في البداية حبيت اقول ان الموسم كان بيكون شبه كارثي لولا وجود الحلقتين الاخيرة خصوصاً الحلقة الاخيرة الي اعتبرها واحدة من افضل حلقات المسلسل بسبب ميغيل الاسطوري حلقة ويندز اوف وينتر كانت عبارة عن الكمال في تجسيدها للشخصيات خصوصاً شخصية سيرسي الي اتقنت لينا هيدي الدور بجدارة !
محور الكينجز لاندينق لأول مرة هذا الموسم يكون محور مثير للإهتمام البداية مع الموسيقى الخرافية وتصوير المشاهد للشخصيات وتجهيزها للمحاكمة شيء عظيم سيرسي الجنون اصبح يتحكم فيها الجنون الي اخذ الماد كينق ايريس وحوله من رجل طيب لشخص مجنون بالكامل الأن جاء لسيرسي بعد ما خسرت كل شيء حرفياً خسرت كرامتها وبالمقابل تشوف الشخص الي اخذ كل شيء منها سلطتها وكرامتها يأخذ اعز شيء عندها الي هو طفلها ويتحكم فيه بشكل تام ويخليه منصاع له ومنقاد انقياد اعمى ، سيرسي بتفجيرها للمعبد كسبت لكن خسرت ، خسرت طفلها و الجانب العاطفي من شخصية سيرسي مات واساساً كان يتلاشى كل ما مات واحد من اطفالها وتحققت نبوءة الساحرة ماتوا والذهب في اكفانهم ، العظيم بالموضوع ان لينا نقلت هذا الشعور باللاشيء والي هو اخطر من الجنون في ابهى صورة في مشهدها وهي تشوف طفلها وماتحس في اي مشاعر بنظراتها لجثته ، تشعر انها ارتاحت في الاخير لأن الجانب الي كان نقطة ضعفها انتهى الي هم (اطفالها) كأنها كانت في كابوس انتهت منه بعد ما تحققت نبوءة الساحرة ، تتويجها كان عظيم واستخدامها لإسم اللانيستر بدل البراثيون يوضح لنا قد ايش هي ما صارت تهتم لكلام الناس بعد رحيل اطفالها و النظرات الاخيرة بين جيمي وسيرسي ماهي طبيعية ابداً حصل الشيء الي يخافه جيمي ان شخص مجنون بعد الماد كينق يلقى مكان الوايلد فاير ويحرق الابرياء لكن هذي الطرف المجنون هو الشخص الي يعشقه جيمي هذا اكثر شيء متحمس له الموسم القادم اشوف كيف تقبل جيمي للوضع اخر موسمين خربوا شخصية جيمي لانيستر الي في الكتب بالكامل ! وعلى فكرة مشاهد انتقام سيرسي من الكل ذكرني في اخر ربع ساعة من اجزاء فيلم العراب لما تبدأ عائلة كورليوني تصفي كل حساباتها
😀
محور الشمال ايضاً كان جيد رغم بعض الاشياء الي ما عجبتني فيه زي ليتل فينقر الي مخلين خطته الاخيرة تافهه ومتأكد ان في كتب جورج ما راح تظهر بهذا الشكل البائس ، في مشهد ليتل فينقر وسانسا اول مرة يقول خططه وما توقعت تكون خطته ساذجة لهذي الدرجة لكن هل هذي فعلاً خطة ام بيتر يتلاعب على الجميع كالعادة ؟ اكثر مشهد كان منتظر من الجميع هو R+L=J وتحقق هذا الموسم بمشهد عظيم قبل تتويج ملك الشمال تظهر لنا حقيقة الطفل الي عرفناها وطلعت النظريات صحيحة مشهد ليانا ونيد واحد من اكثر المشاهد حزن في السلسلة ، الربط العجيب الي صار عظيم وعد نيد ستارك ان الشتاء قادم لكن كان الوعد الاكبر انه ما يفضح هوية هذا الطفل وراح السر معاه للقبر
🙁 ، الشيء الي الكل متحمس له ان كيف هذي الحقيقة بتظهر للعلن وكيف راح تأثر على مجرى احداث المسلسل ؟ ومين الي راح يثبت ان هذا الشيء حقيقي ؟ من جون الرضيع تنتقل الصورة لجون الكبير وركوع عوائل الشمال له بسبب تهزيء العظيمة ليانا مورمنت لعوائل الشمال مشهد مهيب ♥ ، رغم اعجابي بمشهد جون وكنت اتمنى اساساً يكون ملك الشمال لكن فيه اشياء تناقض هذا الشيء مثلاً انه باسترد بدون ما تشرعه سانسا ، بسبب خيانته للجدار بدون ما يبرر لهم ليش هو موجود اصلاً ، رغم هذا المشهد جبار واعجبتني ليانا مورمنت بتهزيء لوردات الشمال ولو اني بشتغل مقارنة بين الكتب والمسلسل بقول اني ما احب نسخة عوائل الشمال الي في المسلسل لأنهم خوافين ومافيهم اي فزعة الشمال حقين الكتب خصوصاً هاوس ماندرلي واللورد حقهم وايمان ماندرلي
🙁 ، في الكتاب الشمال يتذكر مو بس هاوس مورمنت !!
