ممنوع دخول غير الشيّاب فقط (35+)

[Unknown]

من كم ساعه شفت موضوع له فوق 10 سنين و ردودي الكثيره بموضوع FFXIII لما كنت اكثر حيويه ونشاط لول
فطرأ ببالي شي من فتره افكر فيه .. اصبغ شعري؟ قلت خلني اكتب موضوع هنا بما انني اشوف الشباب
الي هنا اعرف كم واحد هنا بعمري او فيهم شيب .. Dro اتذكر علق على موضوع الشيب معي من فتره
واعرف ان Veeto بعمري او اكبر بكم سنه لول .. مدري عن البقيه اغلبهم مجهولي الهويه وما احتك معهم

احس الموضوع شطح كذا هههه .. لكن سؤالي الاساسي هل تصبغوا الشيب؟ افضل صبغه لشعر والدقن؟
سابقا صبغت كنت اخذ حق الوالده خخخ لكن تركته لين كثر الشيب .. كل الي حولي رافضين اصبغ وبشده
قلت احط الامور عند ناس ماتعرفني افضل .. للامانه كنت بحط الموضوع بـresetera لكن عقلياتهم لك عليها​

 

[dro]

Dro اتذكر علق على موضوع الشيب معي من فتره

و أنا اقول ليش الشيب انفجر عندي (&)

قبل 20 سنه مصورها على اني جن كزاما خخخ وكنت بحطها بمنتدى المنتدى زمان ايام الهبال
وبخاطري من ذاك الوقت ما اتذكر ليش ترددت فيها خفت تكون اوفر او استحيت .. الان حساسية المراهقه راحت وحاب اكشف الصوره وافتك لول

الصورة يمين حسبتك جوني ديب و الصورة اليسار الشاهد الي جاء لمحاكمته (&) :




هههه وصلنا 2022 و للحين اطقطق على صورك معليش

لكن سؤالي الاساسي هل تصبغوا الشيب؟ افضل صبغه لشعر والدقن؟

الجيل القديم كنت ملاحظ انهم كانوا يصبغوا.. ابوي مع انه كان كبير بالعمر كان دائما يصبغ لكن في اخر سنينه صار ما يصبغ و اتوقع أنت ملاحظ بعد اما الشباب فالترند الحالي اتوقع انهم يميلوا للشيب و عموما الذكور ما يحتاجوا عملية تجميل ليصغروا عمرهم.. احلق اللحية و اصبغ.. هوبا صغرت 20 سنة (&)

 

[Unknown]

و أنا اقول ليش الشيب انفجر عندي (&)

انفجر؟ .. استعد لما هو قادم .. ماشفت شي
يعني ماجربت تصبغ للان؟ او مطنش ومو ببالك؟

الصورة يمين حسبتك جوني ديب و الصورة اليسار الشاهد الي جاء لمحاكمته (&) :
هههه وصلنا 2022 و للحين اطقطق على صورك معليش

شي لابد منه ههههههه عشان كذا الصور هبله

الجيل القديم كنت ملاحظ انهم كانوا يصبغوا.. ابوي مع انه كان كبير بالعمر كان دائما يصبغ عدا لكن في اخر سنينه صار ما يصبغ و اتوقع أنت ملاحظ بعد اما الشباب فالترند الحالي اتوقع انهم يميلوا للشيب و عموما الذكور ما يحتاجوا عملية تجميل ليصغروا عمرهم.. احلق اللحية و اصبغ.. هوبا صغرت 20 سنة (&)

ابوي للان يصبغ شعر ودقن .. صحيح ملاحظ جيلنا مطنش الا نادرا

 

[dro]

يعني ماجربت تصبغ للان؟ او مطنش ومو ببالك؟

مو كثير لدرجة اني اصبغ الحمدلله (&)

ابوي للان يصبغ شعر ودقن .. صحيح ملاحظ جيلنا مطنش الا نادرا

و الجيل الشيّاب المتدينين الي قبل الله يرحمهم كانوا يستخدمون الحنّة (&) لكن ما عدت اشوفها الحين زي قبل نادر و إذا شفتها يكونون شيّاب باكستانيين او هنود.. جيلنا مطنش لأنه يظن هالشكل يجذب الجنس الناعم

 

[DINO CRISIS]

الذكريات جميلة

صورتك الي على اليمين تشبه جن كازما فعلاً

وينك ايام مسابقات الكوسبلاي في ال 2013 وما بعدها؟

الصورة الثانية انت تشبه شخصية ثانية لكن نسيت اسمها...

