شاهدت المقطع و اللي أشوفه انه صاحبه يبالغ بشكل كبير في المشاكل اللي تحصل للاعب البي سي ، هذا غير كمية المعلومات المغلوطة اللي ذكرها صاحب المقطع بخصوص الدرايفرات و غيره ، عنوان المقطع يعطيني انطباع انه كونسول فانبوي عنده مشكلة شخصية مع منصة البي سي و لاعبيه و يبدو حصل نقاش بينه و بين لاعب بي سي و حب يفش غله ، لو تدخل على قناته كل المحتوى اللي فيها مخصص للكونسول و أخباره و انطباعاته و العابه ، هذا المقطع هو الوحيد اتوقع اللي يتحدث فيه عن منصة البي سي و ياليته موضوعي كله انتقادات لمجرد الانتقاد و ما يخليني آخذه على محمل الجد ، بمعنى مجرد ترولة.
ما أزيد على كلام أخوي
@hussien-11 اللي ذكر ايجابيات منصة البي سي ، لكن منصة البي سي او هاردوير البي سي ما هو هاردوير واحد او له شكل واحد ، كل شخص راح تجده يمتلك هاردوير مختلف حسب احتياجاته و حسب ميزانيته ، كذلك البي سي ما هو فقط جهاز العاب بحت ، جهاز مثل السكينة السويسرية متعدد الاستخدامات ، يوفرلك أبسط الوظائف مثل تصفح الانترنت الى أثقلها في تعديل الصور و الفيديو و غيره ، كل ما تدفع أكثر راح تحصل تجربة أفضل و أكثر سلاسة و فخمة أكثر بكل تأكيد ، مسألة انك معجب بمنصة ثانية هذا يدخل ضمن الاختيار الشخصي اللي يريحك لكن انك تقول للاعبين خلوكم من هالمنصة و يالله تعالوا معاي للمنصة هذي ، أنا أعتبرها مصادرة للحرية في الاختيار.
على المستوى الشخصي و التاريخي كنت ألعب على جميع المنصات ، في كل جيل لازم يكون عندي جهاز بي سي و أجهزة كونسول ، لكن بدايةً من 2011 انتقلت بشكل شبه كامل و حصري للبي سي ، آخر جهاز كونسول اشتريته كان البلايستيشن 4 وقت اصداره و جلس عندي اقل من اسبوع و بعته ، بعدها ما قمت العب الا على البي سي ، في 2016 عملت أبجريد شامل للجهاز ، أغلب القطع اللي فيه موجودة الى الآن ، المعالج هو نفسه و لوحة الأم و الرامات ووسائط التخزين ، في 2018 عملت أبجريد للبطاقة فقط لأني كنت محتاج هورس باور زيادة حتى أقدر اشغل الألعاب على شاشة الألتراوايد الجديدة اللي اشتريتها في بداية 2019 ، تجربتي بعد الانتقال بشكل حصري على المنصة ذكرتها أكثر من مرة ، تجربة ممتازة و ايجابية و ما ندمت في يوم واحد على اتخاذ هذا القرار ، بالعكس زاد حبي و عشقي للمنصة بعد اقتناء شاشة الالتراوايد لأنها تجربة جديدة و مختلفة علي و Worth it و ما هي متوفرة على أي منصة ثانية.
بنيت مكتبة العاب كبيرة على ستيم و مع الوقت راح تكبر أكثر و أكثر ، وقت انتقالي للمنصة بشكل حصري كان وقت ممتاز جداً بسبب ان الدعم الآن للمنصة اصبح كبير ، كل ما لذ و طاب تحصله هناك ، تبي العاب غربية بكل الجنرات موجودة ، تبي العاب يابانية بكل الجنرات كذلك موجودة ، حتى ان المنصة تستلم العاب يابانية ، الاكسبوكس من قريب استلمها ، صحيح ان رسوم الدخول عالية شوية لكن اللي بعده هين و مريح ، اسعار الالعاب رخيصة جداً ،
@msfm مثلاً يشتري العاب من متجر ستيم الروسي برخص التراب و تعتبر سرقة ، وجود خدمات مثل الجيم باس ، متجر ايبيك و لو اني ما احبه لكنه يوفر لك العاب مجانية طول السنة و العاب لها وزنها ، المتاجر الثانية كذلك تقدم لك خدمات طيبة مثل متجر GOG اللي يوفر لك العاب كلاسيكية بأسعار رخيصة و بدون DRM ، نقطة ايجابية لمنصة البي سي قليل من الناس يذكرها هي سياسة استرجاع الأموال او Refund جداً آمنة و سلسة و خدمة العملاء شغالة على الدوام و مريحة ، متجر GOG حتى يقدم لك حق استرجاع اموال خلال 30 يوم لثقته الكبيرة باللاعبين ، الاونلاين المجاني هذي نقطة مهمة جداً ، لا وجود لاشتراكات جولد و لا بلس او شي مشابه لهم لأنك ما تحتاجهم ، شخصياً أعتبرها سرقة لأموال الناس بحجة ان و الله نقدم لك خدمات و خصومات و غيره و ان السيرفرات تكلفنا بينما الحجة هذي ما نشاهدها على منصة البي سي ، تسجيل حساب في أي منصة مجاني و ما تدفع رسوم عليه و تجربتك هي نفسها تجربة غيرك من لاعبين البي سي بدون تغيير.
العاب ميكروسوفت الطرف الأول كلها راح تجي للمنصة و من أول يوم هذا الشي يغنيني شخصياً اني اروح و آخذ لي جهاز اكسبوكس ، بالنسبة لسوني و البلايستيشن كذلك هناك بوادر بدايتها مع هورايزون ان العابهم كذلك قادمة للمنصة و لو اني مو معجب بغالبية العابهم ما عدا يمكن GoW لكن هل اللعبة هذي تخليني اروح لأقرب متجر الكترونيات و اخذلي جهاز بلايستيشن؟ بالتأكيد لا ، هي منصة حيادية ما تدخل في الصراع اللي حاصل بين أجهزة الكونسول و عشاقهم ، و ما تدري ممكن مستقبلاً نشوف تواجد ننتندو كذلك و لو اني ما أحب العابهم و توجههم ما هو مناسب لذوقي الشخصي.
بالنهاية هي تدخل في الاختيار الشخصي ، لكن صاحب المقطع مجرد ترول و عنده مشكلة شخصية مع البي سي و لاعبينه على ما يبدو ، و ما كان حيادي او موضوعي في طرحه.
.. أنا مايهمني الجرافكس والمواصفات التقنية يهمني ألعب وأنا مستمتع من غير صداع راس
