هل تعاني من حساسية؟

[m7tram]

السلام عليكم ورحمة الله وبركاته.

طول عمري كنت أقول ان الحمدلله أنا ما أعاني من أي حساسية أبدا لا من الاكل أو الادوية ولا القطط ..ألخ لان في كل حياتي الي عشتها 38 سنة ادخلها بعد شهرين عمري ما تحسست من أي شيء.

لكن لكل شيء في أول مره صح؟

كنت قاعد على الكمبيوتر الساعة 3 الفجر .. جتني بنتي تقولي بابا القطوه سوت نمبر "2" ووصخت الدنيا لان تعلق بشعرها .. وبس انا وياها قاعدين هالوقت فقلت خلاص خل ننظف الي وصخته ورحت وخذيت:

وايبز كلوركس .. وقعدت أنظف الاماكن وهذي مو أول مره أستخدمه! يعني كذا مره استخدمة لتنظيف الجواتي مرات وهكذا لكن ما أزيد عن حبه أو حبتين .. هالمره استخدمت ما يقارب الـ10 حبات .. وخلصنا ونظفنا .. فحسيت اني دخت قلت بنام.

وأنا منسدح فجأة أحس في حكة قوية صوب "سرتي" ولما شفت .. ولا في احمرار حولينها وحبوب! وماهي الا لحظات قليلة الا وجهي يحكني وشعري .. ولما قمت شفت المنظرة ( المراية) الا وجهي أحمممررر وأحس بحراق .. غسلت بماي بارد وحاولت انام لين نمت .. فلما قعدت من النوم .. لا زالت الحكه والاحمرار والحرقان موجود .. رحت للمستشفى وقال لي هذي حساسية من المواد الكيمياوية @@ قلت لكن طول عمري استخدمه عادي اشمعنى هالمره؟ قال مو شرط عادي لو تتحسس منها بعدين .. سألني اذا في مشكلة بالحلق والتنفس قلت لأ فقط حرقان واحمرار مع حكة .. وصف لي إبرتين وحدة بالعضل ووحدة بالوريد ثم أعطاني أدوية حبوب لمدة 5 أيام مع كريم احطه على موضع الحكة والاحمرار.


وحاليا أكتب لكم الموضوع ووجهي أحمر وبشرتي صارت مرعبه وملمسها خشن .. لكن على أمل هالكم يوم ويرد كل شيء طبييعي باذن الله.

انا كانت عندي مواقف بالحساسية من قبل لكن لأحد أبنائي من عين الجمل walnut لكن انا شخصيا أول مرة في حياتي تصير فيني حساسية!

وانتوا شنو قصصكم مع الحساسية وشنو نوعها اذا كان عندكم .. فقط مع وجهي المحترق حبيت اكتب لكم قصتي لول.

 

[abdullah-kh]

كلوركس

ما أطيقه يسبب لي كتمة بالتنفس واصلا الكثير يستخدمه غلط المفروض كمية بسيطة منه

 

[m7tram]

ما أطيقه يسبب لي كتمة بالتنفس واصلا الكثير يستخدمه غلط المفروض كمية بسيطة منه

انا نفسك ما أحب المنظف نفسه ويسبب لي يكتمة .. لكن الوايبز زين وامورة طيبة ونستخدمة من أيام كورونا.

 

[Arashi]

من تخرجت من الجامعه وبديت اعاني من اكزيما عشوائيه.. عشوائيه لان مالها مكان محدد ولا شي معين اتحسس منه، تختفي لفتره طويله ثم ترجع بشكل وتحسس جديد
لكن شي واحد اكيد هو اني ما اقدر استعمل اي صابون لفتره طويله عدا dove اللي مفروض مقاطعه >_>
غسيل اليد لا بأس اقدر استعمل اي شي وحتى صرت اقدر اغسل صحون ما عدت اتحسس من صابون الغسيل
بين الاصابع اليد حاليا في تحسس قوي من ماء الدجاج المسلوق وبعض الصوصات الحمراء حتى لو بدون توابل والربيان والمانجا
الامور طيبه مع الألوان والحيوانات والطيور لله الحمد بس احتياط اغسل يدي بالصابون بعد ما ألعب معاهم

