غير انه الرد اللي قلته ما يسوى الهايب
بس اشوف انه سهل الواحد يقول "لول الجيمرز هطوف مافي زيهم بأي مجال ثاني لول"، عشان رفع ١٠ دولارات او شي زي كذا مثلا
لكن هل هذا صحيح؟ هل الجيمرز حالة خاصة بتبرير رفع الاسعار؟
تشوف مجال التقنية، رفع اسعار الجوالات بمئات الدولارات، عمرك شفت اعتراض؟ نزول اسعار ؟ لا، أسعار الجوالات الآن نار مقارنة بقبل عشر سنين
فوق الرفع، صاروا كمان ينتجوا الجوالات سادة بدون شواحن او سماعات او مرفقات زي زمان بس باسعار اغلى، بحجة "البيئة"، اعتراض على الحجج؟ لا، مبسوطين وباعوهم عادي وزيادة مبيعات كمان
طبعا اكسسوارات ابل حدث ولا حرج باسعار باهظة بزيادة، ومش كلها بقيمتها، منديل ابل تحصله بمية دولار مثلا
تروح جمهور الكورة اوك نبغى نشوف هوايتنا، تشوف اسعار اشتراكات باقات القنوات الرياضية وتنصدم بالآلاف، وتزيد! ما عمره نقص، تشوف اعتراض؟ لا الوضع ماشي عادي وذا "الطبيعي"، مش عاجبك؟ روح قط مع واحد او خمسة باشتراك، روح استراحات ومقاهي عشان تتفرج، عادي عندك حلول، بس ما عمره حل الاساس
تجي تبغى تشتري سيارة وتشوف الاسعار، تشوفها ارتفعت بشكل كبير جدا، هل مع اي اضافات تساوي سعرها؟ تبريرات او تقنية افضل؟ بكثير احيان لا، زاد سعره لانه فقط الموديل الجديد حق هالسنة وهو يشبه الموديل السابق، وفعليا قدرة تحمل السيارات للمشاكل تجدها أردأ من زمان
تروح سوق الستريمنج، تشوف على مر السنين كيف اسعار نتفلكس ارتفعت بشكل كبير ، مش بس كذا: مؤخرا منعوا خاصية مشاركة الحسابات والباسووردات، كان قرار زعل الكثير عشان كان عادي تشوف عشر ناس مشاركين نفس الحساب، بعد التطبيق اتوقع ايش صار؟ زاد عدد المشتركين بشكل كبير بنتفلكس ، كافؤوهم على ذا القرار ومش العكس.
هذا بدون ذكر انه الستريمنج ما صار نتفلكس بس، كل شركة صارت تدخل السوق وتجد اللي مهتم يتابع مسلسلات وافلام عنده اكثر من اشتراك متراكم باسعار متزايدة اكثر من السابق، ومبسوطين ويكافؤوا الشركات، الناس اللي "هربت" من قنوات التلفزيون واشتراكاتها الغالية وراحوا الستريمنج كبديل وخيار افضل وأجود رجعوا ثاني لقوا نفسهم يدفعوا مبالغ كبيرة بنهاية الامر
وغيرهم من المجالات ، فيعني بشكل فعلي، هل في اي مجال ثاني تشوفه وتقول "اوه عندهم مستهلكين مسؤولين جدا" ؟ مش ببالي اي شي، بالعكس لما اشوف مقارنة الاسعار بكل المجالات السابقة، تطلع زيادة ال١٠ دولارات ولا شي لما تشوف الصورة الكبيرة واحسها تافهة بالمقارنة*
*طبعا الزيادة تتجاهل انه الشركات عندها اساليب تاخذ منك اكثر بكثير من المايكرو وغيره حتى لو اللعبة مجانية
جد عطوني مثال مجال ثاني المفروض نتعلم منهم، في شيء فايتني بهاللحظة أكيد ومش ببالي (@)