 

[Unknown]

و الجيل الشيّاب المتدينين الي قبل الله يرحمهم كانوا يصبغون لحاهم باللون الأحمر.. ما عدت اشوفها الحين زي قبل نادر و إذا شفتها يكونون شيّاب باكستانيين او هنود.. جيلنا مطنش لأنه يظن هالشكل يجذب الجنس الناعم

لا وين احمر ههه .. ابوي مثلا بالحلاق يصبغ شعر والسكسوكه وواضح صبغه ابو كلب .. سوداء بشكل مو طبيعي
انا لما اخذت حقت امي وتوهقت كنت مفكر نفس لون الشعر الطبيعي لكن طلعوا معقدين لها ارقام لكل لون ولخبطه ومو فاهمها
لما صبغت كنت تمام لين وقت نشف وطلعت بالشمس .. طلع اللون بني بزياده قلبت للغه الايطاليه بالبيت "ماعرف الا السب حقهم"

وينك ايام مسابقات الكوسبلاي في ال 2013 وما بعدها؟

اذا بمطعم اكل وشخص يناظرني مشبه علي .. اقعد اتلخبط .. تبيني كوسبلاي انا كليا مالي بهالامور ابد ههههه

 

[MD3]

كانوا يصبغون لحاهم باللون الأحمر

اعقب!! هذه الحنّة ولونها حسب الخلطة وإذا خفت احمرت واصفرت حسب بياض الشعر. أجل يصبغون لون أحمر ها.

 

[dro]

اعقب!! هذه الحنّة ولونها حسب الخلطة وإذا خفت احمرت واصفرت حسب بياض الشعر. أجل يصبغون لون أحمر ها.

هههه النتيجة واحدة (&) كنت حاس تبي تقتبس ردي

 

[MD3]

هههه النتيجة واحدة (&) كنت حاس تبي تقتبس ردي

تخيّر لك وحدة بس امحطها في ظهرك لين أصبغة لك لون أحمر كاروهات!!

 

[Hugo]

بدأ يظهرلي شويه شعرات على اطراف رأسي شهباء، وما زلت في العشرينات

الشيب وقار بس بشكل العام الصغار في السن يحسون بالتوتر اذا شافوا شعرة بيضاء ويفكرون بازالتها او صبغها علشان يستمتعون بشبابهم (&)

كانوا يصبغون لحاهم باللون الأحمر

 

[dro]

تخيّر لك وحدة بس امحطها في ظهرك لين أصبغة لك لون أحمر كاروهات!!

اعترف اني جبت العيد

 

[Unknown]

نحطها للفائده .. الاكثر ريفيوز بامازون (مافيه ميتاكرتك؟ ) #صبغة_الجيل
شعر
دقن

الشيب وقار بس بشكل العام الصغار في السن يحسون بالتوتر اذا شافوا شعرة بيضاء ويفكرون بازالتها او صبغها علشان يستمتعون بشبابهم (&)

صحيح بالبدايه كنت بحالة هلع لكن مع الوقت صار عادي ثم عدم اهتمام

 

[Kain]

عندي شيب خصوصا من الجهة الامامية و في زيادة

ما يهمني الموضوع كثير اشوف الناس معطية الموضوع اكبر من حجمه كانه الشعر الابيض عيب

+ اغلب الي اشوفهم يضبغون طالعه مظهر الصبع كأنه صبغ الاحذية لون اسود قاتم و ما متناسب خصوصا الشياب الي يسوونا شكلهم يفشل صراحة

 

[Black Wolf]

االشيب وقار ......