بداية الاكزيما كانت أليمه بدت في وسط كف اليد وكان يصير الجلد حرفيا أسود والحكه لا تطاق ان تقومني من النوم واضطريت كم مره استعمل كريمات بكورتيزون مركز (تحديدا بدت مع فترة اللي كنت أرسم قصص لمنتدى المنتدى وكنت وايد اغسل يدي بصابون لايف بوي التعيس عشان انظف اثر قلم الرصاص >_>)
بعدها اكتشفت حساب وحده تصنع كريم طبيعي في البيت من زبدة الشيا والفيتامينات وصراحه مب بس ريحني... حتى عالج الاكزيما نهائيا مكان ما طلعت .. لهالسبب الاكزيما صارت تختفي وترجع في اماكن مختلفه .. مثلا لما ترجع لكف اليد ترجع بين الاصابع او الخلف مب وسط الكف نفس البدايه، ولا احتاج اهتم بالترطيب بشكل يومي عادي أقطع الترطيب لين تظهر الاكزيما مره ثانيه وبس ارطب المكان كم يوم وتختفي وهكذا. فلما ترجع صارت ترجع خفيفه جدا. كذلك النوم المنتظم والرياضه وايد يلعبون دور (اتوقع مع كل انواع الحساسيه).

شي اخر مهم هو شرب الماء... لما اهمل الماي لدرجة يصيدني جفاف حاد هني الاكزيما ترجع تاخذ طله.
الحمدلله اهم شي ما تظهر عالوجه لأن اهم شي عندنا الوجه

وحاليا أكتب لكم الموضوع ووجهي أحمر وبشرتي صارت مرعبه وملمسها خشن .. لكن على أمل هالكم يوم ويرد كل شيء طبييعي باذن الله.

الله يشفيك... من تجارب البعض عرفت ان معظم الحساسيات تختفي باتباع نظام مناسب سواءا بترك اشياء معينه لفتره او عمل اشياء تخلصك من الحساسيه
عندي صديقه اضطرت تصير نباتيه لأن معدتها تحسست بشكل قوي من اللحوم. تقريبا مدة 3 سنوات.. بعدها بدت ترجع بالتدريج ابتداءا من الدجاج وتقول امورها طيبه ^^

 

[Abdulrahman1]

انا جتني اكزيما قبل ثلاث سنين اكلت يدي
السبب باختصار شديد هو الصابونات الموجودة في السوق
في نوعين مناسبة للاكزيما اللي هو سيباميد و QV والحمدلله اختفت وحتى رجعت للصابونات العادية والامور طيبة

 

[سِراج]

عدا dove اللي مفروض مقاطعه >_>

👏

 

[Jasmine]

سلامات يا رب

أنا عندي حساسية جلدية بسيطة سببها مجهول، فجأة يدي أو ذراعي تصير تحكني ولو ما قاومت وحكيتها يزداد الاحمرار وتظهر حبوب صغيرة، وفجأة تختفي مثل ما تظهر ولا كأنها كانت، بدأت من ٢٠٢٠ للآن.

الحساسية الثانية (الأقوى والأسوء) هي حساسية الشعب الهوائية، فبعد أي زكام أو رشح خفيف أو قوي، يصيبني سعال سيئ وحاد، لن يخففه إلا دواء للحساسية الصدرية.
السعال شائع بعد الزكام لكنه خفيف ولبضعة أيام، أما في حالتي وقبل التشخيص كان ممكن يستمر لشهر مع تحسن بطيء جدًا، حتى مع دواء خاص للسعال.

 

[سِراج]

سلامات وطهور بإذن الله.

 

[Zorro]

وحاليا أكتب لكم الموضوع ووجهي أحمر وبشرتي صارت مرعبه وملمسها خشن .. لكن على أمل هالكم يوم ويرد كل شيء طبييعي باذن الله.

