشي.
- فكرة الميميك حلوه بس للأسف قليلة جدا.
- توزيع الأعداء سئ وما تحس فيه أي جهد من هالناحية، رمي عشوائي فقط.
- التعامل مع كم عدو بنفس الوقت شبه مستحيل والمشكلة أن فيه جزئيات ترمي لك اللعبه كم عدو فيهم.
- أرجع وأقول مناطق اللعبه بشكل عام مع أن أتموسفيرها جميل بس موب متنوعه أبدا ومهما حاولوا يغيرون باللفل بس تحس فيه تشابه كبيير.
بكل اختصار اللعبة عندها ميكانيكات وأساسيات ممتازة بس انحطت على مراحل سيئة وأعداء سيئين واحساس استكشاف ميت فطلعنا بلعبة متوسطة وتمنيت أنهم ما تفلسفوا وحاولوا يتبعون أسلوب سولز وتمسكوا بمجالهم الهاك اند سلاش وشفنا لعبة نينجا جايدن بذا الميكانيكيات.