 

[Kain]

االشيب وقار ......

 

[Veeto]

ما اصبغ ولا احب الفكرة
بس نصيحتي خصوصا للحية .. ضربوها ليزر
بتوفر عليكم وقت ثمين .. روحة الحلاق

 

[Dark_N11]

الشيب حالياً هو من يجذب الفتيات لا تصبغ

 

[MOSU]

@s3rorh وش رايك بالموضوع ؟

 

[abdullah-kh]

احب اصلع موس فما تظهر لي المشكلة

 

[Hugo]

ما اصبغ ولا احب الفكرة
بس نصيحتي خصوصا للحية .. ضربوها ليزر
بتوفر عليكم وقت ثمين .. روحة الحلاق

مرات الليزر ما ينفع مع بعض الناس، يسويلك عشرين جلسة وما يفيد معاه

 

[ABUALI]

ما أصبغ... خايف على الشعرتين اللي في راسي تطيح، محتفظ بآخر خصلات شعر تبقت فيي ومطولنها علشان أغطي التصحر اللي عندي... تقدر تقول أني حسن مصطفى زماني.
لكن لو أني مثلك ما شاء الله، لا بصبغ، ان شاء الله يفيدونك شيابنا المشعرين.
أفكر أصبغ اللحية تطلع أرتب على الوجه، لكن الصبغات تخوف من ناحية إنها تحتوي على مواد تطير صبغة الشعر الأصلية علشان تزيد مبيعاتهم.

المهم، قبل ما ينتشر الشيب لازم هذا

نصيحتي خصوصا للحية .. ضربوها ليزر

غير انها توفر وقتك في كل اسبوع حلاقة، فهي تعطيك مظهر أحلى لما تكبر اللحية دون الشعر الغير مرغوب فيه، وتخلي لون بشرتك طبيعي مو مخوضرة وتكون أنظف.

 

[Aqua_]

الشيب حالياً هو من يجذب الفتيات لا تصبغ

تقصد خمسيني عنده فلوس

 

[ABUALI]

تقصد خمسيني عنده فلوس

شكري الدمامي

 

[بندول]

مدري عن البقيه اغلبهم مجهولي الهويه وما احتك معهم

أنون يقول عن الناس الثانية مجهولي الهوية

 

[Kain]

أنون يقول عن الناس الثانية مجهولي الهوية

ممكن يقصد ما كاتبين اعمارهم

 

[سِراج]

طالع عندي شيب خفيف في شعري ولحيتي وألاقي تعليقات كثيرة عن كيف إني "شيبت" وما إلى ذلك وشخصيًا لا أهتم ولا أفكر أصبغه أو أخفيه بالحلاقة.

 

[Veeto]

ما أصبغ... خايف على الشعرتين اللي في راسي تطيح، محتفظ بآخر خصلات شعر تبقت فيي ومطولنها علشان أغطي التصحر اللي عندي

عليك ببلاد فارس .. رحت زرعت هناك قبل 5 سنوات النتيجة ممتازة

 

[Kain]

عليك ببلاد فارس .. رحت زرعت هناك قبل 5 سنوات النتيجة ممتازة

اعرف ناس مطيحين هناك كله زراعة شعر و تجميل أنف محد راضي بخشمه *__*

 

[Veeto]

اعرف ناس مطيحين هناك كله زراعة شعر و تجميل أنف محد راضي بخشمه *__*

اي .. حتى هن (( نساء بلاد فارس )) سمعت ان عمليات تجميل الانف عندهم تصل الى 90 %

 

[The Last Lombax]

استلمني الشيب على جوانب رأسي مع شعرة او اثنين في ذقني والصلع من أعلى الرأس...

عن الصبغ لسا صامل وما اظن بصبغ ابدا.

سبويلر: لسا ماوصلت الثلاثين حتى...