ماتشوف شر و كذلك باقي الإخوان والأخوات

اللي عندي اسمها (ارتيكاريا) واللي هي اشكال وألوان واظنها منتشرة عند غالبية الناس بكثرة ، اكتشفتها قبل سنة ونص من بعد معاناة 3 سنين تقريبا ، حساسية عجيبة ما كنت ألقي لها بال واطنشها بحكم الدوام والانشغال، أي واحد يضرب أو يخبط يدي أو ذراعي أو بأي مكان بجسمي تحمر وتطلع حبوب و تبدأ الحكة خلال دقايق ، الحبوب تكون ظاهرة لربع ساعة او اقل وبعدين تختفي الا الحكة تستمر لمدة طويلة ، تعال شوفني لما اخلص مزح مع بنتي أو مع الصغار ، وياسلام لو يجي صاحبي أو قريب لي كبير سن لما يخبط ذراعي على سبيل المزاح ولا العتاب ، ياربي ، اشيل همها لا تجيني ، وأي كيس ثقيل اشيله تجيني حكة في باطن الكف مباشرة ، غير الحكة اليومية في في مناطق عشوائية ومتفرقة بالجسم و إن تركزت اكثر باليد و الذراع ، ودايما من بعد العشاء تبدا تجيني بحسب مزاجها ..
اكتب لك و حكة اليوم ماسكة في راسي
على بساطة نوع الحساسية عندي لكنها معاناة وعذاب ..

الله يشافي الجميع..

 

[m7tram]

من تخرجت من الجامعه وبديت اعاني من اكزيما عشوائيه.. عشوائيه لان مالها مكان محدد ولا شي معين اتحسس منه، تختفي لفتره طويله ثم ترجع بشكل وتحسس جديد
لكن شي واحد اكيد هو اني ما اقدر استعمل اي صابون لفتره طويله عدا dove اللي مفروض مقاطعه >_>
غسيل اليد لا بأس اقدر استعمل اي شي وحتى صرت اقدر اغسل صحون ما عدت اتحسس من صابون الغسيل
بين الاصابع اليد حاليا في تحسس قوي من ماء الدجاج المسلوق وبعض الصوصات الحمراء حتى لو بدون توابل والربيان والمانجا
الامور طيبه مع الألوان والحيوانات والطيور لله الحمد بس احتياط اغسل يدي بالصابون بعد ما ألعب معاهم

بداية الاكزيما كانت أليمه بدت في وسط كف اليد وكان يصير الجلد حرفيا أسود والحكه لا تطاق ان تقومني من النوم واضطريت كم مره استعمل كريمات بكورتيزون مركز (تحديدا بدت مع فترة اللي كنت أرسم قصص لمنتدى المنتدى وكنت وايد اغسل يدي بصابون لايف بوي التعيس عشان انظف اثر قلم الرصاص >_>)
بعدها اكتشفت حساب وحده تصنع كريم طبيعي في البيت من زبدة الشيا والفيتامينات وصراحه مب بس ريحني... حتى عالج الاكزيما نهائيا مكان ما طلعت .. لهالسبب الاكزيما صارت تختفي وترجع في اماكن مختلفه .. مثلا لما ترجع لكف اليد ترجع بين الاصابع او الخلف مب وسط الكف نفس البدايه، ولا احتاج اهتم بالترطيب بشكل يومي عادي أقطع الترطيب لين تظهر الاكزيما مره ثانيه وبس ارطب المكان كم يوم وتختفي وهكذا. فلما ترجع صارت ترجع خفيفه جدا. كذلك النوم المنتظم والرياضه وايد يلعبون دور (اتوقع مع كل انواع الحساسيه).

شي اخر مهم هو شرب الماء... لما اهمل الماي لدرجة يصيدني جفاف حاد هني الاكزيما ترجع تاخذ طله.
الحمدلله اهم شي ما تظهر عالوجه لأن اهم شي عندنا الوجه


الله يشفيك... من تجارب البعض عرفت ان معظم الحساسيات تختفي باتباع نظام مناسب سواءا بترك اشياء معينه لفتره او عمل اشياء تخلصك من الحساسيه
عندي صديقه اضطرت تصير نباتيه لأن معدتها تحسست بشكل قوي من اللحوم. تقريبا مدة 3 سنوات.. بعدها بدت ترجع بالتدريج ابتداءا من الدجاج وتقول امورها طيبه ^^

الحمدلله قدرتي تتأقلمين معاها وشبه راحت.

انا جتني اكزيما قبل ثلاث سنين اكلت يدي
السبب باختصار شديد هو الصابونات الموجودة في السوق
في نوعين مناسبة للاكزيما اللي هو سيباميد و QV والحمدلله اختفت وحتى رجعت للصابونات العادية والامور طيبة

الحمدلله انها اختفت.

