أنا رجل بسيط. رح أطالب كل مطوري الهندي الي على قد حالهم ورح يفلسوا لو فشلت لعبتهم يترجموا ألعابهم للعربي وما رح أشتري غير الألعاب المش مترجمة للعربي. أنك توقع في ذا الفخ؟ مشكلتك. يعني ياباني وما عندك أي فكرة عن السوق العربي, تترجم لعبتك كذا طوالي من دون ما تعمل بحث كافي حقيقي وتشوف الوضع صدق مستاهل؟ طيب خليها ترجمة AI طالما لعبتك بسيطة ولا تقروش نفسك. كل الي صدق مطلوب من المطورين إنهم يترجموا لعبتهم للإنجليزي. ذي هي اللغة العالمية يعني حبينا أو لا. معلش بس متأكد كلنا هنا بدأنا نتعلمها من مراحل مبكرة في الإبتدائي (مدري عن الشيبان لو في زمنهم ما كان في تدريس لها) وصدقا التدريس البسيط ذاك كافي عشان يخليك تفهم معظم الألعاب البسيطة. أنا ما كملت تدريسي وطول عمري درجاتي سيئة في الإنجليزي, متأكد أغلب الناس الي تطالب بالترجمة للعربي لغتهم الإنجليزية أحسن مني. بس يعني ماريو ينقز بينق بينق واهو أنقذ الأميرة... مفهوم الصدق, ولا؟... "إنشاء حساب" والعبارات البسيطة مثلها والمهمات الي تعطيها لك ألعاب الهندي أغلبهم مفهومة... شيء مش مفهوم؟ ترجمة جوجل موجودة أو تمسك جوالك بيدك وتترجم الشاشة لو في نصوص كثيرة... مليون حل وطريقة ما تتعبك الصدق وتسمح للمطور يعيش حياته بدل ما تخربها بس عشان رغبة شخصية من عندك ممكن بسببها تخرب بيت شخص في قارة ثانية ويتمنى لك السوء طيلة حياته.
