قبل ما أعلق على الشابتر فى جزئية أحب أتكلم عليها
بالرغم من كم الأحداث الرهيبة على مدار آرك ال Ten Commandments إلا إن فى نفس الوقت كان فى عدد من النقط اللى خلتنى أحس إنه أقل فى المستوى من الآرك اللى قبله
🙁
من ضمن النقط دى إحساسى إن مافيش اتجاه أو هدف واضح للشخصيات ، آرك ال Holy Knights كان مقسوم لآركات محددة و كل واحد فيها كان ليه هدف معين ، على العكس فى الآرك الحالى و بالرغم من وجود عدو قوى لل Sins الأحداث مش ماشية فى اتجاه محدد و إلى حد ما كانت عشوائية ، نقطة تانية و هى موضوع ال Power Levels و اللى ضايق عدد كبير من القراء و أنا منهم ، أظن إن الكاتب لجأ للفكرة دى بعد كل الكلام عن إن مافيش توازن للقوى فى العمل و احتمال عشان يبين مدى قوة العدو الجديد بس للأسف استخدامه ليها كان غير صحيح و مبالغ فيه بشكل كبير ده بالإضافة لبعض القرارات اللى ماحبيتهاش زى موضوع رجوع إيلين بالرغم من إنها شخصية جيدة فى حد ذاتها أو فقدان ديان لذاكرتها
النقط دى مش معناها إنى كرهت العمل بس للأسف قللت من مستواه بشكل كبير بالنسبة لى بس للسبب ده حبيت جدا الأحداث الأخيرة
🙂
لأول مرة من مدة يبقى فى آرك حقيقى بهدف واضح ، الحقيقة لما الآرك بدأ ماكنتش مقتنع بالفكرة و حسيت إنها تكرار لآرك Vaisel الأول بس بعد كده الأحداث خدت مسار مختلف و بقت رهيبة
بالإضافة للمواجهات الممتازة خصوصا مواجهة بان و مليوداس
، الكاتب على مايبدو قرر إنه يحط نهاية لبعض النقط المزعجة على مدار الأحداث اللى فاتت زى موضوع العلاقة بين ديان و كينج و فكرة إنه لأول مرة أخيرا كل ال Sins اتجمعوا فى مكان واحد
الملاحظ برضه إن بالرغم من كم الشخصيات الجديدة فى الآرك و عدد المواجهات إلا إن استخدام موضوع الPower Levels بقى غير موجود تقريبا و دى نقطة تحسب للكاتب اللى أظن إنه حس بكره القراء للفكرة
😀
الجزئية المهمة فعلا كانت رجوع البناء الممتاز للأحداث و ال Foreshadowing ، الجزئية دى كانت من أهم مميزات العمل و للأسف قلت بشكل كبير فى الفترة اللى فاتت بس ظهرت تانى فى الآرك ده خصوصا فى الشابتر ده
🙂
هجوم فرودرين على دينزل و مجموعته كان من النقط اللى حبيتها جدا لأن لأول مرة الشرير يقرر إنه يتخلص فعلا من الأعداء مش يسيبهم من غير سبب منطقى بس توقعت إن الهجوم مش هايبقى ليه تأثير كالعادة ، بالفعل اتضح إن دينزل و مجموعته لسه عايشين بس الحقيقة إن ده تم بشكل جيد على غير المتوقع ، لتانى مرة يتم التلميح إن دينزل عنده سلاح سرى لمواجهة الشياطين و إن ده السبب إنه فضل عايش بعد الهجوم و المرة الأولى كانت عند محاولة تحرير فرودرين من دينزل قبل الهجوم
موضوع علاقة جيلا بجاوثر طلع إنه مانتهاش و على مايبدو هايبقى ليه دور فى الأحداث الجاية و دى نقطة عجبتنى، كل التلميحات بخصوص جاوثر ابتدت تظهر نتيجتها أخيرا و نهاية الشابتر كانت رهيبة
فى نفس الوقت موضوع انضمام فيرونيكا لل Holy Knights مثير للإهتمام و ممكن تتبنى عليه أحداث جيدة
المفاجأة فعلا فى الشابتر كانت موضوع سقوط Camelot
😱 ، دور آرثر هايظهر أخيرا
النقطة اللى ماحبيتهاش فى الشابتر كانت تلميح فردورين بخصوص زاراتراس ،التلميح جه فى الوقت اللى ظهرت فيه شخصية جديدة بنفس الشكل (جيل فروست) و بصراحة مش عاوز شخصية تانية ترجع للحياة بعد ما ماتت و كفاية اللى حصل مع إيلين، اتمنى إن يكون فى تفسير أحسن للتلميح
فى الآخر الشابتر كان ممتاز و بناء رائع للأحداث الجاية
🙂 ، متحمس جدا للشابتر الجاى و اتمنى إن الكاتب يحافظ على مستواه الحالى