ماتشوف شر و كذلك باقي الإخوان والأخوات

اللي عندي اسمها (ارتيكاريا) واللي هي اشكال وألوان واظنها منتشرة عند غالبية الناس بكثرة ، اكتشفتها قبل سنة ونص من بعد معاناة 3 سنين تقريبا ، حساسية عجيبة ما كنت ألقي لها بال واطنشها بحكم الدوام والانشغال، أي واحد يضرب أو يخبط يدي أو ذراعي أو بأي مكان بجسمي تحمر وتطلع حبوب و تبدأ الحكة خلال دقايق ، الحبوب تكون ظاهرة لربع ساعة او اقل وبعدين تختفي الا الحكة تستمر لمدة طويلة ، تعال شوفني لما اخلص مزح مع بنتي أو مع الصغار ، وياسلام لو يجي صاحبي أو قريب لي كبير سن لما يخبط ذراعي على سبيل المزاح ولا العتاب ، ياربي ، اشيل همها لا تجيني ، وأي كيس ثقيل اشيله تجيني حكة في باطن الكف مباشرة ، غير الحكة اليومية في في مناطق عشوائية ومتفرقة بالجسم و إن تركزت اكثر باليد و الذراع ، ودايما من بعد العشاء تبدا تجيني بحسب مزاجها ..
اكتب لك و حكة اليوم ماسكة في راسي
على بساطة نوع الحساسية عندي لكنها معاناة وعذاب ..

الله يشافي الجميع..

الشر مايجيك.

والله الدكتوره قالت لي اليوم الي عندك ارتيكاريا لكن مايصير فيني الي انت وصفته @@.

الله يشافيك وتروح منك باذن الله.

 

[m7tram]

سلامات يا رب

أنا عندي حساسية جلدية بسيطة سببها مجهول، فجأة يدي أو ذراعي تصير تحكني ولو ما قاومت وحكيتها يزداد الاحمرار وتظهر حبوب صغيرة، وفجأة تختفي مثل ما تظهر ولا كأنها كانت، بدأت من ٢٠٢٠ للآن.

الحساسية الثانية (الأقوى والأسوء) هي حساسية الشعب الهوائية، فبعد أي زكام أو رشح خفيف أو قوي، يصيبني سعال سيئ وحاد، لن يخففه إلا دواء للحساسية الصدرية.
السعال شائع بعد الزكام لكنه خفيف ولبضعة أيام، أما في حالتي وقبل التشخيص كان ممكن يستمر لشهر مع تحسن بطيء جدًا، حتى مع دواء خاص للسعال.

حساسية الشعب الهوائية مشكلتها مشكلة وماهي سهله .. ماعندكم كورسات لعلاج الحساسية ؟ عندنا في الكويت الي عنده مشاكل بالحساسية وتتعلق بالشعب الهوائية يعطونهم كورسات أبر لمدة سنه الى سنتين ومن بعدها تروح وتختفي .. صاحبي أخذ ولله الحمد الحين ووضعه ممتاز.

 

[Eye]

ما تشوف شر يا محترم ، لا باس عليك ان شاء الله

والله توي اعرف انك ممكن تجيك الحساسية على كبر ، فخلنا نقول حاليا مافي حساسية اعرف عنها الحمدلله

وانا صغير كان فيني ربو اي مرض زكام شي على طول ينزل على الرئة ولازم مستشفى وبخار ، تقريبا بشكل موسمي

لما صار عمري ١٥ اختفت

 

[m7tram]

ما تشوف شر يا محترم ، لا باس عليك ان شاء الله

والله توي اعرف انك ممكن تجيك الحساسية على كبر ، فخلنا نقول حاليا مافي حساسية اعرف عنها الحمدلله

وانا صغير كان فيني ربو اي مرض زكام شي على طول ينزل على الرئة ولازم مستشفى وبخار ، تقريبا بشكل موسمي

لما صار عمري ١٥ اختفت

الشر مايجيك .. جزاك الله خير.

سمعت مره من صاحبي الي لما صار عمره تقريبا 20 اكتشف انه عنده حساسية تسبب له ربو .. ولما راح راجع قال لدكتور اني لما كنت صغير ما كان فيني! قاله هي معاك من الولاده لكن لما كبرت قلت مناعتك فصارت تطلع عليك؟! فعاد مادري هل هذا كلام صحيح ولا تفلسف لول.