وعلى فكرة يا اصدقاء دافوس شخصية بيضاء بالكامل هذا الشخص يعجبني في الكتب وفي المسلسل شخصية مكتوبة بعناية والممثل ابدع في تجسيدها شكله وهو يتكلم عن شيرين وكيف احببها يقطع القلب
🙁 ♥
قلعة التؤام كانت ممتازة كتويست وانتقام رغم ان الطريقة الي حصلت فيها سريع لكن ما الوم المسلسل دامهم بينهون اكبر عدد من القصص قبل الموسمين الاخيرين ، استمتعت وانا اشوف اريا ستارك تنحر عنق الحقير والدر فراي انتقام يبرد القلب .
في ميرين المحور الاسوأ دائماً تيريون ينصح داني بالتخلص من داريو عشان ما تتأثر قرارتها المنطقية قدام العاطفة وداني تؤمن بمشورة تيريون ، اخيراً شفنا حوار ممتاز في ميرين والسبب هو نظرات تيريون والفخر الي يحس فيه لأنه اخيراً لقى شخص يقدر عقله ولا يعينه مساعد ملك عشان اسمه ، ينتهي الموسم بمشهد رائع نرى فيه السفن تبحر لويستروس التايريل ودورن وسفن الجريجوي معاها الأن جيشها مرعب مع 3 تنانيين على الاقل يعني شفنا تحرك ولو اني ما اطيق داني لانها دلوعة المسلسل تحصل على كل شيء بدون اي جهد منها ، لكن السؤال هل هذا الجيش راح يصمد خصوصاً إذا عرف تيريون ان ايلاريا سممت بنت اخته الي ارسلها لدورن عشان تعيش بسلام ؟؟
والسؤال الاكبر وين السايكوباث الاكبر في كتب جورج مارتن ؟ الي خلوه مهرج في المسلسل ! ايش بيسوون معاه الموسم الجاي ؟ اتمنى يدخل في قتال مع داني ويجلدها مع ان للاسف اتوقع انهم جايبينه عشان يهربون ثيون ويارا ويقابلون داني
🙁 .. يورون جريجوي في الكتب مرعب اتكلم عن شخص عاش حياته في البحر وعنده قدرات خارقة وقطع لسان طاقمه بس عشان ما ينقلون اسراره
اسمعوا خطابه الاسطوري في الكينجزموت بدل الهراء الي عرضوه في المسلسل ، لكن مشكلة المسلسل الاساسية للاسف يجيب بعض الشخصيات عشان يقتلها بدون اي منطقية زي دوران الي كان عبقري ايضاً في الكتب ..
ايش تتوقعوا الاحداث الي بتصير الموسم القادم ؟ عندنا حالياً خمس ملوك ( سيرسي ، دانيريس ، جون سنو ، يورون ، النايت كينق ) اشطحوا بتحليلاتكم عشان ننعش التغطية بعد هذي النهاية
😀
شيء يغبن
