السلام عليكم ورحمة الله وبركاته.
أنتهيت من اللعبة مع الإضافة، هذي اول لعبة فاينل فانتسي العبها وما عمري لعبت الأصلية والجزء الوحيد الي قد جربته غير هذا هو 15 لكن مره ما أعجبني وتركته.
نظام القتال هو أفضل حاجة في اللعبة، في البداية كان عادي لكن مع التقدم يصير افضل وافضل لدرجة ممتازة تخليه من افضل انظمة القتال الي لعبتها، ممتع كمظهر ومؤثرات بصرية وشعور ضرب ويقدم تحدي كويس مره يخليك تفكر وش تستعمل من حركاتك وايضا كيف تستعملهم وتُدير نقاط الAP حقتك بأفضل شكل. شخصية تيفا كأسلوب قتال هي الأفضل، العب بها قمة في المتعه وما أبالغ لو اقول لو ان اللعبة بالكامل مافيها غير اسلوب قتالها راح ابقى اقول ان اللعبة عندها واحد من افضل اساليب القتال الي قد شفتها! حتى التحكم بها خارج القتالات طالع ممتع.
مافي شيء يتفوق على لكمات تيفا او حتى السياف كلاود لكن يوفي فاجأتني بتنوع اسلوبها بين مدى بعيد وقريب مع إستعمالها لكل العناصر، اقدر اقول انها الكل في واحد.
اعرف ان الشباب انتقدوا كثير خطية المراحل ومافي إستكشاف كويس في كثير مرات وايضا الممرات الصغيرة كثرتها مزعجة، وانا اتفق مع هذا الشيء وحتى تمنيت لو على الأقل يستغلون الخطية بتقديم لحظات أكشن ممتازة ورتم حماسي اكثر لكن للأسف هذا الشيء مو موجود و في لحظات حسيت بتمطيط، لكن المشكلة الحقيقية بالنسبة لي مو في خطية تصميم المراحل بل اسلوب اللعب نفسه خارج القتال، كثير اشياء اللعبة تسويها لك، لازم تتسلق فوق حاجة؟ تعال عند السهم واللعبة تساعدك، تبغى تدفع صندوق عشان تمر؟ تعال عند الصندوق واضغط زر واحد، يعني انت ما تقدر تتفاعل مع الصندوق وتحركه بالشكل الي تبغاه، عاد اسوء جزئية من هذه الناحية ان مره من المرات كنا نقفز من ثريا إلى ثريا وحرفيا كل الي تسويه هو انك تنتظر الشخصية تتجهز بنفسها انها تقفز للثرية الأخرى ويظهر لك علامة مثلث عشان تضغطها، مافي قفز حقيقي وتحاول انك ما تطيح وتوزن قفزتك لأن اللعبة حادتك بزر واحد تنتظره يظهر لك عشان تضغطه، انا عاجبني التنوع هذا لكن مافي فائدة منه إذا ما كان شيء ممتع يخليك تتفاعل معه وتركز...
انا العب اللعبة على الPS5 واللعبة غريبة الصراحة لأن مظهرها ممتاز جدا في الأماكن الحديثة والمتطورة او الأماكن المظلمة مثل الصورة الي فوق مع إضاءة خافته ممتازة، مدري كيف اوصفها لكن في الأماكن الحديدية تحس الحديد جد حديد
، لكن في الأماكن الريفية مثل اول حاره مظهرها اقل من عادي بشكل واضح.
للأمانة ما فهمت بعض الأشياء في القصة خصوصا عند النهايات، لكن أعتقد كثير اشياء بتكون اوضح مع البارتات الجاية بس لو بتكلم عن الشخصيات تيفا كويسه بشكل عام لكن الي جد محلي اللعبة قصصيا ومعطيها جو هو كلاود، الأداء الصوتي البارد مع كم نص له حاجة ممتازة وما توقعت الشخصية كذا، بشكل عام الأداء الصوتي للشخصيات ممتاز. لو بتكلم عن اجواء القصة واحداثها، انا كنت داخل جو في البداية لكن كل ما تقدمت في اللعبة كرهت الجانب القصصي فيها اكثر ولكن حتى مع ذلك في لحظات عظيمة وحماسية مثل
البطولة تحت الأرض، بس مع بعض الجزئيات ومع الطاقم النسائي في اللعبة مرات احس اني جالس اتابع انمي بتصنيف 'حريم' هههههههه&&&
ودي امشي على نصيحة العضو فيتو وأعيد اللعبة على الصعب عشان نظام القتال خصوصا اني ما شبعت منه، لكن صعب أعيد لعبة بهذا الطول عشان شيء واحد، لكن نظام القتال ممتاز و واضح انه انحط فيه مجهود وعشان كذا إحتمالية الإعادة قائمة إلى الآن.
في النهاية انا أعجبتني اللعبة لكن كان عندها إمكانيات جدا ممتازة ضيعوها للأسف كان ممكن تخليها من أفضل الألعاب الي لعبتها.