 

[Jasmine]

ماتشوف شر و كذلك باقي الإخوان والأخوات

اللي عندي اسمها (ارتيكاريا) واللي هي اشكال وألوان واظنها منتشرة عند غالبية الناس بكثرة ، اكتشفتها قبل سنة ونص من بعد معاناة 3 سنين تقريبا ، حساسية عجيبة ما كنت ألقي لها بال واطنشها بحكم الدوام والانشغال، أي واحد يضرب أو يخبط يدي أو ذراعي أو بأي مكان بجسمي تحمر وتطلع حبوب و تبدأ الحكة خلال دقايق ، الحبوب تكون ظاهرة لربع ساعة او اقل وبعدين تختفي الا الحكة تستمر لمدة طويلة ، تعال شوفني لما اخلص مزح مع بنتي أو مع الصغار ، وياسلام لو يجي صاحبي أو قريب لي كبير سن لما يخبط ذراعي على سبيل المزاح ولا العتاب ، ياربي ، اشيل همها لا تجيني ، وأي كيس ثقيل اشيله تجيني حكة في باطن الكف مباشرة ، غير الحكة اليومية في في مناطق عشوائية ومتفرقة بالجسم و إن تركزت اكثر باليد و الذراع ، ودايما من بعد العشاء تبدا تجيني بحسب مزاجها ..
اكتب لك و حكة اليوم ماسكة في راسي
على بساطة نوع الحساسية عندي لكنها معاناة وعذاب ..

الله يشافي الجميع..

تمامًا نفس أعراضي، بس أنا أخف كثير.
طيب ما لها علاج ينهيها؟

حساسية الشعب الهوائية مشكلتها مشكلة وماهي سهله .. ماعندكم كورسات لعلاج الحساسية ؟ عندنا في الكويت الي عنده مشاكل بالحساسية وتتعلق بالشعب الهوائية يعطونهم كورسات أبر لمدة سنه الى سنتين ومن بعدها تروح وتختفي .. صاحبي أخذ ولله الحمد الحين ووضعه ممتاز.

هي تأتي فقط بعد زكام، وما في سبب آخر لها.
كنت أمرض كثير خلال السنة لذلك الموضوع مزعج لكن آخر فترة -حمدًا لله- إصابتي بالزكام خفت كثير فما عانيت من الأمر. لكن لازمني مراجعة الطبيب قريبًا وبسأله عن الإبر إن شاء الله.
شكرًا لك.

 

[DINO CRISIS]

سلامات

ما تشوف شر يا غالي ان شاء الله

الله يعافيك ويسلمك يارب العالمين

حساسية

ما أعرف إذا هي حساسيه أو لا

رحت أطباء كثير الطفش ولا حد عرف لي دواء

كنت اشطف حوش بيتنا قبل سنوات عديدة ووالدي يومها الله يهديه
أصر يحط دواء صراصير قوي ممكن يقتل حتى الافاعي أو الفئران والعقارب أيضاً...

بعدها صار عندي حكة واحمرار في القدمين لكن الحكة الاحمرار اختفت بسرعة ثاني او ثالث يوم لهذا قلت الموضوع عادي لكن تحول بعدها بفترة لون الجلد من الأحمر إلى بقع بنية متفرقة...

البقع البنية كانت ترتفع بإستمرار حتى لليوم وصلت لفوق السرة

المهم أنا اهملت الموضوع ونسيته وبعدها بسنة أو أكثر رحت للمستشفى وقلت نشوف طبيب الجلدية
فما عرف إيش المشكلة
فقال لي :
نأخذ خزعة
أخذ خزعة وراجعته قال كل شي طبيعي
في الجلد
فقال لي اهتم بالأكل والرياضة واعطاني حمية للدم
وكريمات تخفف الحكة والاحمرار

ولليوم تجيني حكة لكن بدون إحمرار

والحمدلله على كل حال

 

[m7tram]

سلامات

ما تشوف شر يا غالي ان شاء الله

الله يعافيك ويسلمك يارب العالمين

حساسية

ما أعرف إذا هي حساسيه أو لا

رحت أطباء كثير الطفش ولا حد عرف لي دواء

كنت اشطف حوش بيتنا قبل سنوات عديدة ووالدي يومها الله يهديه
أصر يحط دواء صراصير قوي ممكن يقتل حتى الافاعي أو الفئران والعقارب أيضاً...

