علقم
قصير مدلقم
اللعبة هذه العبها من يوم ما بدأ الايرلي اكسس في منتصف 2022 فسعيد جداً انها اخيراً نزلت على أحلى كونسول السويتش2
اللعبة تدور قصتها حول ساحرة صغيرة ومتدربة اسمها إيلي، تلاقي نفسها بوسط غابة مجهولة وقرية مهجورة بعد ما تعطل فيها الباص المائي وهي بالاساس رايحة تكمل تدريبها الميداني. وعشان تنجح وتصير ساحرة رسمية، تقرر تقعد بالمكان وتبدأ تستكشف أسرار الغابة وتساعد أهل القرية وترد فيها الحياة، من خلال جولات يومية تجمع فيها أغراض سحرية وتحل ألغاز مختلفة مبعثرة.
أهم شي يميز اللعبة جوها السحري اللطيف جداً جداً ورسومات البكسل الناعمة مع ألوانها المبهجة، من غير الموسيقى الهادية الي تعيشك استرخاء وروقان مش طبيعي وتريح البال. وطبعاً شخصية إيلي بروحها تحلي اللعبة، فرفوشة وفضولية وسوالفها الكوميدية مع قبعتها السحرية المتكلمة والشخصيات المختلفة الي تقابلها تعطي القصة طعم حلو ودمها خفيف من أول لحظات اللعبة.
طريقة الجيمبلاي تعتمد بشكل أساسي على إنك تقعد تلاحظ تصرفات الكائنات السحرية الصغيرة، عشان تعرف شلون تأخذ منها المكونات بدون ما تخوفها، وبعدها تروح تستخدم القدر والمقطرة عشان تسوي خلطات وجرعات سحرية معينة. هذي الجرعات تستفيد منها عشان تنظف المكان وتفتح الطرق المسكرة وتساعد الشخصيات المتمشكلة، وتحس مع الوقت انك صدق قاعد تبني القرية وترد روحها شوي شوي.
اللعبة اعتبرها خيار ممتاز للي يحبون ألعاب المحاكاة مثل ستارديو فالي أو أنيمال كروسنج وحصلت مكان ممتاز تبيع فيه في منصة السويتش، وخصوصاً للي يعجبهم طابع السحر تحديداً مسلسلات نفس Little Witch Academia وحتى افلام جيبلي. وبما إن اللعبة خالية من المعارك الصعبة والضغط وسوالف الديدلاينز، فهي فرصة حلوة عشان تريح راسك بعد يوم طويل وتستمتع بتجربة خفيفة وممتعة على جلسات سريعة لو تبي.
أشجع ملاك السويتش2 وننتندو يعطونها فرصة ما تخيب ظنهم