بعدها صار عندي حكة واحمرار في القدمين لكن الحكة الاحمرار اختفت بسرعة ثاني او ثالث يوم لهذا قلت الموضوع عادي لكن تحول بعدها بفترة لون الجلد من الأحمر إلى بقع بنية متفرقة...

البقع البنية كانت ترتفع بإستمرار حتى لليوم وصلت لفوق السرة

المهم أنا اهملت الموضوع ونسيته وبعدها بسنة أو أكثر رحت للمستشفى وقلت نشوف طبيب الجلدية
فما عرف إيش المشكلة
فقال لي :
نأخذ خزعة
أخذ خزعة وراجعته قال كل شي طبيعي
في الجلد
فقال لي اهتم بالأكل والرياضة واعطاني حمية للدم
وكريمات تخفف الحكة والاحمرار

ولليوم تجيني حكة لكن بدون إحمرار

والحمدلله على كل حال

الشر مايجيك والله يسلمك.

مافيك الا العافية ان شاءالله .. لكن لا تهملها ورد راجع مره اخرى اذا فضيت.

 

[Hugo]

انا اول كنت اظن الحساسية تكون من الولادة مثل الحليب والفوليات والجلوتين لكن اكتشفت بأنها مرات قد تصيبك وانت في عمر متقدم مع الوقت، ما اقدر اتخيل حياتي بدون حليب او كربوهيدرات مثل الخبز والعيش 🥲

 

[Phantasm]

لا توجد لدي حساسيات من هذا النوع لكن الوالد رحمة الله عليه كان عنده حساسية شديدة من الجمبري والجوافة.

 

[النسر الأسود]

عليك العافية فيصل ما تشوف شر إن شاء الله.

شخصياً ما كنت أعاني من أي حساسية في الصغر، لكن بعد السفر إلى دولة جديد من عدة سنوات بدأت عندي حساسية اتجاه بعض أنواع الأشجار.
الوضع ازداد سوءاً مع الوقت والأعراض أصبحت أشد وحتى صار عندي ربو تحسسي في فترة من الفترات. بعدها بدأت مرحلة العلاج بأخذ أدوية مناعية والوضع أصبح أفضل الحمد لله.

 

[prince khalid]

شافاك الله. طهور بإذنه.

قد تكون عندي حساسية لكن لا توجد للأسف اختبارات تحسس على مقربة، أحصل على حالة حكّة واحمرار في الأعين من نوعٍ محدد من الشموع المعطرة، لكن الأعراض ليست خطيرة ولا مستمرة، فالطبيب أخبرني أنها حتى الآن تهيج لكن يمكن أن تبني حالة تحسس لو أطلت التعرض.

في مواسم انتشار حبوب اللقاح البيئة التي أعيش فيها فلاحية ودائما ألتقط بعض الأعراض لكنها خفيفة، فعلى ما يبدو في طريق بناء حساسية جديدة والله الحافظ @@

شافاكم الله جميعًا.

والله توي اعرف انك ممكن تجيك الحساسية على كبر ، فخلنا نقول حاليا مافي حساسية اعرف عنها الحمدلله

الحساسية نوع من ردود الفعل المُبالغة من الجهاز المناعي، تحتاج للتعرض لمُسبب الحساسية حتّى تحصل على رد الفعل هذا، الفرق فقط أن بسبب الجينات ومؤثرات أخرى، عدد مرات التعرض تبني الحساسية وردة الفعل، فالجميع مُعرض للحساسية، بدرجات متفاوتة.

من الحساسيات الشائعة حاليا حساسية حبوب اللقاح، ستجد أنه بسبب طول مدة انتشار حبوب اللقاح في الجو بدأت الحساسية ترتفع، لأنّ عدد مرات التعرض وطول الفترة يُسرع العملية والمزيد من الأشخاص الذين يتأثرون بها.

 

[Unknown]

صديقي .. لو ياكل حبة لوز, على طول اسعاف لدرجه ممكن يموت!
دايم نعاني اذا طلعنا مطعم نسألهم اكلكم فيه لوز او كاجو ويتمقلب

عن نفسي عندي حساسية بالخدود حفيفه كل اسبوع لازم يجيك يوم محمره تقول طالع من مضاربه وكفوف لول
جلست لي 20 سنه على fucidin و fucicort كانت متعبه كريحه ولزوجه + كورتيزون .. لين استقريت على elidel

 

[Zorro]

طيب ما لها علاج ينهيها؟

علاج ينهي الحساسية ما اتوقع فيه ، نوعية اكلنا وشربنا و استخدامنا للمنظفات زي الصابون والشامبوهات من صغرنا أكيد بيأثر على جهاز المناعة بشكل متفاوت من شخص لآخر ، فيه اللي تظهر عليه بدري و فيه اللي يتاخر تنتظر المحفز عشان تظهر
انا نفع معي حبوب مضادات الهستامين ، كانت تخفف من الاعراض ، ولما تخلص الحبوب كنت استخدم اي علاج حق
كحة (يكون فيها مضاد هستامين) ..
المهم لازم تفحصي مع اخصائي جلدية او طبيب مختص بالحساسية افضل ..
وقدامك العافية ان شا الله..

 

[m7tram]

انا اول كنت اظن الحساسية تكون من الولادة مثل الحليب والفوليات والجلوتين لكن اكتشفت بأنها مرات قد تصيبك وانت في عمر متقدم مع الوقت، ما اقدر اتخيل حياتي بدون حليب او كربوهيدرات مثل الخبز والعيش 🥲

أعتقد هالامور ما يجيك منها حساسية مع الوقت.

لا توجد لدي حساسيات من هذا النوع لكن الوالد رحمة الله عليه كان عنده حساسية شديدة من الجمبري والجوافة.

الله يشفيه وتحرصوا .. أكره ماعندي حساسيات الأكل مرعبة.

عليك العافية فيصل ما تشوف شر إن شاء الله.

شخصياً ما كنت أعاني من أي حساسية في الصغر، لكن بعد السفر إلى دولة جديد من عدة سنوات بدأت عندي حساسية اتجاه بعض أنواع الأشجار.
الوضع ازداد سوءاً مع الوقت والأعراض أصبحت أشد وحتى صار عندي ربو تحسسي في فترة من الفترات. بعدها بدأت مرحلة العلاج بأخذ أدوية مناعية والوضع أصبح أفضل الحمد لله.

الله يعافيك حبيبنا مؤيد ومايجيك الشر .. والحمدلله على سلامتك.

شافاك الله. طهور بإذنه.

قد تكون عندي حساسية لكن لا توجد للأسف اختبارات تحسس على مقربة، أحصل على حالة حكّة واحمرار في الأعين من نوعٍ محدد من الشموع المعطرة، لكن الأعراض ليست خطيرة ولا مستمرة، فالطبيب أخبرني أنها حتى الآن تهيج لكن يمكن أن تبني حالة تحسس لو أطلت التعرض.

في مواسم انتشار حبوب اللقاح البيئة التي أعيش فيها فلاحية ودائما ألتقط بعض الأعراض لكنها خفيفة، فعلى ما يبدو في طريق بناء حساسية جديدة والله الحافظ @@

شافاكم الله جميعًا.


الحساسية نوع من ردود الفعل المُبالغة من الجهاز المناعي، تحتاج للتعرض لمُسبب الحساسية حتّى تحصل على رد الفعل هذا، الفرق فقط أن بسبب الجينات ومؤثرات أخرى، عدد مرات التعرض تبني الحساسية وردة الفعل، فالجميع مُعرض للحساسية، بدرجات متفاوتة.

من الحساسيات الشائعة حاليا حساسية حبوب اللقاح، ستجد أنه بسبب طول مدة انتشار حبوب اللقاح في الجو بدأت الحساسية ترتفع، لأنّ عدد مرات التعرض وطول الفترة يُسرع العملية والمزيد من الأشخاص الذين يتأثرون بها.

جزاك الله خير .. وانتبه وتحرص من الحساسية ولا تتساهل معاه.

صديقي .. لو ياكل حبة لوز, على طول اسعاف لدرجه ممكن يموت!
دايم نعاني اذا طلعنا مطعم نسألهم اكلكم فيه لوز او كاجو ويتمقلب

عن نفسي عندي حساسية بالخدود حفيفه كل اسبوع لازم يجيك يوم محمره تقول طالع من مضاربه وكفوف لول
جلست لي 20 سنه على fucidin و fucicort كانت متعبه كريحه ولزوجه + كورتيزون .. لين استقريت على elidel

أكثر انواع الفوبيا .. فوبيا حساسية الأكل .. ولدي فيه حساسية من جوز عين الجمل .. فصرت أوسوس لما ناكل باي مكان بذات بالسفر .. وحتى طلع عنده حساسية من المكسرات بشكل عام لكن الحمدلله حساسية خفيفة الي يشرب زيرتك واموره تمام.

وبخصوص حساسية الخدود الي عندك ماعرفت شنو سببها؟ يعني شنو الي يهيجها؟

 

[Unknown]

وبخصوص حساسية الخدود الي عندك ماعرفت شنو سببها؟ يعني شنو الي يهيجها؟

25 سنه مو عارف .. ولا دكتور صاد المشكله, هو للامانه هي خفيفه ماتنشاف الا اذا جبت صورتين لي جنب بعض ممكن تلاحظ
يعني لو اطلع مع شباب محد ملاحظ .. مع الوقت والسنين طنشت الموضوع واذا جت احط كريم بعد الدش وانام والصبح تختفي

يعني لو بحدد شي من واقع خبره .. بقول تغير الجو المفاجئ من بارد الى حار و الغبار عامل
مثلا جالس بغرفتي البارده .. اروح 10د للمستودع (حراره + غبار) اليوم الثاني تتهيج علي

 

[Jasmine]

عن نفسي عندي حساسية بالخدود حفيفه كل اسبوع لازم يجيك يوم محمره تقول طالع من مضاربه وكفوف لول
جلست لي 20 سنه على fucidin و fucicort كانت متعبه كريحه ولزوجه + كورتيزون .. لين استقريت على elidel

في الحالة الطبيعية، هل عندك احمرار بسيط دائم في وجهك خاصة الخدود؟
ممكن تكون وردية (Rosacea) مش حساسية.

 

[Unknown]

في الحالة الطبيعية، هل عندك احمرار بسيط دائم في وجهك خاصة الخدود؟
ممكن تكون وردية (Rosacea) مش حساسية.

الحاله الطبيعيه لا, مو Rosacea من الصور ببحث قوقل شي فضيع! .. لا خشونه ولا تضاريس ولا حبوب عندي
هي اشبه لما اركض بمكان حار والخدود تحمّر طبيعي .. هذا الي يجيني بدون جهد, بالاسبوع او 10 ايام مره

 

[Jasmine]

الحاله الطبيعيه لا, مو Rosacea من الصور ببحث قوقل شي فضيع! .. لا خشونه ولا تضاريس ولا حبوب عندي
هي اشبه لما اركض بمكان حار والخدود تحمّر طبيعي .. هذا الي يجيني بدون جهد, بالاسبوع او 10 ايام مره

الصور على الإنترنت لحالات شديدة.
أنا عندي Rosacea من الطفولة، عبارة عن احمرار دائم في الخدين فقط، يزداد عند الجهد أو الانفعال، وبالحر، وبفعل بعض الأطعمة (الحارة مثلًا).
اللي يصيبك إذن حالات تهيج.
أشبه بحرارة ووخز في الخدين مع ألم؟

 

[Unknown]

لا الم ولا حراره ولا وخز


بديت اوسوس ..خلاص قفلوا السالفه

 

[Jasmine]

لا الم ولا حراره ولا وخز


بديت اوسوس ..خلاص قفلوا السالفه

لا توسوس ولا شيء، أنا فقط حبيت أفيدك من تجربتي.

عمومًا نصيحة لو ما تستخدم واقي شمس قبل الخروج فهذا لازم، ولو تريد الاستزادة استخدم كريم مرطب للوجه لو قبل النوم، بفرق معك بإذن الله.

 

[Bill Cober]

أحيانا تجيني حساسية من الحليب

اليوم الصباح كنت أشرب شاي بالحليب فجأة جاتني كحة قوية وما قدرت أخلصه